Dúkì 12

Sèsíì teǹ o dapàm̀ma è yɔ̀ pà dá n'yònà Fàdísìpa.

Dentá Màtíyéè 10.26-33

¹ Sèsíì biɔhànì tḭ́ń wɔ̀ni, kà nìku dɔ́ɔ́di, nìpa tòhìka tòhìka é tɛ̀ni o pesá. Pà de tɛ̀ni è wɛhi-í-ma dɛ́dɛ́í, háá è yoò nɔ̀ɔ̀ǹta pa tɔɔ̀pa. K'ó cedí caka o dapàm̀ma è yɔ̀: Pa̰á̰-nà yɔkàma nà Fàdísìpa yam̀pèǹtamá, mà yònà pɛ̰́ɛ̰̀ yòmu yíkànasá-dà. ² Nɛ pú kó nɛɛ́ dáná yècɛ̰́ɛ̰̀ kà nìpa p'éè n'dɛ́hà daadí yènì, nɛ mɛ̀ɛ pú kó nɛɛ́ sɔɔ̀na yècɛ̰́ɛ̰̀ kà nìpa p'éè n'yá̰dà daadí yènì. ³ Mɛmá-dà tee, nɛ kó wɛdá-sa wɛǹni yèǹka, nìpa kó wáńtá éè yèkà-á-ma wèǹku. Kà nɛ mɛ̀ɛ wɛ́-wɛ́dà-sa nɛ tɔɔ̀pa nàmɔ̀ni mɛhɛká, yè kó wáńtá pidá-ma tapaàdi.

Nìpa yònà é n'wani-kó.

Dentá Màtíyéè 10.28-31

⁴ N nɛ cakú-ma nɛ́na mɛ̀m̀pà yòǹ-pa n dóòpa è yɔ̀: Nɛ dá n'wani nìpa mɛ̀m̀pà kó nɛɛ́ kɔ̀ù-pa wɔ̰̀ǹku, ye kú dàhàka àá koò pú kó nɛɛ́ pa̰á̰ yècɛ̰́ɛ̰̀. ⁵ N kó nɛ bɛka nɛ yònà é n'wani-kó-dà. Nɛ́ n'wani Weèdi mɛ̀nì kó nɛɛ́ nɛ kɔ̀ù-di é tṵ́má nɛɛ́ nɛ taàa ha̰bíiní mɛhɛká. Mɔ́ma-dà n nɛ cakú-ma, mɛní-dà nɛ yònà é n'wani-má.

⁶ Pà pú hɔ̰́ yɛda nɛ̀càbímú mùnùm̀ dífa píta? Nà mɛma, Weèdi pú hɔ̰́ dúi bá mu yècɔ̰́ kú kpɛ́mú. ⁷ Múńdìkaà, Weèdi yá̰á̰-ma nɛ yùti dɔ́ɔ́di sá̰á̰pu. Ye kú kpɛ́mú, nɛ dá n'wani. Weèdi pesá nɛ ka̰hà-á-ma nɛ̀càbímú dɔ́ɔ́di.

Sèsíì tehàma yoo o yedàma nìpa yìhìka.

Dentá Màtíyéè 10.32-33; 12.32; 10.19-20

⁸ Kà Sèsíì é tṵ́má pà caka è yɔ̀: Kà nìdo wɛdà nìpa wɛǹni yìhìka è hḭ́n ò yòǹ n kóoó-dà, mmí Niìfòùo bíitá, n mɛ̀ɛ té kó wáńtá wɛdá-ma Weèdi tɔntɔndipá yìhìka è yɔ̀ n kóoó-d'òò héé. ⁹ Àmá, mɛ̀ǹǹ kó wɛdá-kó nìpa wɛǹni yìhìka è yɔ̀ ò pú n yá̰á̰, mmí Niìfòùo bíitá, n mɛ̀ɛ té kó wáńtá wɛdá-ma Weèdi tɔntɔndipá yìhìka è yɔ̀ p'óò yá̰á̰.

