Yesus moletah duok balas murit Ah
(Mat. 10:5-15; Mrk. 6:7-13)
9
Icok ondo Yesus naꞌah duok balas murit Ah, khavui Ah nongak doh kuasa unuk doh ngusir otuk, khavun ahkan nyahkang dolang ponyahkit. 2 Khavun Iyok nguhtus idoh ahkan nyahkang tumbuk ulun khavun narung inon kolo ah Hotalak momorintah jadik Lacak. 3 Hiyoi Ah ahkan doh: “Arak ngomin inon-inon nuk ponyalam, arak ngomin sokuhut, arak bohatik ukun ponguman, duit, khavun arak ngomin saliu muk.a 4 Khavun ngindoi ihkok uwas tonorimak nuk luvang icok lovuk, kapat noh nuk anai nyiring ihkok tulak noku kota bohkon. 5 Khavun ngindoi arok ulun-ulun jok iyam kanik norimak ihkok, tulak nai tahkan kota erih khavun nopihkih ah korovuk tahkan paꞌam muk, ahkan tandak poringatan ahkan idoh tului Hotalak ahkan ngohukum idoh.”6 Murit-murit Ah erih turus tulak khavun idoh noliung dolang kapung, tahtup idoh nyahkang tumbuk ulun khavun narung inon kolo ah Hotalak momorintah jadik Lacak.
Herodes khavun Yesus
(Mat. 14:1-12; Mrk. 6:14-29)
7 Kotihkak lacak Herodes jok momorintah unuk wilayah Galilea, iyok nyonih paring aꞌang jok motaher jok uwas konguan Yesus. Herodes pusong umbak ah, tului arok ulun marak ah: “Yesus Iyok noh Yohanes jok hulik bolum tahkan holang ulun mahtoi.” b 8 Arok kak ulun marak ah: “Yesus Iyok noh nabik Elia jok uwas kongahtang Hotalak noku surga nai lomoi hulik lombut.” Khavun arok kak ulun ngohavot ah: “Yesus, Iyok noh icok behtik tahkan nabi-nabik lomoi, uwas hulik bolum tahkan holang ulun mahtoi.”c 9 Totahpik Herodes marak ah: “Yohanes uwas tonohtok kuk ujat ah, khavun iyai poh Iyok ihtuh rih? Bojoin kuk nyonih kesah Ah.” Khavui Herodes ngorihan ahkai touk bohavung umbak Yesus.
Yesus mokuman limok kujan behtik
(Mat. 14:13-21; Mrk. 6:30-44; Yoh. 6:1-14)
10 Kotihkak rasul-rasul jok konguhtus Yesus erih hulik bulik, idoh ngesah ah ahkan Yesus inon jok uwas umbot idoh nguai. Khavun Yesus ngihit doh noku kota Betsaida, sohinggak idoh kiak jok hicok umbak Iyok. 11 Totahpik taꞌan ulun arok Yesus nuk anan khavun doh ngohasuk Iyok. Yesus norimak idoh khavui Ah bokesah bohkolo ah Hotalak momorintah jadik Lacak khavun Iyok ngopios ulun-ulun jok kanik konopios.
12 Kotihkak ondo uwas ngolomik, lombut noh koduok balas behtik murit Ah noku Iyok, khavui doh bokesah: “Guruk Nyuhuk ah noh ulun-ulun arok atuh tulak, ahkan doh noku kapung-kapung khavun noku desa-desa kohosilak ihtuh ahkan ngurah unuk kapat khavun unuk kuman, tului ohtoi ihtok arok unuk jok bungun.”
13 Totahpik Yesus mutah ah: “Ihkam kiak nongak idoh kuman!”
Idoh mutah ah: “Ihkai arok limok roti khavun duok ocin kiak. Inon ihkai harus tulak molik ukun ahkan paring ulun tuh?” 14 Nuk anai arok sokitar limok kujan behtik ulun bahkas.
