Yesus cuhun dolang arik okak Ah noku Yudea
7
Umbot erih Yesus nyalan khavun tulik noku kota khavun kota jok bohkon nuk provinsi Galilea. Yesus eleu ah tulak noku daerah Yudea kotului dolang pomipin Yahudi nuk anai kanik munuk Yok.2 Beteng erih was donik noh ondo raya Pondok Dauna. 3 Mahkak hiyon dolang arik okak Yesus ahkai Ah: “Tulak noh tahkan ohtoi khavun noku Yudea, supayak dolang murit-Muk touk nohtok dolang aꞌang jok motaher jok konguam-Muk. 4 Yarok ulun jok ahkan nyuhuk inon jok konuai ah, ngindoi iyok kanik paring ulun taꞌai mongenai arop ah. Khavun ngindoi Ihkok nguan aꞌang jok motaher kolo erih, paring ulun jok nuk duniak alah nohtok ah!” 5 Dolang arik okak-Ah nuhtui naing erih kotului idoh pun iyam pocayak mbak Iyok.
6 Hiyon Yesus ahkan doh: “Mirak pun ihkam touk tulak noku Yudea, totahpik huntuh jaham ohkot Kuk tulak noku anai. 7 Ulun luvang duniak tuh yam taꞌai becik mbak ihkam. Totahpik Ahkuk konomecik doh, kotului Ahkuk marak ah nulo ngindoi inon jok konguan ulun luvang duniak tuh jaek. 8 Tulak noh ihkam noku porayaan Pondok Daun erih. Ahkuk iyam tulak kotului jaham tumbas ohkot ah ahkak-Kuk.” 9 Umbot Yesus bokesah naing erih ahkan dolang arik okak-Ah, Iyok pun mocon nuk Galilea.
10 Totahpik umbot dolang arik okak-Ah tulak noku porayaan Pondok Daun erih, Yesus bongoi ah tulak toni-tonih supayak yarok ulun jok taꞌai ah. 11 Kotahin porayaan erih, dolang pomipin Yahudi ngurah Iyok khavun bokisok mbak dolang ulun jok arok nuk anai, hiyon doh: “Nuk amoh ulun erih?”
12 Tumbuk ulun jok hosokinok mongenai Yesus. Arok jok marak ah: “Iyok ulun pios.” Arok kak jok marak ah: “Iyam! Iyok ngolanyat ulun arok.” 13 Totahpik yarok icok behtik pun jok bohanyik bokesah nuk husuk ulun arok mongenai Iyok kotului idoh mihkoh konohukum dolang pomipin Yahudi.
Kosaksian Yesus mongenai arop-Ah
14 Nuk tohu-tohun porayaan erih, Yesus nyolong noku Lovun Hotalak, khavun ngajar nuk anai. 15 Dolang pomipin Yahudi erih pusong mbak inon jok kongajar-Ah khavun hiyon doh: “Bohkolo Ulun ihtuh touk taꞌai mongenai ajar barak erih, sobenar ah Iyok iyam pujik bolajar kolo ihtok?”
16 Hiyon Yesus mutah doh: “Inon jok kongajar Kuk tuh, iyam ajar barak tahkan arop Kuk bongok, totahpik ajar barak tahkan Iyok jok nguhtus Ahkuk. 17 Ulun jok kanik pahtuh nguan kokanin Hotalak, ahkan kotaan inon leh ajar barak Kuk lombut tahkan Hotalak, ngindoi iyam tahkan arop Kuk. 18 Ulun jok nongak ajar barak ah bongoi ngurah supayak iyok konolehkak. Totahpik ulun jok ngurah supayak Iyok jok nguhtus konolehkak, ulun erih bokesah hinut khavun iyam bobalik. 19 Iyam leh Musa was nongak Hukum Taurat ahkan mik? Totahpik iyam arok nuk holang ihkam jok pahtuh mbak Hukum Taurat erih. Ngombai ihkam ngotiak munuk Ahkuk?”
