Poletah Hotalak khavun kobudayaan ulun Yahudi
(Mat. 15:1-20)
7
Icok ondo arok kolompok ulun Parisi khavun guruk-guruk agamak tahkan Yerusalem, idoh lombut noku Yesus. 2 Dolang guruk agamak khavun ulun Parisi erih nohtok arok pirak behtik murit Yesus kuman. Totahpik longon doh iyam borasih pomuhik numun porahturan agamak.3 Kotului kolompok ulun Parisi havoi noh mbak paring ulun Yahudi jok bohkon idoh iyam ahkan kuman ngindoi longon doh iyam pomuhik borasih numun porahturan agamak. Kotului idoh pahtuh mbak porahturan adat tahtuk ajuh doh. 4 Khavun ngindoi bulik tahkan pasar idoh iyam ahkan turus kuman ngindoi iyam muhik behtin kungan doh holuk. Tumbuk porahturan adat tahtuk ajuh doh jok harus doh pahtuh mbak ah, kolo porahturan mongenai muhik gelas, dolang mangkok khavun alat dahpur jok bohkon jok konguan tahkan tembaga.
5 Kotului erih ulun-ulun Parisi khavun guruk-guruk agamak erih bokisok mbak Yesus: “Murit-murit Muk kuman mbak longok jok iyam borasih numun porahturan adat tahtuk ajuk etok. Ngombai idoh koderih?”
6 Yesus mutah doh hiyoi Ah: “Ihkam ulun jok pura-purak pios! Punak tuꞌuk tanjik Hotalak jok pomarak nabik Yesaya mongenai ihkam. Yesaya nulih kolihtuh luvang buhkuk ah:
‘Ulun-ulun ihtuh ngolehkak Ahkuk nuk baun doh kiyak
totahpik ahtoi doh iyam tuꞌuk-tuꞌuk ngolehkak Kuk. a
7 Idoh nyembah Ahkuk yarok gunai ah,
kotului idoh ngajar marak mongenai porahturan jok tonapak kolunon
iyam porahturan tahkan Ahkuk!’
8 Ihkam iyam pahtuh mbak poletah Hotalak horonaan ihkam pahtuh mbak poletah-poletah jok bohuak jok tonapak kolunon.”
9 Hiyon Yesus ahkan doh hinok: “Yamios kolicik mik ngomelek poletah Hotalak kotului ihkam kanik pahtuh mbak poletah kolunon. 10 Musa pujik marak ah luvang Hukum Taurat: Ngolehkak ah noh amai khavun inai muk! Khavun iyai jok inai khavun amai ah iyok harus konohukum mahtoi. b 11 Totahpik ihkam ngajar marak kolihtuh: Ngindoi ulun bokesah mbak inai khavun amai ah: ‘Inon jok soharus ah tonongak kuk ahkan borok, was tonongak kuk noh ahkan surung kuk noku Hotalak.’ 12 Mahkak ihkam ngajar doh supayak idoh arak ngavat inai khavun amai doh. 13 Jadik mbak ajar barak mik erih ihkam iyam nai pahtuh umbak Auh Hotalak. Kotului ihkam bopihkir porahturan jok tonapak tahtuk ajuh tok punak poduluk. Khavun tumbuk ah hinok ajar barak jok kongaluh mik.”
14 Khavun Yesus naꞌah ulun turus marak doh, hiyoi Ah: “Ihkam paring ah, nyonih ah noh Ahkuk khavun maham ah auh Kuk. 15 Inon pun jok nyolong noku luvang behtin mik, iyam ahkan nguan ihkam kohtor nuk husuk Hotalak, totahpik inon jok boluak tahkan behtin mik, erih noh jok nguan ihkam kohtor nuk husuk Hotalak. [ 16 Nyonih ah pio-pios auh ihtuh!]”
17 Beteng Yesus nyolong noku luvang lohpo nohtah ulun arok erih, murit-murit Ah bokisok mbak Iyok mongenai rehti tindung jok kongesah Ah. 18 Hiyoi mutah doh: “Inon leh ihkam jaham ngorehti? Iyam leh ihkam taꞌai paring aꞌang jok nyolong noku luvang behtin mik iyam ahkan nguan kam najis? 19 Kotului iyam nyolong noku luvang ahtoi mik totahpik nyolong noku luvang butui, khavun kongindo nuk wese?” Umbak auh erih Yesus marak ah ngindoi paring ukun ponguman touk uras ukun.
