Maria ngasak binyak wangi nuk paan Yesus beteng nuk Betania
(Mat. 26:6-13; Mrk. 14:3-9)
12
Onom ondo sojaham porayaan Ondo Paskah, Yesus tulak noku Betania. Betania arok noh kapung Lazarus jok hulik bolum tahkan pomalus ah konguan Yesus. 2 Arok pirak behtik ulun nuk kapung erih ngahtang dolang ukun ponguman ahkan Yesus, khavun Marta halik mbak molayan idoh kuman. Lazarus arok noh icok behtik nuk holang ulun-ulun jok kuman homboh mbak Yesus. 3 Khavun Maria iyok lombut ngonin moheteng liter binyak wangi tahkan uhat narwastu jok tulin, lehkai ah punak mahal. Maria ngasak binyak wangi erih noku paan Yesus, khavun motojah ah mbak balo ah. Paring luvang lohpo erih jadik buan segah kotului binyak wangi erih. a 4 Totahpik icok behtik murit-Ah jok ngarai ah Yudas Iskariot iyok noh jok ahkan ngohianat Yesus, iyok bokesah hiyoi ah: 5 “Ngombai binyak wangi atuh iyam dahkang ah kiyak lehkai ah toluk lahtus duit perak, khavun duit lehkai ah nongak ahkan ulun malak?” 6 Yudas bokesah naing erih iyam kotului iyok tuꞌuk-tuꞌuk masik mbak ulun malak, totahpik kotului iyok ulun jok baas nahko. Yudas pomocayak namit duit porsembahan ahkan Yesus khavun dolang murit-Ah, tahpik iyok baas ngomin duit erih.7 Totahpik hiyon Yesus: “Pohiyoi ah noh iyok nguan aꞌang ihtuh! Iyok was nginak ah ahkan ondo Kuk tonanom. 8 Tului Ahkuk iyam ahkan hicok humbak hinok mbak ihkam, mahkak iyam arok hocok mik ngavat Ahkuk. Tahpik ulun malak erih arok nulo nuk holang ihkam, jadik mirak kiyak ihkam touk ngavat idoh.” b
Evak dolang kopalak pomipin agamak Yahudi munuk Lazarus
9 Tumbuk ulun Yahudi nyonih ah ngindoi Yesus arok nuk Betania, jadik idoh tulak noku anai. Ponulak doh noku anai iyam cumak kotului Yesus, totahpik kotului idoh kanik nohtok Lazarus kak jok hulik bolum tahkan pomalus ah, konguan Yesus. 10 Kotului erih noh dolang kopalak pomipin agamak Yahudi kanik munuk Lazarus kak. 11 Kotului Lazarus noh jok nguan dolang ulun makin arok pocayak mbak Yesus, khavun idoh nohtah dolang pomipin agamak erih.
Ulun arok noharang Yesus sobagai Lacak
(Mat. 21:1-11; Mrk. 11:1-11; Luk. 19:28-40)
12 Ondo ulik erih hinok ulun arok jok was lombut noku Yerusalem ahkan ngoramik Ondo Paskah, idoh nyonih Yesus nuk luvang ponyalai-Ah noku anai. 13 Mahkak idoh ngonin daun-daun palem khavun turus tulak noharang polombut Yesus, tahtup koriak doh momuji Iyok, hiyon doh: “Torpuji noh Hotalak! Konomerkat noh Iyok jok lombut nuk luvang ngaran Tuhan. Konomerkat noh Lacak Israel!” c
14 Arok ulun ngomin icok keledai bio ahkan Yesus, khavun Yesus jahkat noku keledai erih. Mahkak torjadik noh inon jok was tonulih luvang Kitab Suci, jok marak ah:
15 “Arak mihkoh, ihkam dolang ulun jok mocon nuk Yerusalem!
Nohtok ah! Lacak muk lombut,
Iyok jahkat noku isung keledai bio!” d
16 Beteng hun erih murit-murit Yesus iyam ngorehti inon jok was torjadik. Totahpik kotihkak Yesus konolehkak nyihing pomalus khavun tokahtang noku surga, punan dolang murit-Ah ngorehti ngindoi idoh was nguan aꞌang jok sosuai mbak auh nabik jok tonulih luvang Kitab Suci.
