Yesus nyahkang ulun bobulen
9
Beteng Yesus nyalan, Iyok nohtok ulun bobulen tahkan yok punai arok. 2 Murit-murit-Ah bokisok mbak Iyok: “Guruk, ngombai ulun erih tahkan yok punai konganak bobulen? Inon leh kotului iyok bodosa atau kotului dosa inai amai ah?”3 Yesus mutah ah: “Iyok bobulen iyam kotului dosa aiu atau kotului dosa inai amai ah. Totahpik supayak ulun touk nohtok kuasak Hotalak torjadik nuk luvang arop ah. 4 Beteng honong boloang, ihtok alah ngorejak korejak jok ongak Iyok jok nguhtus Ahkuk. Ondo ahkan pindong, khavun yarok ulun jok ahkan touk korejak ngindoi ngolomik. 5 Kotahin Ahkuk nuk duniak ihtuh, Ahkuk noh tarang duniak jok narang ahtoi kolunon.” a
6 Umbot Yesus bokesah koderih Iyok ngolucak noku tanak, khavun hatin longoi ah Iyok ngudak kolucak erih hobolouk mbak tanak nyiring jadik dahpak. Khavun Iyok ngasak ah nuk mahtan ulun erih, 7 Khavun hiyoi Yesus ahkan ulun erih: “Tulak nai morasih tapak muk nuk kolam Siloam.” Siloam rehti ah “Konguhtus”. Mahkak ulun erih tulak muhik tapak ah beteng erih kak iyok was touk nohtok, khavun iyok pun bulik.
8 Dolang ulun jok hokosilak lovuk mbak iyok khavun ulun jok pujik nohtok yok baas nyavot, paring doh marak ah: “Iyam leh iyok ihtuh ulun jok baas tuot nyavot duit tahkan ulun arok?”
9 Arok kak jok marak ah: “Iyok atuh noh poh.” Totahpik arok kak jok marak ah: “Iyam, iyok atuh havoi tapak ah mbak ulun erih.”
Totahpik hiyon ulun jok pios tahkan ulen ah erih: “Ahkuk noh iyok jok hiyon mik erih.”
10 Hiyon doh ahkai ah: “Bohkolo kesah ah mahtam muk touk nohtok?”
11 Hiyon ulun jok pios tahkan ulen ah erih mutah doh: “Ulun jok ngarai Yesus erih ngudak ivoh ah hatin longoi-Ah hobolouk mbak tanak nyiring jadik dahpak, turus ngasak ah nuk mahtak kuk khavun hiyoi-Ah ‘Tulak morasih tapak muk nuk kolam Siloam.’ Khavun ahkuk pun tulak, kotihkak ahkuk morasih tapak kuk, ahkuk pun touk nohtok.”
12 Khavun idoh bokisok hinok mbak iyok: “Nuk amoh Ulun erih?”
Hiyoi mutah doh: “Iyam kuk taꞌai.”
Ulun Parisi morisak inon leh tuꞌuk ulun erih bobulen tahkan iyok kongarok
13 Dolang ulun jok hokosilak lovuk mbak ulun jok pios tahkan ulen ah erih idoh ngonin yok noku ulun Parisi. 14 Kotului beteng Yesus ngudak ivoh ah louk tanak khavun ngasak ah noku mahtan ulun bobulen erih arok noh ondo Sabat, 15 mahkak ulun Parisi pun halik bokisok hinok hiyon doh: “Bohkolo kesah ah ihkok touk nohtok.” Hiyoi mutah ah: “Iyok ngasak dahpak nuk mahtak kuk, khavuk kuk morasih tapak kuk, ahkuk pun touk nohtok.”
16 Arok pirak behtik nuk holang ulun Parisi erih marak ah: “Iyam mukin Yesus konguhtus Hotalak, kotului Iyok iyam pahtuh mbak ondo Sabat.”
Totahpik hiyon doh jok bohkon: “Yamukin ulun jok bodosa nguan aꞌang jok motaher kolo ihtuh?” Kotului erih lopung noh pihkir jok nguan idoh iyam hicok pahkat.
17 Mahkak ulun Parisi erih bokisok nok mbak ulun jok pios tahkan ulen ah erih, hiyon doh: “Iyok uwas nguan kok pios, monurut muk iyai poh Iyok rih?”
Hiyoi mutah doh: “Iyok arok noh nabik.”
18 Totahpik pomipin Yahudi erih iyam kanik pocayak ngindoi ulun erih tuꞌuk bobulen tahkan iyok kongarok, khavun huntuh iyok touk nohtok. Kotului erih idoh naꞌah ulun okok ah, 19 khavun idoh pun bokisok mbak koduok ulun okok ah, hiyon doh: “Tuꞌuk leh ihtuh anak muk jok pomarak muk bobulen tahkan iyok kongarok? Bohkolo iyok touk nohtok huntuh?”