¹⁰ Nìdo wɛǹni mɛ̀ǹǹ kó tèe-kó Niìfòùo bíitá, Weèdi k'óò dèda-á-ma o sḭ̀ḭ̀ma. Àmá, mɛ̀ǹǹ kó tèe-kó Weèdi Sèdi, Weèdi pú k'óò dèda o sḭ̀ḭ̀ma. ¹¹ Pà kó nɛ tanà tḭ́ń wɔ̀ni Weèdi wɛmá biɔhà-nàmɔ̀ka mɛhɛká è kó nɛ síi-nà, yoo sídàpa nà wóópa pesá, nɛ yàma dá n'cɛ̰ḭ́ nà nɛ kó hḭmpú é feèda nɛ cɔ̰́ɔ̰̀di yoo nà nɛ kó n'yɔ̀pu, ¹² mìì tee-sá, Weèdi Sèdi kó nɛ caka-á-ma ye kú wɔ̀nì nɛ yònà é wɛdá-sa.

Wɛbemú yohènamá díikáàdo òcɔ̰́ǹ kú hḭ́ǹka k'ò yòǹ yḭ́ńtása.

¹³ Nà ye nìku mɛhɛká-ní k'òòcɔ̰́ǹ é caka Sèsíì è yɔ̀: N dakpɛ̰́ǹn, caka n kúpùèyo è yɔ̀ ó héé kà tí totá kpààti ti báàa ti héè-ti.

¹⁴ Kà Sèsíì óò tɛ̰́ná è yɔ̀: Wodà n kɔ̰́ɔ̰̀ kpɛ̰́ǹti è yɔ̀ ń nɛ n'síí-nà yoo é nɛ n'tookú nɛ káma?

¹⁵ Ye kú dàhàka, k'ó pà caka pa wɛǹni è yɔ̀: Pa̰á̰-nà yɔkàma, nɛ dá m'pɛnti é n'káá kpààti sàma, è yá̰á̰ kpààti sàti pú yòǹ nìdo fòùmu yudí.

¹⁶ Ye wɔ̀ni, k'ó tṵ́má pà caka wɛbemú yohènamá è yɔ̀: Kpààti yaǹn òcɔ̰́ǹ-dà de káá teǹka kà ká teha dití dɛ́dɛ́í. ¹⁷ K'ó m'maàhu o yàma mɛhɛká è tonà: Ntɛ́ n hɔ̰mù mɛmà? N pú káá bɛ̀m̀bɛ̀ni n kó hḭ́ná-di n dití wɛǹni. ¹⁸ Ye wɔ̀ni, k'ò yɔ̀: Ǹtɛ n kó hḭmpú. N kó pɔ́dá-ma n bɔɔ̀ka, é madí sàka mɔ́nká, é hutá n dití nà n káma tɔɔ̀ma wɛǹni. ¹⁹ Ye kú dàhàka, ká n caka n cɔ̰́ɔ̰̀di è yɔ̀: N dóopó, a káá káma sàma-dà è kó dii beeká dɔ́ɔ́di. Á muhipa, é n'yon, è yɔ̰̀ǹ, é m'péé yaǹnaakú mɛhɛká. ²⁰ Àmá, kà Weèdi óò caka è yɔ̀: Yíńtásà fɔ̰́ń! Yèǹkà mɛnkà, a kó kpíí-ma. Ye wɔ̀ni, wodà kó n'tee a hḭ́nà-sà wɛnnì a cɔ̰́ɔ̰̀di kpɛ́mú?

²¹ Kà Sèsíì é tɔhìna è yɔ̀: Ma cɔ̰́ɔ̰̀di-dà yè kó n'yòǹ-ma nìdo mɛ̀ǹǹ pɛnti-kó káma o cɔ̰́ɔ̰̀di kpɛ́mú è há̰ pú yòǹ káma yaǹn Weèdi yìhìka.

Nɛ dá n'káá màmàhìma nɛ kó dii-sá nà nɛ báá-sa hḭ́ǹka.

