Hal bodoa
(Mat. 6:9-13; 7:7-11)
11
Icok ondo Yesus tulak bodoa. Kotihkak Iyok umbot bodoa, arok icok behtik murit Ah jok marak Ahkai: “Guruk, ngajar ah noh ihkai bodoa, kolo jok kongajar Yohanes ahkan murit-murit ah bodoa.” 2 Hiyon Yesus marak doh: “Ngindoi ihkok bodoa, marak ah:Hotalak, Amai kai nuk surga,
Pohiyoi ah noh ngaram muk kudus khavun pomujik paring ulun,
Pohiyoi Ihkok lombut jadik Lacak nuk luvang komolum paring ulun.
3 Nongak ah noh ahkan ihkai nyinong ondo
ukun ponguman kai jok socuhkup ah.
4 Khavun ngapun ah noh ihkai tahkan dosa kai,
tului ihkai halik ngapun paring ulun jok salak umbak ihkai,
arak mosuah ihkai nyerah arop kai umbak aꞌang jok jaek.”
5 Khavun hiyon Yesus ahkan doh: “Ngindoi icok behtik nuk holang ihkam, beteng tohun ngolomik tulak noku lovuk icok behtik jolahai ah khavun marak ahkai ah: ‘Jolahak kuk, touk iyam ihkok mosanggah kuk umbak toluk roti? 6 Tului arok icok behtik jolahak kuk jok honong arok nuk holang jalan, tulik noku lovuk kuk khavun ahkuk iyam arok inon-inon ahkan kongahtang kuk ahkai ah.’ 7 Sopama jolahai jok nuk luvang lovuk erih mutah ah: ‘Arak ngalut ahkuk. Atop kuk uwas kongulin khavun ahkuk uwas tiruh hombo-homboh umbak dolang anak kuk. Ahkuk bokolas monyun ahkan nongak inon-inon ahkam muk.’ ”
8 Khavun Yesus marak ah hinok: “Oluk poh iyok jolahai ah, iyok iyam ahkan kuat khavun nongak iyok icok inon pun. Totahpik kotului ulun ah jok iyam miak nyavot nulo-nulo umbak iyok, jolahai ah ahkan kuat khavun nongak inon jok pomonuluk jolahai ah erih. 9 Jadik tului erih noh Ahkuk marak ahkam muk: Nyavot ah noh, mahkak ihkok ahkan tonongak. Ngurah ah noh, mahkak ihkok ahkan ngonduon. Ngetok ah noh, mahkak atop ahkan konguap ahkam muk. 10 Tului paring ulun jok nyavot ahkan norimak, khavun ulun jok ngurah ahkan ngonduon, khavun ulun jok ngetok ahkan konguap ahkai ah atop. 11 Nuk holang ihkam arok iyam amai jok nongak ahkan anak ah lohik, ngindoi anak ah nyavot ocin? Mihtik iyam. 12 Khavun ngindoi anak ah nyavot kotoluh, iyok ahkan tonongak ah kahtip kalak? Mihtik iyam. 13 Jadik ngindoi ihkok jok jaek, taꞌam muk nongak aꞌang jok pios ahkan anak-anak muk, mahik hinok Amai muk jok nuk surga! Iyok ahkan nongak Roh Ah ahkan paring ulun jok nyavot umbak Iyok!”
Yesus ngusir otuk boluak tahkan ulun bisuk
(Mat. 12:22-30; Mrk. 3:20-27)
14 Icok ondo Yesus ngusir otuk boluak tahkan ulun bisuk. Umbot otuk erih boluak, ulun erih nyolengak nopahtuk bokesah. Mahkak tumbuk ulun jok pusong, 15 totahpik arok nuk holang ulun jok arok erih nuhtui: “Iyok muhkok otuk erih umbak kuasa Belsebul, kopalak otuk.”a
16 Arok kak ulun-ulun bohkon jok kanik ngurah kosalaꞌan Yesus, jadik idoh nyavot icok aꞌang jok motaher ahkan tandak tului Iyok lombut tahkan Hotalak.b 17 Totahpik Yesus taꞌai pihkir doh khavui marak Ah: “Ngindoi paring ulun arok jok unuk icok korajaan idoh havoi hokolavan mahkak korajaan erih iyam ahkan tahan, khavun paring avun human jok hobomilang ahkan lohpung. 18 Koderih kak nuk luvang korajaan Iblis okon paring otuk. Ihkam marak ahkuk ngusir otuk umbak kuasa Belsebul kopalak lacak paring otuk erih. Totahpik ngindoi okon otuk erih ngolavan jok bopihak hilak iyok, mahkak korajaan ah ahkan lohpung. 19 Ihkam marak ah, Ahkuk hatin kuasa Belsebul unuk ngusir otuk erih, totahpik murit-murit muk ngusir otuk erih umbak kuasa Hotalak. Jadik murit muk bongom muk noh jok mombukti ah tului ihkam salak. 20 Totahpik Ahkuk muhkok otuk erih umbak kuasa Hotalak, erih rehti ah Hotalak uwas momorintah jadik Lacak nuk tohun-tohun ihkam.
