Tindung mongenai domba khavun ponjagak domba
10
Yesus marak ahkan dolang ulun jok arok nuk anai hatin tindung, hiyoi-Ah: “Punak tuꞌuk auh Kuk tuh: Ulun jok nyolong noku luvang kandang domba iyok nuhkat nyihing pahkot, iyam nyihing atop pahkot, ulun erih ponahko khavun porampok. 2 Totahpik ulun jok nyolong nyihing atop pahkot, iyok noh ponjagak domba. 3 Ulun jok jagak atop pahkot iyok ahkan nguhkoi atop pahkot ahkan ponjagak domba. Ponjagak domba erih pun ahkan naꞌah ngaran domba-domba ah khavun dolang domba ahkan nyonih bahing ah khavun iyok ngonin doh boluak. 4 Mbot dolang domba erih boluak uras, ponjagak domba ahkan nyalan nuk husuk domba ah, khavun dolang domba erih ngohasuk iyok kotului idoh nyokonok bahing ah. 5 Totahpik dolang domba iyam ahkan kanik ngohasuk ulun bohkon, malah idoh ahkan buho tahkan ulun erih, kotului idoh yam nyokonok bahing ah.”6 Yesus ngesah tindung erih, totahpik ulun arok erih iyam ngorehti inon manak jok pomarak Ah.
Yesus ponjagak domba jok pios
7 Mahkak hiyon Yesus sinok hinok: “Punak tuꞌuk auh Kuk tuh, Ahkuk kolo atop ahkan dolang domba erih. 8 Paring ulun jok lombut sojaham Ahkuk jok ngahkuk arop doh ponjagak domba, idoh arok noh ulun jok ponahko khavun porampok, totahpik domba iyam nyonih auh doh. 9 Ahkuk kolo atop ahkan dolang domba. Iyai jok nyolong nyihing Ahkuk idoh ahkan solamat, iyok boluak nyolong khavun ngonduon ukun ponguman. 10 Ulun ponahko idoh lombut ahkan nahko, munuk khavun ngolohpung dolang domba kiyak. Totahpik Ahkuk lombut supayak domba-domba-Kuk ngonduon komolum jok holovik holeak.
11 Ahkuk noh Ponjagak domba jok pios, Ahkuk nongak hasong Kuk ahkan dolang domba Kuk. 12 Totahpik ulun jok konguhpah jagak domba erih, iyok iyam ponjagak domba khavun iyok iyam kak ulun jok tepun domba. Kotihkak ulun jok konguhpah erih nohtok horomaung lombut, iyok ahkan buho nohtah dolang domba ah. Mahkak dolang domba erih ahkan pomavak khavun horomaung erih nguan doh torasah. 13 Ulun jok konguhpah erih buho, kotului iyok korejak konguhpah. Iyok iyam podulik mbak dolang domba erih. 14 Ahkuk noh ponjagak domba jok pios. Khavun Ahkuk nyokonok dolang domba Kuk khavun idoh pun nyokonok Ahkuk. a 15 Havoi mbak Amai nyokonok Ahkuk khavun Ahkuk sokonak Kuk Amai, khavun Ahkuk nongak hasong Kuk ahkan dolang domba Kuk. 16 Totahpik Ahkuk halik tepun domba-domba jok bohkon, domba erih jaham konohicok nuk luvang kandang ihtuh. Ahkuk alah nuhtun idoh kak, khavun idoh ahkan nyonih auh Kuk. Jadik paring domba-Kuk ahkan jadik icok kolompok nuk luvang kandang khavun icok kak ponjagak domba ah.
17 Amai mongasihi Ahkuk kotului Ahkuk kanik nongak hasong Kuk supayak Ahkuk hulik bolum. 18 Yarok icok behtik ulun pun jok touk ngonin hasong Kuk. Tahpik Ahkuk nyerah ah kotului kokanik Kuk bongok. Ahkuk bokuasak ahkan nyerah ah, khavun bokuasak kak ngoniu ah hinok. Erih nok poletah jok tonongak Amai ahkak Kuk.”
19 Kotului Yesus bokesah naing erih ulun-ulun Yahudi jok nyonih ah idoh hobatah. 20 Tumbuk nuk holang idoh jok marak ah: “Iyok sonyorupang roh jaek! Iyok bobujon! Arak nyonih Yok!”
21 Totahpik arok kak jok marak ah: “Ulun jok sonyorupang roh jaek iyam ahkan bokesah koderih! Touk leh roh jaek nyahkang ulun bobulen sohinggak ulun erih touk nohtok?”