Dentá M`atíyéè 6.25-34

²² Ye kú dàhàka, kà Sèsíì é caka o dapàm̀ma è yɔ̀: Ye kú kpɛ́mú-dà tee n nɛ cakú-ma è tonà: Nɛ dá m'maàhu kà nɛ bɔ̀ti putì nà nɛ kó dii-sá é n'fòù-nà yoo nà nɛ kó báá-sa, ²³ mìì tee-sá fòùmu ha̰tà-á-ma dimá, kà wɔ̰̀ǹku ha̰tà báatí. ²⁴ Nɛ́ seká nɛ̀hi, hì pú hɔ̰́ bɔdí, hì pú hɔ̰́ kɔ̰ṵ, hì mɛ̀ɛ pú káá bɔà, kà Weèdi hì dinì! N'aá ha̰tà-á-ma nɛ̀hi sàma mɔ́mmá. ²⁵ Nɛ wodà mɔ́ńn-dà kó nɛdá o yaǹcɔ̰hàma mɛhɛká é tɔhɛ̀na o fòùmu daàka hḭ́ǹka daadí nìcɔ̰́? ²⁶ Nɛ pú kó nɛɛ́ é pa̰á̰-mà niìi cɛ̰́masà miì, badà tee kà nɛ kó m'maàhu kà nɛ bɔ̀ti putì mìì sɔ̰́ńtà-sa hḭ́ǹka. ²⁷ Nɛ́ seká foǹni míti péna kpɛ̰́ńkúma, nà pú hɔ̰́ tɔn, nà mɛ̀ɛ pú hɔ̰́ dɛ̀i báatí. N há̰ nɛ cakú-ma, bá wódo Sàdòmɔ́ɔ̀ n'ɔ̀ɔ káma ò de káá-ma wɛǹni, ò pú nɛɛ̀ é bádí báatí kà ti suukú é ta̰ntá ye pému mùcɔ̰́. ²⁸ Weèdi mɛ̀nì sà̰nì-di foǹni míti ma kú bookù, mɛntí mɛ̀ǹtì péé-ti yenì è kó wáńtá é cɔ́dá ha̰mú, k'yàá bá síika-nà nɛ́na, nì pú kó nɛ báná k'yé n'ka̰hà mɛma? Nɛ dandaní pú wɛhi báà cɛ̰́ma. ²⁹ Nɛ bɔ̀ti dá m'putì kà nɛ́ m'pɛnti nɛ kó dii-sá nà nɛ kó yà̰à̰-sa. ³⁰ Mii kú wɛnnì, mɛ̀m̀pà pú yá̰á̰-pa Weèdi-dà hɔ̰́ yè m'pɛnti wɔ̀ka wɛǹni. Àmá, nɛ́na nɛ báàa yá̰á̰-ma è yɔ̀ n'ɛɛ̀ kpɛ̀i. ³¹ Nɛ múńtà yònà é m'pɛnti nɛ kó hḭmpú-dà é dúú Weèdi wóòti mɛhɛká. Ye kú dàhàka, nì kó nɛ kɔ̰́ɔ̰́-ma nɛ kpɛ̀i-sá wɛǹni.

³² Wantafɔ̰̀di dá nɛ cɛ̰ɛ̰́ nɛ́na mɛ̀m̀pà yòǹ-pa hɔ̰ɔ̰̀kàdo sìmɔ́ǹn, mìì tee-sá, nɛ báàa ta̰kadà-á-ma è yɔ̀ nɛ́ dúú o wóòti mɛhɛká. ³³ Yɛda-nà nɛ káá-sa é pa̰a̰ ye dífa sɔ̰̀m̀ma. Nɛ́ pɛha díipɛ̀kahí mɛ̀ǹhì pú kó kpíí-hi é n'hḭ́nì nɛ káma Weèdi pesá, mà kó m'péé-sa è pú kó cɔ̰ha daadí yènì. Ye pesá, túùpa pú kó nɛdá mà yódá, túúdi mɛ̀ɛ pú kó nɛɛ́ é mà múí, ³⁴ mìì tee-sá, nɛ káma hḭ́ḭ́-sa, nɛ yàma hɔ̰́ m'péé-sa-dà.

Sèsíì dapàm̀ma yònà é n'you-ú-ma é n'ceí o tóḿma-ní.