21 Okon otuk erih touk tonindung kolo ulun jok muhat. Iyok tepun tumbuk sonjata. Tului erih paring barang bandak ah iyam duon kongorapas. 22 Totahpik ngindoi ulun jok paling muhat nyarang khavun ngalah iyok jok tepun lovuk erih, mahkak ulun erih ahkan nyombaan sonjata jok kongandar ulun jok tepun lohpo erih. Khavun ulun jok ngalah iyok jok tepun lohpo erih, ahkan magi-magik aꞌang jok sonyombang ah erih.
23 Ulun jok iyam bopihak umbak Ahkuk, kotuꞌui iyok ngolavan Ahkuk. Khavun ulun jok iyam ngonohop Ahkuk ngohumak dolang domba-domba, kotuꞌui iyok noh motasah dolang domba erih!”c
Otuk tulak, khavui hulik
(Mat. 12:43-45)
24 “Ngindoi roh jaek nohtah ulun jok sonyorupang ah erih, otuk erih ngoniling tulak noku jok tojah ngurah unuk ah mocon. Totahpik iyok iyam ngonduoi ah, otuk erih marak ah: ‘Ahkuk ahkan hulik noku lohpo jok pujik kuk nohtah ah erih.’ 25 Beteng iyok dahpot unuk anai, iyok nohtok lohpo erih borasih khavun torahtur.
26 Khavun iyok boluak ngihit pihtuk otuk jok bohkon jok tuꞌuk jaek umbak iyok. Khavun doh nyolong luvang ulun erih turus mocon nuk anan. Khavun koadaꞌan ulun erih mahik kojaek ah hinok.”
Ulun jok tuꞌuk-tuꞌuk botuah
27 Ulik Yesus nuhtui koderih, icok behtik bavik tahkan holang ulun arok erih nuhtui ahkan Yesus: “Botuah noh bavik jok dimbit khavun noposuk Ihkok!”
28 Totahpik Yesus mutah ah: “Holovik hinok botuah ulun jok ngonih Auh Hotalak khavui nguan inon jok hiyoi Ah!”
Ulun-ulun nyavot Yesus nguan aꞌang jok motaher
(Mat. 12:38-42)
29 Lambak ulun-ulun ngorumbuk Yesus, Iyok nurus auh Ah, hiyoi Ah: “Iyam miyos kojaek ah ihkam jok bolum jaman huntuh. Ihkam nyavot tandak jok motaher ahkan ihkam pocayak umbak Kuk, totahpik ihkam iyam ahkan tonongak tandak jok motaher. Tihkas icok tandak ahkan pomokarah kan mik, yok erih tandak havoi umbak tandak nabik Yunus jaman lomoi.d 30 Kolo nabik Yunus jadik tandak ahkan ulun-ulun kota Niniwe, koderih kak Ahkuk, Anak Kolunon, ahkan jadik tandak ahkan ihkam jok bolum jaman ihtuh. e 31 Hun Ondo Kiamat, puhtir nogara solatan ahkan kuat homboh umbak ihkam jok bolum beteng jaman ihtuh, khavun iyok ahkan mokarah kosalaꞌan mik. Tului puhtir erih nguan ponyalai jok macuk nyangit tahkan topahkan duniak ahkan ngonih ajar barak lacak Salomo jok horahtik. Totahpik nuk ohtoi huntuh arok jok holovik horahtik umbak Salomo. Totahpik ihkam iyam kanik pocayak.f 32 Beteng Ondo Kiamat, ulun-ulun kota Niniwe ahkan kuat homboh umbak ihkam jok bolum beteng jaman ihtuh, khavun idoh ahkan mokarah kosalaꞌan mik. Tului ulun Niniwe erih umbot botobat tahkan dosa-dosa doh kotihkak Yunus kotbah ahkan doh. Totahpik nuk ohtoi huntuh arok jok holovik hajok tahkan Yunus. Totahpik ihkam iyam kanik pocayak!”g
Tarang khavun pindong
(Mat. 5:1; 6:22-23)
33 Yesus nurus kesah Ah: “Iyam arok ulun jok nutang sumbuk khavui nyuhuk ah, ndoi iyam nuhtup ah umbak katang. Iyok ahkan nihkas sumbuk erih nuk jok isung, ahkan ulun jok nyolong nohtok kotarang ah.h 34 Mahtak iyok noh sumbuk ahkan behtik. Ngindoi mahtam muk nyoronih, paring behtim muk tarang ngolondang. Totahpik ngindoi mahtam muk biroh-biroh, paring behtim muk ahkan pindong kihtop. 35 Kotului erih touk-touk noh, arak sapai tarang jok arok umbak ihkok erih nyoriak pindong. 36 Ngindoi paring behtim muk tarang, khavun iyam sobagik pun jok pindong, mahkak paring behtim muk erih tarang ngolondang kolo sonyingah umbak kolondang sumbuk.”