20 Ulun arok erih mutah ah: “Ihkok sonyorupang roh jaek! Iyai jok ngotiak munuk Kok?”
21 Yesus mutah ah: “Icok kiyak aꞌang jok motaher jok konguak Kuk beteng Ondo Sabat khavun ihkam pusong. 22 Totahpik iyam leh beteng Ondo Sabat ihkam malax anak kinyam bahkas supayak pahtuh mbak Hukum Taurat jok tonongak Musa. Kotuui ah Musa iyam nongak porahturan malax. Porahturan erih tahkan tahtuk ajuh tok jok bolum sojaham Musa. b 23 Ngindoi ihkam malax anak kinyam bahkas beteng Ondo Sabat kotului ihkam pahtuh mbak Hukum Taurat jok tonulih Musa, iyam pahtut ihkam birat kotihkak Ahkuk ngopios ulun beteng Ondo Sabat. c 24 Arak nai ihkam ngohakim ulun mbak inon jok tonohtok mik kiyak, totahpik ngohakim ah noh ulun erih mbak inon jok tuꞌuk-tuꞌuk torjadik.”
Tuꞌuk leh Yesus Lacak Ponyolamat?
25 Khavun arok pirak behtik ulun Yerusalem marak ah: “Iyam leh Iyok tuh jok honong kongurah khavun kanik pomunuk doh? 26 Nohtok ah noh Iyok bokesah nuk husuk ulun arok, yarok icok behtik ulun pun jok ngombohok khavun nondok Yok bokesah. Anggar ah dolang pomipin tok was taꞌai ngindoi Iyok arok noh Lacak Ponyolamat. 27 Totahpik ngindoi Lacak Ponyolamat lombut, iyam arok icok behtik ulun pun taꞌai tahkan amoh polombut-Ah! Totahpik ihtok kan taꞌai tahkan amoh polombut Iyok ihtuh.”
28 Khavun beteng Yesus honong ngajar nuk Lovun Hotalak Iyok bokesah mbak auh jok mohing: “Tuꞌuk noh ihkam was taan mik Ahkuk khavun tahkan amoh polombut Kuk. Totahpik Ahkuk iyam lombut kotului kokanik Kuk. Ahkuk konguhtus Amai Kuk jok touk kam pocayak ah. Totahpik ihkam iyam nyokonok Iyok. 29 Ahkuk nyokonok Iyok, kotului Ahkuk lombut tahkan Iyok, khavun Iyok noh jok nguhtus Ahkuk.”
30 Beteng erih arok pirak behtik ulun jok arok nuk anai ngotiak navan Yesus, totahpik yarok jok duon doh navan Yok, kotului jaham jocok ohkot ah. 31 Tumbuk nuk holang ulun-ulun erih jok pocayak mbak Yesus, khavun hiyon doh: “Ngindoi Lacak Ponyolamat erih lombut, inon leh Iyok touk nguan tumbuk aꞌang jok motaher holovik hinok tahkan Ulun ihtuh.”
32 Dolang ulun Parisi nyonih ulun arok erih hosokinok bokesah mongenai Yesus. Kotului erih, havo-havoi mbak dolang pomipin agamak, idoh nyuhuk dolang potugas Lovun Hotalak tulak navan Yesus. 33 Yesus bokesah ahkan ulun arok jok nuk luvang Lovun Hotalak: “Iyam tahik nai Ahkuk mocon nuk holang ihkam. Umbot erih Ahkuk ahkan bulik noku Iyok jok nguhtus Ahkuk. 34 Ihkam ahkan ngurah Ahkuk, totahpik iyam duon mik tobarung mbak Ahkuk, kotului iyam taan mik lombut noku amoh Kuk mocon.”
