Kesah mongenai Lazarus jok poros
11
Beteng erih arok icok behtik ulun jok poros ngarai ah Lazarus. Iyok mocon nuk Betania humbak mbak jolahai harik hicok inai amai yok erih, Maria khavun Marta. a 2 Maria iyok noh bavik jok nusuh binyak wangi noku paan Yesus, khavun jok ngapit paan Yesus mbak balo ah. Khavun Lazarus jok poros erih arok noh arik ah. b 3 Jadik Maria khavun Marta motiang tanjik ahkan Yesus hiyon dorok: “Tuhan, jolahan Muk jok kongasih-Muk erih iyok poros.”4 Kotihkak Yesus nyonih kesah erih, hiyoi-Ah: “Ponyahkit erih iyam ahkan nguan iyok mahtoi. Aꞌang erih torjadik supayak Hotalak kongisung, khavun kotului ponyahkit erih kak Anak Hotalak kongisung.”
5 Oluh poh Yesus mongasihi Maria, khavun arik ah Marta khavun Lazarus, 6 totahpik kotihkak Yesus nyonih tanjik ngindoi Lazarus poros, atak Yesus noh mocon duok ondo hinok nuk anai mbak dolang murit-Ah. 7 Mbot erih baruk nai Iyok marak ahkan dolang murit Ah: “Has huntuh tok alah hulik tulak noku Yudea.”
8 Hiyon doh mutah Yok: “Guruk, malom kak dolang ulun Yahudi jok nuk anai kanik munuk Guruk hatin bahtuk, khavun huntuh Guruk kanik hulik noku anai hinok?”
9 Hiyon Yesus mutah doh: “Ihkam taꞌai ngindoi icok ondo arok duok balas jam. Ulun jok nyalan beteng hondo, paai ah iyam ahkan totinop kotului iyok nohtok kotarang duniak ihtuh. 10 Totahpik ulun jok nyalan beteng ngolomik paai ah mihtik ahkan totinop, kotului iyam arok tarang nuk luvang arop ah.” 11 Erih noh jok pomarak Yesus. Khavun hiyon Yesus hinok: “Jolahan tok Lazarus honong tiruh huntuh, totahpik Ahkuk kanik tulak kanai mokonyun yok tahkan poniruh ah.”
12 Hiyon murit-murit-Ah: “Tuhan, ngindoi iyok honong tiruh mahkak iyok ahkan pios.”
13 Sobenar ah jok pomarak Yesus mongenai Lazarus tiruh rehti ah iyok uwas mahtoi. Totahpik dolang murit Ah moravak tiruh kolo puun, iyam mahtoi. 14 Kotului erih Yesus marak ah mbak jelas ahkan doh, hiyoi Ah: “Lazarus was mahtoi. 15 Ahkuk ngandah kak, kotului beteng erih Ahkuk yam arok nuk anai, aꞌang erih pios ahkam muk. Nyihing kojadian ihtuh ihkam touk pocayak mbak Ahkuk. Has huntuh tok tulak noku Lazarus anai.”
16 Tomas jok baas tonaꞌah “Anak Kahpit” iyok marak ah ahkan dolang murit Yesus jok bohkon, hiyoi ah ahkan doh: “Has tok mbak Guruk, supayak tok mahtoi homboh Iyok!”
Yesus kiyak jok nguan ulun hulik bolum khavun jok nongak komolum
17 Kotihkak Yesus khavun murit-murit Ah docok nuk Betania, Iyok nyonih ngindoi Lazarus was mahtoi. Lazarus was ohpat ondo noh tonanom. 18 Kota Betania donik tahkan Yerusalem, sokitar toluk kilomehter kacui ah. 19 Tumbuk ulun Yahudi tulak bohavung mbak Marta dorok Maria ahkan ngohibur dorok kotului jolahan dorok harik Lazarus was mahtoi.
20 Kotihkak Marta nyonih Yesus was manyo dahpot nuk kapung ah, iyok boluak ahkan noharang polombut Yesus. Totahpik Maria mocon nuk lohpo. 21 Beteng idoh tobarung hiyon Marta ahkan Yesus: “Tuhan, ngindoi Ihkok arok nuk ohtoi sojaham ah, mihtik jolahak kuk harik Lazarus iyam ahkan mahtoi. 22 Totahpik ahkuk taꞌai ngindoi huntuh Ihkok nyavot inon pun mbak Hotalak, mahkak Iyok ahkan nguan Ihkok touk nguai ah.”
