Yesus ngajar marak mongenai Ondo Kiamat
Lovun Hotalak ahkan konolohpung
(Mat. 24:1-2; Luk. 21:5-6)
13
Kotihkak Yesus boluak tahkan Lovun Hotalak, arok icok behtik murit Ah marak ahkai Ah: “Guruk, nohtok ah noh yamios koborohon ah bahtuk-bahtuk ihtuh khavun yamios kotamam ah Lovun Hotalak ihtuh!”2 Khavun hiyon Yesus ahkai ah: “Inon leh ihkok nohtok lovuk jok borohon erih? Paring ah erih ahkan pononorop. Yarok icok bahtuk pun jok ahkan bosusun nuk isung bahtuk jok bohkon.”
Topahtuk kojorak
(Mat. 24:3-14; Luk. 21:7-19)
3 Kotihkak Yesus tulak nuk korong Zaitun, Iyok tuot nuk jok hotoharep mbak Lovun Hotalak. Khavun Petrus, Yakobus, Yohanes khavun Andreas idoh lombut khavun bokisok mbak Iyok, 4 hiyon doh: “Guruk marak ah noh ahkan kai, mirak Lovun Hotalak erih ahkan pomonorop? Khavun inon tandak ah ngindoi aꞌang erih was ahkan torjadik?”
5 Yesus mutah doh hiyoi: “Touk-touk noh! Arak sapai ihkam tonihpuk. 6 Tumbuk ulun ahkan lombut hapan ngarak Kuk, khavun hiyon doh: ‘Ahkuk noh Iyok!’ Khavun nihpuk tumbuk ulun. 7 Ngindoi ihkam nyonih auh ulun jok kalut nyangit khavun dolang tarung mongenai ulun ahkan hobunuk, arak ihkam mihkoh. Aꞌang erih harus torjadik, totahpik iyam rehti ah Ondo Kiamat was donik. 8 Kotului nogarak ahkan hokolavan mbak nogarak jok bohkon khavun korajaan ahkan hokolavan mbak korajaan jok bohkon. Unuk paring daerah ahkan torjadik tanak tokuruk khavun iyam arok ukun ponguman jok touk doh kumai ah. Paring ah erih iyok noh topahtuk ahkan lombut kojorak jok ahkan torjadik, kolo ulun bavik jok poros ahkan dimbit.
9 Totahpik ihkam, touk-touk noh! Ihkam ahkan tonavan khavun sonyerah noku pongadilan agamak. Ihkam ahkan pononyorak nuk lohpo ibadat. Khavun ihkam ahkan kongonin noku dolang pomipin khavun lacak kotului ngohasuk Ahkuk. Kotihkak erih noh ihkam touk ngesah mongenai Ahkuk ahkan idoh. a 10 Totahpik kesah mongenai Tarung Pios harus pomarak holuk ahkan paring bangsak. 11 Khavun ngindoi ihkok tonavan khavun sonyerah noku pongadilan, arak noh ihkok liduk mbak inon jok harus pomarak muk. Totahpik marak ah inon jok ongak Hotalak ahkan muk beteng hun erih kak, kotului iyam ihkok jok marak ah, totahpik Roh Kudus. 12 Icok behtik ulun harik ahkan nyerah jolahai harik jok bohkon supayak pomunuk, koderih kak mbak amai ahkan nyerah anak ah. Dolang anak ahkan ngolavan mbak amai inai ah khavun nyerah amai inai ah supayak pomunuk. 13 Ihkok ahkan konomecik paring ulun kotului ngarak Kuk. Totahpik ulun jok pocayak nyiring pongohpah ah iyok ahkan solamat.” b
Kojorak jok punak bahat
(Mat. 24:15-28; Luk. 21:20-24)
14 Hiyon Yesus hinok: “Ihkok ahkan nohtok icok behtik ulun jok punak jaek jok ahkan nguan paring aꞌang lohpung. Ulun erih ahkan tombok khavun ngohtor unuk jok iyam pahtut ahkai ah. (Ulun jok ngomasak ihtuh harus tuꞌuk-tuꞌuk ngorehti!) Beteng hun erih ulun jok arok nuk Yudea harus buho noku puruk. c 15 Ulun jok arok nuk isung sahpo lohpo arak mosuluh khavun nyolong noku luvang lohpo ahkan ngomin barang bandak ah. d 16 Ulun jok arok nuk umok arak hulik ngonin dolang kolambik. 17 Colahkak noh dolang bavik jok beteng hun erih honong botohik khavun jok honong noposuk anak ah. 18 Bodoa supayak paring ah erih arak torjadik beteng musim ucan. 19 Kotului beteng erih ahkan arok kojorak jok jaham pujik arok tahkan topahtuk Hotalak napak duniak nyiring huntuh, havun pun iyam arok ulun jok ahkan ngomok kojorak jok kolihtuh hinok. e 20 Totahpik kotului kopion Hotalak mbak ulun jok konopilik Ah, Iyok was ngopuhtus ah kojorak jok paling hajok iyam taꞌai tahik. Kotului ngindoi tahik, iyam arok kolunon jok duoi bolum nuk duniak.
