Nosehat ahkan ihtok arak pura-purak pios
(Mat. 10:26-27)
12
Hun erih bokujan-kujan behtik ulun borobalun nyiring arok jok buah ticak-kihik paꞌai ah. Lambak ulun-ulun erih hokorumbuk, Yesus nuhtui kan murit-murit Ah: “Touk-touk noh mꞌbak lakik ulun Parisi, jok hiyok Kuk rih, balik doh.a 2 Iyam arok jok sonyuhuk jok iyam ahkan kihtan, khavun iyam arok jok kongahput jok iyam ahkan kotaꞌan.b 3 Jok kongohavot mik beteng ngolomik, ahkan konahan beteng tohun ondo. Khavun jok ihkam nyokinok ah nuk tolingan ulun nuk luvang takun jok kongatop, ahkan pomarak nuk husuk ulun arok.”Mihkoh noh umbak Hotalak
(Mat. 10:28-31)
4 “Nohouk ah noh, dolang jolahak Kuk! Arak noh mihkoh umbak kolunon jok kanik munuk behtin mik, totahpik iyam duoi nguai jok holovik umbak erih. 5 Tului erih noh Kuk marak ahkam muk umbak iyai jok poduluk ihkam mihkoh Ah. Mihkoh noh umbak Hotalak! Tului salak umbak bokuasak munuk kolunon, Iyok bokuasak kak ngindo ulun noku luvang noraka! Pocayak noh, Iyok noh jok poduluk kam mihkoh ah.
6 Limok kungan ocinaꞌang opit pomorahkang solehkak duok kobikap duit jok koik nilai ah. Oluk poh koderih iyam icok kungan pun jok tonolingau Hotalak. 7 Balo muk kiak uwas toniap paring ah. Kotului erih arak noh mihkoh, ihkam holovik bolehkak mbak ocinaꞌang opit erih!”
Ngahkuk Yesus nuk husuk ulun arok
(Mat. 10:32-33; 12:32; 10:19-20)
8 “Nyonih ah noh pios-pios: Ulun jok ngahkuk Ahkuk nuk husuk ulun arok tului iyok ngohasuk Kuk, Ahkuk Anak Kolunon ahkan ngahkuk iyok kak nuk husuk molekat-molekat Hotalak. 9 Totahpik ulun jok iyam ngahkuk Ahkuk nuk husuk ulun arok tului iyok ngohasuk Kuk, Ahkuk Anak Kolunon, iyam ahkan ngahkuk iyok kak nuk husuk molekat-molekat Hotalak.
10 Ngindoi arok ulun nuhtui jok ngolavan Ahkuk Anak Kolunon, iyok ahkan kongapun, totahpik ngindoi ngohinak Roh Hotalak, iyok iyam duon kongapun.c
11 Ngindoi ihkam kongomin noku lovuk-lovuk unuk ulun Yahudi sombayang ahkan kongadil nuk husuk pomoretah atau pongusak, arak noh mihkoh umbak inon kolo ihkam poduluk ngobela arop khavun inon jok poduluk ngohavot.d 12 Kotului inon jok ihkam poduluk ngohavot ah erih, ahkan kongajar Roh Hotalak ahkam muk beteng erih kak.”
Tindung ulun tahto jok baleh
13 Icok behtik ulun nuk holang ulun arok nuhtui ahkan Yesus: “Guruk, nikos Ihkok nyuhuk jolahak kuk harik nongak ahkak kuk sobagik tahkan ponahto jok tonohtah amai kai.”
14 Yesus mutah ah: “Iyai jok nguan Ahkuk jadik hakim khavun tuhkang pagik ponahto nuk holang borok?” 15 Khavun ahkan paring ulun jok nuk anan Yesus marak Ah: “Touk-touk noh khavun siap noh, arak sapai ihkam bokahuk. Tului bolum iyam bogantung tahkan ponahto ah, holuk poh ponahto holovik holeak.”
16 Khavun Yesus ngesah tindung ihtuh: “Arok icok behtik ulun tahto. Iyok tepun tanak jok nongak iyok tumbuk hasil ah. 17 Ulun tahto erih punai bopihkir nuk luvang ahtoi ah: ‘Uwas iyam arok unuk anai unuk ngivak hasil tanak kuk. Inon kiak jok ahkan konguak kuk huntuh beh?’ 18 Khavui iyok bopihkir hinok khavun nuhtui bongoi: ‘Haa, ahkuk arok pihkir. Ahkuk ahkan ngahkas uvung-uvung kuk khavun nombok bohuak uvung jok paling hajok. Nuk anan ahkuk ahkan ngivak gandum kuk khavun barang bandak kuk jok bohkon. 19 Umbot erih, ahkuk ahkan nuhtui nuk luvang ahtoi kuk: Ahkuk uwas tahto, khavun uwas arok uras noh nuk ahkuk. Khavun dolang ponahto kuk iyam ahkan tahpus soumur komolum kuk. Mahkak ahkuk ahkan tondok korejak khavun ahkuk ahkan nondok olai kuk. Khavuk ahkan kuman ngorih kiak ngomok komolum kuk jok tahto!’ 20 Totahpik Hotalak marak ahkai ah: ‘Oo ihkok ulun baleh! Ngolomik tuh kak ihkok ahkan mahtoi, khavun iyai jok ahkan ngonduon paring ah ponahto muk jok uwas umbot kok ngupur ahkan arop muk erih?’