23 Hiyon Yesus ahkan Marta: “Lazarus jolaham muk harik erih ahkan hulik bolum.”
24 Marta mutah Ah: “Ahkuk taꞌai ngindoi iyok ahkan hulik bolum beteng ulun mahtoi konomolum hinok kotihkak Ondo Kiamat.”
25 Hiyon Yesus ahkan Marta: “Ahkuk noh jok nongak komolum khavun jok nguan ulun hulik bolum tahkan pomalus doh. Ulun jok pocayak mbak Ahkuk ahkan bolum, holuk poh iyok was mahtoi. 26 Khavun ulun jok honong bolum khavun pocayak mbak Ahkuk iyam ahkan mahtoi nyiring yarok tihkas nyamah ah. Pocayak leh kok mbak aꞌang jok kongesah Kuk ihtuh?”
27 Marta mutah ah: “Tuhan, ahkuk pocayak Ihkok Anak Hotalak, Lacak Ponyolamat jok konojanjik ahkan lombut noku duniak.”
Yesus nangih tului pomalus Lazarus
28 Umbot Marta bokesah naing erih, iyok tulak naꞌah jolahai harik jok ngarai ah Maria khavui nyokinok ah, hiyoi: “Guruk arok nuk ohtoi, Iyok kanik bokesah mbak ihkok.” 29 Nyonih auh Marta, Maria pun ngimo-ngimos monyun, khavun tulak tobarung Yesus. 30 Beteng erih, Yesus honong arok nuk amoh Iyok tobarung mbak Marta, Iyok jaham nyolong noku kapung erih. 31 Ulun-ulun Yahudi jok ngohibur Maria nuk lohpo ah, beteng doh nohtok Maria ngimo-ngimos kuat khavun boluak, idoh halik ngohasuk iyok. Idoh pihkir iyok ahkan tulak nangih nuk tanom Lazarus.
32 Beteng Maria dahpot nuk Yesus khavun nohtok Iyok, Maria nyuhkuk nuk husuk Ah khavun hiyoi ah: “Tuhan, ngindoi Tuhan arok nuk ohtoi beteng erih, pasti jolahak kuk harik erih iyam ahkan mahtoi.”
33 Kotihkak Yesus nohtok Maria nangih, khavun ulun-ulun Yahudi jok ngohasuk Maria idoh halik nangih, Yesus tuꞌuk-tuꞌuk piluk ahtoi Ah nohtok idoh. 34 Mahkak Iyok bokisok mbak idoh: “Nuk amoh ihkam nanom Lazarus?”
Hiyon doh mutah Yok: “Has tok tulak nohtok ah, Tuhan.”
35 Khavun Yesus pun nangih. 36 Mahkak hiyon ulun-ulun Yahudi erih icok mbak bohkon ah: “Nohtok ah Yesus punak mongasihi Lazarus!”
37 Totahpik arok nuk holang idoh jok marak ah: “Iyok nguan ulun bobulen touk nohtok, ngombai yok mosuah Lazarus mahtoi?”
Yesus nguan Lazarus hulik bolum hinok
38 Yesus tuꞌuk-tuꞌuk piluk khavun Iyok tulak noku tanom. Tanom erih arok noh gua jok tonuhtup mbak bahtuk hajok.
39 Yesus marak ahkan dolang ulun nuk anan: “Nyarok bahtuk atuh!”
Marta jok jolahan Lazarus harik iyok mutah Yesus hiyoi: “Tahpik Tuhan, iyok was ohpat ondo noh tonanom. Mihtik was buan maram noh.”
