Yesus tonikos Iblis
(Mat. 4:1-11; Mrk. 1:12-13)
4
Kotihkak Yesus tulak tahkan sungoi Yordan, Iyok konguasak Roh Hotalak, khavun Roh Hotalak ngihit Iyok noku lahpang baras. 2 Nuk anai Iyok tonikos Iblis okon paring otuk, ohpat puluk ondo kotahiu ah. Hun erih Iyok iyam kuman inon-inon, umbot erih Iyok pun ngomok loui Ah.3 Iblis marak ahkan Yesus: “Ngindoi Ihkok Anak Hotalak, nyuhuk bahtuk tuh nyoriak roti.”
4 Yesus mutah ah: “Unuk luvang Kitab Suci tonulih, kolunon iyam taꞌai ah bolum tahkan ukun ponguman kiak.” a
5 Khavun Iblis ngomin Yesus noku jok isung, sokinyop mahtak, mokarah ahkai Ah paring korajaan nuk duniak. 6 Khavun hiyon Iblis ahkan Yesus: “Paring kuasa khavun dolang koponahto ihtuh ahkan tonongak kuk ahkam Muk, tului paring ah uwas tonongak ahkak kuk, khavun ahkuk touk nongak iyai kiak jok kongohuang kuk. 7 Paring ah rih ahkan Emuk uras noh tepui ngindoi Ihkok tunop nyembah ahkuk.”
8 Yesus mutah ah: “Nuk luvang Kitab Suci arok tonulih, ‘Nyembah ah noh Tuhan Hotalak muk khavun ngurus ah noh Iyok kiak.’ ” b
9 Khavun Iblis ngomin Yesus noku Yerusalem nihkas Iyok nuk bohuvung Lovun Hotalak, khavui marak ahkai Ah: “Ngindoi Ihkok Anak Hotalak nomarang noh Ihkok tahkan ohtoi, 10 tului nuk luvang Kitab Suci tonulih: ‘Hotalak ahkan nyuhuk molekat-molekat Ah ngolindung Ihkok. c 11 Khavun molekat-molekat ahkan noharang Ihkok umbak longon doh, ahkan paꞌam Muk iyam tukik umbak bahtuk.’ ” d
12 Yesus mutah ah: “Nuk luvang Kitab tonulih: ‘Arak nikos Tuhan, Hotalak muk.’ ” e
13 Ulik Iblis tondok nikos Yesus umbak dolang malik macam kolo ah, iyok nohtah Yesus khavun ngindoi ondo jok pios.
Yesus nopahtuk korejak Ah unuk Galilea
(Mat. 4:12-17; Mrk. 1:14-15)
14 Umbot erih Yesus bulik noku Galilea, khavun Iyok konguasak Roh Hotalak. Tarung arop-Ah dahpot uras nuk daerah erih. 15 Lambak erih Iyok ngajar nuk lovuk ulun Yahudi sombayang khavun paring ulun momuji Iyok.
Yesus iyam tonorimak unuk Nazaret
(Mat. 13:53-58; Mrk. 6:1-6)
16 Yesus tulak noku Nazaret, unuk Iyok kongohajok. Beteng ondo Sabat,f kolo kopuꞌun ah Iyok tulak noku lovuk unuk ulun Yahudi sombayang. Iyok tombok ahkan ngomasak Kitab Suci. 17 Khavun Iyok tonongak pokuang buhkuk Kitab nabikg Yesaya. Iyok nguvat pokuang erih, khavun Iyok nyombang ayat ihtuh.
18 “Roh Hotalak arok unuk Ahkuk,
tului Iyok molantik Ahkuk, ahkak Kuk nongak
Tarung Pios ahkan ulun malax.
Iyok nguhtus Ahkuk ahkan marak
polahpas noku ulun jok tonavan
khavun ulun jok bobulen ahkan nohtok
khavun ahkan molahpas ulun jok kongonyorak.
19 Khavun ngohavot uwas lombut noh kotihkak ah Hotalak
nyolamat kolunon.” h
20 Yesus hulik mokuang buhkuk erih, khavun nopulik ah noku potugas, khavun Iyok tuot.i Paring ulun nuk luvang lovuk unuk ulun Yahudi sombayang erih nuneng Iyok. 21 Khavun Yesus nopahtuk kesah ahkan doh, kolihtuh: “Ayat Kitab Suci ihtuh hondo tuh uwas tonumbas noh beteng ihkam nyonih ah.”
22 Khavun paring ulun erih marak Iyok tuꞌuk, khavun idoh pusong mꞌbak auh jok segah jok kongohavot Ah, khavun idoh nuhtui: “Iyam leh Iyok ihtuh anak Yusup?”
