Yesus nyolamat Sakius ponahkih pajak
19
Kotihkak Yesus dahpot nuk kota Yeriko, Iyok nyalan turus nyihing kota erih. 2 Nuk kota erih arok icok behtik kopalak ponahkih pajak jok tahto, ngarai ah Sakius. 3 Iyok kanik nohtok iyai Yesus erih, totahpik iyok iyam taꞌai nohtok ah tului ulun dalo karoi nuk anai khavun behtiu ah livek. 4 Mahkak iyok nokoruk noseluk ulun arok khavui ah nuhkat puꞌun harak ahkai ah touk nohtok Yesus jok ahkan nyihing nuk anan. 5 Kotihkak Yesus ahkan nyihing puꞌun harak erih, Iyok nokarak noku diang khavui marak ah: “Sakius, ngimos ah mosuluh tului Ahkuk ahkan kapat nuk lovum muk hondo tuh.”6 Khavun Sakius ngimos ah mosuluh khavui norimak Yesus nuk lovui tahtup kosenang ahtoi ah. 7 Totahpik paring ulun jok nohtok ah erih, ngomumut khavun nuhtui: “Ceh! Iyok tulak noku lohpo ulun jok bodosa!”
8 Kotihkak idoh dahpot nuk lovui ah, Sakius tombok khavui marak ah ahkan Yesus: “Tuhan, soparuk tahkan ponahto kuk ahkan tonongak kuk ahkan ulun malax. Khavun ahkan iyai kiak jok uwas alik tonihpuk kuk, ahkan tonopulik kuk hulik noku iyok lihpet ohpat hinok.”
9 Khavun Yesus marak ahkai ah: “Hondo tuh ihkok khavun paring bari-basak basak muk sonyolamat Hotalak khavun tonongak komolum jok bohuak, kotului ihkok pocayak mbak Iyok, havoi mbak Abraham tahtuk ajuh muk. 10 Kotului Ahkuk, Anak Kolunon lombut ahkan ngurah, khavun nyolamat ulun jok lajat.” a
Tindung duit bulo
(Mat. 25:14-30)
11 Kotihkak idoh nyonih aꞌang erih, ngoravak idoh Hotalak manyo noh momorintah jadik Lacak nuk duniak, tului Yesus uwas donik kanik nyolong noku Yerusalem. Kotului erih Yesus ngesah tindung ihtuh: b 12 “Arok icok behtik ulun tahkan koturun lacak jok tulak noku nogara jok macuk ahkan kongolantik jadik lacak nuk wilayah ah, umbot erih iyok hulik. 13 Sojaham iyok tulak iyok naꞌah sopuluh jihpoi ah, khavui nongak doh ico-icok bikap ah duit bulo. Khavun hiyoi ah ahkan doh: ‘Borahkang noh umbak duit bulo tuh lambak ahkuk tulak.’ 14 Totahpik ulun-ulun nogara erih becik umbak lacak erih. Ulik iyok tulak, idoh nyuhuk pirak behtik uhtusan doh ahkan marak ah ahkan lacak jok paling isung jok tepun evak ahkan ngahtang iyok jadik lacak nuk wilayah erih ahkan ngohavot ah: ‘Ihkai iyam kanik ulun erih jadik lacak kai.’
15 Totahpik koturun lacak erih kongopilik ahkan jadik lacak, khavui ah hulik noku nogara ah. Pohos iyok naꞌah jihpoi ah ahkan tobarung umbak iyok, unuk ngotaꞌan pirak kohuntung jok kongonduon tahkan hasil rahkang doh. 16 Jihpoi jok topahtuk ah marak: ‘Tuan, icok kobikap duit bulo jok tonongak muk ahkak kuk, uwas botambah jadik sopuluh kobikap tahkan hasil kuk borahkang.’ 17 Hiyon ah ahkan jihpoi ah erih: ‘Pios tuꞌuk gavim muk erih, kotului aꞌang jok koik ihkok touk ngorejak ah, ahkuk ahkan nguan ihkok jadik ponguasak nuk isung sopuluh kota.’ 18 Jihpon jok koduok ah lombut khavun nuhtui: ‘Tuan, icok kobikap duit bulo jok tonongak muk ahkak kuk, uwas botambah jadik limok kobikap tahkan hasil kuk borahkang.’ 19 Khavun ahkan jihpon erih lacak marak ah: ‘Ihkok ahkan jadik ponguasak nuk isung limok kota.’ 20 Jihpon jok kotoluk lombut khavun marak ah: ‘Tuh bikap duit bulo tuan, pomukus kuk nuk luvang koromaꞌang kapit longok. 