Khavun Yesus mutah murit-murit Ah: “Nyuhuk paring ulun tuot hokorumbuk sokitar liman puluk behtik icok korumbuk.”
15 Murit-murit Yesus turus nyuhuk ulun arok erih tuot hokorumbuk. 16 Khavun Yesus ngomin limok roti khavun duok ocin erih, Iyok nokarak noku langit, nyavot berkat noku Hotalak. Umbot erih Iyok nyilak roti khavun ocin erih hapan longoi Ah, khavui nongak ah ahkan murit-murit Ah, ahkan doh magik ah ahkan ulun arok. 17 Khavun idoh paring ah kuman nyiring bosuh. Umbot erih murit-murit Yesus ngupur putan ukun ponguman erih, tisai ah duok balas bahkun.
Kongahkuk Petrus mongenai Yesus
(Mat. 16:13-19; Mrk. 8:27-29)
18 Icok ondo, beteng Yesus bodoa bongoi Ah, murit-murit Ah arok nuk hokosilak erih, khavun idoh lombut noku Iyok. Yesus bokisok umbak idoh: “Monurut hiyon ulun, Ahkuk tuh iyai?”
19 Idoh mutah ah: “Arok jok marak ah Ihkok rih Yohanes Pombaptis. Arok kak jok marak ah: Ihkok nabik Elia, jok bohkon hinok marak ah: Ihkok iyok noh icok behtik tahkan nabi-nabik jaman lomoi jok hulik bolum tahkan holang ulun mahtoi.” d
20 Kisok Yesus: “Totahpik monurut emik bongon mik, Ahkuk ihtuh iyai?”
Khavun Petrus mutah Ah: “Ihkok Lacak Ponyolamat jok kongojanjik Hotalak.”e
Yesus bokesah mongenai Iyok ahkan kongonjorak khavun ahkan mahtoi
21 Khavun Yesus marak ahkan murit-murit Ah: “Arak sama sinok marak aꞌang ihtuh ahkan iyai pun.” 22 Yesus marak Ah kak: “Ahkuk, Anak Kolunon, pahtut kongonjorak khavun kongolavan okok-okok ulun Yahudi, kopalak okon-okon agamak, khavun guru-guruk agamak. Khavun Ahkuk ahkan pomunuk, totahpik hun ondo kotoluk ah Ahkuk ahkan hulik bolum tahkan holang ulun mahtoi.”
23 Umbot erih Yesus marak ahkan paring ulun jok arok unuk anai, hiyoi Ah: “Ulun jok kanik ngohasuk Ahkuk, harus nohtah jok kopoduluk arop ah bongoi, nakung salib ah tiap ondo, khavun tuꞌu-tuꞌui ngohasuk Ahkuk. f 24 Tului ulun jok kanik motahan komolum ah khavun kopoduluk ah nuk duniak tuh, ahkan niho komolum nuk surga. Totahpik ulun jok nohtah komolum ah khavun kopoduluk ah kotului Ahkuk, iyok ahkan sonyolamat. g 25 Mahpah ah noh ngindoi ulun jok ngutama kopoduluk ah, ngonduon paring suang duniak ihtuh totahpik iyok niho komolum ah nuk surga. 26 Ngindoi ulun miak ngahkuk arop ah ngohasuk Ahkuk, khavun iyok iyam kanik ngohasuk auh Kuk, Ahkuk Anak Kolunon ahkan miak ngahkuk ulun erih. Beteng ondo Ahkuk lombut nok nahtup kuasa Kuk khavun luvang kuasa Amai Kuk khavun molekat-molekat kudus. 27 Nyonih ah noh pios-pios: Jok kotetu ah nuk holang ulun jok arok nuk ohtoi, arok jok iyam ahkan mahtoi sojaham idoh nohtok Hotalak momorintah jadik Lacak.”
