Yesus nyahkang jihpon sordaduk nuk Kapernaum
(Mat. 8:5-13)
7
Ulik Yesus umbot bokesah unuk husuk ulun arok, tulak nai Iyok noku kota Kapernaum. 2 Nuk anai arok cok behtik sordaduk kopalak tentara Roma tepun icok behtik jihpoi jok punak kongolehkak ah. Jihpoi ah erih honong poros tehen manyo mahtoi. 3 Beteng sordaduk erih nyonih tarung Yesus, arok pirak behtik ulun Yahudi jok okok-okok sonyuhuk ah noku Yesus, nyavot Ahkai lombut nyahkang jihpoi ah. 4 Idoh lombut noku Yesus, khavun idoh jua-juan nyavot kavat Ah, hiyoi doh: “Iyok pahtut Kok ngavat ah, 5 tului iyok masik umbak bangsak ihtok khavun iyok noh kak jok napak ahkan kai lovuk nuk kai sombayang.”6 Khavun Yesus tulak hombo-homboh umbak idoh. Beteng Yesus manyo noh dahpot nuk lohpo sordaduk erih, sordaduk erih nyuhuk jolahai ah marak ahkan Yesus: “Tuan, arak noh ihkok ngaok arop Muk, tului ahkuk iyam pahtut ahkan norimak Tuan nuk luvang lovuk kuk. 7 Ahkuk ngomok arop kuk iyam pahtut ahkan lombut noku Ihkok. Mahkak ngohavot icok tihkap auh Muk kiak. Mahkak jihpok kuk ahkan pios. 8 Tului ahkuk tuh halik mindak umbak poletah ulun jok isung umbak ahkuk. Arok kak pongawal jok pindak umbak ahkuk jok harus mindak umbak poletah kuk. Ngindoi ahkuk nyuhuk pongawal kuk: ‘Tulak!’ Iyok halik tulak. Ngindoi ahkuk moletah jok bohkon: ‘Noku ohtoi!’ Iyok halik lombut. Khavun ngindoi ahkuk moletah jihpok kuk: ‘Nguan ihtuh!’ Iyok halik nguai ah. Koderih kak umbak Ihkok, inon jok kongohavot Muk, mihtik ahkan nyoriak.”
9 Ulik Yesus nyonih tanjik sordaduk Roma erih, Iyok salut, khavun Iyok moliyo ulun arok jok honong ngohasuk Iyok, khavui marak Ah: “Iyam alik Kuk tobarung umbak ulun jok tuꞌuk-tuꞌuk pocayak kolo sordaduk ihtuh, ulun Israel kiak iyam arok icok behtik pun jok pocayak kolo ihtuh!”
10 Beteng ulun-ulun jok sonyuhuk sordaduk erih bulik noku lovui ah, jihpon erih uwas pios.
Yesus ngombolum beleh bahkas nuk nain
11 Iyam tahik ulik erih Yesus tulak noku kapung Nain, murit-murit Ah khavun ulun arok tulak homboh umbak Iyok. 12 Beteng Yesus dahpot nuk donik baun tukang kapung, ulun-ulun beteng ngitot otui noku saran kapung. Jok palus erih beleh bahkas, anak tukan tahkan bavik baluk. Arok ponduduk kapung homboh umbak baluk erih. 13 Beteng Tuhan Yesus nohtok baluk erih, Iyok masik umbak ah khavui marak ahkai: “Arak nangih, minak!” 14 Umbot erih Yesus ngononik tandu otun beleh erih khavui nukik ah, mahkak ulun jok nakung ah erih tondok. Yesus marak ah: “Oo nong, Ahkuk nyuhuk kok monyun!” 15 Bahkas beleh jok uwas palus erih, monyun khavun tuot turus bokesah. Mahkak Yesus ngitot iyok noku inai ah.
16 Paring ulun mihkoh khavun momuji Hotalak. Idoh marak ah: “Icok behtik nabik jok hajok uwas arok nuk tohun-tohun ihtok! Hotalak uwas lombut ahkan nyolamat ihtok bangsak Ah!” 17 Mahkak tarung Yesus uwas soup nuk paring Yudea khavun nuk sokitar ah.
