16
Hiyon Yesus ahkan dolang murit-Ah: “Paring ah ihtuh pomarak Kuk ahkan mik, supayak ihkam iyam nohtah kopocayak mik mbak Ahkuk. 2 Nain arok unuk ah ihkam ahkan ponoluak tahkan lohpo-lohpo unuk ulun Yahudi sombayang. Khavun ahkan lombut ondo ah ngindoi ulun jok munuk ihkam idoh davak idoh nyenang ahtoi Hotalak. 3 Idoh nguan paring ah erih ahkan mik kotului idoh yam nyokonok Amai khavun Ahkuk. 4 Totahpik huntuh Kuk marak ahkan mik, supayak ngindoi aꞌang erih torjadik nain, tohoun mik ngindoi Ahkuk was marak ahkan mik.”Paring aꞌang jok konguan Roh Hotalak
Khavun hiyon Yesus hinok: “Tahkan topahtuk Kuk ngajar ihkam paring aꞌang erih yarok Kuk marak ahkam mik, kotului Ahkuk honong hicok humbak mbak ihkam. 5 Totahpik huntuh Ahkuk ahkan tulak noku Amai jok nguhtus Ahkuk, khavun yarok icok behtik pun nuk holang ihkam jok ngisok ah noku amoh Ahkuk tulak. 6 Kotului Ahkuk marak paring ah aꞌang erih ahkam mik, huntuh ihkam punak liduk. 7 Totahpik inon jok pomarak Kuk ahkan mik punak tuꞌuk. Ihkam ahkan holovik pios ngindoi Ahkuk tulak, kotului ngindoi Ahkuk iyam tulak, Roh Kudus jok ngavat ihkam erih iyam ahkan lombut. Tahpik ngindoi Ahkuk tulak Ahkuk ahkan nguhtus Roh erih lombut noku ihkam. 8 Ngindoi Iyok lombut, Iyok ahkan mokarah ah ahkan duniak ngindoi idoh jaham ngorehti mbak hinut: Mongenai rehti dolang dosa, mongenai iyai jok hinut nuk husuk Hotalak, mongenai bohkolo Hotalak ahkan ngohakim dolang ulun nuk duniak. 9 Roh Hotalak ahkan motohtok ah ngindoi iyam tuꞌuk-tuꞌuk pocayak mbak Ahkuk arok noh dosa. 10 Roh erih ahkan motohtok ah iyai jok hinut nuk husuk Hotalak. Ahkuk noh jok hinut nuk husuk Ah kotului Ahkuk tulak noku Amai, khavun ihkam iyam ahkan nohtok Ahkuk hinok. 11 Roh erih ahkan motohtok ah ngindoi Hotalak ahkan ngohakim dolang ulun duniak, tului Lacak paring otuk was konohukum.
12 Honong tumbuk jok kanik pomarak Kuk ahkan mik, totahpik huntuh iyam ahkan duon mik norimak paring aꞌang erih. 13 Totahpik ngindoi Roh erih lombut, yok erih Roh jok motohtok aꞌang jok hinut mongenai Hotalak, ihkam ahkan onin noku paring aꞌang jok hinut. Iyok iyam ahkan bokesah kotului kokaniu-Ah totahpik bokesah mongenai inon jok was sonyonih-Ah. Khavun Iyok ahkan marak ahkan mik inon jok ahkan torjadik. 14 Roh erih ahkan ngolehkak Ahkuk, nyihing inon jok pomarak-Ah ahkan mik jok was tonorimak-Ah tahkan Ahkuk. 15 Paring aꞌang jok Amai tepui paring ah erih Kuk halik tepui kak. Kotului erih noh Kuk marak ahkam mik inon jok pomarak Roh ahkan mik, tonorimak-Ah tahkan Ahkuk.”
Koliduk ahkan borubah jadik kandah
16 Hiyon Yesus nurus kesah ah: “Nyohuluk hinok ihkam iyam ahkan nohtok Ahkuk, umbot erih ihkam ahkan pohos nohtok Ahkuk hinok.”
17 Arok pirak behtik murit Yesus idoh bokisok icok mbak jok bohkon, hiyon doh: “Inon manak jok pomarak-Ah ahkan tok: Nyohuluk hinok ihkam iyam ahkan nohtok Ahkuk, umbot erih ihkam ahkan pohos nohtok Ahkuk hinok? Khavun inon rehti auh Ah: Ahkuk tulak noku Amai?” 18 Idoh bokisok bunang: “Inon rehti ah, nyohuluk hinok? Ihtok iyam ngorehti inon manak kesah-Ah erih!”