Dentá Màtíyéè 24.43-51

³⁵ Kà Sèsíì yɔ̀: Nɛ sɔ̀do é m'bii tɔmú hḭ́ǹka, nɛ́ hédá kà nɛ ha̰wèhi é n'cɔ́hú. ³⁶ Nɛ́ pa̰á̰ é n'yònà dehèpa mɛ̀m̀pà ceí-pa pa dakpɛ̰́ǹn k'ò péé-ho potóóma, k'yé teha k'ò koní tḭ́ń wɔ̀ni è tɛ̀ni è béń cɔ̀di kà pá cemá kpetá k'ó dúú! ³⁷ Wɛ̀ɛ̀di m'péé-nà dehèpa ye dakpɛ̰́ǹn kó koní é hɔ̰́tá-pa kà pà you. N nɛ cakú bemú-dà, ò kó báá-ma o tɔmú nɛǹti é pà kàna, é pà hḭ́ná dimá kà pá dii. ³⁸ Bá k'ò koní yèǹkà cɔ̀hɔ̀ka yoo kóokɔǹni è tɛ̀ni è hɔ̰́tà pà káà you, pà kó m'péé yaǹnaakú mɛhɛká-dà. ³⁹ Nɛ́ yekà miì sukú: Kà hɔ̰́ɔ̰́tà yaǹn yá̰á̰ túùdo kó tɛ̀ni tḭ́ń wɔ̀ni, ò pú k'óò hédá k'ó dúú o hɔ̰́ɔ̰̀ta mɛhɛká. ⁴⁰ Nɛ́na mɛ̀ɛtékà, nɛ n'sàà è yá̰á̰ Niìfòùo bíitá kó tɛ̀ni wɔ̀ni nɛ pú tà ceí-di-dà.

Deho mɛ̀ǹǹ coó-ko nà mɛ̀ǹǹ pú coó-ko.

Dentá Màtíyéè 24.45-51

⁴¹ Ye wɔ̀ni kà Píyɛ́ɛ̀ yɔ̀: Ti Teù, a cakú ye wɛbemù yohènamà tḭ́ńti cɔ̰́ɔ̰̀di kpɛ́mú nkɛ́ɛ̀ nìdo wɛǹni kpɛ́mú-dà?

⁴² Kà Teó óò tɛ̰́ná è yɔ̀: Pà hɔ̰́ n'toò deho wodà coó è káá yàma? Mɛ̀ǹǹ kú dakpɛ̰́ǹn ò kɔ̰́ɔ̰̀-ko-dà tɔmú è yɔ̀ ó n'ceí o hɔ̰́ɔ̰̀ta, é n'kɔ̰́nì o dehèpa tɔɔ̀pa dipú ye békú tḭ́ń wɔ̀ni. ⁴³ Wɛ̀ɛ̀di m'péé-nà ye kú deho, k'òo dakpɛ̰́ǹn koní è tɛ̀ni è hɔ̰́tà ò púsí ye kú tɔmù kú bookù-ní hɔ̰́ɔ̰̀ta mɛhɛká. ⁴⁴ N nɛ cakú bemú-dà, o dakpɛ̰́ǹn k'óò kɔ̰́ɔ̰́-ma kpɛ̰́ǹti o káma wɛǹni hḭ́ǹka. ⁴⁵ Àmá, k'yè yònà ye deho cakáà o cɔ̰́ɔ̰̀di è hḭ́n: N dakpɛ̰́ǹn pú kṵnti-ní fem̀ma, k'ò yídà o dehàtɔ̀pa daapá nà poòpa pootí, k'ò hɔ̰́ dii, é yà̰à̰, é bɔń, ⁴⁶ o dakpɛ̰́ǹn kó koní daadí ò p'óò ceí-di-dà, wɔ̀ni ò p'óò màhu-nà-dí. Ò k'óò bɔ̀hà-á-ma, é yɔ̰́ń o toodí dɛ́dɛ́í é n'yònà pà kó yɔ̰́ńkamá mɛ̀m̀pà pú coó-pa kpɛ́ɛká.

⁴⁷ Deho mɛ̀ǹǹ yá̰á̰-ko o dakpɛ̰́ǹn kpɛ̀i-sá, è há̰ pú dɔɔ̀haà o cɔ̰́ɔ̰̀di é yè n'ɔ̀ɔ̀ pa̰ná, o pootí kó n'wɛhi-í-ma sàma. ⁴⁸ Há̰kà, k'ò pú yá̰á̰ o dakpɛ̰́ǹn kpɛ̀i-sá, è pa̰nà pa̰á̰ma mɛ̀mà sà-nà-ma p'óò podí, o kú pootí pú kó n'wɛhi. Pà kɔ̰́ɔ̰̀-kó sàma, pà k'óò béka sàma-dà, pà mɛ̀ɛ cɛ̰à̰-ko niìya̰ sàma, pà k'óò béka-á-ma k'yé n'wɛhi sàma.

