Yesus jalan jok hinut ngindoi tulak noku Amai
14
Hiyon Yesus ahkan dolang murit-Ah: “Arak kam liduk, pocayak noh mbak Hotalak, khavun pocayak kak mbak Ahkuk. 2 Nuk lohpo Amai Kuk tumbuk nuk mocon. Ngindoi aꞌang erih yam hinut, Ahkuk iyam ahkan bokesah naing erih. Tului erih noh Ahkuk tulak noku anai nyodiak unuk kam mocon. 3 Ngindoi Ahkuk was umbot nyodiak unuk ahkan mik, Ahkuk ahkan hulik lombut hinok ngomin ihkam, supayak ihtok mocon havo-havoi nuk anai. 4 Noku amoh Ahkuk ahkan tulak, ihkam halik taan mik jalan ah.”5 Khavun hiyon Tomas ahkan Yesus: “Tuhan, ihkai iyam kai taan noku amoh Tuhan tulak, bohkolo kai touk taꞌai jalan ah?”
6 Yesus mutah ah: “Ahkuk noh jalan, ajar barak jok hinut khavun bolum. Yarok icok behtik pun jok touk lombut noku Amai ngindoi iyam nyihing Ahkuk. 7 Ngindoi ihkam tuꞌuk nyokonok Ahkuk, ihkam halik nyokonok Amai-Kuk kak. Huntuh ihkam was nyokonok Iyok khavun ihkam was nohtok Iyok.”
8 Mahkak hiyon Pilipus ahkan Yesus: “Tuhan, motohtok ah noh ahkan kai Amai, erih kiyak savot kai.”
9 Totahpik Yesus mutah ah, hiyoi: “Was yamios kotahiu Kuk hicok humbak mbak ihkam, khavun jaham kak ihkok nyokonok Ahkuk, Pilipus? Ulun jok was nohtok Ahkuk, iyok was nohtok Amai kak. Bohkolo kok touk marak ah, ‘motohtok ahkan kai Amai’? 10 Pilipus! Iyam leh kok pocayak, ngindoi Ahkuk hicok mbak Amai khavun Amai hicok mbak Ahkuk? Inon jok pomarak Kuk ahkan mik, iyam kokanin Ekuk bongok jok marak ah. Amai hicok mbak Ahkuk, Iyok noh jok nguan paring ah erih. 11 Pocayak noh mbak Ahkuk, ngindoi Ahkuk hicok mbak Amai khavun Amai hicok mbak Ahkuk, ngindoi ihkam iyam pocayak mbak inon jok pomarak Kuk mahkak pocayak kiyak tului paring aꞌang jok konguak Kuk. 12 Punak tuꞌuk auh Kuk tuh: Ulun jok pocayak mbak Ahkuk, iyok ahkan numui inon jok was konguak Kuk, holovik hinok idoh halik ahkan nguan aꞌang jok motaher holovik hajok mbak aꞌang jok konguak Kuk. Kotului nyohuluk hinok Ahkuk ahkan tulak noku Amai-Kuk. 13 Khavun inon kiyak jok sonyavot mik nuk luvang ngarak Kuk, paring ah erih ahkan tonongak-Kuk ahkan mik. Mbak koderih paring ulun ahkan ngolehkak Amai nyihing Ahkuk, Anak-Ah. 14 Ngindoi ihkam nyavot inon pun luvang ngarak-Kuk mahkak paring ah erih ahkan tonongak Kuk.”
Janjik Yesus ahkan nongak Roh Kudus
15 Khavun hiyon Yesus: “Ngindoi ihkam mongasihi Ahkuk, ihkam ahkan nguai ah dolang poletah Kuk. 16 Ahkuk ahkan nyavot mbak Amai, supayak arok jok bohkon jok ngavat ihkam, yok erih Roh Kudus. Roh erih noh jok ahkan hicok humbak mbak ihkam nyiring yarok tihkas nyamah ah. 17 Roh erih arok noh Roh Hotalak jok ahkan motohtok ahkan mik paring aꞌang jok hinut tahkan Hotalak. Duniak iyam taꞌai norimak Iyok, kotului idoh iyam nohtok khavun iyam nyokonok Iyok. Totahpik ihkam nyokonok Iyok, kotului Iyok hicok humbak mbak ihkam, khavun Iyok ahkan mocon nuk luvang ihkam.
