TARUNG PIOS
JOK TONULIH
MARKUS
Kesah mongenai Yohanes Pombaptis
(Mat. 3:1-12; Luk. 3:1-18; Yoh. 1:19-28)
1
Ihtuh noh Tarung Pios mongenai Yesus Lacak Ponyolamat, Iyok Anak Hotalak. 2 Tarung Pios ihtuh tonopahtuk kolo jok pomarak Hotalak nyihing nabik Yesaya, hiyoi ah:“ ‘Nohtok ah noh Ahkuk nguhtus ulun jok konopilik-Kuk,
iyok holuk tulak sojaham Ihkok,
iyok ahkan nyodiak jalan ahkam Muk.’ a
3 Arok ulun jok ahkan ngorahang ngoriak nuk lahpang baras hiyon ulun erih,
‘Nyodiak ah noh jalan ahkan Tuhan,
ngolahtak ah noh jalan ahkai Ah.’ ” b
4 Ulun jok konguhtus Hotalak erih iyok noh Yohanes Pombaptis. Iyok lombut nuk lahpang baras khavui ah marak umbak auh jok mohing: “Botobat nai khavun nongak ah noh arop muk ahkan kongombaptis mahkak Hotalak ahkan ngapun dosa muk.” 5 Khavun ulun pun tumbuk lombut noku iyok idoh lombut tahkan paring daerah Yudea, khavun paring ulun Yerusalem pun lombut kak noku Yohanes Pombaptis, idoh ngahkuk dosa khavun konombaptis nuk Sungoi Yordan.
6 Yohanes hatin hatik, jok tonapak tahkan bulun unta khavun kahut kahang ah tonapak tahkan uhpak binahtang, ukui pongumai ah mokalap khavun oling. c 7 Ihtuh noh jok kongajar pomarak ah, hiyoi ah: “Umbot ahkuk tuh, ahkan lombut icok Behtik jok punak bokuasak tahkan ahkuk, tunop nguhkoi talin sopahtuk Ah kiyak ahkuk yam pahtut. 8 Ahkuk ngombaptis ihkam umbak danum, totahpik Iyok ahkan ngombaptis ihkam mbak Roh Kudus.”
Yesus kongombaptis Yohanes
(Mat. 3:13-17; Luk. 3:21-22)
9 Umbot erih Yesus tulak noku Sungoi Yordan Iyok lombut tahkan kapung Nazaret nuk Galilea, khavun Iyok turus kongombaptis Yohanes Pombaptis nuk Sungoi Yordan. 10 Hun Yesus boluak tahkan luvang danum, Iyok nohtok langit tokuhkoi, khavun Roh Hotalak mosuluh noku isung Iyok kolo icok kungan ocinaꞌang merpati. 11 Umbot erih kongihan auh tahkan surga marak ah: “Ihkok noh Anak Kuk jok kongasih Kuk, Ihkok ngosenang ahtoi Kuk.” d
Yesus tonikos Iblis
(Mat. 4:1-11; Luk. 4:1-13)
12 Khavun umbot erih Roh Hotalak ngonin Yesus tulak noku lahpang baras. 13 Ohpat puluk ondo kotahiw Iyok nuk anai, Iyok pun tonikos Iblis okon paring otuk. Nuk anai Iyok hicok mbak dolang binahtang jok molos khavun dolang molekat Hotalak molayan Yok.
Yesus nuk Galilea
(Mat. 4:12-22; Luk. 4:14-15; 5:1-11)
14 Beteng Yohanes Pombaptis tonavan khavun ulik yok kongipos noku luvang ponjara, lombut noh Yesus noku Galilea Iyok ngajar marak mongenai Tarung Pios tahkan Hotalak, hiyoi Ah: 15 “Ondo jok tonetu Hotalak was docok. Hotalak ahkan pohos lombut momorintah nuk duniak jadik Lacak. Botobat nai tahkan dosa-dosa muk khavun pocayak noh mbak Tarung Pios tahkan Hotalak!” e
Yesus naꞌah murit-murit jok topahtuk ah
(Mat. 4:18-22; Luk. 5:1-11)
16 Khavun kotihkak Yesus honong mondiang maloi kovang Danau Galilea, Iyok nohtok duok behtik ulun harik yok erih Simon jok tonaꞌah ulun ngarai ah Petrus khavun arik ah Andreas. Idoh honong monyalak nuk danau erih, kotului dorok pongocin. 17 Hiyon Yesus ahkan dorok: “Has, ngohasuk Ahkuk, Ahkuk ahkan ngajar borok jadik ponjalak kolunon nuk ngomin ulun noku jalan kosolamatan.” 18 Dorok pun turus nohtah jalak dorok khavun turus ngohasuk Yesus.
19 Khavun yam macuk Yesus nyalan tahkan anai Iyok nohtok duok behtik pongocin morasih jalak nuk luvang alut yok erih Yakobus khavun arik ah Yohanes dorok erih anak Zebedeus. 20 Yesus turus naꞌah Yakobus khavun Yohanes supayak ngohasuk Iyok. Nuk luvang alut erih arok amai dorok, khavun arok kak pirak behtik jihpon amai ah. Yakobus dorok Yohanes turus nohtah doh khavun dorok ngohasuk Yesus.
