8
Totahpik Yesus tulak noku korong Zaitun. 2 Ondo havun ah ngohko-ngohkos Iyok tulak hinok noku Lovun Hotalak. Tumbuk ulun lombut noku Iyok, Iyok tuot khavun ngajar idoh. 3 Beteng erih dolang guruk agamak Yahudi khavun ulun-ulun tahkan kolompok Parisi ngonin noku Iyok icok behtik bavik jok kotaan tiruh mbak bahkas jok iyam bosai ah. Idoh nyuhuk bavik erih tombok nuk husuk ulun arok. 4 Khavun hiyon doh ahkan Yesus: “Guruk, bavik ihtuh kotaan beteng iyok honong tiruh mbak bahkas jok iyam bosai ah. 5 Nuk luvang Hukum Taurat jok tonulih Musa, arok porahturan ahkan tok ngindoi bavik jok kolo ihtuh alah ponuhkah mbak bahtuk nyiring yok mahtoi. Huntuh bohkolo monurut Guruk?” 6 Idoh bokisok naing erih supayak ngindoi Yesus salak putah ah idoh touk ngolahpor Iyok noku potugas pongadilan khavun Iyok ahkan konohukum. Totahpik Yesus tuot duhku-duhkung, Iyok nulih nuk tanak mbak iking-Ah. 7 Beteng doh nulo ngonyonyok Iyok, Iyok pun tombok khavun marak ahkan doh: “Iyai nuk holang ihkam jok ngomok yarok dosa ah, iyok noh jok topahtuk ah muhkah bahtuk noku bavik atuh.” 8 Umbot erih Yesus tuot duhku-duhkung hinok khavun nulih mbak iking-Ah hinok. 9 Totahpik umbot nyonih Yesus bokesah koderih, idoh pun tulak mico-micok ah tahkan anai topahtuk ah ulun jok paling okok. Pongohpah ah Yesus bongoi ah khavun bavik erih noh jok nuk anai, bavik erih honong tombok tehtap nuk ponombok ah. 10 Khavun Yesus tombok, hiyoi-Ah ahkan bavik erih: “Nuk amoh idoh lang erih? Yarok icok behtik pun reh jok ngohukum ihkok?” 11 Hiyon bavik erih mutah: “Iyam arok, Tuan.”Hiyon Yesus ahkai ah: “Ahkuk halik iyam ngohukum ihkok. Huntuh tulak nai khavun arak nguan dosa hinok.”
Yesus arok noh tarang duniak
12 Umbot erih Yesus bokesah hinok ahkan ulun arok nuk anan: “Ahkuk noh tarang duniak. Ulun jok ngohasuk Ahkuk iyam ahkan nyalan nuk luvang jok pindong, totahpik idoh ahkan tepun tarang jok nongak doh komolum.” a
13 Khavun hiyon dolang ulun Parisi ahkai-Ah: “Ihkok bongom noh jok jadik saksi mongenai arop Muk ngindoi Ihkok hinut, yarok ulun bohkon. Jadik ihkai iyam norimak kosaksian Muk erih.” b
14 Yesus mutah ah: “Holuk poh Ahkuk jok nongak kosaksian mongenai arop Kuk bongok, tahpik kosaksian Kuk erih hinut. Kotului Ahkuk taꞌai tahkan amoh Kuk lombut khavun noku amoh Ahkuk tulak. Totahpik ihkam yam kam taꞌai tahkan amoh Kuk lombut khavun noku amoh Ahkuk tulak. 15 Monurut pihkir emik noh ihkam ngohakim ulun bohkon, tahpik Ahkuk iyam ngohakim icok behtik ulun pun. 16 Khavun ngindoi Ahkuk ngohakim ulun, Ahkuk ngohakim mbak adil kotului iyam Ahkuk bongok jok ngohakim ah, tahpik korok Amai jok nguhtus Ahkuk. 17 Tonulih kolihtuh nuk luvang kitab Hukum Taurat mik: Kosaksian jok hinut arok noh kosaksian tahkan duok behtik ulun jok ngesah aꞌang jok havoi. 18 Ahkuk arok icok behtik jok nongak kosaksian mongenai arop Kuk bongok. Khavun saksi Kuk jok bohkon iyok noh Amai jok nguhtus Ahkuk.”
19 Khavun idoh bokisok mbak Iyok: “Nuk amoh Amai Muk erih?”
Khavun Yesus mutah ah: “Iyam kam nyokonok Ahkuk khavun Amai-Kuk. Ngindoi ihkam nyokonok Ahkuk mahkak ihkam halik nyokonok Amai-Kuk.”
20 Yesus marak paring aꞌang erih kotihkak Iyok ngajar nuk teras Lovun Hotalak nuk donik dolang totai porsembahan. Totahpik yarok icok behtik pun jok navan Iyok kotului jaham ohkot ah Yesus tonavan.
