Yesus nguhtus pihtun puluk murit Ah
10
Ulik erih Yesus ngopilik pihtun puluk murit Ah jok bohkon, khavui nguhtus doh duo-duok behtik ahkan doh holuk tulak tahkan Iyok noku paring kota khavun unuk jok huang Ah ahkai lombut. 2 Hiyoi Ah ahkan idoh: “Paroi jok uwas touk kongohtom yamios karoi ah, totahpik jok korejak nyohiyot. Tului erih nyavot ah noh umbak Hotalak jok tepun umok, ahkan Iyok motiang ulun jok ahkan ngohtom hasil umoi Ah. a 3 Tulak noh huntuh! Ahkuk nguhtus ihkam kolo anak domba unuk tohun-tohun kulih. b 4 Arak noh ngomin dopet duit, beriut totai bohatik khavun sindal khavun arak noh tondok tahi-tahik nuk tohun jalan ahkan ngohavot salam nuk luvang ponyalam.c 5 Ngindoi ihkok nyolong noku luvang icok lohpo, jok harus holuk ihkok ngohavot ah: ‘Mudah-mudah Hotalak nguan paring lihit liting muk cehat borikas nuk paring aꞌang nuk luvang lohpo ihtuh.’ 6 Ngindoi anan arok ulun jok baꞌas hokopios, salam kopios muk ahkan tehtap ahkai ah. Totahpik ngindoi ulun iyam kanik norimak ihkam, mahkak berkat Hotalak jok kongohavot mik iyam arok ahkan nuk luvang lohpo erih. 7 Mocon noh nuk luvang lohpo ulun jok kanik norimak ihkam, kumai ah noh inon jok kongahtang doh nuk anai ahkam mik, tului ulun jok korejak pahtut norimak uhpah ah. Arak kahtun pindah tahkan icok lohpo noku lohpo jok bohkon. d 8 Ngindoi ihkam lombut noku icok kota khavun nuk anai ihkam tonoharang umbak pios, kumai ah noh inon jok kongahtang nuk anan ahkam muk. 9 Nyahkang anoh ulun-ulun jok poros nuk kota erih, khavun narung ah noh ahkan ulun-ulun nuk anai: ‘Hotalak uwas manyo noh lombut momorintah jadik Lacak nuk tohun-tohun ihkam.’ 10 Totahpik ngindoi ihkam lombut noku icok kota, khavun nuk anai ihkam iyam tonorimak, tulak noh noku jalan jok hajok, khavum ngohavot ah umbak auh jok mohing: e 11 ‘Korovuk kota mik jok lehket unuk paꞌan kai, ihkai nopihkih ah ahkan poringatan ahkam mik kotului ihkam ahkan kongohukum Hotalak. Totahpik poduluk kam taꞌai ah Hotalak manyo noh lombut momorintah jadik Lacak nuk tohun-tohun ihkam!’ 12 Ahkuk ngohavot ah ahkam muk: Beteng Ondo Kiamat, Hotalak ahkan ngohukum ulun nuk kota erih holovik kojorak ah umbak ulun nuk kota Sodom.” fHotalak ahkan ngohukum kota-kota jok iyam norimak Yesus
(Mat. 11:20-24)
13 “Colahkak noh ihkok ulun-ulun kota Korajim khavun ulun-ulun kota Betsaida, tului tumbuk ah aꞌang jok motaher uwas umbot Ahkuk nguai ah nuk tohun ihkam, podahal ngindoi ulun nuk kota Tirus khavun kota Sidon jaman lomoi nohtok ah aꞌang jok motaher erih pasti idoh umbot botobat khavun monasar umbak dosa-dosa doh.g 14 Beteng Ondo Kiamat Hotalak ahkan ngohukum ihkam holovik kojorak ah umbak ulun-ulun Tirus khavun ulun Sidon. 15 Khavun ihkok ulun Kapernaum! Ihkok pihkir Hotalak ahkan ngahtang ihkok nuk surga nai? Iyam! Tului ihkok ahkan indo noku noraka.”h
16 Khavun Yesus ngohavot ahkan murit-murit Ah: “Ulun jok pocayak umbak inon jok kongohavot mik, idoh pun pocayak umbak inon jok kongohavot Kuk. Khavun ulun jok ngomelek ihkok, iyok ngomelek Ahkuk. Khavun iyai jok ngomelek Ahkuk, iyok uwas ngomelek Hotalak jok nguhtus Ahkuk.”i
Pihtun puluk murit-murit erih bulik noku Yesus
17 Pihtuk puluk murit erih bulik nahtup kandah doh, hiyon doh: “Tuhan, otuk-otuk halik mindak umbak ihkai ngindoi ihkai momorintah umbak ngaram Muk!”
18 Khavun hiyon Yesus ahkan doh: “Ahkuk nohtok Iblis, iyok noh okon paring otuk, jok nohkah tahkan langit kolo kilap. 19 Poduluk ihkam taꞌai ah! Ihkam uwas umbot itot Kuk kuasa, ahkan mik touk nicak lohik khavun kahtip kalak nahtup molot paring komuhat musuh mik, sohinggak iyam arok jok ahkan nyolahkak ihkam.j 20 Olupoh koderih arak ihkam ngandah tului otuk-otuk erih mindak mbak ihkam. Holovik pios ihkam ngandah tului ngaram muk tonulih nuk surga.”