19 Yesus taꞌai idoh kanik bokisok mbak Iyok. Jadik hiyoi-Ah: “Nenih Kuk marak ah: Nyohuluk hinok ihkam iyam ahkan nohtok Ahkuk, umbot erih ihkam ahkan pohos nohtok Ahkuk hinok. Auh Kuk erih reh jok nguan kam bokiso-kisok icok mbak jok bohkon?
20 Punak tuꞌuk auh Kuk tuh, ihkam ahkan nangih noloung, totahpik ulun nuk duniak ahkan ngandah. Totahpik koliduk mik erih ahkan borubah jadik kandah.
21 Nyohuluk hinok ahkan torjadik mbak ihkam kolo bavik jok was kanik nganak, iyok jorak kotului poros. Totahpik beteng anak erih was boluak, tului iyok punak ngandah tolingau ah nai oros ah kotului anak erih was konganak noku duniak ihtuh. 22 Koderih kak mbak ihkam: Huntuh ihkam liduk, totahpik Ahkuk ahkan bohavung hinok mbak ihkam. Mahkak beteng erih ihkam ahkan punak senang, khavun yarok icok behtik pun jok touk ngonin kosenang erih tahkan ahtoi mik.
23 Beteng ondo erih, ihkam iyam ahkan bokisok ino-inon pun mbak Ahkuk. Punak tuꞌuk auh Kuk tuh: Inon kiyak jok sonyavot mik mbak Amai Kuk luvang ngarak Kuk, paring ah erih ahkan tonongak Amai ahkan mik. 24 Nyiring huntuh ihkam jaham nyavot ino-inon nuk luvang ngarak-Kuk. Nyavot ah noh mahkak ihkam ahkan norimak ah, supayak kandah muk yarok tahpas kokurang ah.”
Yesus was manang tahkan duniak
25 Hiyon Yesus: “Ahkuk was ngajar paring ah ahkan mik nyihing tindung. Totahpik ahkan lombut ohkot ah, Ahkuk iyam ahkan hatin tindung hinok. Totahpik bokesah mbak jelas ahkam mik mongenai Amai. 26 Tahkan ondo erih ihkam bongon mik touk bodoa nyavot mbak Amai paring aꞌang nuk luvang ngarak Ahkuk. Jadik Ahkuk iyam nai poduluk marak ah mbak Amai inon jok sonyavot mik luvang doa. 27 Kotului Amai mongasihi ihkam. Iyok mongasihi ihkam kotului ihkam mongasihi Ahkuk, khavun ihkam pocayak ngindoi Ahkuk lombut tahkan Amai. 28 Tuꞌuk noh Ahkuk lombut tahkan Amai, khavun was lombut noku duniak ihtuh. Totahpik huntuh Ahkuk nohtah duniak khavun hulik noku Amai.”
29 Khavun murit-murit Yesus bokesah mbak Iyok hiyon doh: “Huntuh Tuhan bokesah mbak jelas iyam hatin tindung hinok, 30 khavun huntuh ihkai taꞌai ngindoi Ihkok taam Muk uras paring aꞌang. Iyam poduluk nai ulun bokiso-kisok mbak Ihkok, kotului Ihkok was holuk taꞌai kisok doh. Kotului erih ihkai pocayak Ihkok lombut tahkan Hotalak.”
31 Yesus mutah doh: “Jadik huntuh kam tuꞌuk-tuꞌuk pocayak?” 32 Nohouk ah noh! Was dahpot noh ohkot ah, ihkam ahkan hobomilang khavun ahkan bulik noku lohpo mik. Ihkam ahkan nohtah Ahkuk bongok, totahpik Ahkuk iyam bongok Kuk kiyak kotului Amai hicok humbak mbak Ahkuk. 33 Paring ah ihtuh pomarak Kuk supayak ihkam ngonduon damai sojahtera kotului kam hicok mbak Ahkuk. Nuk duniak ihkam ahkan pononyorak, totahpik tehtap sabar noh ahtoi mik! Ahkuk was ngolohpung kuasak duniak!