Yesus kongarok
(Mat. 1:18-25)
2
Beteng Yohanes honong lengak ah, Kaisar Agustus, iyok noh kopalak lacak korajaan Roma, nyuhuk ahkan paring ulun tahkan paring nogara korajaan Roma mondaftar arop ah. 2 Pondaftaran erih jok topahtuk ah, beteng Kirenius jadik gubenur unuk nogara Siria. 3 Khavun paring ulun tulak mondaftar nuk kapung arop doh nuk tahtuk ajuh doh lomoi.4 Yusup pun tulak tahkan kapung Nazaret, jok unuk Galilea, noku unuk Betlehem, kapung unuk lacak Daud kongarok jok arok unuk Yudea, tului Yusup tuh rih uhtus koturun Daud. 5 Yusup halik mondaftar arop ah khavun Maria tunang ah jok honong botohik. 6 Beteng dorok nuk Betlehem tumbas noh ondo ah Maria ahkan dimbit. 7 Khavun Maria halik dimbit anak jok okok, anak erih bahkas khavun kolengak anak kinyam erih pomukus ah umbak tolapin. Khavun doh mokaling Iyok nuk julang totai ukun ocin louk kuman jok sonyuang umbak uruk. Tului iyam arok lovuk nuk doh kapat.
Dolang ponjagak domba
8 Beteng ngolomik erih, arok ulun jok jagak domba unuk lahpang uruk. 9 Nyolengak lombut hiyon molekat Tuhan mokarah arop ah ahkan doh. Tarang ngolondang jok tahkan Hotalak nyingah idoh, idoh pun mahik kihkoh doh. 10 Totahpik molekat Hotalak erih marak ah: “Arak mihkoh! Ahkuk lombut ngomin tarung jok pios ahkan mik, tarung jok nyenang paring ulun. 11 Hondo ihtuh uwas kongarok nuk kota Daud, Lacak Ponyolamat, Iyok noh Kristus khavun Iyok noh kak Tuhan. 12 Ihtuh tandak ah: Ihkam ahkan nohtok anak lengak ah pomukus umbak tolapin khavun pomokaling unuk luvang julang totai ukun ocin louk kuman.”
13 Khavun molekat-molekat jok bohkon nyolengak marah khavun doh momuji Hotalak havo-havoi umbak molekat erih, hiyon doh marak ah:
14 “Torpuji noh Hotalak nuk surga!
Khavun nuk luvang duniak tuh kolunon jok cucuk umbak huang Ah ahkan ngonduon komolum jok pios.”
15 Ulik dolang molekat erih nohtah idoh bulik noku surga, ponjaga-ponjagak domba erih bokesah umbak icok khavun umbak jok bohkon: “Has tok tulak noku Betlehem ahkan nohtok inon jok kojadiu nuk anai, numun jok pomarak Hotalak ahkan ihtok.”
16 Umbot erih idoh turus tulak, khavun tobarung mꞌbak Maria dorok Yusup khavun Anak lengak erih, jok honong kaling nuk luvang julang.
17 Khavun beteng doh nohtok Anak lengak erih, idoh ngesah ah inon jok uwas kongohavot molekat ahkan idoh nohouk kesah anak lengak erih. 18 Khavun paring ulun jok nyonih ah pusong umbak jok kongohavot ponjaga-ponjagak erih ahkan idoh. 19 Totahpik Maria ngivak paring ah erih luvang ahtoi ah khavui mihkir ah. 20 Khavun bulik nai ponjaga-ponjagak erih noku lahpang uruk tahtup momuji khavun nyembah Hotalak, tului paring jok sonyonih khavun jok tonohtok doh rih, tumbas umbak jok kongohavot molekat erih ahkan idoh.
Yesus pomalax khavun sonyerah ahkan Hotalak
21 Umbot umur ah jaluk ondo, anak erih pomalax. Khavun idoh nongak ngarai Ah Yesus, ngarak jok ongak molekat ahkai Ah sojaham Iyok nuk luvang butui inai Ah. a 22 Dahpot noh ondo ah ahkan Yusup dorok Maria morasihb arop doh ulik Maria dimbit kolo jok arok nuk hukum Taurat jok tonulih Musa. Hun erih kak idoh ngomin anak erih noku Yerusalem ahkai ah sonyerah noku Hotalak, c 23 tului nuk luvang hukum Taurat Hotalak, tonulih kolihtuh: “Paring anak bahkas jok okok, iyam taꞌai iyam sonyerah noku Hotalak.” d 24 Idoh pun kanik nongak sahkiu, numun hukum Taurat Hotalak iyok noh icok dalung icok pohuk ocin naꞌang tokukur khavun duok kungan ocin naꞌang merpati jok bio.