Yesus khavun Yohanes Pombaptis
(Mat. 11:2-19)
18 Kotihkak Yohanes nyonih tarung tahkan murit-murit ah mongenai inon jok uwas konguan Yesus, iyok naꞌah duok behtik tahkan murit ah erih. 19 Turus nyuhuk doh tulak noku Tuhan Yesus ahkan bokisok: “Ihkok leh Lacak Ponyolamat jok ahkan lombut monurut janjin Hotalak, atau ihkai harus ngindoi ulun bohkon hinok?”
20 Duok behtik murit Yohanes erih tulak noku Yesus khavun doh bokesah: “Yohanes Pombaptis nyuhuk ihkai ngisok Ihkok: Ihkok leh Lacak Ponyolamat jok ahkan lombut monurut janjik Hotalak, atau ihkai harus ngindoi ulun jok bohkon?”
21 Beteng erih Yesus nyahkang ulun arok tahkan dolang malik macam ponyahkit. Khavun Iyok kak ngusir otuk turus nguan tumbuk ulun bobulen touk nohtok. 22 Khavun Yesus mutah idoh: “Bulik nai noku Yohanes khavum marak ahkai ah inon jok uwas sonyonih mik khavun kihtan mik: Ulun bobulen touk nohtok, ulun kehtot touk nyalan, ulun buah belang touk pios, ulun borengen touk nyonih, ulun mahtoi hulik bolum, khavun tarung pios tahkan Hotalak kongohavot ahkan ulun malax. a 23 Borutung noh ulun jok iyam deroh ngohasuk Ahkuk khavun iyam ngomelek Ahkuk.”
24 Umbot murit Yohanes erih tulak, Yesus nopahtuk kesah Ah mongenai Yohanes ahkan ulun arok, hiyoi Ah: “Ngombai ihkam tulak noku Yohanes nuk lahpang baras? Mihtik ihkam iyam tulak ahkan nohtok tomiang jok buah bahiu. 25 Ihkam tulak ahkan nohtok inon? Mihtik iyam ahkan nohtok cok behtik jok mokajan tamam khavun bolum ngandah, tului ulun jok bolum kolo erih tihkas mocon nuk istana lacak! 26 Jadik, ihkam tulak ahkan nohtok inon? Tetu ahkan nohtok nabik. Ahkuk ngohavot ah ahkam muk Yohanes erih nait umbak icok behtik nabik. 27 Tului Yohanes erih noh jok hiyon Kitab Suci jaman lomoi. Hotalak marak ahkan Anak Ah:
‘Ahkuk nyuhuk uhtus kuk noseluk Ihkok,
Iyok ahkan nyodiak jalan ahkam Muk.’ b
28 Ahkuk marak ahkam muk: Nuk holang ulun jok kongarok nuk duniak tuh, iyam arok ulun jok hajok tahkan Yohanes, totahpik ulun jok koik nuk luvang Korajaan Hotalak punak hajok tahkan iyok.”
29 Paring ulun arok jok nyonih auh Ah, tormasuk dolang pomungut pajak ngahkuk Hotalak jok punak hinut, tului idoh uwas ngitot arop doh kongombaptis Yohanes. c 30 Totahpik ulun-ulun Parisi khavun guru-guruk agamak Yahudi ngombelek jok hiyon Hotalak ahkan idoh, tului elen doh kongombaptis Yohanes.
31 Mongenai ulun jok ngomelek Hotalak nenih, Yesus marak Ah: “Umbak inon harus Ahkuk nyamak ah ulun-ulun jok bolum jaman huntuh? 32 Idoh havoi umbak duok kolompok anak kinyam jok tuot nuk pasar monyanyi hopalo-palos kolo ihtuh: Ihkai ngorungut ahkam muk totahpik ihkok iyam kanik nginyah, ihkai linguk ahkam muk totahpik ihkok elem nangih. 33 Rehti ah: Beteng Yohanes Pombaptis lombut, iyok iyam kuman roti khavun iyam ngorih anggur, totahpik ihkam iyam kanik norimak iyok khavun ihkok marak ah iyok sonyorupang otuk. 34 Beteng Ahkuk, Anak Kolunon lombut, Ahkuk kuman ngorih havoi umbak kolo ulun jok bohkon, totahpik ihkam iyam kanik norimak Ahkuk khavun ihkok marak ah: Nohtok ah noh, Iyok ulun jok bobolai khavun pongorih, jolahan umbak kavan pomungut pajak khavun ulun jok bodosa. 35 Totahpik kohorahtik Hotalak tuꞌuk-tuꞌuk nyahtak luvang komolum ulun jok ngohasuk huang Ah.”