40 Khavun hiyon Yesus ahkan Marta: “Iyam leh was umbot Kuk marak ahkam muk: Ngindoi ihkok pocayak, ihkok ahkan nohtok boh kohajoi kuasak Hotalak!” 41 Mahkak idoh nyarok bahtuk erih. Ulik erih Yesus nokarak noku langit khavun hiyoi ah: “Ahkuk bosukur ahkam Muk Amai, kotului Ihkok was nyonih doa Kuk. 42 Ahkuk taꞌai Ihkok nulo nyonih Ahkuk. Tahpik Ahkuk bokesah aꞌang ihtuh kotului paring ulun jok arok nuk ohtoi, supayak idoh pocayak ngindoi Ihkok noh jok nguhtus Ahkuk.” 43 Umbot bokesah naing erih, Yesus marak mbak auh jok mohing hiyoi ah: “Lazarus, boluak!” 44 Mahkak boluak noh Lazarus jok mahtoi erih. Longoi khavun paai ah pun honong pomukus mbak kain jok hatin mukus otui. Khavun tapak ah tonuhtup mbak kain jok hatin nuhtup tapak. Hiyon Yesus ahkan ulun-ulun jok arok nuk anai: “Nguvat noh kain-kain erih supayak iyok touk nyalan.”
Dolang pomipin Yahudi hopahkat kanik munuk Yesus
(Mat. 26:1-5; Mrk. 14:1-2; Luk. 22:1-2)
45 Beteng erih tumbuk ulun-ulun Yahudi jok lombut ngohibur Maria, idoh jadik pocayak mbak Yesus kotihkak doh nohtok inon jok konguan Ah. 46 Totahpik arok pirak behtik nuk holang idoh jok tulak noku ulun Parisi khavun ngesah ahkan doh inon jok was konguan Yesus. 47 Kotului erih ulun-ulun Parisi khavun dolang kopalak pomipin agamak Yahudi idoh rahpat mbak Pongadilan Agamak Yahudi hiyon doh: “Ihtok alah nguan inon? Ulun erih nguan tumbuk aꞌang jok motaher! 48 Ngindoi ihtok nulo mosuah Yok kolihtuh mahkak paring ulun ahkan pocayak mbak Iyok. Khavun pongohpah ah ponguasak Roma ahkan lombut ngolohpung Lovun Hotalak khavun paring bangsak etok tuh!”
49 Icok behtik tahkan holang idoh jok ngarai ah Kayafas, iyok arok noh Pomipin Agamak Yahudi jok paling isung beteng toun erih, hiyoi ahkan doh: “Ihkam iyam taan inon-inon. 50 Nikos kam mihkir ah, nihak icok behtik palus ahkan bangsak tok dari padak paring bangsak tok lohpung!” 51 Kayafas bokesah naing erih, iyam tahkan pihkir aiu ah bongoi, tahpik tahkan Hotalak. Tului iyok Pomipin Agamak Yahudi jok paling isung nuk toun erih. Inon jok pomarak ah erih manak ah mongenai Yesus ahkan mahtoi ahkan bangsak Yahudi. 52 Khavun iyam ahkan ulun Yahudi kiyak, totahpik pomalus Ah ahkan ngupur khavun ngohicok anak-anak Hotalak jok toravuh toriak nuk amo-amoh.
53 Tahkan ondo erih noh dolang pomipin Yahudi hopahkat ahkan munuk Yesus. 54 Kotului erih Yesus pun iyam mokarah arop ah nuk husuk ulun Yahudi. Iyok tulak tahkan Yudea noku kota jok ngarai ah Efraim jok hokoronik mbak lahpang baras. Nuk anai Iyok mocon humbak murit-murit-Ah.
55 Pirak ondo sojaham Ondo Raya Paskah ulun Yahudi. Tumbuk ulun tahkan paring kapung tulak noku Yerusalem. Sosuai Hukum Taurat, idoh lombut sojaham Ondo Paskah ahkan sombayang supayak arop doh borasih nuk husuk Hotalak. 56 Idoh ngurah Yesus, beteng doh kupur nuk dohopan Lovun Hotalak, hiyon doh bokesah icok mbak jok bohkon: “Bohkolo monurut muk, inon leh Yesus ahkan lombut noku porayaan Paskah tuh?” 57 Idoh bokesah naing erih kotului dolang kopalak pomipin agamak Yahudi khavun ulun-ulun Parisi was nongak poletah: Iyai jok taꞌai nuk amoh Yesus mocon, iyok alah ngolahpor ah noku idoh supayak doh touk navan Yesus.