17 Ulun-ulun jok lombut beteng Yesus nguan Lazarus hulik bolum khavun naꞌah Lazarus kuat tahkan luvang tanom ah, idoh noh jok nongak kosaksian mongenai aꞌang jok motaher erih ahkan ulun arok. 18 Tului erih noh ulun arok erih tulak noharang Yesus kotului idoh nyonih ngindoi Yesus noh jok nguan aꞌang jok motaher. 19 Mahkak ulun-ulun Parisi bokesah icok mbak jok bohkon: “Nohtok ah, evak tok iyam arok hasil ah, paring ulun was ngohasuk Iyok!”
Yesus bokesah mongenai pomalus-Ah
20 Nuk holang ulun jok tulak noku Yerusalem ahkan sombayang beteng Ondo Raya Paskah, nuk anai arok pirak behtik jok iyam ulun Yahudi kak. 21 Ulun-ulun jok iyam Yahudi erih idoh lombut noku icok behtik murit Yesus ngarai ah Pilipus, iyok tahkan kota Betsaida nuk provinsi Galilea, khavun hiyon doh ahkai ah: “Tuan, ngindoi touk, ihkai kanik bohavung mbak Yesus.”
22 Mahkak Pilipus tulak marak aꞌang erih ahkan Andreas, khavun dorok pun marak inon jok sonyavot doh ahkan Yesus. 23 Hiyon Yesus ahkan dorok: “Was dahpot noh ohkot ah Anak Kolunon konolehkak. 24 Punak tuꞌuk auh Kuk tuh: Ngindoi bijik gandum iyam konomulan nuk tanak, bijik erih ahkan tehtap icok bijik kiyak, iyam ahkan muak. Tahpik ngindoi bijik gandum erih konomulan nuk tanak, pongopah ah bijik erih ahkan tumbuk buai. 25 Koderih kak ihkam: Ngindoi ulun cumak kanik bolum ahkan arop ah, mahkak iyok iyam ngonduon bolum jok yarok tihkas nyamah ah. Totahpik iyai jok kanik nongak komolum ah nuk duniak tuh ahkak Kuk, mahkak idoh ahkan ngonduon komolum jok yarok tihkas nyamah ah. e 26 Ulun jok kanik molayan Ahkuk alah ngohasuk Ahkuk, supayak touk hicok humbak mbak Ahkuk nuk amoh pun Ahkuk arok. Khavun ulun jok molayan Ahkuk iyok ahkan konolehkak Amai-Kuk.”
27 Hiyon Yesus: “Ahtoi Kuk punak liduk, Iyam taak Kuk inon jok ahkan sonyavot luvang doa. Sobenar ah Ahkuk touk nyavot supayak Amai nyolamat Ahkuk tahkan kojorak ihtuh. Totahpik Ahkuk iyam ahkan bokesah naing erih, kotului erih noh ponyalak Kuk lombut noku duniak ihtuh. 28 Amai mokarah ah noh ahkan paring ulun ngindoi Ihkok punak konolehkak!” Mahkak konihan auh tahkan langit jok marak ah: “Ahkuk was ngolehkak ngarak Kuk, khavun Ahkuk ahkan ngolehkak ah hinok.”
29 Paring ulun jok tombok nuk anai nyonih auh erih. Hiyon doh: “Erih duhung!” Totahpik arok kak jok marak ah: “Iyam! Erih molekat bokesah mbak Iyok.”
30 Khavun hiyon Yesus ahkan doh: “Amai-Kuk bokesah naing erih, iyam ngavat Ahkuk totahpik ngavat ihkam. 31 Huntuh was dahpot noh ohkot ah Hotalak ngohakim kolunon nuk duniak, khavun huntuh Lacak paring otuk jok nguasak duniak ahkan kongusir boluak tahkan duniak. 32 Ahkuk ahkan kongahtang noku isung khavun sonyalib. Ngindoi aꞌang erih torjadik, mahkak Ahkuk ahkan nongak jalan supayak paring ulun touk lombut noku Ahkuk.” 33 Yesus bokesah naing erih Iyok motohtok ah bohkolo cara Iyok ahkan mahtoi.