Yesus ngandah
(Mat. 11:25-27; 13:16-17)
21 Beteng erih ngandah kak Yesus nuk luvang Roh Hotalak. Khavun Yesus marak Ah: “Amai, Tuhan jok nguasak langit khavun duniak! Ahkuk botorimakasih umbak Ihkok, tului paring ah erih Ihkok nyuhuk ah tahkan ulun-ulun jok touk khavun ulun jok pitar, totahpik ihkok mokarah ah ahkan ulun-ulun jok tahpas ponyokulah ah. Amai, erih noh jok nyenang ahtoi Muk.
22 Paring pongotaꞌan mongenai Hotalak uwas sonyerah Ah ahkak Kuk. Iyam arok icok behtik pun mongenal Anak, salak mbak Amai. Iyam arok ulun jok mongenal Amai salak mbak Ahkuk Anak Ah, khavun ulun-ulun jok pomokenal Kuk ahkai ah Amai Kuk.”k
23 Umbot erih Yesus moliyo noku murit-murit Ah, khavui ngohavot ahkan doh kiak: “Borutung noh ihkam tului uwas nohtok inon jok uwas torjadik hun ihtuh. 24 Tului Ahkuk ngohavot ah ahkam muk: Tumbuk nabik khavun lacak jok kanik nohtok inon jok tonohtok muk, totahpik idoh iyam nohtok ah. Khavun doh kanik nyonih ah inon jok sonyonih muk totahpik iyam taꞌan doh nyonih ah.”
Kopios jok punak tulin
25 Beteng Yesus ngajar, arok icok behtik guruk agamak Yahudi tombok iyok nikos Yesus, hiyoi marak ah: “Guruk inon jok iyam taꞌai iyam kuk nguai ah, ahkak kuk touk bolum yarok tihkas nyamah ah?”l
26 Hiyon Yesus mutah ah: “Inon suang hukum Taurat jok tonulih Musa? Inon jok kongomasak muk nuk anai?”
27 Khavun guruk agamak erih mutah Ah: “Pios noh umbak Hotalak muk, umbak dolang ahtoi huang muk, umbak dolang hasong komolum muk, umbak dolang komuhat muk. Khavun pios noh umbak ulun bohkon kolo ihkok pios umbak arop muk.”m
28 Hiyon Yesus mutah ah: “Inon jok kongohavot muk rih tuꞌuk noh. Nguai nai numun jok kongohavot muk rih. Khavun ihkok ahkan bolum yarok tihkas nyamah ah.”n
29 Khavun guruk agamak erih ngolapak ah, iyok marak ah: “Ulun bohkon jok bohkolo poh jok harus pios kuk umbak ah?”
30 Khavun Yesus mutah ah: “Arok icok behtik ulun mosuluh tahkan kota Yerusalem jok tulak noku kota Yeriko. Beteng nyihing nuk jalan erih iyok tonahko ulun, iyok pomoros ulun nyiring manyo mahtoi. Dolang puat ah jok oniu ah rih omin ulun nyiring yarok tisai ah, khavun ulun erih nohtah iyok koderih kiak. 31 Hun erih tumbas kak okon agamak Yahudi nyihing nuk jalan erih. Totahpik iyok nohtok ah kiak tahkan macuk. Khavui ngoliu ah nyihing pohoi jalan. 32 Khavun arok kak ulun Lewi nyihing jalan erih. Beteng iyok nohtok ulun erih iyok ngoliu ah nyihing pohoi jalan. 33 Umbot erih arok icok behtik ulun Samaria jok nyihing jalan erih. Beteng iyok nohtok ulun jok pomoros erih, iyok masik umbak ah.o 34 Khavui ah turus ngononik ah, iyok ngavat ulun erih. Turus morasih dolang dingan ah mbak danum buak anggur, khavun nyahkang ah mbak binyak khavui ngahut dolang dingan ah erih. Khavui ah monyahkat ah noku isung kuda, khavui ngitot ah unuk ah kapat jok ahkan ngorimbit ulun jok tonahko erih. 35 Khavun hondo icok ah rih ulun Samaria erih nongak duit duok dinar ahkan ulun jok unuk ah kapat erih. Khavui ah marak ah: ‘Ngorimbit iyok pios-pios bah. Ngindoi kolo tahpas duit tuh rih, touk kuk mondahang ah, havun ngindoi kuk hulik hinok.’ ”
36 Umbot erih Yesus ngisok guruk agamak erih: “Monurut emuk tahkan idoh toluk tuh, iyai jok tuꞌuk pios umbak ulun jok buah tahko nenih?”
37 Khavun guruk agamak erih mutah ah: “Ulun jok pios erih, iyok noh ulun jok ngavat iyok jok buah tahko erih nenih.”
Khavun Yesus mutah iyok: “Tulak nai nguai ah numun jok hiyom muk erih.”
Yesus masap Marta dorok Maria
38 Umbot erih Yesus khavun murit-murit Ah nurus ponyalan doh, khavun doh dahpot nuk icok kapung. Nuk anai arok icok behtik bavik, ngarai ah Marta, iyok ngihit Yesus noku lohpo ah. p 39 Marta tepun icok behtik jolahai ah harik jok bavik ngarai ah Maria. Maria tuot donik Tuhan Yesus, iyok nyonih Yesus ngajar. 40 Totahpik Marta halu umbak korejak ah nuk lohpo ah. Iyok tulak noku Tuhan Yesus khavui ah marak ah: “Tuhan ngombai Ihkok iyam podulik umbak ahkuk. Maria mosuah ahkuk korejak bongok kuk kiak? Nikos nyuhuk Maria dohop ahkuk.”