TARUNG PIOS
JOK TONULIH
YOHANES
Auh jok nongak komolum ahkan kolunon
1
Beteng topahtuk ah sojaham duniak tonaoi Auh Hotalak was arok.Auh erih hicok humbak Hotalak
khavun Auh havoi mbak Hotalak.
2 Sojaham duniak tonaoi Iyok hicok mbak Hotalak.
3 Paring aꞌang tonaoi Hotalak nyihing Iyok,
khavun tahkan paring aꞌang jok arok,
yarok icok pun jok iyam tonaoi nyihing Auh erih.
4 Nuk luvang Auh erih arok kuasak jok nongak komolum ahkan paring aꞌang jok bolum nuk duniak tuh,
khavun komolum erih kolo tarang jok narang ahtoi kolunon.
5 Tarang erih ngolondang nuk luvang jok pindong,
khavun aꞌang jok pindong yam duon ngomalop tarang erih.
6 Hotalak pun nguhtus icok behtik
ngarai ah Yohanes, jok baas ngombaptis. a
7 Yohanes lombut marak mongenai Yesus jok nongak tarang erih,
supayak paring ulun jok nyonih mongenai tarang erih idoh jadik pocayak mbak Yesus.
8 Yohanes iyam tarang erih,
totahpik iyok konguhtus ahkan bokesah mongenai tarang erih.
9 Tarang jok kotuui ah honong lombut noku duniak.
Khavun Iyok ahkan narang paring ahtoi kolunon.
10 Auh was arok nuk luvang duniak
khavun duniak tonapak nyihing Iyok,
totahpik ulun-ulun jok nuk duniak iyam nyokonok Iyok.
11 Iyok lombut noku bangsak jok konopilik-Ah.
Totahpik idoh iyam norimak Iyok.
12 Totahpik paring ulun jok norimak Iyok
khavun pocayak mbak Iyok,
idoh ongak-Ah hak supayak jadik anak-anak Hotalak.
13 Idoh jadik anak Hotalak iyam kolo konganak ulun okok doh, khavun idoh jadik anak Hotalak iyam kak tului oruh khavun bosai ah jok alah tiruh hicok supayak idoh duon anak.
totahpik tului Hotalak noh jok nongak komolum jok bohuak ahkan doh.
14 Iyok jok pomarak Auh was nyoriak kolunon,
Iyok mocon nuk holang ihtok,
khavun ihtok was nohtok komulian-Ah.
Komulian erih tonorimak-Ah
sobagai Anak Hotalak jok ico-icok ah.
Nyihing Iyok ihtok touk nohtok Hotalak jok hinut
khavun taan tok kopion ahtoi-Ah jok punak hajok.
15 Yohanes pombaptis lombut ngesah mongenai Auh erih
khavun Yohanes bokesah tutang korahang:
“Ihtuh noh Iyok jok was pomarak kuk:
Iyok lombut pongok mbak ahkuk,
totahpik Iyok punak peting tahkan ahkuk,
kotului sojaham ahkuk arok, Iyok was arok.”
16 Kotului kopion ahtoi-Ah jok punak hajok holovik holeak ahkan tok
khavun tonongak ah nulo noku ihtok.
17 Hukum Taurat tonorimak tok nyihing Musa.
Totahpik kopion ahtoi Hotalak jok punak hajok khavun aꞌang jok hinut
kononyahtak nyihing Yesus Kristus.
18 Yarok ulun jok pujik nohtok Hotalak,
salak mbak Anak Tukan Hotalak, jok arok noh Hotalak kak, Iyok ngorihpot mbak Amai,
Anak Tukan Hotalak erih noh jok was motohtok ah mbak jelas ahkan ihtok iyai Hotalak erih.