21 Beteng hun erih ngindoi arok ulun jok marak ah ahkam muk: ‘Nohtok ah, Lacak Ponyolamat arok nuk ohtoi!’ ngindoi iyam ‘Nohtok ah, Lacak Ponyolamat arok nuk anai!’, arak ihkam pocayak mbak inon jok pomarak ah. 22 Kotului beteng erih arok ulun-ulun jok bobalik ngahkuk arop ah sobagai Lacak Ponyolamat khavun arok kak jok ngahkuk arop ah sobagai nabikf. Idoh ahkan nguan tanda-tandak khavun aꞌang jok motaher, supayak ngindoi idoh touk nguai idoh ahkan ngomalik paring ulun jok konopilik Hotalak. 23 Touk-touk noh ihkam! Ahkuk was holuk marak paring ah ihtuh ahkan mik.”
Polombut Anak Kolunon
Tindung mongenai puꞌun harak
(Mat. 24:29-35; Luk. 21:25-33)
24 Khavun Yesus hulik marak ah hinok hiyoi Ah: “Totahpik beteng hun erih, umbot kojorak erih ohpah, mahtan ondo ahkan jadik pindong khavun bulan iyam ahkan arok loang ah. g 25 Khavun dolang potion ahkan nohkah tahkan langit, khavun dolang ponguasak langit ahkan kalut. h 26 Beteng hun erih ulun ahkan nohtok Anak Kolunon lombut nuk luvang havun umbak paring kuasak khavun komuliaan Ah. i 27 Beteng erih kak Iyok ahkan nyuhuk molekat-molekat Ah ngupur paring ulun jok konopilik Ah, idoh ahkan konupur tahkan paring unuk jok arok nuk duniak.
28 Bolajar noh tahkan puꞌun harak. Ngindoi pahting ah khavun daui jok bio was kihtan, ihkam taꞌai iyam tahik nai buak ahkan muak. 29 Mahkak, ngindoi ihkam nohtok paring aꞌang erih torjadik, ihkam harus taꞌai ngindoi ondo ah was manyo noh docok.” 30 Hiyon Yesus ahkan doh: “Ahkuk marak ahkam muk nohouk ah paring jok kongesah Kuk erih ahkan torjadik sojaham paring ulun jok bolum huntuh mahtoi uras. 31 Langit khavun duniak ahkan niho, totahpik Auh Kuk iyam ahkan niho nyiring yarok tihkas nyamah ah.”
Ihkam harus touk-touk
(Mat. 24:36-44)
32 “Totahpik, iyam icok behtik pun jok taꞌai mirak ondo ah khavun jam ah. Molekat jok nuk surga pun iyam taꞌai khavun Anak Kolunon pun iyam Yok taꞌai, kotului Amai kiyak jok taꞌai. j 33 Jadik ihkam harus jaga-jagak khavun nohouk ah, kotului ihkam iyam taꞌai mirak ondo ah ahkan torjadik. 34 Havoi mbak kolo icok behtik jok ahkan nohtah lohpo ah, iyok moletah dolang jihpoi supayak doh ngurus ah. Iyok marak ah inon jok harus doh nguai kotahin yok tulak. Khavun iyok marak ahkan doh jok jagak atop, supayak jagak atop pios-pios kotahin yok tulak. k 35 Kotului erih touk-touk noh, ihkam iyam taꞌai mirak ulun jok tepun lohpo erih ahkan bulik, inon leh iyok bulik hiro-hirok, ngolomik, tohun ngolomik, ngindoi iyam topolaoi. 36 Supayak ngindoi iyok nyolengak lombut arak sapai yok nohtok ihkam tiruh. 37 Ahkuk marak ahkam muk khavun ahkan paring ulun jok bohkon: ‘Touk-touk noh!’ ”