Yesus ngopilik murit-murit Ah jok topahtuk ah
(Mat. 4:18-22; Mrk. 1:16-20)
5
Icok kotihkak, Yesus tombok nuk saran kovang lavang Genesaret.a Unuk anai tumbuk ulun hokorumbuk noliung Yesus kanik nyonih Auh Hotalak. 2 Yesus nohtok arok duok alut nuk saran kovang erih. Ulun-ulun jok pongocin uwas tohkak noh tahkan alut doh, khavun honong morasih jalak doh. 3 Yesus jahkat noku luvang icok alut erih, Iyok noh alut Simon, khavui nyuhuk Simon nulak alut ah erih macuk nyohiyot tahkan kovang. Yesus tuot unuk luvang alut erih khavui ngajar ulun arok. b4 Ulik Iyok umbot ngajar, Iyok nuhtui ahkan Simon: “Ngavus nai noku jok monyalom, khavun noravuh jalak muk ahkan navan ocin.”
5 Simon mutah Ah: “Guruk, uwas icok ngolomik tuh noh ihkai nyangit korejak totahpik yarok ngonduon inon-inon. Oluk poh koderih, tului Ihkok jok nyuhuk ah, ahkuk ahkan noravuh jalak tuh.” c 6 Khavun ulik dok nguai ah idoh ngonduon ocin jok punak arok nyangit nyiring jalak doh manyo botisah. d 7 Khavun idoh nyavot kavat umbak jolahan doh jok arok nuk alut jok bohkon. Jolahan-jolahan doh erih lombut turus ngavat doh, idoh havo-havoi nyuang koduok alut erih umbak ocin nyiring tuvik manyo lohtong. 8 Beteng Simon nohtok paring aꞌang erih, Iyok tunop nuk husuk Yesus, khavui marak ah: “Tuhan, nohtah ah noh ahkuk, tului ahkuk tuh ulun jok bodosa.”
9 Simon bokesah koderih tului iyok khavun paring ulun jok umbak iyok pusong nohtok tumbuk ah ocin jok duon doh. 10 Koderih kak umbak dolang jolahan Simon, iyok noh Yakobus khavun Yohanes, anak-anak Sebedeus. Yesus nuhtui ahkan Simon: “Arak mihkoh! Tahkan huntuh ihkok ahkan jadik ponjalak kolunon.”
11 Simon khavun dolang jolahai ah nyokarah alut doh noku kovang, khavun doh nohtah paring ah, turus ngohasuk Yesus.
Yesus nyahkang ulun buah belang
(Mat. 8:1-4; Mrk. 1:40-45)
12 Icok ondo beteng Yesus arok nuk icok kota, nuk anai arok icok behtik ulun bahkas jok buah belang soup behtiu ah. Beteng iyok nohtok Yesus, iyok tunop nyiring tuhkun tanak nuk husuk Yesus, khavun jua-juan nyavot: “Tuhan ngindoi Ihkok kanik Ihkok touk nyahkang ahkuk.”
13 Khavun Yesus notacuk longoi Ah noku isung ulun erih khavun marah Ah: “Ahkuk kanik, hun ihtuh kak ihkok pios.” Beteng erih kak ulun erih pios. 14 Yesus majak ulun erih marak ah ahkan paring ulun hiyoi Ah: “Tulak nai mokarah ah noh arop muk ahkan okon agamak Yahudi, ahkan doh taꞌai ngindoi ihkok uwas pios. Khavun tulak nai nongak ah noh surung ahkan Hotalak, havoi umbak surung jok sonyuhuk Musa, ahkan tandak ah ahkan ulun arok tului ihkok tuꞌuk-tuꞌuk pios.” e
15 Totahpik kesah tarung Yesus soup nuk ohtoi anai, khavun tumbuk ulun lombut ahkan nyonih Iyok khavun ahkan konopios tahkan ponyahkit idoh. 16 Oluk poh koderih Yesus bojoin tulak bodoa noku unuk jok bungun.
Yesus nyahkang ulun kehtot
(Mat. 9:1-8; Mrk. 2:1-12)
17 Icok ondo beteng Yesus honong ngajar, arok pirak behtik ulun Parisi khavun guru-guruk agamak tuot unuk anai. Idoh lombut tahkan Yerusalem, khavun tahkan kapung-kapung unuk Galilea khavun Yudea. Kuasa Hotalak arok umbak Yesus ahkan nyahkang ulun arok. 18 Beteng erih arok pirak behtik lombut ngomin ulun kehtot jok kaling unuk isung tandu ah. Idoh ngorihan ngomin ulun erih noku luvang lovuk ahkan doh touk nihkas iyok noku husuk Yesus. 19 Totahpik tului yamios karon ulun unuk anai, idoh iyam taꞌan ngoniu ah nyolong. Kotului erih idoh ngomin iyok nuhkat noku isung sahpo lohpo. Khavun idoh ngahkas sahpo erih, khavun doh hombo-homboh nguluh ah nahtup tandu ah noku husuk Yesus unuk tohun-tohun ulun arok. 20 Hun erih Yesus nohtok yamios kohajoi ah kopocayak doh, Iyok nuhtui umbak ulun kehtot erih: “Oo konduang, dosa muk uwas kongapun.”