20 Amai inai ulun bobulen erih mutah ah: “Tuꞌuk noh iyok tuh anak kai, khavun iyok bobulen tahkan iyok kongarok. 21 Iyam taan kai kolo cara ah iyok touk nohtok huntuh. Khavun iyam kai taꞌai ah kak iyai jok nguan yok touk nohtok. Ngisok ah kiyak mbak iyok, iyok was okok noh iyok touk mutah ah bongoi.” 22 Amai inai ulun jok pios tahkan ulen ah erih bokesah koderih kotului idoh mihkoh mbak dolang pomipin Yahudi. Dolang pomipin erih umbot sopahkat ngindoi ulun jok ngahkuk Yesus arok noh Lacak Ponyolamat, idoh iyam taꞌai nyolong noku lohpo sombayang ulun Yahudi. 23 Kotului erih noh amai inai ah marak ah: “Iyok was okok, ngisok ah kiyak mbak iyok.”
24 Jok koduok kali ah hinok ulun-ulun Parisi erih naꞌah ulun jok pios tahkan ulen ah erih, hiyon doh ahkai ah: “Hotulut noh nuk husuk Hotalak ngindoi ihkok ahkan ngesah aꞌang jok hinut. Kai taꞌai ulun erih ulun bodosa.”
25 Hiyoi ah mutah doh: “Iyok bodosa atau iyam, ahkuk yam kuk taꞌai. Totahpik icok aꞌang jok kuk taꞌai, lomoi kuk bobulen huntuh kuk touk nohtok.”
26 Khavun hiyon doh nok ahkai ah: “Inon jok konguai-Ah ahkam muk? Bohkolo Iyok touk nguan ihkok nohtok?”
27 Iyok mutah ah: “Was mbot kuk marak ahkan mik, totahpik belen mik nyonih ah. Ngombai kam kanik nyonih ah hinok? Mukin ihkam kanik jadik murit-Ah kak?”
28 Khavun idoh ngohinak iyok, hiyon doh: “Ihkok noh murit Ulun jok bodosa erih, ihkai iyam! Ihkai murit Musa. 29 Ihkai taꞌai ngindoi Hotalak was bokesah mbak Musa. Totahpik mongenai Ulun erih, iyam kai taꞌai tahkan amoh asal-Ah.”
30 Ulun jok pios tahkan ulen ah erih mutah doh hinok, hiyoi: “Ahkuk pusong ngindoi ihkam iyam taꞌai tahkan amoh asal-Ah, podahal Iyok was nguan ahkuk touk nohtok. 31 Ihtok was taꞌai ngindoi Hotalak iyam kanik nyonih doa ulun jok bodosa. Totahpik Hotalak nyonih paring doa ulun jok nyembah khavun nguai kokaniu-Ah. 32 Tahkan topahtuk duniak tonapak jaham pujik sonyonih ulun jok touk nguan mahtan ulun jok bobulen tahkan yok kongarok tahpik touk nohtok. 33 Ngindoi Ulun erih asal ah iyam tahkan Hotalak, Iyok iyam ahkan touk nguan ino-inon.”
34 Idoh mutah yok: “Ihkok jok yamios dosa tahkan kok kongarok! Inon leh Ihkok kanik ngajar ihkai?” Mahkak tahkan erih iyok pomajak doh nyolong lohpo sombayang ulun Yahudi.
Dolang ulun jok ahtoi pihkir ah bobulen
35 Kotihkak Yesus nyonih ngindoi dolang pomipin Yahudi erih was ngusir yok tahkan lohpo sombayang ulun Yahudi, Iyok ngurah ulun erih khavun hiyoi ah: “Inon leh ihkok pocayak mbak Anak Kolunon?”
36 Ulun jok pios tahkan ulen ah erih mutah Yok, hiyoi: “Iyai Anak Kolunon erih, Tuan? Marak ahkak kuk supayak ahkuk pocayak mbak Iyok.”
37 Hiyon Yesus mutah yok: “Ihkok was nohtok Anak Kolunon, Iyok jok huntuh honong bokesah mbak ihkok, Ahkuk noh Iyok.”
38 Hiyoi mutah auh Yesus: “Ahkuk pocayak mbak Ihkok Tuhan.” Iyok pun turus nyuhkuk nuk husuk Yesus.
39 Hiyon Yesus nok: “Ahkuk lombut noku duniak supayak kolunon pomilang: jok bobulen touk nohtok, khavun ulun jok ngomok arop ah touk nohtok jadik bobulen.”
40 Arok pirak behtik ulun Parisi jok arok nuk anai idoh nyonih Yesus bokesah koderih, khavun hiyon doh ngisok Iyok: “Davak-Muk ihkai tuh bobulen kak?”
41 Yesus mutah ah: “Ngindoi ihkam ngahkuk bobulen, rehti ah beteng erih ihkam iyam bodosa. Totahpik kotului ihkam tehtap marak ah ihkam iyam bobulen, rehti ah ihkam ahkan tehtap konohukum kotului dosa mik.”