34 Hiyon ulun arok erih ahkai-Ah: “Monurut kitab Hukum Taurat ekai, Lacak Ponyolamat ahkan bolum nyiring yarok tihkas nyamah ah. Bohkolo Kok touk marak ah ngindoi Anak Kolunon ahkan kongahtang noku isung khavun sonyalib? Iyai Anak Kolunon erih?” f
35 Yesus mutah ah: “Nyohuluk kiyak nai tarang hicok humbak mbak ihkam. Jadik, bolum noh nuk luvang tarang kotahin tarang erih arok nuk holang ihkam, supayak ihkam iyam konguasak aꞌang jok pindong. Ulun jok nyalan nuk luvang jok pindong iyok iyam taꞌai kamoh iyok ahkan tulak. 36 Pocayak noh mbak tarang erih, kotahin tarang erih hicok humbak mbak ihkam, supayak ihkam jadik anak-anak tarang.”
Mbot Yesus bokesah naing erih, Iyok tulak tahkan anai khavun beleu mokarah arop-Ah ahkan doh.
Ulun-ulun Yahudi iyam pocayak mbak Yesus
37 Holuk poh dolang ulun erih nohtok tumbuk aꞌang jok motaher konguan Yesus nuk husuk doh, tahpik idoh tehtap iyam pocayak mbak Iyok. 38 Supayak nyolung noh inon jok pomarak nabik Yesaya:
“Hotalak, iyai jok pocayak mbak tanjik kai?
Ahkan iyai kuasak Muk ponotohtok?” g
39 Kotului erih noh idoh iyam touk pocayak, Yesaya halik was marak ah kak:
40 “Hotalak was mulen mahtan doh, supayak mahtan doh iyam nohtok,
Iyok was nuhtup ahtoi pihkir doh,
supayak idoh iyam ngorehti.
Sohinggak idoh iyam hulik noku Iyok,
khavun Iyok iyam nyahkang navas doh.” h
41 Yesaya bokesah naing erih kotului sojaham Yesus lombut nuk luvang duniak tuh, iyok holuk was nohtok Yesus konolehkak. Khavun Yesaya motohtok ah ngindoi nain komolum Yesus ahkan kolo erih.
42 Holuk poh arok ulun jok iyam pocayak mbak Yesus, totahpik tumbuk ulun khavun pomipin Yahudi jok pocayak mbak Iyok. Cumak idoh iyam bohanyik ngahkuk ah nuk husuk ulun arok ngindoi idoh pocayak, tului idoh mihkoh ngindoi ulun Parisi majak doh nyolong lohpo sombayang ulun Yahudi. 43 Idoh mihkoh, kotului idoh suhkak kongolehkak kolunon dari padak kongolehkak Hotalak.
Kolunon ahkan konohakim monurut ajar barak Yesus
44 Totahpik Yesus bokesah mbak auh jok mohing hiyoi-Ah: “Ulun jok pocayak mbak Ahkuk, iyok iyam pocayak mbak Ahkuk kiyak, totahpik idoh pocayak mbak Iyok jok nguhtus Ahkuk. 45 Khavun ulun jok nohtok Ahkuk, idoh kak nohtok Iyok jok nguhtus Ahkuk kak. 46 Ahkuk lombut noku duniak ihtuh nongak tarang, supayak paring ulun jok pocayak mbak Ahkuk iyam bolum nuk luvang jok pindong. 47 Ahkuk lombut noku duniak iyam ahkan ngohakim kolunon, totahpik Ahkuk lombut nyolamat idoh. Jadik, Ahkuk iyam ngohakim paring ulun jok was nyonih ajar barak Kuk totahpik idoh iyam pahtuh mbak ajar barak Kuk erih. 48 Totahpik ahkan dolang ulun jok beleu pocayak Ahkuk khavun jok iyam norimak inon jok pomarak Kuk, mahkak ajar barak Kuk erih noh jok ahkan hatin Hotalak ngohakim idoh beteng Ondo Kiamat. 49 Ahkuk bokesah iyam tului konganin Ekuk bongok, totahpik Amai jok nguhtus Ahkuk, Iyok noh jok moletah Ahkuk ahkan marak inon jok alah kongesah Kuk. 50 Khavun Ahkuk taꞌai poletah ah erih nongak komolum jok yarok tihkas nyamah ah. Mahkak Ahkuk ngesah ajar barak jok pomoletah Amai ahkak Kuk.”