Puun anggur jok hinut
15
Yesus bokesah mbak murit-murit-Ah hatin tindung, hiyoi-Ah: “Ahkuk noh puun anggur jok hinut, khavun Amai Kuk noh jok ngurus kabun erih. 2 Ulun-ulun jok pocayak kolo pahting puun anggur jok hicok mbak Ahkuk, pahting jok iyam muak ahkan tonuhtuk Amai khavun dolang paring pahting jok muak, ponorasih Amai kak supayak iyok muak makin arok. 3 Ihkam was borasih kotului ajar barak jok tonongak Kuk, ihkam borasih supayak muak arok. 4 Tehtap noh ihkam hicok mbak Ahkuk khavun Ahkuk ahkan tehtap hicok mbak ihkam. Pahting puun anggur iyam taꞌai muak ngindoi iyok iyam tehtap hicok nuk puui ah. Koderih kak mbak ihkam, ihkam touk muak ngindoi tehtap hicok mbak Ahkuk.5 Ahkuk kolo puun anggur, khavun ihkam kolo dolang pahting ah. Ulun jok nulo hicok mbak Ahkuk khavun Ahkuk hicok kak mbak iyok, ulun erih muak aroka. Kotului ngindoi Ahkuk iyam ngavat ihkam, mahkak yam taan mik nguan ino-inon. 6 Ulun jok iyam tehtap hicok mbak Ahkuk, iyok ahkan kolo pahting puun anggur jok kogindo khavun jadik koring. Dolang pahting puun anggur jok kolo erih ahkan konupur khavun indo noku luvang ahpui supayak bopahpui. 7 Ngindoi ihkam tehtap hicok mbak Ahkuk khavun ajar barak-Kuk tehtap nuk luvang ahtoi mik, nyavot ah kiyak mbak Amai inon jok kokanin mik, mahkak savot mik erih ahkan tonongak-Ah. 8 Paring ulun ahkan ngolehkak Amai-Kuk ngindoi ihkam muak arok. Mbak koderih mahkak ihkam motohtok ah ngindoi ihkam arok noh murit-Kuk.
Yesus moletah dolang murit-Ah supayak idoh mongasihi icok mbak jok bohkon
9 Kolo Amai mongasihi Ahkuk, kolo erih noh Ahkuk mongasihi ihkam. Tehtap noh ihkam bolum sobagai ulun jok kongasih Kuk. 10 Ngindoi ihkam nguan inon jok pomarak Kuk, ihkam tehtap bolum sobagai ulun jok kongasih Kuk. Havoi kolo Ahkuk uwas nguan poletah Amai Kuk khavun tehtap bolum sobagai ulun jok kongasih Ah.
11 Paring ah ihtuh pomarak Kuk ahkan mik, supayak ihkam ngandah havoi mbak kandah Ekuk kak, khavun kosenang mik jadik yarok tahpas kokurang ah. 12 Ihtuh noh poletah Kuk ahkan mik: Ihkam alah mongasihi icok mbak jok bohkon, kolo Ahkuk was mongasihi ihkam. b 13 Yarok kasih jok holovik hajok tahkan kasih ulun jok kanik palus ahkan dolang jolahai ah. 14 Ihkam arok noh dolang jolahak Kuk, ngindoi ihkam nguai inon jok ponoletah Kuk ahkan mik. 15 Ihkam iyam nai tonaꞌah Kuk jihpon, kotului jihpon iyam taꞌai inon jok konguan tuan ah. Totahpik ihkam tonaꞌah Kuk jolahak, kotului paring aꞌang jok sonyonih Kuk tahkan Amai, was pomarak Kuk ahkam mik. 16 Iyam ihkam jok milik Ahkuk, totahpik Ahkuk noh jok milik ihkam. Khavun Ahkuk nyuhuk ihkam tulak supayak ihkam muak arok, sohinggak hasil korejak mik erih buai ah nyiring yarok tihkas nyamah ah. mbak koderih Amai nongak ahkan mik inon kiyak jok sonyavot mik tului ihkam arok noh murit-Kuk. 17 Ihtuh noh poletah Kuk ahkan mik: Mongasihi noh icok mbak jok bohkon.”
Ulun nuk duniak tuh becik mbak Yesus khavun dolang murit-Ah
18 Hiyon Yesus ahkan dolang murit-Ah: “Kotihkak ulun duniak tuh ngomecik ihkam, nohouk ah Ahkuk was holuk doh ngomecik ah. 19 Ngindoi ihkam duniak tepui, idoh ahkan mongasihi ihkam. Totahpik huntuh Ahkuk was milik ihkam tahkan holang idoh, sohinggak ihkam iyam nai duniak tepui. Kotului erih noh doh becik mbak ihkam. 20 Nohouk ah inon jok was pomarak Kuk ahkan mik: Jihpon iyam ahkan holovik peting mbak tuan ah. Ngindoi ulun duniak was monyorak Ahkuk, mahkak idoh ahkan monyorak ihkam kak. Ngindoi idoh ngohasuk ajar barak Kuk, idoh ahkan ngohasuk ajar barak ihkam kak. c 21 Idoh ahkan nguan ihkam kolo doh nguan Ahkuk kotului ihkam murit-Kuk, khavun idoh iyam nyokonok Amai jok nguhtus Ahkuk. 22 Ngindoi Ahkuk iyam lombut khavun marak ahkan doh ajar barak tahkan Hotalak, idoh mihtik iyam ahkan bodosa tului yam doh taꞌai. Totahpik huntuh Ahkuk was lombut khavun ngajar doh, sohinggak iyam taan doh marak ah: Yarok kai taꞌai. 23 Ulun jok becik mbak Ahkuk, iyok becik kak mbak Amai-Kuk. 24 Ahkuk was nguan paring aꞌang jok motaher nuk duniak tuh jok yam pujik ulun bohkon nguai ah. Ngindoi Ahkuk iyam nguan paring ah erih mahkak idoh iyam ahkan bodosa tului becik mbak Ahkuk. Holuk poh huntuh idoh was nohtok paring ah erih, totahpik idoh tehtap becik mbak Ahkuk khavun Amai-Kuk. 25 Paring ah erih alah koderih noh, supayak nyolung noh inon jok tonulih luvang kitab Hukum Taurat, yok erih: Idoh becik mbak Ahkuk, holuk poh Ahkuk iyam nguan inon pun jok pahtut doh becik ah. d
26 Nain Ahkuk ahkan nguhtus Roh Kudus jok ahkan ngavat ihkam. Roh erih polombut ah tahkan Amai. Roh erih noh jok ahkan motohtok aꞌang jok hinut mongenai Hotalak. Ngindoi Iyok lombut, Iyok ngesah ahkan mik kosaksian mongenai Ahkuk. 27 Khavun ihkam halik alah nongak kosaksian mongenai Ahkuk, kotului ihkam was hicok humbak mbak Ahkuk tahkan topahtuk Kuk ngajar.”