Yesus kongolehkak nuk isung puruk
(Mat. 17:1-8; Mrk. 9:2-8)
28 Sokitar jaluk ondo umbot Yesus ngajar, Iyok ngomin Petrus, Yohanes khavun Yakobus, turus nuhkat noku isung puruk ahkan bodoa.h 29 Kotihkak Iyok honong bodoa, tapak Ah malik, khavun hatiu Ah malik puhtik ngolondang. 30 Khavun nyolengak marah duok behtik ulun jok bokesah umbak Iyok, iyok noh nabik Musa khavun nabik Elia. 31 Dorok mokarah arop dorok nuk luvang kotarang jok ngolondang khavun bokesah mongenai pahtoi Ah nuk Yerusalem havoi umbak evak Hotalak. 32 Kotihkak erih Petrus khavun dolang jolahai ah tiruh, idoh nyolengak monyun, khavun nohtok Yesus tarang ngolondang khavun duok behtik ulun erih tombok donik Iyok. 33 Beteng duok behtik ulun erih ahkan nohtah Yesus, Petrus marak ahkan Yesus: “Guruk, tamam tuꞌuk ihtok unuk ohtoi. Bohkolo ngindoi ihkai motombok toluk balai, icok ahkan Guruk, icok ahkan nabik Musa khavun icok hinok ahkan nabik Elia.” Petrus bokesah koderih nahtup iyok iyam ngorehti inon jok kongohavot ah.
34 Beteng Petrus honong bokesah, idoh tonuhtup havun jok lombut noku isung idoh, sohinggak idoh mihkoh. 35 Khavun tahkan havun erih sonyonih arok auh jok marak Ah: “Ihtuh noh Anak Kuk jok kongopilik Kuk, nyonih ah noh Iyok!”i
36 Ulik auh erih tondok, idoh nohtok Yesus bongoi nuk anai. Murit-murit Yesus ngivak paring aꞌang jok tonohtok doh erih nuk luvang ahtoi doh, khavun beteng erih idoh iyam ngohavot ah ahkan iya-iyai.
Yesus ngopios anak jok sonyolong otuk
(Mat. 17:14-18; Mrk. 9:14-27)
37 Hondo havun ah Yesus khavun doh toluk murit Ah mosuluh tahkan puruk, khavun ulun arok lombut noku Yesus. 38 Arok icok behtik ulun bahkas tahkan tohun-tohun ulun arok erih ngoriak: “Guruk, ngavat ahkuk nohtok anak kuk, iyok ico-icok ah anak kuk. 39 Ngindoi otuk erih nyolengak nyarang iyok, iyok nyolengak ngoriak khavun behtiu ah nyolengak kohecang konyereng nyiring baui ah ngolopuhtak. Otuk erih turu-turus monyorak iyok khavun beleu boluak tahkan iyok! 40 Ahkuk umbot nyavot umbak murit-murit Muk nenih ahkan idoh ngusir otuk erih, totahpik idoh iyam taꞌan doh.”
41 Mahkak hiyon Yesus: “Oo ihkam jok iyam pocayak, ihkam ulun lajat! Boh kotahiu ah hinok Ahkuk harus mocon humbak umbak ihkam khavun sabar noharep ihkam? Ngomin anak muk erih kohtoi!”
42 Khavun kotihkak anak erih ngononik Yesus, otuk erih nyoketap iyok noku tanak khavun ngundek nguruk behtiu ah. Totahpik Yesus nyuhuk otuk erih boluak tahkan anak kinyam erih khavun ngopios anak erih. Khavui ngitot ah noku amai ah. 43 Paring ulun erih salut nohtok kuasa Hotalak jok punak hajok kotihkak paring ulun erih honong salut umbak paring jok konguai Ah erih, Yesus bokesah umbak murit-murit Ah: 44 “Nyonih ah noh pios-pios auh Kuk, arak nolingau ah inon jok kongohavot Kuk ihtuh: Ahkuk, Anak Kolunon, ahkan sonyerah noku ulun jok bokuasak.” 45 Totahpik murit-murit Yesus erih iyam ngorehti inon jok pomarak Ah. Aꞌang erih sonyuhuk tahkan idoh ahkan idoh iyam ngorehti, totahpik idoh mihkoh ngisok Iyok.