21 Koderih noh kojadiu ah umbak paring ulun jok ngotiak kanik tahto ahkan arop ah bongoi, totahpik iyam ucaha tahto nuk mahtan Hotalak.”
Pocayak noh umbak Hotalak
(Mat. 6:25-34)
22 Khavun Yesus marak ahkan murit-murit Ah: “Kotului erih Ahkuk marak Ah: Arak noh ihkam mihkoh umbak komolum mik, mongenai inon jok ahkan ukun mik, khavun inon jok ahkan hatin mik. 23 Kotului bolum punak bolehkak tahkan ukun ponguman, khavun behtik punak bolehkak tahkan hatik. 24 Nohtok ah noh ocin naꞌang okak! Idoh iyam ngombulan, iyam ngohtom, idoh iyam tepun uvung, totahpik Hotalak nongak idoh kuman. Mahik hinok ihkam jok punak bolehkak tahkan dolang ocin naꞌang erih! 25 Ahkan inon ihkam liduk? Touk leh koliduk mik monahang hasong mik oluk poh icok ondo kiak? 26 Ngindoi aꞌang jok koik koderih kiak iyam taꞌan mik nguai, ngombai ihkam mihkoh umbak aꞌang jok bohkon?
27 Nohtok ah noh inon kolo dolak pohakung nyuluh. Dolak pohakung erih iyam korejak, iyam kak ngalo. Totahpik lacak Salomo jok koderih ponahto ah pun iyam hapan hatik jok segah kolo dolang dolak erih!e 28 Uruk nuk lahpang nyuluh ondo tuh khavun ondo havun sonyahak paring ah. Totahpik Hotalak mokajan uruk erih nyiring yamios kosegah ah. Mahik hinok ihkam! Totahpik ihkam iyam dalo pocayak! 29 Jadik, arak noh ihkam liduk umbak inon jok ahkan ukun mik khavun kongorih mik. 30 Aꞌang jok kolo erih jok atak kongurah ulun jok iyam mongenal Hotalak. Podahal Hotalak, Amai muk nuk surga nai taꞌai ihkam poduluk paring aꞌang erih. 31 Totahpik ihkam harus ngotiak nguan inon jok kojolik Hotalak, ahkan Hotalak momorintah jadik Lacak nuk luvang komolum muk, mahkak paring aꞌang erih jok pomoduluk mik ahkan tonongak Hotalak ahkam mik.”
Ponahto nuk surga
(Mat. 6:19-21)
32 “Ihkam jok ngohasuk Ahkuk, arak noh mihkoh, olupoh ihkam nyohiyot behtin mik. Tului Amai muk Hotalak rih ngandah nongak ahkam muk berkat tahkan Korajaan Ah. 33 Dahkang ah noh inon jok arok nuk ihkok, khavun nongak ah noh duit erih ahkan ulun-ulun jok malax. Ngindoi ihkam nguai numun erih, ihkam ngivak inon jok arok umbak ihkam nuk dopet jok iyam ahkan touk jaek, yok noh nuk surga. Ponahto erih iyam taꞌai niho, kotului ulun ponahko iyam taꞌai ngoniu ah khavun hamak iyam taꞌai ngorusak ah. 34 Kotului nuk amoh ponahto muk arok, nuk anai noh kak ahtoi muk!”
Jihpon jok siap bunang
35 Yesus bokesah ahkan doh, hiyoi Ah: “Bojaga-jagak noh nuk noharep paring aꞌang. Ihkam nyamah korejak ahkan Hotalak hondo ngolomik, kolo jihpon jok ngolambik bunang khavun sumbuk ah bolum bunang.f 36 Havoi umbak jihpon jok ngindoi tuan ah bulik tahkan gavik sahkik koruh. Ngindoi tuan ah bulik ngetok atop, iyok ahkan pohos nguap atop.g 37 Punak utung dolang jihpon-jihpon erih ngindoi tuan ah tosuruk umbak idoh honong siap ngindoi, oluk poh iyok lombut tohun ngolomik. Nyonih ah noh pios-pios: Tuan erih ahkan mempersiap arop ah korejak kolo jihpon. Khavun iyok ahkan nyuhuk jihpoi-jihpoi ah tuot, khavun iyok ahkan molayan idoh. 38 Punak utung dolang jihpon erih ngindoi tuan ah tosuruk umbak idoh honong siap ngindoi iyok bulik, oluk poh tuan erih lombut tohun ngolomik, ngindoi iyam iyok livat bulik. 39 Nohouk ah noh! Sopama ulun jok tepun lohpo taꞌai jam pirak ponahko ahkan lombut, iyok mihtik ahkan bojaga-jagak ahkan ponahko erih iyam nyolong lohpo ah.h 40 Kotului erih kak ihkam nyamah siap, tului Anak Kolunon ahkan lombut nyolengak iyam ihkam taꞌai ah.”