Yesus pomorak bavik bodosa
36 Icok behtik ulun Parisi ngarai ah Simon, iyok ngihit Yesus lombut kuman nuk lohpo ah. Yesus lombut noku lohpo ulun Parisi erih khavui tuot kuman. 37 Nuk kota erih arok icok behtik bavik baluk jok botarung ulun jok bodosa jok baꞌas ngomahkas. Beteng bavik erih nyonih Yesus honong kuman nuk lohpo ulun Parisi erih, lombut noh iyok ngomin icok kundik binyak wangi.d 38 Tahtup nangih iyok tulak tombok nuk donik paꞌan Yesus khavui ngomisak paꞌai Ah erih umbak danum mahtai ah. Khavui ngapit ah umbak balo ah. Umbot erih iyok ngarok paꞌai Ah khavun ngominyak paꞌai Ah umbak binyak wangi erih. 39 Beteng ulun Parisi jok ngundang Yesus nohtok aꞌang erih, iyok bokesah luvang ahtoi ah: “Ngindoi Iyok tuh nabik, mihtik Iyok taꞌai iyai bavik jok nukik Iyok tuh rih, tului bavik tuh ulun jok bodosa.”
40 Khavun Yesus marak ahkai: “Simon arok jok ahkan kongohavot kuk ahkam muk.”
Pomutah Simon: “Ngohavot ah kiak Guruk.”
41 Khavun Yesus ngohavot Ah: “Arok duok behtik jok bohutang noku ulun jok mokuhtang ulun umbak duit. Icok behtik bohutang limok lahtus dinar,e jok bohkon liman puluk dinar. 42 Tului iyam duon dorok ngomayar ah, mahkak iyok ngahpus uhtang dorok erih.” Nuk lain kesah tuh Yesus bokisok: “Iyai nuk holang dorok tuh jok punak botorimakasih umbak ulun jok uwas umbot ngahpus uhtang dorok erih?”
43 Pomutah Simon: “Davak kuk iyok jok paling hajok uhtang ah kongahpus erih.”
Hiyon Yesus ahkai ah: “Punak tuꞌuk hiyom muk rih.” 44 Khavui Ah moliyo bavik erih khavui marak ahkan Simon: “Nohtok ah noh bavik jok honong bosujut tuh! Beteng Ahkuk nyolong noku luvang lohpo muk, ihkok iyam nongak Kuk danum ahkak muhik paꞌak Kuk, totahpik iyok morasih paꞌak Kuk umbak danum mahtai ah khavun ngapit ah umbak balo ah. 45 Ihkok iyam ngarok Ahkuk kolo jok kopuꞌun ah ulun norimak tamu, totahpik iyok iyam tondo-tondok ngarok paꞌak Kuk tahkan topahtuk Kuk nyolong. 46 Ihkok iyam ngominyak kuhung Kuk, totahpik iyok uwas nusuh binyak wangi jok bolehkak nyangit noku isung paꞌak Kuk. 47 Ahkuk ngohavot ah ahkam muk, bavik ihtuh tumbuk ah mongasihi, kotului dosa ah jok tumbuk ah uwas kongapun, totahpik ulun jok nyohiyot kongapun, nyohiyot kak iyok mongasihi.”
48 Khavun Yesus marak ahkan bavik erih: “Dosa muk uwas kongapun.”
49 Ulun-ulun jok tuot hicok humbak umbak Iyok kuman, bopihkir luvang ahtoi doh: “Iyai kiak ulun tuh beh jok touk ngapun dosa?”
50 Totahpik Yesus marak ahkan bavik erih: “Iman muk uwas nyolamat ihkok, tulak nai umbak bolum pios!”