Yesus bodoa ahkan murit-murit-Ah
17
Mbot Yesus bokesah naing erih, Iyok nokarak noku langit khavun bodoa, hiyoi-Ah: “Amai, huntuh was dahpot noh ohkot Kuk. Ngolehkak ah noh Ahkuk Anak Muk, supayak Ahkuk ngolehkak Ihkok. 2 Amai was nongak Kuk kuasak ahkan ngahtur paring kolunon, supayak Ahkuk nongak komolum jok pios jok yarok tihkas nyamah ah ahkan paring ulun jok tonongak Amai ahkak Kuk. 3 Ngindoi ulun nyokonok Ihkok, ico-icok ah Hotalak jok hinut, khavun ngindoi idoh nyokonok Ahkuk Yesus Lacak Ponyolamat, jok was konguhtus-Muk, mahkak idoh ahkan bolum nyiring yarok tihkas nyamah ah. 4 Ahkuk was ngumbot korejak jok ongak Amai ahkak-Kuk, mbak koderih Ahkuk ngolehkak Ihkok Amai nuk luvang duniak. 5 Amai-Kuk, huntuh nguai noh Ahkuk konolehkak nuk husuk Muk, mbak cara jok havoi, jok Ihkok nguai ah sojaham duniak tonaoi.6 Ahkuk was nguan paring ulun jok ponotiang Muk ahkak Kuk doh taan Amai. Idoh arok noh Ihkok tepui khavun Ihkok nongak idoh ahkak Kuk. Idoh was nguan inon jok pomarak Amai, supayak doh nguai ah. 7 Huntuh doh was taꞌai paring jok ongak Amai ahkak Kuk paring ah erih tahkan Amai. 8 Tului was pomarak Kuk ahkan doh auh jok pomarak Amai ahkak Kuk kak, khavun idoh was norimak ah. Idoh taꞌai ngindoi Ahkuk tuꞌuk-tuꞌuk lombut tahkan Amai khavun idoh pocayak ngindoi Amai noh jok nguhtus Ahkuk.
9 Ahkuk bodoa ahkan doh, ulun-ulun jok was tonongak Amai ahkak Kuk, kotului idoh Amai jok tepui. Ahkuk iyam bodoa ahkan ulun-ulun jok tepun duniak. 10 Paring ulun jok Ahkuk tepui Amai halik tepui ah kak, khavun paring ulun jok Amai tepui, idoh halik Ahkuk tepui kak. Tului nyihing idoh noh Ahkuk konolehkak. 11 Ahkuk iyam nai mocon nuk duniak, totahpik idoh arok nuk duniak. Huntuh Ahkuk lombut noku Amai. Amai jok pahtut sonyembah! Jagak ah noh doh mbak kuasak ngaram Muk, yok erih kuasak jok uwas tonongak Muk ahkak Kuk. Mbak koderih, idoh ahkan jadik icok, havoi mbak Amai khavun Ahkuk hicok. 12 Kotahin Ahkuk hicok mbak idoh, Ahkuk was jagak idoh mbak kuasak ngaram-Muk jok ongak ahkak Kuk. Ahkuk was jagak idoh yarok icok behtik pun idoh jok lohpung kocuali iyok jok was sopahtut ah lohpung, supayak torjadik noh jok tonulih luvang Kitab Suci. a
13 Amai, huntuh Ahkuk lombut noku Ihkok. Beteng Kuk honong nuk duniak ihtuh Ahkuk bodoa kolihtuh, supayak idoh jok tonongak Muk ahkak Kuk idoh touk ngomok kosenang Kuk jok yarok tahpas kokurang ah nuk luvang arop doh. 14 Ahkuk was nongak ajar barak Muk ahkan doh, khavun duniak becik mbak idoh. Kotului idoh iyam duniak tepui, havoi mbak Ahkuk iyam duniak tepui. 15 Ahkuk iyam nyavot supayak Amai ngonin doh tahkan duniak ihtuh, totahpik Ahkuk nyavot supayak Amai jagak idoh tahkan Iblis lacak paring jok jaek. 16 Idoh havoi mbak Ahkuk iyam duniak tuh jok tepui. 17 Hatiu ah noh ajar barak jok hinut tahkan Muk Amai supayak idoh jadik Ihkok tepui. Kotului paring ajar barak tahkan Amai erih hinut. 18 Havoi mbak Ahkuk jok was konguhtus Amai noku duniak, koderih kak Ahkuk nguhtus idoh noku duniak. 19 Amai, Ahkuk tuꞌuk-tuꞌuk nyerah arop Kuk noku Ihkok. Ahkuk nguan paring aꞌang erih supayak idoh pun touk jadik Ihkok tepui nyihing ajar barak Muk jok hinut erih.
20 Iyam ahkan doh ihtuh kiyak Ahkuk bodoa. Ahkuk halik bodoa ahkan ulun-ulun jok ahkan pocayak mbak Ahkuk nyihing kosaksian doh ihtuh. 21 Amai, Ahkuk bodoa supayak idoh hicok, kolo Amai hicok mbak Ahkuk, Ahkuk hicok mbak Amai. Ahkuk halik bodoa supayak idoh hicok mbak Ihtok, supayak ulun-ulun duniak pocayak ngindoi Ahkuk konguhtus Amai. 22 Ahkuk was nongak idoh konolehkak jok tonongak Amai ahkak Kuk, supayak idoh tehtap hicok, kolo Torok hicok. 23 Ahkuk hicok mbak idoh, khavun Amai hicok mbak Ahkuk. Nyiring idoh jadik icok yarok tahpas kokurang ah, mbak koderih mahkak duniak ahkan taꞌai ngindoi Amai nguhtus Ahkuk, khavun Amai mongasihi murit-murit-Kuk kolo Amai mongasihi Ahkuk.
24 Amai, Ahkuk kanik supayak idoh jok tonongak Amai ahkak Kuk, idoh humbak mbak Ahkuk nuk amoh Kuk arok. Mbak koderih idoh ahkan nohtok Ahkuk konolehkak, yok erih kolehkak jok ongak Amai ahkak Kuk, kotului Amai mongasihi Ahkuk sojaham duniak tonaoi. 25 Amai jok nulo nguan aꞌang jok hinut! Duniak iyam nyokonok doh Amai, totahpik Ahkuk sokonak Kuk Amai. Khavun dolang murit Kuk taꞌai ngindoi Amai jok nguhtus Ahkuk. 26 Ahkuk was bokesah mongenai Amai ahkan doh, khavun erih noh jok ahkan nulo konguak Kuk, supayak kasih Amai ahkak Kuk tehtap nuk luvang ahtoi doh khavun Ahkuk hicok mbak idoh.”