35 Khavun dolang pomipin Yahudi bokesah icok mbak jok bohkon: “Ulun ihtuh kanik tulak noku amoh sohinggak iyam taan tok tobarung mbak Iyok? Inon leh Iyok kanik tulak noku ulun-ulun Yahudi jok mocon nuk luar nogarak nuk holang bangsak Yunani, khavun Iyok kanik ngajar bangsak Yunani erih? 36 Inon manak jok hiyoi-Ah: Ihkam ahkan ngurah Ahkuk, totahpik iyam duon mik tobarung mbak Ahkuk, kotului iyam taan mik lombut noku unuk Kuk mocon?”
Danum jok nongak komolum
37 Ondo jok pongohpah ah nuk luvang porayaan Pondok Daun, yok erih ondo jok punak peting beteng porayaan erih. Yesus tombok nuk Lovun Hotalak khavun bokesah mbak auh jok mohing: “Ulun jok haus lombut noh noku Ahkuk supayak ngorih. d 38 Iyai pun ulun jok pocayak mbak Ahkuk, aꞌang erih was tonulih luvang Kitab Suci: ‘Tahkan luvang ahtoi ah nyalut danum jok nongak komolum.’ ” e 39 Yesus bokesah mongenai Roh Hotalak, jok ahkan tonorimak ulun jok pocayak mbak Iyok. Kotului beteng erih Hotalak jaham nongak Roh-Ah ahkan doh. Kotului Yesus jaham kongahtang noku unuk jok konolehkak yok erih nuk surga.
40 Tumbuk ulun nyonih inon jok pomarak Yesus, khavun nuk holang idoh arok jok marak ah: “Ulun ihtuh mihtik nabik jok kongindoi tok!”
41 Jok bohkon marak ah: “Iyok arok noh Lacak Ponyolamat!”
Totahpik arok kak jok bohkon marak ah: “Ah, yamukin Lacak Ponyolamat lombut tahkan Galilea! 42 Luvang Kitab Suci tonulih ngindoi Lacak Ponyolamat arok noh koturun Daud khavun ahkan lombut tahkan Betlehem, yok erih kapung pongolovuk Daud.” f 43 Mahkak lopung noh batah jeleh nuk holang ulun arok, mongenai Yesus. 44 Arok pirak behtik jok kanik navan Iyok, totahpik yarok icok behtik pun jok nukik behtiu-Ah.
Dolang pomipin Yahudi iyam kanik pocayak mbak Yesus
45 Kotihkak dolang potugas Lovun Hotalak jok sonyuhuk tulak navan Yesus lombut hinok, dolang kopalak pomipin agamak Yahudi khavun ulun-ulun tahkan golongan Parisi erih bokisok, hiyon doh: “Ngombai ihkam iyam ngonin Iyok noku ohtoi?”
46 Dolang potugas erih mutah ah: “Jaham pujik icok behtik kolunon pun jok ngajar kolo Iyok ihtuh!”
47 Khavun ulun Parisi erih mutah doh: “Ahkai, ihkam halik lajat konguai-Ah! 48 Inon leh ihkam pujik nyonih ah arok nuk holang pomipin tok khavun dolang ulun Parisi jok pocayak mbak Yesus? 49 Totahpik ulun arok tuh jok iyam taan doh mongenai Hukum Taurat, idoh ahkan konohukum Hotalak!” 50 Nuk ohtoi arok icok behtik ulun Parisi ngarai ah Nikodemus, iyok pujik lombut noku Yesus. Hiyon Nikodemus ahkan ulun Parisi jok bohkon: g 51 “Monurut Hukum Taurat, ulun iyam taꞌai konohukum sojaham ihtok nyonih iyok bokesah khavun morisak kosalak jok konuai ah.”
52 Totahpik dolang pomipin Yahudi erih mutah ah: “Inon leh ihkok tahkan Galilea kak? Hodilik ah luvang Kitab Suci. Ihkok ahkan taꞌai iyam arok nabik polombut ah tahkan Galilea.”
Icok behtik bavik tiruh mbak bahkas jok iyam bosai ah
53 Umbot erih, paring ulun bulik noku lohpo doh.