Yesus iyam lombut tahkan duniak ihtuh
21 Yesus marak ahkan ulun arok erih hinok: “Ahkuk ahkan tulak, khavun ihkam ahkan ngurah Ahkuk. Ihkam ahkan mahtoi kotihkak dosa mik jaham kongapun. Iyam taan mik lombut noku amoh Ahkuk ahkan tulak.”
22 Mahkak dolang pomipin Yahudi erih bokisok icok mbak jok bohkon, hiyon doh: “Mukin Iyok kanik munuk arop-Ah, kotului Iyok marak ah: Iyam taan mik lombut noku amoh Ahkuk ahkan tulak.”
23 Khavun hiyon Yesus ahkan doh: “Ihkam asal mik tahkan duniak ihtuh, tahpik Ahkuk asal Kuk tahkan surga. Ihkam tahkan duniak ihtuh, Ahkuk iyam tahkan duniak ihtuh. 24 Kotului erih noh Ahkuk marak ahkan mik, ihkam ahkan mahtoi kotihkak dosa mik jaham kongapun. Tuꞌuk noh, ngindoi ihkam iyam pocayak Ahkuk noh Lacak Ponyolamat jok kongindoi mik, mahkak ihkam ahkan mahtoi kotihkak dosa mik jaham kongapun.”
25 Hiyon doh ngisok Yok: “Sobenar ah iyai Ihkok tuh?”
Yesus mutah ah: “Tahkan topahtuk ah Ahkuk was marak ahkan mik iyai Ahkuk! 26 Tumbuk aꞌang jok touk Kuk marak ah mongenai tobiat mik kotului erih Ahkuk touk ngohakim ihkam. Totahpik Iyok jok nguhtus Ahkuk, Iyok hinut. Khavun inon jok sonyonih Kuk tahkan Iyok, erih kiyak jok pomarak Kuk ahkan paring ulun nuk duniak tuh.”
27 Idoh iyam ngorehti ngindoi Yesus bokesah ahkan doh mongenai Amai-Ah jok nuk surga iyam amai Ah jok nuk duniak. 28 Kotului erih hiyon Yesus ahkan doh: “Nain ngindoi ihkam was ngahtang Ahkuk, Anak Kolunon, noku salib mahkak ihkam ahkan taꞌai Ahkuk noh Lacak Ponyolamat jok kongindoi mik. Khavun ihkam ahkan taꞌai ngindoi iyam arok icok pun jok konguak Kuk erih tahkan kokanin Ekuk bongok, totahpik inon jok pomarak Kuk sosuai mbak inon jok kongajar Amai ahkak-Kuk. 29 Khavun Iyok jok nguhtus Ahkuk hicok humbak mbak Ahkuk. Iyam pujik Iyok nohtah Ahkuk bongok, kotului Ahkuk nulo nguan inon jok ngosenang ahtoi-Ah.”
30 Mbot Yesus marak paring ah erih, tumbuk ulun pocayak mbak Iyok.
Ajar barak jok hinut mongenai Hotalak ahkan molahpas kolunon tahkan dosa
31 Khavun hiyon Yesus ahkan ulun-ulun Yahudi jok was pocayak mbak Iyok: “Ngindoi ihkam nulo bolum pahtuh numun jok kongajar Kuk mahkak ihkam tuꞌuk-tuꞌuk murit-Kuk. 32 Khavun ihkam ahkan taꞌai ajar barak jok hinut mongenai Hotalak, sohinggak ihkam ahkan ponolahpas.”
33 Idoh mutah ah: “Ihkai tuh koturun Abraham, jaham pujik kai jadik jihpon iyai pun! Inon manak ah jok pomarak Muk erih ngindoi ihkai ahkan ponolahpas?” c
34 Hiyon Yesus ahkan doh: “Punak tuꞌuk inon jok pomarak Kuk tuh, ulun jok nguan dosa arok noh jihpon dosa. 35 Khavun icok behtik jihpon iyam arok unuk ah jok tehtap nuk luvang koluarga tuan ah, totahpik anak tuan erih iyok tehtap nuk luvang koluarga erih nyiring yarok tihkas nyamah ah. 36 Jadik ngindoi Anak Hotalak molahpas ihkam, mahkak ihkam ahkan tuꞌuk-tuꞌuk lahpas. 37 Ahkuk taꞌai ihkam tuh koturun Abraham. Totahpik ihkam kanik munuk Ahkuk, kotului ihkam iyam kanik pahtuh mbak inon jok kongajar-Kuk. 38 Inon jok tonohtok Kuk tahkan Amai Kuk, erih noh jok pomarak Kuk. Koderih kak ihkam nguan inon jok kongajar amai mik.”
39 Hiyon doh mutah Yok: “Ihkai arok noh koturun Abraham.” Hiyon Yesus nok: “Ngindoi ihkam tuꞌuk-tuꞌuk koturun Abraham, ihkam pasti nguan inon jok konguan Abraham. 40 Totahpik ihkam kanik munuk Ahkuk, holuk poh Ahkuk marak aꞌang jok hinut ahkan mik jok sonyonih Kuk tahkan Hotalak. Abraham iyam nguan aꞌang jok kolo erih! 41 Jadik ihkam iyam koturun Abraham, tului ihkam nguan aꞌang jok konguan amai mik jok bohkon.”