18 Ihkam iyam ahkan tonohtah Kuk bongon mik nuk duniak tuh kolo ulun jok yarok inai amai mik. Ahkuk ahkan hulik noku ihkam. 19 Iyam tahik hinok kolunon nuk duniak idoh iyam ahkan nohtok Ahkuk hinok. Totahpik ihkam ahkan nohtok Ahkuk. Kotului Ahkuk bolum, ihkam halik ahkan bolum. 20 Beteng aꞌang erih torjadik mahkak ihkam ahkan taꞌai ngindoi Ahkuk hicok mbak Amai. Koderih kak ihkam ahkan taꞌai Ahkuk hicok mbak ihkam khavun ihkam hicok mbak Ahkuk.
21 Ulun jok norimak dolang poletah-Kuk khavun nguai ah, iyok noh jok mongasihi Ahkuk. Amai-Kuk ahkan mongasihi ulun jok mongasihi Ahkuk. Ahkuk pun ahkan mongasihi ulun erih khavun mokarah arop Kuk ahkai ah.”
22 Ulun jok ngarai ah Yudas, iyam Yudas Iskariot, iyok bokisok mbak Yesus: “Tuhan, ngombai Tuhan kanik mokarah arop Muk ahkan kai totahpik iyam ahkan duniak?”
23 Yesus mutah ah: “Ulun jok mongasihi Ahkuk, ahkan ngohasuk ajar barak Kuk. Amai-Kuk ahkan mongasihi iyok. Ahkuk khavun Amai ahkan lombut noku iyok khavun mocon hicok humbak mbak iyok. 24 Totahpik ulun jok iyam mongasihi Ahkuk, iyok iyam ngohasuk ajar barak Kuk. Khavun ajar barak jok sonyonih mik erih iyam tahkan Ahkuk, totahpik tahkan Amai jok nguhtus Ahkuk.
25 Paring ah erih pomarak Kuk ahkam mik kotahin Kuk honong hicok humbak mbak ihkam. 26 Totahpik Roh jok ngavat ihkam, arok noh Roh Hotalak jok konguhtus Amai nuk luvang ngarak Kuk. Iyok noh jok ahkan ngajar ihkam mongenai paring aꞌang khavun Iyok ahkan nohouk ihkam mongenai paring aꞌang jok was pomarak Kuk ahkan mik.
27 Damai sojahtera tonohtah Kuk ahkan mik. Damai sojahtera Ekuk tonongak Kuk ahkan mik. Sojahtera jok ongak Kuk erih iyam kolo jok tonongak duniak ahkan mik. Arak noh ihkam liduk khavun arak noh ihkam mihkoh. 28 Kam was nyonih Kuk marak ah: Ahkuk ahkan tulak, totahpik Ahkuk ahkan lombut hinok noku ihkam. Ngindoi ihkam mongasihi Ahkuk, ihkam ahkan ngandah Ahkuk tulak noku Amai, kotului Amai holovik bokuasak mbak Ahkuk. Totahpik ihkam iyam ngandah ngindoi Ahkuk tulak. 29 Ahkuk marak erih ahkam muk huntuh, sojaham paring aꞌang erih torjadik. Supayak ngindoi torjadik nain, ihkam ahkan pocayak inon jok pomarak Kuk erih hinut. 30 Ahkuk iyam ahkan tumbuk bokesah hinok mbak ihkam, kotului Lacak paring otuk jok nguasak duniak tuh lombut. Totahpik iyok iyam duoi nguasak Ahkuk. 31 Tahpik paring ah erih alah nyolung supayak duniak taꞌai ngindoi Ahkuk mongasihi Amai khavun ngorejak paring jok ponoletah Amai ahkak Kuk.
Boh, tok tulak tahkan ohtoi.”