Yesus mokuman ulun ohpat kujan behtik
(Mat. 15:32-39)
8
Iyam tahik hulik erih, arok ulun jok punak arok lombut kupur nuk anai. Idoh iyam tepun ukun ponguman, kotului erih Yesus naꞌah murit-murit Ah khavui bokesah: 2 “Ahkuk masik umbak paring ulun ihtuh. Was toluk ondo kotahiu ah idoh ngohasuk Ahkuk, huntuh idoh iyam arok nai ukun ponguman doh. 3 Ngindoi Ahkuk nyuhuk idoh bulik nahtup loun doh, mahkak idoh ahkan kohoran nuk tohun ponyalan doh. Mahik hinok idoh tuh arok jok lombut tahkan macuk.”4 Khavun murit-murit Yesus mutah ah: “Nuk jok bungun tuh, nuk amoh tok touk ngurah ukun ponguman supayak cuhkup ahkan ulun karon tuh?”
5 Yesus bokisok umbak murit-murit-Ah: “Arok pirak roti jok arok nuk ihkam?”
Hiyon doh mutah Yok: “Arok pihtuk.”
6 Mahkak Yesus nyuhuk paring ulun jok arok nuk anai tuot nuk isung tanak. Umbot erih Iyok ngomin pihtuk kobikap roti erih khavun mongucap sukur umbak Hotalak. Hulik erih Iyok nyipak ah roti erih umbak longoi Ah kavui nongak dolang murit-murit Ah, supayak doh nongak ulun-ulun jok arok nuk anai. Khavun murit-murit Ah turus nguai ah. 7 Idoh halik tepun pirak kungan ocin koik, Yesus turus bosukur noku Hotalak, khavun Iyok pun nyuhuk paring murit-murit Ah magi-magik ocin erih ahkan ulun arok. 8 Khavun idoh kuman nyiring bosuh. Umbot idoh kuman dolang ulun erih ngupur tisai ah pihtuk bahkun. 9 Khavun idoh jok arok nuk anai sokitar ohpat kujan ulun. Khavun Yesus nyuhuk ulun-ulun erih bulik. 10 Umbot erih Yesus khavun murit-murit Ah turus jahkat noku luvang alut khavun doh tulak noku daerah Dalmanuta.
Ulun-ulun Parisi nyuhuk Yesus nguan aꞌang jok motaher
(Mat. 16:1-4)
11 Khavun lombut pirak behtik ulun Parisi noku Yesus, umbot erih idoh hobatah umbak Iyok supayak idoh touk duon kosalak Ah. Idoh nyavot Yesus nguan aꞌang jok motaher sobagai tandak ngindoi Iyok tuꞌuk-tuꞌuk lombut tahkan Hotalak. a 12 Mahkak jaon noh Iyok nuk luvang ahtoi ah: “Ngombai ulun huntuh nyuhuk Ahkuk nguan aꞌang jok motaher? Iyam! Ahkuk iyam ahkan nguan tandak kolo erih ahkan doh!” b
13 Khavun Yesus mbak murit-murit-Ah nohtah idoh turus jahkat kuk luvang alut, khavun mihtah noku pohoi danau.
Lakik ulun Parisi khavun Herodes
(Mat. 16:5-12)
14 Nuk luvang ponyalan doh, dolang murit-murit Yesus tolingau doh ngomin ukun ponguman doh. Idoh tepun icok roti kiyak nuk luvang alut doh. 15 Khavun Yesus marak ahkan doh: “Touk-touk noh ihkam mbak lakikc ulun Parisi khavun lakik Herodes.” d
16 Mahkak paring murit Yesus nopahtuk kesah doh mongenai aꞌang erih. Khavun hiyon doh: “Iyok bokesah kolo erih, kotului ihtok iyam arok roti.”
17 Totahpik Yesus taꞌai inon jok kongesah doh erih. Khavun Yesus bokisok mbak doh: “Ngombai ihkam bokesah mongenai ukun ponguman? Ngombai ihkam yam ngorehti? Ihkam mahang jaan mik! 18 Ihkam tepun mahtak tahpik kolo ulun bobulen nih? Ihkam tepun tolingak tahpik kolo ulun borengen nih? Iyam kam nohouk ah leh e 19 beteng Kuk nyipak limok roti erih ahkan ulun limok kujan behtik, arok pirak bahkun putai ah?”
Khavun doh mutah Iyok: “Duok balas bahkun.”
20 “Beteng Kuk nyipak pihtuk roti erih ahkan ohpat kujan behtik ulun erih, arok pirak bahkun putai ah jok konupur mik?”
Khavun doh mutah Iyok: “Pihtuk bahkun putai ah.”