Kosaksian Yohanes pombaptis mongenai arop ah
(Mat. 3:1-12; Mrk. 1:1-8; Luk. 3:1-18)
19 Dolang pomipin Yahudi nuk Yerusalem, idoh nyuhuk dolang pomipin agamak Yahudi khavun ulun-ulun Lewi tulak ngisok Yohanes pombaptis, hiyon doh: “Sobenar ah ihkok rih iyai?”
20 Yohanes iyam bobalik, iyok tuꞌuk-tuꞌuk ngahkuk ah, hiyoi ah: “Ahkuk iyam Lacak Ponyolamat jok konojanjik Hotalak.”
21 Hiyon doh mutah yok: “Ngindoi koderih kok rih iyai? Inon leh ihkok Nabik Elia?”
Yohanes mutah ah: “Iyam!”
Khavun hiyon doh ngisok yok hinok: “Inon leh ihkok Nabik jok kongindoi kai?”
Hiyoi mutah doh: “Iyam!” b
22 Hiyon doh: “Ngindoi koderih marak ah ahkan kai iyai kok tuh? Supayak ihkai touk mutah kisok ulun-ulun jok nguhtus ihkai. Monurut emuk bongom, iyai ihkok?”
23 Hiyon Yohanes pombaptis mutah ah: “Ahkuk noh iyok jok kongesah Nabik Yesaya:
‘Ahkuk noh ulun jok ngorahang ngoriak nuk lahpang baras:
Ngolahtak ah noh jalan ahkan Tuhan.’ ” c
24 Dolang ulun jok konguhtus erih arok pirak behtik jok ulun Parisi, 25 idoh ngisok Yohanes, hiyon doh: “Ngindoi ihkok iyam Lacak Ponyolamat jok konojanjik Hotalak, iyam Nabik Elia khavun iyam kak Nabik jok kongindoi kai, ngombai ihkok ngombaptis ulun?”
26 Yohanes mutah ah: “Ahkuk ngombaptis mbak danum. Totahpik nuk tohun-tohun ihkam arok Iyok jok iyam kam nyokonok ah. 27 Iyok jok ahkan lombut pongok mbot ahkuk, totahpik nguhkoi talin sopahtuk-Ah kiyak ahkuk yam pahtut.”
28 Paring ah erih torjadik nuk Betania, jok arok nuk pohoi sungoi Yordan unuk Yohanes ngombaptis.
Yesus Anak Domba Hotalak
29 Ondo havun ah hinok, Yohanes pombaptis nohtok Yesus lombut noku iyok. Khavun hiyon Yohanes: “Nohtok ah Anak Domba Hotalak jok ngolahpas paring kolunon jok nuk duniak tuh tahkan dosa doh! 30 Iyok noh jok pomarak kuk: ‘Ahkan lombut pongok tahkan ahkuk, tahpik Iyok holovik bokuasak tahkan ahkuk, kotului sojaham ahkuk kongarok, Iyok was arok.’ 31 Sojaham ah, iyam kuk taꞌai iyai Iyok. Khavun tului erih noh ahkuk lombut ngombaptis mbak danum, supayak ulun Israel nyokonok ah iyai Iyok.”
32 Yohanes pun ngesah inon jok mbot yok nohtok ah. Iyok marak ah: “Ahkuk nohtok Roh Hotalak mosuluh kolo ocinaꞌang merpati tahkan langit, khavun ocinaꞌang erih nakoi nuk Iyok. 33 Beteng erih iyam taak kuk iyai Iyok. Totahpik Hotalak jok nguhtus kuk ngombaptis hatin danum was marak ahkak kuk hiyoi-Ah kolihtuh: ‘Ngindoi ihkok nohtok Roh Kuk mosuluh khavun nakoi noku icok behtik Ulun. Iyok noh jok ahkan mombaptis mbak Roh Hotalak.’ 34 Ahkuk bongok kuk noh jok was nohtok ah, khavun ahkuk nongak kosaksian ngindoi Iyok Anak Hotalak.”