23 Mahkak nuhtui noh Iyok ahkan doh: “Touk ihkam ahkan marak ah auh ihtuh ahkak Kuk, ‘Jajak, ngopios ah noh arop Muk. Napak anoh nuk ohtoi kak, nuk kapung asal Muk, paring tandak ponaꞌam jok sonyonih kai jok umbot ihkok nguai ah nuk Kapernaum.’ ”
24 Yesus bokesah hinok: “Nyonih ah noh iyam arok nabik jok kongolehkak nuk kapung arop ah.” j 25 Nyonih ah pios-pios: “Beteng jaman Elia ondo tojah toluk toun onom bulan kotahiu ah, sohinggak nyangit louk unuk paring nogara erih. Kotihkak erih tumbuk baluk sonyombang nuk Israel. k 26 Oluk poh koderih, Hotalak iyam nyuhuk Elia tulak ngavat noku sokolang icok tahkan baluk-baluk nuk Israel, mohtos iyok tulak ngavat icok behtik baluk nuk kota sarfat nuk daerah Sidon. l 27 Koderih kak beteng jaman nabik Elisa arok tumbuk ah ulun nuk Israel buah ponyahkit belang, totahpik iyam arok icok behtik tahkan idoh jok konopios, tihkas Naaman ulun Siria erih kiak.” m
28 Paring ulun nuk lovuk unuk ulun Yahudi sombayang ulun Yahudi erih nyangit birat beteng nyonih aꞌang erih. 29 Idoh tombok khavun nyuhuk Yesus buho tahkan kota erih, khavun ngomin Iyok noku saran korovih, nuk amoh kota doh jok tonombok. Idoh kanik nonjuhung Iyok noku luvang korovih. 30 Totahpik Yesus nyuruk tohun-tohun ulun arok erih turus tulak.
Ulun sonyorupang otuk
31 Ulik erih Yesus tulak noku kota Kapernaum unuk Galilea. Unuk anai Iyok ngajar ulun-ulun beteng Ondo Sabat. 32 Idoh salut nyonih Iyok ngajar, tului Iyok bokesah umbak auh jok bokuasak. n 33 Unuk anai nuk lovuk unuk ulun Yahudi sombayang arok icok behtik jok sonyorupang otuk, ulun erih ngoriak-ngoraik: 34 “Tulak noh, Ihkok Yesus ulun Nazaret, Ihkok kanik nguan inon umbak ihkai? Inon Ihkok lombut ahkan ngolohpung ihkai? Ahkuk taꞌak iyai Ihkok. Ihkok Anak Hotalak jok suci.”
35 Yesus ngorahang otuk erih: “Tonih! Boluak ihkok tahkan ulun ihtuh!” Umbot erih otuk erih nyoketap ulun erih nuk husuk idoh, khavun otuk erih boluak tahkan ulun erih totahpik ulun erih iyam poros.
36 Paring ulun pusong, khavun bokesah icok behtik umbak jok bohkon: “Iyam mios auh tuhtui Ah. Umbak kotehtek Ah, khavun kuasa Ah, Iyok moletah otuk-otuk boluak khavun idoh boluak kak!” 37 Mahkak tarung Yesus soup nuk paring wilayah erih.
Yesus nyahkang tumbuk ulun
(Mat. 8:14-17; Mrk. 1:29-34)
38 Yesus tulak tahkan lovuk unuk ulun Yahudi sombayang erih, khavun tulak noku lohpo Simon. Okok upuk Simon jok bavik honong mondam, khavun ulun-ulun ngesah ah ahkan Yesus.
39 Khavun Yesus tulak noku unuk poniruh okok bavik erih turus ngopios pondam ah. Beteng huꞌun erih kak pondam ah pios khavun okok upuk Simon turus kuat khavun ngurus idoh.
40 Beteng mahtan ondo uwas tonyop, paring ulun ngomin bari-basak ah jok poros malik macam oros doh noku Yesus. Yesus nihkas longoi ah isung idoh mico-micok khavui ngopios idoh. 41 Otuk-otuk erih pun boluak tahkan tumbuk ulun, tahtup ngorahang-ngoriak: “Ihkok noh Anak Hotalak!”
Totahpik Yesus ngorahang idoh khavun iyam nohoꞌoi ah idoh nuhtui, tului taꞌan doh Iyok noh Lacak Ponyolamat.
Yesus ngajar unuk luvang lovuk-lovuk unuk ulun Yahudi sombayang
42 Beteng polombut mahtan ondo Yesus nohtah kota erih khavui tulak noku unuk jok bungun. Tumbuk ulun nopahtuk ngurah-gurah Iyok, beteng doh bohavung umbak Iyok, idoh ngorihan ahkan Iyok iyam nohtah idoh. 43 Totahpik Yesus nuhtui: “Tarung jok pios tului Hotalak momorintah jadik Lacak harus Ahkuk narung ah noku kota-kota jok bohkon kak, kotului erih noh Hotalak nguhtus Ahkuk noku duniak tuh.”
44 Tului erih Yesus ngajar nuk luvang lovuk-lovuk ulun Yahudi sombayang, nuk daerah Yudea.