21 Hiyon Yesus ahkan doh: “Ngombai ihkam jaham ngorehti kak?”
Yesus ngopios ulun bobulen nuk Betsaida
22 Beteng Yesus khavun murit-murit Ah docok nuk kapung Betsaida, arok pirak behtik ulun noku Yesus idoh ngomin ulun jok bobulen. Khavun doh nyavot kavat mbak Iyok supayak nukik ulun bobulen erih khavun ngopios yok. 23 Khavun Yesus namit longon ah turus ngomin iyok boluak tahkan kapung erih. Umbot erih Yesus ngolucak mahtan ah, khavun Yesus nihkas longoi Ah noku mahtan ah, turus ngisok yok: “Inon reh ihkok was touk nohtok?”
24 Khavun ulun jok bobulen erih nohtok noku husuk ah, hiyoi ah: “Ahkuk touk nohtok ulun, tahpik honong biro-biroh kolo puꞌun kajuk jok nyalan.”
25 Yesus pun turus nihkas longoi Ah hinok noku mahtan ulun jok bobulen erih. Ulun erih ngotiak nohtok, iyok pun turus pios khavun ponohtok ah botatuk. 26 Khavun Yesus nyuhuk iyok bulik, hiyoi ah: “Arak hulik noku kapung tuh.”
Petrus ngahkuk ngindoi Yesus Iyok noh Lacak Ponyolamat
(Mat. 16:13-20; Luk. 9:18-21)
27 Umbot erih Yesus khavun murit-murit Ah tulak noku kapung-kapung nuk sokitar daerah Kaisarea Pilipi. Nuk luvang ponyalan doh Iyok bokisok mbak idoh: “Monurut auh ulun, Ahkuk tuh iyai?”
28 Khavun doh mutah Yok: “Arok jok marak ah Ihkok Yohanes Pombaptis, arok kak jok marak ah Ihkok Elia, khavun jok bohkon ah hinok marak ah, Ihkok icok behtik tahkan holang paring nabik.” f
29 Yesus bokisok hinok umbak doh: “Monurut ihkam, iyai Ahkuk tuh?” Petrus mutah ah: “Ihkok noh Lacak Ponyolamat jok was konojanjik Hotalak.” g
30 Khavun Yesus majak doh supayak arak marak ahkan iyai pun mongenai arop Ah.
Yesus bokesah mongenai Arop ah ahkan konojorak khavun mongenai pahtoi Ah
(Mat. 16:21-28; Luk. 9:22-27)
31 Umbot erih, Yesus ngajar marak paring murit Ah, ngindoi Anak Kolunon harus tumbuk jorak khavun iyam tonorimak okok-okok Yahudi, dolang kopalak pomipin agamak Yahudi khavun guruk-guruk agamak Yahudi. Khavun Iyok ahkan pomunuk, totahpik beteng ondo kotoluk ah Iyok ahkan hulik bolum hinok. 32 Mbak jelas Yesus marak ahkan paring murit Ah mongenai aꞌang jok ahkan torjadik mbak arop-Ah. Khavun Petrus nguhut Yok noku saran, turus ngombohok Yok. 33 Totahpik Yesus moliyo khavun nohtok murit-murit Ah, khavui birat kan Petrus: “Buho kok tahkan husuk Kuk, O Iblis lacak roh jaek! Kotului ihkok iyam mihkir inon jok pihkir Hotalak totahpik pihkir muk pihkir kolunon!”
34 Yesus naꞌah murit-murit Ah khavun paring ulun-ulun jok arok nuk anai. Khavui hiyoi ahkan doh: “Iyai jok kanik ngohasuk Ahkuk, iyok harus nohtah kopoduluk ah bongoi, khavui iyok harus nakung salib ah, khavun tuꞌuk-tuꞌuk ngohasuk Ahkuk. h 35 Kotului ulun jok kanik motahan komolum ah khavun kopoduluk ah nuk duniak tuh, ahkan niho komolum nuk surga. Totahpik iyai jok mahtoi kotului Ahkuk khavun kotului ngesah Tarung Pios, iyok ahkan ngonduon komolum jok yarok tihkas nyamah ah. i 36 Inon gunai ah ihkok tepun paring suang duniak tuh, totahpik ihkok mahtoi? 37 Kotului ponahto karon erih iyam taꞌai molik komolum jok yarok tihkas nyamah ah.
38 Kolunon huntuh yamios kojaek doh, idoh iyam kanik nai ngohasuk Hotalak. Jadik iyai jok miak ngohasuk Ahkuk khavun miak mbak inon jok kongajar-Kuk, Ahkuk Anak Kolunon halik miak ngahkuk ulun erih beteng ahkuk lombut nain. Ahkuk ahkan mosuluh tahkan surga mbak kuasak tahkan Hotalak. Molekat-molekat tahkan surga ahkan mosuluh havo-havoi mbak Ahkuk.”