25 Tumbas beteng erih nuk Yerusalem arok icok behtik ngarai ah Simeon. Iyok ulun pios jok mihkoh umbak Hotalak iyok honong ngindoi Hotalak nyolamat Israel. Roh Hotalak homboh umbak iyok, 26 khavun Roh Hotalak umbot marak ah ahkai ah, tului iyok iyam ahkan palus sojaham nuneng Lacak Ponyolamat jok kongojanjik Hotalak. 27 Roh Hotalak ngihit Simeon nyolong noku Lovuk Hotalak. Hun erih Yusup dorok Maria ngomin kolengak Yesus nyolong, ahkan sonyerah noku Hotalak numun hukum Taurat jok tonulih Musa.
28 Simeon ngomin Anak erih khavun ah nyokahpuk Ah, khavui momuji Hotalak hiyoi ah:
29 “Huntuh, Tuhan, Ihkok nepat janjim Muk.
Jadik ahkuk jihpon Muk uwas touk noh mahtoi umbak linuh,
30 tului umbak mahtak kuk ahkuk umbot nohtok
Ponyolamat jok tahkan Ihkok Hotalak.
31 Ponyolamat erih tonongak Muk
ahkan paring bangsak.
32 Anak lengak ihtuh kolo tarang jok narang jalan ahkan bangsa-bangsak jok bohkon,e
khavun jadik komuliaan
ahkan bangsak Muk Israel.” f
33 Inai dorok amai Anak erih pusong nyonih inon jok pomarak Simeon mongenai Anak idoh. 34 Simeon momberkat dorok khavun marak ahkan Maria, inai Anak kinyam erih: “Anak ihtuh umbot kongopilik Hotalak nyihing Anak ihtuh tumbuk ulun Israel ahkan kongohukum totahpik tumbuk ulun kak jok ahkan sonyolamat. Iyok ahkan jadik tandak tahkan Hotalak, totahpik ahkan kongolavan ulun arok, 35 tului erih, kotaꞌan noh suang ahtoi doh. Khavun ihkok Maria, arok ohkot ah nain ahtoi muk ahkan koman poros havoi umbak tonevek iso isuk jok monyoꞌot.”
36 Arok icok behtik nabik bavik jok uwas okok tuꞌuk. Ngarai ah Hana, anak Panuel, tahkan suku Aser. Ulik iyok sokavuk pihtuk toun. 37 Hana jadik baluk, khavui huntuh umur ah jaluk puluk ohpat toun. Hondo ngolomik iyok bojoin noku Lovun Hotalak, iyok pahtuh umbak Hotalak, bodoa khavui puasa. 38 Beteng Yusup dorok Maria honong bokesah umbak Simeon, Hana lombut, khavui momuji Hotalak, khavui ah ngesah Anak erih ahkan paring ulun jok ngindoi ondo Hotalak nyolamat Yerusalem.
39 Ulik Yusup dorok Maria nguan paring jok numun hukum Taurat Hotalak, idoh bulik noku Nazaret nuk Galilea. g 40 Anak kinyam erih monahang hajoi Ah. Khavun muhat Iyok punak horahtik khavui Ah kongasik Hotalak.
Yesus nuk luvang Lovun Hotalak
41 Nyinong toun ulun okok Yesus tulak noku Yerusalem ahkan ngoramik hondo hajok Paskah. h 42 Beteng Yesus umur duok balas toun, idoh tulak noku gavik erih jok tumbas numun adat edok. 43 Umbot ngoramik Paskah erih idoh bulik, khavun Yesus honong tohtah nuk Yerusalem, tahpik amai inai Ah iyam hokotaꞌan. 44 Davak idoh Iyok ngohasuk ponyalan doh. Uwas icok ondo noh ponyalan doh punan doh taꞌai ah ngindoi Iyok iyam arok ngohasuk idoh. Khavun idoh ngurah Iyok nuk dolang lihit liting doh khavun ulun jok idoh taꞌai ah. 45 Totahpik idoh iyam bohavung umbak Iyok, jadik idoh hulik noku Yerusalem ngurah Iyok. 46 Uwas toluk ondo noh idoh ngurah Ah, idoh nyombang Iyok nuk luvang Lovun Hotalak. Iyok tuot nyonih dolang guruk agamak Yahudi, ulik erih Iyok ngiso-ngisok doh. 47 Paring ulun jok nyonih Iyok salut tului Iyok mutah ah umbak auh jok horahtik. 48 Ulun okok Ah pusong nohtok Iyok. Khavun inai Ah marak Ahkai ah: “Oo...Nak, ngombai ihkok nguan ihtuh ahkan korok amai Muk? Korok amai Muk liduk ngurah Ihkok!”
49 Yesus mutah ah: “Ngombai poh amai khavun inai ngurah Ahkuk? Iyam kam taꞌai ah leh Ahkuk iyam taꞌai ah iyam arok nuk Lovuk Amai Kuk?” 50 Totahpik idoh iyam Ngorehti auh Yesus erih.