21 Guru-guruk agamak khavun ulun-ulun Parisi bopihkir luvang ahtoi doh: “Iyai Ulun ihtuh jok bohanyik ngohinak Hotalak? Iyai jok touk ngapun dosa ulun salak mꞌbak Hotalak kiak?”
22 Yesus taꞌai ah inon jok pomihkir doh. Jadik Iyok nuhtui: “Ngombai ihkam bopihkir kolo erih unuk luvang ahtoi mik? 23 Amoh jok paling mohinai, marak ah: ‘Dosa muk uwas kongapun’ atau marak ah: ‘Kuat nai khavun nyalan nai?’ 24 Totahpik huntuh Ahkuk ahkan mokarah ah ahkan mik tului unuk isung duniak ihtuh Anak Kolunon bokuasak ahkan ngapun dosa.” Khavun Yesus nuhtui ahkan ulun jok kehtot erih: “Kuat nai, ngahtang ah tandu muk tuh khavun bulik nai!”
25 Iyok turus kuat unuk husuk paring ulun, khavun ngahtang tandu ah, khavun bulik tahtup momuji Hotalak.
26 Paring ulun pusong khavun momuji Hotalak. Khavun tahtup mihkoh, idoh nuhtui: “Hondo tuh ihkai uwas nohtok aꞌang jok motaher!”
Yesus naꞌah Lewi
(Mat. 9:9-13; Mrk. 2:13-17)
27 Ulik erih Yesus boluak khavun nohtok icok behtik ulun ponahkih pajak, ngarai ah Lewi. Iyok honong tuot unuk ulun baꞌas ngombayar pajak. Yesus nuhtui ahkai ah: “Has ngohasuk Ahkuk.” 28 Iyok turus kuat khavui nohtah paring ah, khavun ngohasuk Yesus.
29 Ulik erih Lewi bogavik noharang Yesus nuk lohpo ah. Tumbuk ponahkih pajak khavun ulun-ulun bohkon umbak kuman homboh umbak idoh. 30 Arok pirak behtik ulun Parisi khavun guru-guruk agamak iyam pios pongomok doh, khavun nuhtui ahkan murit-murit Yesus: “Ngombai paring mik kuman ngorih umbak ponahkih pajak khavun ulun-ulun jok bodosa?” f
31 Yesus mutah ah: “Ulun jok cehat iyam poduluk dokter. Tihkas ulun jok poros kiak. 32 Ahkuk lombut iyam ahkan naꞌah ulun-ulun jok marak arop ah uwas pios, totahpik Ahkuk lombut ahkan ulun-ulun jok marak arop ah uwas salak, ahkan idoh botobat tahkan kosalak-kosalak doh.”
Kisok mongenai puasa
(Mat. 9:14-17; Mrk. 2:18-22)
33 Ulik erih ulun Parisi khavun guru-guruk agamak nuhtui ahkan Yesus: “Murit-murit Yohanes khavun murit-murit kai bojoin puasa khavun bodoa. Totahpik murit-murit Muk kuman khavun ngorih.”
34 Yesus mutah idoh: “Iyam alik ihkam nyuhuk ulun-ulun jok lombut noku gavik mik puasa, kotahin bosai ah honong hicok umbak idoh. 35 Totahpik ahkan lombut ohkot ah bosai ah erih ahkan tonavan khavun omin ulun buho tahkan idoh. Beteng erih noh idoh ahkan bopuasak.”
36 Khavun Yesus ngesah ahkan idoh tindung ihtuh: “Ngindoi ihkam tepun kolambik bohuak iyam mukin ihkam nisah kolambik bohuak erih unuk nupang kolambik usang. Tului ngindoi ihkam nguai ah kolo erih, kolambik jok bohuak erih ahkan botisah, khavun kolambik jok usang erih iyam cucuk umbak koromaꞌang tupang jok bohuak. 37 Koderih kak iyam arok ulun jok nusuh danum anggur bohuak noku luvang katong uhpak jok usang, kotului danum anggur bohuak erih ahkan nguan katong erih botisah. Mahkak danum anggur erih ahkan ohpah tokindo, khavun katong ah botisah. 38 Danum anggur jok bohuak harus konguih noku luvang katong jok bohuak kak. 39 Koderih kak iyam arok ulun jok kanik ngorih danum anggur bohuak ulik ngorih danum anggur jok usang, tului ulun ahkan marak ah: ‘Danum anggur usang erih punak tamam’, hiyoi ah.”