21 Ahkuk mihkoh mbak kok tuan kotului ihkok ulun jok garang, ihkok ngonuk inon jok iyam kok tepui ah, khavun ihkok ngonuk hasil jok iyam kok nonjom ah.’ 22 Lacak erih marak ah: ‘Ihkok jihpon jok jaek! Tumbas havoi mbak inon jok kongohavot muk ahkak kuk, ahkuk ahkan ngohukum ihkok. Ihkok taꞌam ahkuk ulun jok garang. Ahkuk ngonuk inon jok iyam ekuk tepui ah khavun ngonuk hasil jok iyam ahkuk ngomulai ah. 23 Ngindoi koderih ngombai ihkok iyam mosolong ah noku bang, supayak kotihkak ahkuk hulik ahkak norimak ah nahtup bunga ah?’ 24 Khavun lacak erih nuhtui ahkan ulun-ulun jok tombok nuk anai: ‘Ngonuk duit erih tahkan iyok khavun nongak duit erih noku jihpon jok tepun sopuluh kobikap duit bulo erih.’ 25 Totahpik ulun-ulun erih marak ah: ‘Tuan iyok uwas tepun sopuluh kobikap duit bulo.’ 26 Khavun lacak erih mutah ah: ‘Nohouk ah noh, ulun jok ngotiak umbak inon jok tonongak ahkai ah, ahkan tonongak hinok umbak iyok. Totahpik ahkan paring ulun jok iyam sotia ngotiak umbak inon jok tonongak ahkai ah, inon jok honong arok umbak iyok ahkan kongomin. c 27 Khavun huntuh ngonuk ah noh musuh-musuh kuk erih jok ngombelek ahkuk jadik lacak doh. Khavun munuk ah noh idoh nuk husuk kuk!’ ”
Yesus nyolong noku Yerusalem mbak ngandah
(Mat. 21:1-9; Mrk. 11:1-10; Yoh. 12:12-15)
28 Umbot Yesus marak erih ahkan doh, Iyok nyalan nuk husuk idoh noku Yerusalem. 29 Kotihkak uwas dahpot unuk Betpage khavun nuk Betania, nuk puruk jok ngarai ah Jaitun, Iyok nyuhuk duok behtik murit Ah noseluk Iyok. 30 Hiyon Yesus ahkan murit-murit Ah erih: “Tulak noh noku kapung jok nuk husuk muk atuh. Ngindoi ihkam nyolong nuk anai, ihkam ahkan nohtok icok kungan anak keledai buah kahut.
Keledai erih jaham alik tonupang ulun. Molahpas ah noh anak keledai erih khavun ngonuk ah kohtoi. 31 Ngindoi ulun ngisok: ‘Ngombai ihkam molahpas keledai erih?’ Marak ah: ‘Tuhan poduluk keledai ihik.’ ”
32 Khavun duok behtik murit Ah erih tulak khavun tobarung havoi umbak inon jok hiyon Yesus erih. 33 Lambak doh nguhkoi kahut keledai erih, ulun jok tepui keledai erih marak ahkan doh: “Ngombai ihkam molahpas keledai atuh?”
34 Idoh mutah ah: “Tuhan poduluk umbak ah.” 35 Khavun doh ngonuk keledai erih ahkan Yesus. Khavun doh nihkas jubah doh noku isung keledai erih khavun doh ngavat Yesus nuhkat noku isung ah. 36 Lambak Iyok nyihing nahtup nupang keledai erih, ulun-ulun ngolahpik jubah doh nuk jalan.
37 Kotihkak Yesus manyo noh dahpot nuk Yerusalem, nuk jalan jok mosuluh puruk Jaitun, paring ulun jok ngohasuk Iyok ngandah momuji Hotalak khavun botorimakasih umbak Iyok, tului aꞌang jok motaher jok uwas tonohtok doh. 38 Idoh marak ah: “Kongomberkat noh Lacak jok konguhtus Hotalak! Damai sejahtra nuk surga, khavun torpuji noh Hotalak!” d
39 Arok pirak behtik ulun Parisi tahkan holang ulun arok erih, marak ahkan Yesus: “Guruk, nyuhuk ah noh murit-murit Muk atuh tonih.”
40 Yesus mutah ah: “Pocayak noh! Ngindoi doh tonih, bahtuk-bahtuk ihtuh ahkan ngoriak momuji Hotalak.”
Yesus nangih ulun Yerusalem
41 Kotihkak Yesus uwas donik Yerusalem, khavun nohtok kota erih, Iyok nangih. 42 Hiyoi Ah: “Masik ah noh ihkam ulun Yerusalem! Yamios kopios ngindoi ihkam hondo ihtuh taꞌan mik bohkolo cara ah supayak ihkam touk tonorimak Hotalak, totahpik iyam ihkam ngorehti cara erih hun ihtuh! 43 Ahkan arok ondo ah nuk amoh musuh mik ahkan lombut napak pahkot bahtuk noliung kota muk, ngohukung ihkam khavun ngonyonyok ihkam tahkan paring unuk. 44 O ihkam ulun Yerusalem! Idoh ahkan ngohacur kota muk, khavun iyam icok bahtuk pun pomusuah doh tosusun, paring mik ahkan pomunuk. Kotului ihkok iyam hokotaꞌan beteng kotihkak Hotalak lombut ahkan nyolamat ihkam!”
Yesus nyolong nuk Lovun Hotalak
(Mat. 21:12-13; Mrk. 11:15-18; Yoh. 2:13-16)
45 Khavun Yesus nyolong noku Lovun Hotalak khavui ngusir ulun jok borahkang nuk anai. 46 Hiyoi Ah ahkan idoh: “Nuk luvang Kitab tonulih kolihik, Hotalak marak Ah: ‘Lovun Kuk ahkan jadik Lovun bodoa.’ Totahpik ihkam nguai ah ahkan unuk ulun ponahko hokupur.” e