Yesus nosalak ulun-ulun Parisi khavun guru-guruk agamak
(Mat. 23:1-36; Mrk. 12:38-40)
37 Ulik Yesus nuhtui, arok icok behtik ulun Parisi mangit Iyok kuman nuk lohpo ah. Mahkak nyolong noh Yesus kuk luvang lohpo erih turus tuot kuman. 38 Ulun Parisi erih pusong nohtok Yesus kuman iyam ngombuhik longoi Ah jok numun porahturan agamak Yahudi. 39 Kotului erih Tuhan marak ahkai ah: “Pahtut ihkam ulun-ulun Parisi baꞌas morasih sakir khavun pinjan nuk sarai ah kiak, totahpik nuk luvang arop muk bongom tuvik konguan komahang ahtoi khavun kojaek muk. 40 Ihkam baleh! Iyam leh Hotalak jok napak unuk luar ah erih, khavun napak nuk luvang ah kak? 41 Jadik magi-magik ah noh inon jok arok unuk ihkok ahkan ulun malax. Koderih noh ihkok havoi umbak mangkok jok borasih nuk husuk Hotalak, borasih nuk luar khavun nuk luvang ah.
42 Colahkak noh ihkam, ulun-ulun Parisi! Kotului tahkan dolang kanyap kihtap ihkam nongak perpuluhan ahkan Hotalak, totahpik koadilan khavun kopios ahkan Hotalak iyam ihkam maham ah. Podahal erih noh jok poduluk ihkam nguai ah, totahpik jok bohkon arak kak ihkam nolingau nguai ah.i
43 Colahkak noh ihkam, ulun-ulun Parisi! Tului ihkam andar tuot unuk jok ponolehkak nuk luvang lovuk unuk ihtok ulun Yahudi sombayang, khavun ihkam suhkak kongohormat nuk pasar-pasar. 44 Colahkak noh ihkam! Tului ihkam kolo tanom jok yarok tandak ah,j jok tonicak kongihik ulun jok iyam dok hokotaꞌan umbak ah.”
45 Icok behtik tahkan holang guruk agamak marak ahkan Yesus: “Guruk, umbak tuhtui auh erih, Ihkok mokiak ihkai.”
46 Yesus mutah ah: “Colahkak noh kak ihkam, guru-guruk agamak! Ihkam nutut aꞌang jok bohalik khavun nongak ahturan-ahturan agamak jok bahat, totahpik ihkam nyohiyot pun iyam kanik ngavat ulun ngorejak ah. 47 Colahkak noh ihkam! Ihkam napak tanom ahkan nabi-nabik jok uwas pomunuk dolang tahtuk ajuh mik. 48 Jadik ihkam bongon mik ngahkuk ngindoi ihkam sotuju inon jok konguan tahtuk ajuh mik, kotului tuꞌuk noh idoh jok munuk nabi-nabik erih khavun ihkam jok napak tanom doh. 49 Kotului erih noh Hotalak jok horahtik marak Ah: ‘Ahkuk ahkan motiang ahkan nabi-nabik khavun uhtus-uhtus Kuk. Totahpik sobagik ahkan pomunuk khavun sobagik ahkan pomonyorak.’ 50 Tului erih ihkam jok bolum jaman ihtuh ahkan kongohukum tului umbot munuk dolang nabi-nabik topahtuk duniak tonapak. 51 Tahkan topahtuk ah pomunuk tahtuk ajuh mik iyok noh Habel nyiring jok totihput ah rih idoh munuk Jakaria nuk holang mesbahk dorok Lovuk Hotalak. Pocayak noh ulun-ulun jaman ihik mihtik ahkan kongohukum kotului paring erih.l
52 Colahkak noh ihkam guru-guruk agamak! Tului ihkam uwas namit kucik unuk nguhkoi atop jalan ahkan unuk ulun nyokonok Tuhan Hotalak. Totahpik ihkam bongon mik iyam nyolong noku luvang ah, khavun ulun jok ngotiak ahkan nyolong noku luvang nai ihkam nohambang ah!”