Jihpon jok sotia khavun jihpon jok iyam sotia
(Mat. 24:45-51)
41 Khavun Petrus ngisok: “Tuhan, inon leh tindung tuh rih ahkan ekai kiak ngindoi iyam ahkan paring ulun?”
42 Tuhan mutah ah: “Jadik iyai jihpon jok sotia khavun horahtik sohinggak touk pomocayak ahkan jadik pongurus lohpo tuan ah? Iyok erih noh jok kongahtang tuan ah jadik kopalak jihpon-jihpon jok bohkon ahkan nongak doh ukun tumbas kotihkak ah. 43 Punak utung jihpon erih ngindoi tuan ah hulik khavun ngonduon iyok beteng ah nguan korejak ah. 44 Nyonih ah noh pios-pios: Tuan ah erih ahkan ngopocayak dolang ponahto ah ahkan jihpon erih. 45 Totahpik ngindoi jihpon erih jaek khavun nuhtui nuk luvang ahtoi ah: ‘Tuan kuk honong tahik khavui bulik.’ Khavui ah moros paring polayan jok bohkon khavui ah kuman ngorih nyiring buso, 46 mahkak tuan ah ahkan hulik beteng ondo jok iyam iyok taꞌai ah. Khavun jihpon erih ahkan kongohukum kolo ulun-ulun jok iyam pahtuh umbak Hotalak.
47 Sotiap jihpon jok taꞌai ah inon jok kojolik tuan ah, totahpik iyok iyam sia-siap khavun iyam ngorejak ah jok kojolik tuan ah erih, iyok mihtik ahkan pomorihpit jok paling poros. 48 Totahpik iyai jihpon jok iyam iyok taꞌai kojolik tuan ah, khavui nguan aꞌang jok salak, iyok ahkan pomorihpit iyam dalo baꞌas. Tului ulun jok tonongak arok umbak iyok ahkan tonutut jok arok kak mbak iyok. Khavun jok uwas tonongak kopocayak arok, ahkan tonutut arok kak mbak iyok.”
Iyam hokopios totahpik hokolavan
(Mat. 10:34-36)
49 “Ahkuk lombut ngomin ahpui kuluvang duniak, khavun kojolik kuk ahpui erih uwas ngonyehau! 50 Totahpik honong bahat kojorak jok harus tonoharep kuk. Khavun ngindoi erih jaham umbot ahtoi Kuk liduk.i 51 Arak ihkam ngonavak Ahkuk lombut noku duniak tuh ahkan nguan ulun hicok. Ahkuk lombut ahkan nguan ulun hokolavan. 52 Tului tahkan huntuh, ulun-ulun luvang icok koluarga ahkan hokolavan kotului Ahkuk. Ngindoi arok limok behtik luvang icok kolovuk, toluk behtik ahkan ngolavan duok, ndoi iyam duok ngolavan toluk. 53 Amai ah ahkan ngolavan anak ah jok bahkas, khavun anak ah jok bahkas ahkan ngolavan amai ah. Inai ah ngolavan anak ah jok bavik khavun anak ah jok bavik ngolavan inai ah. Upuk ah jok bavik ahkan ngolavan monatui ah jok bavik, khavun monatui ah jok bavik ahkan ngolavan upuk ah jok bavik.”j
Nyokonok tandak jaman
(Mat. 16:2-3)
54 Yesus nuhtui kak ahkan ulun arok: “Ngindoi ihkam nohtok indong ondo nuk silak barat, turus noh ihkam marak ah: ‘Ahkan ucan.’ Khavun turus tuꞌuk-tuꞌuk ucan. 55 Ngindoi ihkam ngomok bahiu lombut tahkan solatan ihkam ahkan marak ah: ‘Ahkan bolasut.’ Khavun tuꞌuk-tuꞌuk bolasut. 56 Ihkam ulun jok pura-purak pios! Beteng ondo ihkam nohtok koadaꞌan langit khavun duniak, ihkam taꞌam cuaca inon jok ahkan torjadik. Totahpik hun ihkam nohtok tandak jok konguak Kuk beteng jaman ihtuh, ngombai ihkam iyam nyokonok ah inon jok ahkan torjadik? 57 Ngombai ihkam iyam muhtus ah bongon mik inon jok tuꞌuk? 58 Ngindoi arok ulun ngomin ihkam noku hukum ahkan nondah ihkam, ngotiak ah noh tuꞌuk-tuꞌuk ahkan ngumbot ah pokarak erih umbak iyok nuk tohun jalan. Ngindoi iyam, iyok ahkan nguhut ihkam noku husuk hakim, khavun hakim erih ahkan ngitot ihkam noku polisik, khavun polisik erih ahkan ngipos ihkam nuk luvang ponjara. 59 Ngindoi erih torjadik, jok kotuꞌui ah ihkam iyam ahkan boluak tahkan ponjara sojaham uhtang muk ohpah.”