Yohanes Pombaptis
(Mat. 3:1-12; Mrk. 1:1-8; Yoh. 1:19-28)
3
Beteng toun kolimok balas Kaisar Tiberius momorintah paring korajaan Roma khavun Pontius Pilatus jadik gubenur nuk Yudea khavun Herodes momorintah nuk Galilea. Pilipus jolahan Herodes harik momorintah nuk Iturea khavun Trakonitis, beteng hun erih Lisanias momorintah nuk daerah Abilene. 2 Kotihkak Hanas khavun Kayapas jadik kopalak okon agamak, toun erih noh Hotalak bokesah umbak Yohanes anak Jakaria nuk lahpang baras. 3 Khavun Yohanes tulak kohtoi kanai noku paring daerah sungoi Yordan ahkan ngohavot tarung tahkan Hotalak. Yohanes ngoriak: “Botobat noh tahkan dosa-dosa muk khavun ihkok harus pomombaptis, ahkan Hotalak ngapun ihkok.” 4 Ihtuh numun jok tonulih nuk luvang Kitab Nabik Yesaya:“Arok ulun jok ngorahang-ngoriak unuk lahpang baras:
‘Nyiap jalan ahkan Hotalak,
ngolahtak ah noh jalan ahkai Ah. a
5 Paring duak douk halah kongahput,
paring polahpak puruk harus kongolahtak,
jalan jok mehkong kohtoi kanai harus kongorong,
khavun jalan jok koluvak kolebou poduluk kongolahtak.
6 Paring ulun unuk duniak ahkan nohtok
Hotalak nyolamat kolunon!’ ”
7 Tumbuk ulun jok lombut noku Yohanes ahkan kongombaptis, Yohanes marak ah ahkan doh: “Arak sama sinok ihkok bopihkir tului ihkok ahkan lahpas tahkan hukum Hotalak jok ahkan lombut, ngindoi ihkok iyam botobat. 8 Mokarah ah umbak komolum mik, ngindoi ihkam umbot botobat tahkan dosa-dosa mik. Arak ihkam bopihkir ihkam ahkan sonyolamat Hotalak kotului ihkam koturun Abraham! b 9 Hun tuh kahpak uwas arok nuk longon Hotalak ahkan unuk ngohukum khavun novong puꞌui kajuk turus uhat ah. Paring puꞌui kajuk jok iyam muak pios ahkan tonovong, kongindo khavun pomohun noku luvang ahpui.” c
10 “Jadik, inon jok poduluk ihkai nguai ah?” Kisok ulun arok ahkan Yohanes.
11 Yohanes mutah ah: “Ulun jok tepun duok kolambik, harus nongak icok ahkan ulun jok iyam arok, khavun ulun jok tepun ukun ponguman, harus magik ah.”
12 Ponahkih-ponahkih pajak halik lombut noku Yohanes ahkan kongombaptis, idoh ngisok iyok: “Guruk, inon jok harus ihkai nguai ah?” d 13 Khavun Yohanes mutah ah: “Arak nahkih dalo karoi ah tahkan jok uwas umbot tonetu.”
14 Arok kak porajurit jok ngisok: “Bohkolo ah umbak ihkai? Inon jok harus ihkai nguai ah?”
Khavun Yohanes mutah ah: “Arak ngacam ulun unuk mik ngorihan duit. Puas noh umbak uhpah mik!”
15 Hun erih ulun-ulun bokisok unuk luvang ahtoi ah inon leh Yohanes tuh Lacak Ponyolamat jok kongindoi tok. 16 Tului erih noh Yohanes marak ahkan idoh paring ah: “Ahkuk mombaptis ihkam hatin danum, totahpik nain ahkan lombut Ulun jok paling hajok tahkan ahkuk. Nguvat talin sopahtuk Ah kiak ahkuk iyam pahtut. Iyok ahkan mombaptis ihkam umbak Roh Hotalak khavun ahpui. 17 Tahap unuk nahap uwas arok unuk longoi Ah ahkan morasih paring gandum Ah nyiring borasih. Gandum Ah kongupur Ah unuk luvang uvung, totahpik paring buluk ah ahkan pomahpui Ah noku ahpui jok iyam taꞌai ah balop!”
18 Koderih noh Yohanes nosehat ulun-ulun umbak malik macam kolo beteng iyok ngesah tarung jok pios. 19 Hun erih Yohanes nosalak Herodes lacak unuk Galilea, kotului iyok ngavuk umbak Herodias, oruh tahkan jolahai ah harik, khavun umbak kojaek-kojaek ah jok bohkon. e 20 Totahpik Herodes mahi-mahik kojaek ah nyiring ngipos Yohanes noku luvang ponjara.
Yesus kongombaptis
(Mat. 3:13-17; Mrk. 1:9-11)
21 Umbot paring ulun erih pomombaptis, Yesus halik kongombaptis kak. Khavun beteng Iyok honong bodoa, langit tokuap, 22 khavun Roh Hotalak mosuluh noku isung Iyok kolo ocin naꞌang merpati. Khavun kongihan Auh Hotalak tahkan langit nai, hiyoi marak Ah: “Ihkok noh Anak Kuk jok kongasih Kuk. Ihkok ngosenang ahtoi Kuk.” f
Uhtus koturun Yesus
(Mat. 1:1-17)
23 Beteng Yesus nopahtuk korejak Ah, umur Ah sokitar tolun puluk toun. Numun hiyon ulun, Iyok anak Yusup, Yusup anak Eli, 24 Eli anak Matat, Matat anak Lewi, Lewi anak Malkhi, Malkhi anak Yanai, Yanai anak Yusup, 25 Yusup anak Matica, Matica anak Amos, Amos anak Nahum, Nahum anak Hesli, Hesli anak Nagai, 26 Nagai anak Maat, Maat anak Matika, Matika anak Simei, Simei anak Yosekh, Yosekh anak Yoda, 27 Yoda anak Yohanan, Yohanan anak Resa, Resa anak Zerubabel, Zerubabel anak Sealtiel, Sealtiel anak Neri, 28 Neri anak Malkhi, Malkhi anak Adi, Adi anak Kosam, Kosam anak Elmadam, Elmadam anak Er, 29 Er anak Yesua, Yesua anak Eliezer, Eliezer anak Yorim, Yorim anak Matat, Matat anak Lewi, 30 Lewi anak Simeon, Simeon anak Yehuda, Yehuda anak Yusup, Yusup anak Yonam, Yonam anak Elyakim, 31 Elyakim anak Melea, Melea anak Mina, Mina anak Matata, Matata anak Natan, Natan anak Daud, 32 Daud anak Isai, Isai anak Obed, Obed anak Boas, Boas anak Salomo, Salomo anak Nahason, 33 Nahason anak Aminadab, Aminadab anak Admin, Admin anak Arni, Arni anak Hezron, Hezron anak Peres, Peres anak Yehuda, 34 Yehuda anak Yakub, Yakub anak Ishak, Ishak anak Abraham, Abraham anak Terah, Terah anak Nahor, 35 Nahor anak Serug, Serug anak Rehu, Rehu anak Peleg, Peleg anak Eber, Eber anak Salmon, 36 Salmon anak Kenan, Kenan anak Arpakhsad, Arpakhsad anak Sem, Sem anak Nuh, Nuh anak Lamekh, 37 Lamekh anak Metusalah, Metusalah anak Henokh, Henokh anak Yared, Yared anak Mahalaleel, Mahalaleel anak Kenan, 38 Kenan anak Enos, Enos anak Set, Set anak Adam, Adam anak Hotalak.