Hiyon doh mutah ah: “Ihkai iyam anak lajun! Amai kai icok kiyak, yok erih Hotalak.”
42 Khavun hiyon Yesus ahkan doh: “Ngindoi Hotalak erih tuꞌuk-tuꞌuk Amai mik, ihkam ahkan mongasihi Ahkuk. Kotului Ahkuk lombut tahkan Hotalak khavun huntuh Ahkuk arok nuk ohtoi. Ahkuk iyam lombut mbak konganin arop Kuk totahpik Iyok jok nguhtus Ahkuk. 43 Kotului inon ihkam iyam ngorehti inon jok pomarak Kuk? Kotului ihkam iyam kanik norimak ajar barak-Kuk. 44 Iblis Lacak paring otuk noh amai mik, khavun ihkam kanik ngohasuk kokanin amai mik erih. Tahkan topahtuk ah noh Iblis baas munuk kolunon khavun iyok iyam pujik nguan aꞌang jok hinut, tului iyam pujik iyok marak aꞌang jok hinut. Kotihkak iyok bobalik koderih noh tobiat ah, iyok baas bobalik khavun iyok amai tahkan paring aꞌang jok bobalik. 45 Totahpik Ahkuk marak aꞌang jok hinut, khavun kotului erih noh ihkam iyam pocayak mbak Ahkuk. 46 Iyai nuk holang ihkam jok touk mokarah ah ngindoi Ahkuk bodosa? Ngindoi Ahkuk marak aꞌang jok hinut ngombai ihkam iyam pocayak mbak Ahkuk? 47 Iyai pun jok Hotalak tepui, iyok nyonih auh Hotalak. Totahpik ihkam iyam Hotalak tepui, kotului erih noh ihkam iyam kanik nyonih ah.”
Yesus was arok sojaham Abraham
48 Ulun-ulun Yahudi erih mutah Yesus, hiyon doh: “Iyam leh tuꞌuk hiyon kai ngindoi Ihkok ulun Samaria jok sonyorupang roh jaek?”
49 Yesus mutah ah: “Ahkuk iyam sonyorupang roh jaek. Ahkuk ngolehkak Amai-Kuk, totahpik ihkam marak paring aꞌang jok ngohinak Ahkuk. 50 Ahkuk iyam ngurah supayak ulun ngolehkak Ahkuk, tahpik arok icok Behtik jok ngotiak ngurah ah supayak Ahkuk kongolehkak, Iyok noh Hakim jok hinut. 51 Punak tuꞌuk auh Kuk tuh, ulun jok pahtuh mbak inon jok pomarak Kuk, iyok iyam ahkan mahtoi nyiring yarok tihkas nyamah ah.”
52 Khavun hiyon ulun Yahudi erih ahkan Yesus: “Huntuh ihkai taꞌai Ihkok tuꞌuk-tuꞌuk sonyorupang roh jaek! Abraham was mahtoi, koderih kak paring nabik. Totahpik Ihkok marak ah: Ulun jok pahtuh mbak auh Kuk, nyiring yarok tihkas nyamah ah iyok iyam ahkan mahtoi. 53 Inon leh Ihkok pihkir Ihkok holovik bokuasak mbak amai kai Abraham? Abraham was mahtoi, khavun dolang nabik halik was mahtoi, monurut
Muk Ihkok rih iyai?”
54 Yesus mutah ah: “Ngindoi Ahkuk ngurah supayak Ahkuk kongolehkak, kolehkak kolo erih iyam arok gunai ah. Jok ngolehkak Ahkuk arok noh Amai-Kuk, jok konganggap mik sobagai Hotalak mik. 55 Sobenar ah ihkam iyam nyokonok Iyok, totahpik Ahkuk sokonak Kuk Iyok. Ngindoi Ahkuk marak ah Ahkuk iyam nyokonok Iyok, mahkak Ahkuk ulun jok bobalik havoi mbak ihkam. Ahkuk sokonak Kuk Iyok khavun Ahkuk pahtuh mbak auh-Ah. 56 Abraham tahtuk ajuh mik ngandah kotului iyok touk nohtok ondo kotihkak Ahkuk lombut. Iyok was umbot noh nohtok ah khavun iyok punak ngandah.”
57 Khavun hiyon dolang ulun Yahudi ahkan Yesus nok: “Umur Muk jaham sapai liman puluk toun, yam mukin Ihkok was nohtok Abraham!”
58 Yesus mutah doh: “Punak tuꞌuk inon jok pomarak Kuk ahkam muk: Sojaham Abraham konganak Ahkuk was arok.”
59 Khavun ulun Yahudi erih ngonin bahtuk kanik muhkah Iyok nyiring mahtoi, totahpik Yesus mosuhuk khavun tulak tahkan Lovun Hotalak erih.