Sèsíì tɛ̀mmá tɛɛ̀-ní totáma-dà nìpa cɔhàka.

Dentá Màtíyéè 10.34-36

⁴⁹ Kà Sèsíì yɔ̀: N tɛ̀ni è kó cɔ́hìna ha̰mú-dà teǹka hḭ́ǹka, n mɛ̀ɛ kpɛ̀i kà mú cemá é cɔ́dá-ma. ⁵⁰ N yònà é cóńtá náńkú cóǹti-dà. N yàma pú kaàdi, ye cóǹtì aa pa̰á̰ tḭ́ń daadí bààsí. ⁵¹ Nɛ maàhu è tonà n tɛɛ̀ní wɛ̀ɛ̀di-dà teǹka hḭ́ǹka? Fɔ́ú! N nɛ cakú-ma, n tɛɛ̀ní totáma-dà. ⁵² É tódá wɔ̀nì mɛnì, kà nìpa yòǹ pànùm̀ hɔ̰́ɔ̰̀ta mɛhɛká, pà pú kó n'you-nà pa tɔɔ̀pa. Pàta̰a̰ kó n'kɔ̰ǹti-nà-á-ma pàdɛ́ɛ́, kà pàdɛ́ɛ́ é n'kɔ̰ǹti-nà pàta̰a̰. ⁵³ Báàa kó n'kɔ̰ǹti-nà-á-ma o bíidatá, k'òo bíidatá ò kɔ̰ǹti-nà. Kà màa é n'kɔ̰ǹti-nà o bíipoòta, k'òo bíipoòta ò kɔ̰̀ǹti-nà. Kà hɔ̰́ɔ̰́tà màa é n'kɔ̰ǹti-nà o bíitá poòo, k'òo bíitá poòo ò kɔ̰̀ǹti-nà.

Bantá-nà sá̰mà kú pemá yòm̀pu.

Dentá Màtíyéè 16.2-3

⁵⁴ Kà Sèsíì é tṵ́má caka ye nìku è yɔ̀: Kà nɛ dɛ́hà kà wɔɔ̀di nɛɛ̀hi fɔ̰̀bɛ́ka^a nɛ hɔ̰́ n'yɔ̀: Tafá-dà kó dɔdi, kà fà mɛ̀ɛ té dɔdi. ⁵⁵ Kà nɛ mɛ̀ɛ dɛ́hà kà yakú heé pɛ̰̀pɛ̰̀-cúɛ́cúɛ̀di bɛ́kà, kà nɛ té n'yɔ̀: Wìku-dà kó pa̰ná, kà kù mɛ̀ɛ té tɛ̀ni. ⁵⁶ Yam̀pèǹtapà nɛ́na! Badà tee kà nɛ nɔn è bahiní mìì pa̰kú-sa teǹka nà hḭ́ǹka è há̰ pú kó nɛɛ́ bantá mìì pa̰kú-sa wɔ̀nì mɛnì?

Wɛmá kɔ̀ùma nà nɛ kà̰à̰tɔɔ̀o.

Dentá Màtíyéè 5.25-26

⁵⁷ Baà tee nɛ mɔ́-mɔ́mpá kà nɛ pú hɔ̰́ ta̰kadá mìì suu-sá è yònà é pa̰ná? ⁵⁸ K'yé n'yònà: K'à kɔ́dí sídàpu n'àa kà̰à̰tɔɔ̀o, k'á pɛha a kó hḭmpú kà nɛ́ yekà nɛ tɔɔ̀pa wɛmá è káà sá̰á̰ cɔ̀ku. Kà mɛma dɔ, k'òà ta̰hinà sídàko yìhìka, ye sídàkò k'áa tanà pòdísìku-dà, kà pòdísìpa áa yɛ̰̀ḭ kódedí. ⁵⁹ M'a cakú-ma, k'à pú bodà dífa p'àà fìtà-fa wɛǹni, bá kà píta sɔ̰́ńtà, a pú yɛtì ye kódedì mɛhɛkà.