Ulun-ulun jok topahtuk ah ngohasuk Yesus
35 Ulik erih ondo havun ah Yohanes pombaptis tombok nuk pohoi sungoi Yordan hinok, hicok mbak koduok behtik murit ah. 36 Khavun kotihkak iyok nohtok Yesus nyihing, iyok bokesah hiyoi ah: “Nohtok ah noh, Iyok Anak Domba Hotalak!” 37 Kotihkak koduok murit ah nyonih inon jok pomarak ah, dorok pun turus ngohasuk Yesus. 38 Yesus molio noku lihkut, Iyok nohtok dorok ngohasuk Yok. Yesus pun bokisok: “Inon jok kojolik muk?”
Hiyon dorok mutah Ah: “Guruk, nuk amoh Guruk mocon?”
39 Yesus mutah ah: “Ngohasuk Ahkuk khavun borok ahkan nohtok ah.” Dorok pun ngohasuk Yesus khavun dorok nohtok ah nuk amoh Iyok mocon, khavun ondo erih dorok mocon hicok humbak mbak Iyok. Beteng erih sokitar jam ohpat cohit.
40 Icok behtik holang dorok ngarai ah Andreas jok nyonih auh Yohanes pombaptis khavun turus ngohasuk Yesus iyok jolahan Simon Petrus harik. 41 Iyok ngimo-ngimos ngurah Simon, khavun hiyoi ah ahkan Simon: “Ihkai was bohavung mbak Lacak Ponyolamat jok pomarak tok Kristus.” 42 Khavun Andreas pun turus ngitot Simon noku Yesus.
Yesus ngonorong Simon, khavun hiyoi-Ah: “Ihkok Simon, ngaran amai muk Yohanes. Khavun ngaram muk jok bohuak Kefas.” (Kefas rehti ah Petrus: bahtuk hajok).
Yesus mangit Pilipus khavun Natanael ngohasuk Iyok
43 Ondo havun ah hinok Yesus ngopuhtus ah tulak noku provinsi Galilea. Iyok bohavung mbak Pilipus, khavun marak ahkai ah: “Has ngohasuk Ahkuk!” 44 Pilipus asal ah tahkan Betsaida, havoi mbak Andreas dorok Petrus. 45 Pilipus bohavung mbak Natanael khavun marak ahkai ah: “Ihkai was bohavung mbak ulun jok pomarak Musa nuk luvang buhkuk Hukum Taurat, khavun jok pomander kongesah dolang nabik. Yok arok noh Yesus anak Yusup tahkan Nazaret.” 46 Totahpik Natanael mutah yok hiyoi: “Nazaret? Mukin leh aꞌang jok pios lombut tahkan Nazaret?”
Pilipus mutah yok: “Nikos kok nohtok ah bongom.”
47 Kotihkak Yesus nohtok Natanael lombut noku Iyok khavun hiyoi ah bokesah mongenai Natanael: “Nohtok ah iyok tulin ulun Israel. Iyok arok noh ulun jok touk kam pocayak ah.”
48 Hiyon Natanael mutah Yok: “Bohkolo Ihkok taꞌai mongenai tobiat kuk?”
Hiyon Yesus nok: “Sojaham Pilipus naꞌah ihkok, Ahkuk was nohtok kok nuk pindak puun harak.”
49 Hiyon Natanael ahkai-Ah: “Guruk, Ihkok Anak Hotalak, Ihkok Lacak ulun Israel!”
50 Yesus mutah ah: “Inon leh ihkok pocayak kotului Ahkuk marak ahkam muk ngindoi Ahkuk nohtok kok nuk pindak puun harak? Ihkok ahkan nohtok aꞌang jok holovik hajok mbak erih hinok!” 51 Khavun hiyon Yesus nok ahkai ah: “Ahkuk marak ahkam muk, ihkok ahkan nohtok langit tokuhkoi khavun molekat-molekat Hotalak nuhkat mosuluh nuk husuk Anak Kolunon.” d