Iyai jok hajok nuk holang dolang murit
(Mat. 18:1-5; Mrk. 9:33-37)
46 Khavun murit-murit Yesus hobatah tului iyai nuk holang idoh jok paling hajok. j 47 Yesus taꞌai inon jok pomihkir doh. Tului erih Iyok ngonin icok behtik anak kinyam khavui motombok anak erih nuk bolihkat Ah. 48 Khavun Iyok marak ahkan murit-murit Ah: “Ulun jok norimak anak ihik tului ngohasuk Ahkuk, rehti ah norimak Ahkuk kak. Khavun ulun jok norimak Ahkuk, rehti ah norimak Iyok jok nguhtus Ahkuk. Tului iyai jok paling koik nuk holang ihkam, iyok noh jok paling hajok.” k
Ulun jok iyam ngolavan ihkam, rehti ah hilak ihkam
49 Yohanes marak ah: “Guruk, ihkai nohtok ulun ngusir otuk hapan ngaram Muk. Khavun ihkai majak iyok tului iyok iyam tahkan ihtok.”
50 Totahpik Yesus marak Ah: “Arak majak iyok! Tului ulun jok iyam ngolavan ihkam rehti ah iyok nuk silak ihkam.”
Icok kapung nuk Samaria iyam kanik norimak Yesus
51 Kotihkak uwas donik beteng Yesus kongahtang noku surga, Iyok ngopuhtus Ah ahkan tulak noku Yerusalem. 52 Mahkak Iyok nyuhuk ulun-ulun holuk tulak. Khavun doh turus tulak. Khavui nyolong noku icok kapung nuk Samaria ahkan nyiap paring aꞌang ahkan Yesus. 53 Totahpik ulun nuk kapung erih iyam kanik norimak Yesus, tului nyahtak Iyok kanik tulak noku Yerusalem. 54 Mahkak beteng hun erih murit-murit Yesus, iyok noh Yakobus khavun Yohanes nyonih auh erih, idoh marak ah ahkan Yesus: “Tuhan, inon Tuhan kanik ihkai nyavot ahpui mosuluh tahkan langit unuk ngohpah ulun-ulun ihtuh?”l
55 Ahkan totahpik Yesus ngulos arop Ah khavun ngomirat idoh. 56 Umbot erih idoh tulak noku kapung jok bohkon.
Ulun-ulun jok kanik ngohasuk Yesus
(Mat. 8:19-22)
57 Beteng Yesus khavun murit-murit Ah nurus ponyalan doh, arok ulun bokesah umbak Yesus: “Guruk, ahkuk kanik ngohasuk Guruk noku amoh kiak!”
58 Yesus mutah ah: “Asuk jok molos khavun ocin naꞌang tepun kosalah ah, totahpik Ahkuk, Anak Kolunon, iyam arok unuk Kuk kaling.” 59 Khavun Yesus marak ahkan ulun jok bohkon: “Ngohasuk ah noh Ahkuk!”
Totahpik ulun erih marak ahkai Ah: “Guruk, ahkuk promisik bulik holuk kanik nanom amai kuk.”
60 Yesus mutah ah: “Ulun jok iyam pocayak umbak Ahkuk havoi umbak ulun jok uwas mahtoi. Mosuah ah noh idoh jok mahtoi nanom havoi arop doh jok mahtoi. Totahpik ihkok, tulak khavum narung ah nuk amo-amoh bohkolo ah Hotalak momorintah jadik Lacak.”
61 Arok kak icok behtik ulun bohkon bokesah: “Guruk ahkuk kanik ngohasuk Guruk, totahpik ahkuk kanik promisik holuk umbak bari-basak basak kuk.”m
62 Yesus marak ahkan ulun erih: “Ulun jok honong nyakul khavui moliyo noku lihkut, iyam pahtut ahkan umbak Hotalak.”