20 Hiyon Yesus hinok: “Inon jok boluak tahkan ahtoi mik, erih noh jok nguan ulun erih najis. 21 Kotului tahkan luvang ahtoi, lopung dolang pihkiran jaek, tiruh mbak ulun jok iyam bahkas bosai khavun jok iyam oruh ahc, nahko ngilo, munuk ulun, 22 tiruh mbak oruh ulund bohkon, bokahuk, kojaek ahtoi ah, licik, bolum kolo asuk, ngomelik, motulah mosahuk ulun, sombong, mahang jaꞌai ah yam kanik pomarak. 23 Paring tobiat jaek erih boluak tahkan luvang ahtoi khavun nguan ulun erih jadik najis.”
Bavik jok iyam ulun Yahudi iyok pocayak
(Mat. 15:21-28)
24 Yesus tulak tahkan anai noku daerah Tirus. Iyok nyolong noku icok lohpo. Iyok beleu ah ulun taꞌai ngindoi Iyok nyolong noku anai, totahpik polombut Ah iyam dahpat sonyuhuk 25 Arok icok behtik ulun okok bavik, iyok tepun anak kinyam bavik jok sonyorupang roh jaek. Tonaak nyonih kesah ngindoi Yesus arok nuk anai, iyok lombut khavun nyuhkuk nuk paꞌan Yesus. 26 Bavik erih ulun Yunani koturun ulun daerah Penisia nuk Siria. Iyok nyavot mbak Yesus supayak muhkok roh jaek erih tahkan behtin anak ah. 27 Khavun hiyon Yesus ahkai ah: “Pohiyoi ah noh dolang anak kinyam bosuh holuk, kotului iyam pahtut ngonin roti jok sonyodiak ahkan dolang anak kinyam khavun nosahkah ah noku asuk.”
28 Totahpik bavik erih mutah ah: “Tuꞌuk, Guruk. Tahpik asuk jok unuk pindak mejak kiyak kuman tisan bari-basak konah jok botahas kopindak mejak konguan dolang anak kinyam.”
29 Mahkak hiyon Yesus ahkan bavik erih: “Kotului kok mutah ah naing erih, tulak nai huntuh roh jaek erih was boluak tahkan anak muk.”
30 Bavik erih bulik noku lohpo ah. Khavun kihtai anak ah kaling unuk poniruh ah, totahpik roh jaek erih was boluak tahkan iyok.
Yesus nyahkang icok behtik ulun jok borengen khavun bisuk
31 Yesus tulak tahkan Tirus, khavun nurus ponyalan Ah nyihing Sidon tulak noku daerah jok donik danau Galilea jok pomarak Sopuluh Kota. 32 Nuk anai arok pirak behtik ulun, idoh ngonin icok behtik ulun jok borengen khavun bisuk noku Yesus. Idoh nyavot mbak Yesus, supayak Iyok nihkas longoi ah nuk isung ulun erih. 33 Yesus ngonin ulun erih macuk-macuk tahkan ulun arok, khavun ngipos iking ah noku luvang tolingan ulun erih. Turus Iyok ngolucak khavun nukik jolak ulun erih. 34 Umbot erih Yesus nokarak noku langit, khavun nguhut hasong ah turus bokesah mbak auh Aram ahkan ulun borengen erih hiyoi-Ah: “Efata,” rehti ah: “Tokuhkoi nai!”
35 Mahkak beteng erih kak ulun borengen erih touk nyonih khavun jolak ah pios iyok touk bokesah mbak jelas. 36 Yesus nanjik ulun jok arok nuk anai supayak arak marak ah ahkan ulun bohkon aꞌang jok torjadik erih totahpik makin pomajak makin dolang ulun erih ngesah ah ahkan ulun arok. 37 Idoh jok nyonih ah pusong khavun hiyon doh: “Iyok nguan paring aꞌang jadik pios! Yamios Iyok nguan ulun borengen touk nyonih, ulun bisuk touk bokesah!”