Ulun Yahudi iyam kanik norimak Yesus
22 Nuk Yerusalem dolang ulun bogavik nohouk ondo peresmian nyolong Lovun Hotalak, beteng erih musim sorongin. 23 Kotihkak Yesus honong nyalan nuk teras Salomo nuk Lovun Hotalak, 24 mahkak dolang ulun Yahudi lombut hokupur ngoniling Yesus. Hiyon doh marak ah: “Nyiring mirak Ihkok kanik nguan kai deroh? Ngindoi Ihkok tuꞌuk Lacak Ponyolamat jok kononjanjik Hotalak mahkak marak ah mbak jelas ahkan kai.”
25 Yesus mutah ah: “Was umbot Kuk marak ah ahkam mik, totahpik ihkam iyam pocayak. Dolang aꞌang jok motaher konguak Kuk nuk luvang ngaran Amai Kuk, erih noh jok nongak kosaksian mongenai Ahkuk, 26 totahpik ihkam iyam pocayak mbak Ahkuk kotului ihkam kolo domba-domba jok iyam Ahkuk tepui. 27 Domba-domba Kuk nyonih inon jok pomarak Kuk. Ahkuk nyokonok Kuk idoh, khavun idoh ngohasuk Ahkuk, 28 khavun Ahkuk nongak doh komolum jok yarok tihkas nyamah ah, khavun nyiring yarok tihkas nyamah ah kak idoh iyam ahkan mahtoi. Yarok icok behtik ulun pun jok touk nyombaan idoh tahkan longok-Kuk. 29 Amai-Kuk jok was nongak domba-domba erih ahkak Kuk, Amai noh jok bokuasak tahkan paring aꞌang jok arok, khavun yarok jok touk nyombaan idoh tahkan longon Amai. 30 Ahkuk khavun Amai, Korok icok.”
31 Khavun ulun-ulun Yahudi ngonin bahtuk hinok ahkan muhkah Yesus nyiring mahtoi. 32 Totahpik hiyon Yesus ahkan doh: “Ihkam was nohtok Ahkuk nguan korejak gavik jok pios, jok sonyuhuk Amai ahkak Kuk. Tahkan paring korejak erih, korejak Kuk jok amoh jok nguan kam kanik munuk Ahkuk mbak bahtuk?”
33 Ulun-ulun Yahudi erih mutah ah: “Iyam kotului dolang korejak muk jok pios erih ihkai kanik munuk kok hatin bahtuk, totahpik kotului ihkok ngohinak Hotalak. Ihkok cumak kolunon tahpik kanik nguan arop Muk arok noh Hotalak.” b
34 Khavun Yesus mutah ah: “Uwas tonulih nuk Kitab Suci mik kolihtuh: Hotalak marak ah ihkam arok noh ilah-ilahc? d 35 Ihtok taꞌai ngindoi inon jok tonulih luvang Kitab Suci hinut nyiring yarok tihkas nyamah ah. Ngindoi nuk Kitab Suci Hotalak ngohavot ulun jok norimak auh-Ah sobagai ilah, 36 ngombai ihkam marak Ahkuk ngohinak Hotalak kotului Kuk marak ah ‘Ahkuk Anak Hotalak’? Podahal Ahkuk konopilik khavun konguhtus Amai noku duniak. 37 Ngindoi Ahkuk iyam nguai inon jok konguan Amai-Kuk, arak pocayak mbak Ahkuk. 38 Totahpik Ahkuk nguai inon jok konguan Amai-Kuk. Jadik ihkam alah pocayak kotului inon jok konguak Kuk erih, holuk poh ihkam iyam kanik pocayak mbak Ahkuk. Mbak koderih ihkam taꞌai khavun ngorehti ngindoi Amai tehtap hicok mbak Ahkuk, khavun Ahkuk tehtap hicok kak mbak Amai.”
39 Idoh ngotiak ah hinok ahkan navan Yesus, totahpik iyam duon doh navan Iyok.
40 Yesus hulik noku pohoi sungoi Yordan, nuk holuk Yohanes mombaptis ulun, khavun Yesus pun mocon nuk anai. e 41 Tumbuk ulun lombut noku Iyok. Hiyon doh: “Yarok icok pun aꞌang jok motaher konguan Yohanes pombaptis, totahpik paring aꞌang jok pomarak Yohanes mongenai ulun ihtuh tuꞌuk.” 42 Khavun tumbuk ulun jok arok nuk anai idoh pocayak mbak Yesus.