Yesus nuk luvang lohpo ibadat ulun Yahudi nuk Kapernaum
21 Yesus khavun murit-murit Ah idoh tulak noku Kapernaum. Khavun beteng ondo Sabatf, Yesus nyolong noku luvang lovun ibadat erih khavun ngajar ulun-ulun jok arok nuk anai. 22 Idoh pusong nyonih inon jok kongajar Ah, kotului iyok ngajar kolo ulun jok punak bokuasak, iyam kolo dolang guruk agamak. g
23 Nuk luvang lohpo ibadat erih nyolengak lombut ulun jok sonyorupang roh jaek. Ulun erih ngoriak, hiyoi ah: 24 “Inon urus Muk mbak ihkai, O Yesus ulun Nazaret? Inon leh Ihkok lombut kanik ngolohpung ihkai? Ahkuk taꞌai Ihkok iyai: Ihkok ulun jok suci jok konguhtus Hotalak!”
25 Khavun hiyon Yesus ngomirat roh jaek erih: “Tonih! Boluak kok tahkan behtin ulun atuh!”
26 Mahkak roh jaek jok nyorupang behtin ulun erih nguan yok tosahkah sopiling, khavun roh jaek erih turus boluak tahkan behtin ulun erih tahtup koriak jok punak mohing. 27 Idoh pusong, sohinggak idoh bokesah icok mbak jok bohkon, hiyon doh: “Yamios nih! Inon leh ihtuh ajar barak jok bohuak? Iyok ngusir hatin kuasak Ah khavun roh jaek erih pun pahtuh mbak inon jok pomarak Ah.”
28 Kesah mongenai Yesus pun pohos kotaan noku paring provinsi nuk daerah Galilea.
Yesus nyahkang ulun arok
(Mat. 8:14-17; Luk. 4:38-41)
29 Kotihkak Yesus boluak tahkan lohpo ibadat erih, Iyok hicok umbak murit Ah Yakobus, khavun Yohanes idoh tulak noku lohpo Petrus khavun Andreas. 30 Okok upuk Petrus kaling kotului iyok mondam, jadik beteng Yesus khavun murit Ah nyolong nuk lohpo Petrus, ulun nuk lohpo erih turus marak ahkan Yesus ngindoi upuk Petrus jok bavik mondam. 31 Yesus pun turus tulak kanai, khavun Iyok namit longoi ah motuot ah. Beteng erih kak pondam okok upuk Petrus bokopios, khavun upuk Petrus turus nyodiak ukun ponguman ahkan doh.
32 Beteng hiro-hirok manyo noh ngolomik, ulun-ulun ngonin paring ulun jok poros khavun jok sonyorupang roh jaek noku Yesus. 33 Idoh jok arok nuk kota erih hokupur nuk tohopan lohpo Petrus. 34 Khavun Yesus nyahkang ulun-ulun jok poros, oros doh malik macam khavun Iyok muhkok dolang roh jaek. Iyok majak roh-roh jaek erih bokesah, kotului idoh nyokonok Iyok.
Yesus ngajar nuk kota-kota jok bohkon
35 Beteng topolaoi Yesus monyun khavun boluak tahkan lohpo, Iyok tulak noku jok bungun khavun bodoa nuk anai. 36 Totahpik Petrus khavun dolang jolahai ah ngohasuk Yok. 37 Beteng doh bohavung mbak Iyok idoh marak ah: “Guruk paring ulun ngurah Ihkok.”
38 Hiyoi mutah ah: “Haꞌas tok tulak noku kota-kota jok bohkon, supayak nuk anai Ahkuk touk ngajar mongenai Tarung Pios, kotului erih noh Ahkuk uwas lombut.”
39 Khavun Yesus pun tulak noku paring daerah provinsi Galilea khavun ngajar mongenai Tarung Pios nuk luvang lohpo-lohpo ibadat khavun ngusir dolang roh jaek nuk anai. h
Yesus nyahkang icok behtik ulun buah ponyahkit belang
(Mat. 8:1-4; Luk. 5:12-16)
40 Arok icok behtik ulun buah ponyahkit belang iyok lombut noku Yesus, khavun iyok tuot mbak kalop ah nuk husuk Yesus, iyok nyavot kavat hiyoi ah: “Ngindoi Ihkok kanik, Ihkok poh touk ngopios ponyahkit kuk tuh.” i
41 Yesus pun masik mbak ulun erih, khavun iyok pun nonjuluk longoi khavun nukik ulun erih Iyok marak-Ah: “Ahkuk kanik, pios noh ponyahkit muk.” 42 Beteng erih kak ponyahkit ulun erih niho khavun iyok pun pios. 43 Khavun Iyok pun nyuhuk ulun erih pohos tulak khavun majak yok hiyoi ah: 44 “Awas bah! Arak sapai kok marak ah inon jok was torjadik ihtuh ahkan ulun. Tulak nai, mokarah ah noh arop muk ahkan pomipin agamak Yahudi supayak pomorisak ngindoi kok was pios. Umbot erih nongak ah noh surung noku Hotalak kotului ihkok pios tahkan ponyahkit muk, numun jok sonyuhuk Musa. Mahkak ulun-ulun ahkan taꞌai ngindoi ihkok uwas pios tahkan ponyahkit muk.” j
45 Totahpik ulun erih tulak ngesah ah inon jok was torjadik khavun narung ah noku amo-amoh, sohinggak Yesus iyam taꞌai mokarah arop ah hinok ahkan ulun nuk luvang kota. Iyok mocon unuk jok bungun, totahpik ulun nulo lombut noku iyok tahkan havoi aiu daerah.