Dúkì 24

Sèsíì yá̰ńtáma

Màtíyéè 28.1-10; Mádíkì 16.1-8; Ìsá̰à̰ 20.1-10

¹ Yà̰di daadí, ká̰ńyɛ̰̀ǹfa pìdìpìdì, k'yèe poòpa é yíí taá ye híúdi pesá è toó-nà tùdàdépa nɔ́ɔkpekú kpɛ́ɛpá pà de pa̰à̰-pa sɔ̀do ye kú kpɛ́mú. ² Kà pá tɛ̀i è hɔ̰́tà ye tá̰hàku mɛ̀ǹkù de hḭ̀ḭ-kú ye híúdi nùdi bídí bɛ́ɛ́kú. ³ Kà pá dúú-ho ye híúdi mɛhɛká, pà há̰ pú dɛ́hà Teó Sèsíì wɔ̰̀ǹku. ⁴ K'yé pà dii, kà pá n'káà è nɛ̀hi è péé ye kú yam̀màhàdi mɛhɛká, kà nìpa pàdɛ́ɛ́ é pà foó-ní è báá bátidí kà tì sìkèdi. ⁵ Kà wandafɔ̰̀sàdi é pà cɛ̰ɛ̰́, kà pá tṵḿ-tṵḿ. K'yèe nìpa é pà béka è yɔ̀: Baà tee kà nɛ pɛnti mɛ̀ǹǹ fòù-ko kpíípa mɛhɛká? ⁶ Ò koò pú kaá miì, ò yá̰ńtà-á-ma. Nɛ́ deǹta ò de nɛ cakáà-sa è káà péé Kàdìdéè tempáàku mɛhɛká. ⁷ Ò de yɔ̀: Yè békú-ma pá taàa Niìfòùo bíitá niìsḭ̀m̀ma nɔ̀hi mɛhɛká, kà pá tà kpɛ̰́ḭ́ kpíidɔkú hḭ́ǹka, data̰á̰di kà tá yá̰ńtá.

⁸ Ye wɔ̀ni-dà, kà pá deǹta-ní Sèsíì wɛmá. ⁹ Kà pá yídá ye híúdi pesá é tón é kòǹ, é tɛ̀i é dɛ́há Sèsíì tɔntɔndipá píì-òcɔ̰́ nà tɔɔ̀pa, é pà caka mìì pa̰à̰-sa-ní wɛǹni. ¹⁰ Ye poòpa yèka-dà de dɛɛ̀: Màdí Màkìtàdáà yɔtí kóoó, nà Sàánì nà Màdíì Sàákì màa nà poòpa tɔɔ̀pa. Mɛmpá-dà de mà cakáà o tɔntɔndipá. ¹¹ Àmá kà pá mà hɛɛ̀da sḭ́ńtí wɛhí, pà pú taà dandaní ye poòpa wɛɛ̀-sa. ¹² Kà Píyɛ́ɛ̀ mɛ̀ɛ é yíí é cocí é taá ye híúdi pesá. K'ó tɛ̀i é boí é dentá, é dɛ́há kùdáapɛ́ta pà de ò pɔ̰ɔ̰̀-ta cɔ̰́ɔ̰̀di. K'yé ò dii sàma nà mìì pa̰à̰-sa, k'ó fitá é kòǹ.

Sèsíì fodà o dapàm̀ma pàdɛ́ɛ́ kà pà kɔ́dí Èmàyísì yɔtí.

Mádíkì 16.12-13

¹³ Ye daadí ni cɔ̰́ɔ̰̀di mɛhɛká, kà Sèsíì dapàm̀ma pàdɛ́ɛ́ é yídá Sèdìsàdɛ́m̀ è kɔ́dí yɔbíisá pà toò-sa Èmàyísì, k'yèe ta̰nta̰ǹni yòǹ kìdòmɛ́tídìpa píta n'ɔ̀ɔ̀cɔ̰́ kpɛ́ɛmá. ¹⁴ Pà de tɔdì è wɛì mìì pa̰à̰-sa wɛǹni hḭ́ǹka-dà. ¹⁵ Kà pá n'wɛì è nɔ̀hù, kà Sèsíì é pà hɔ̰́tá-ní kà pá nɔdá cɔ̀ku. ¹⁶ Pà d'oò dìi-í-ma, há̰ka k'yècɛ̰́ɛ̰̀ kpadí pa nɔ̀ǹci pà k'óò bantá-ma. ¹⁷ K'ó pà béka è yɔ̀: M̀mɔ́ńya̰ kú hḭ́ńkà-dà nɛ centì è nɔ̀hù-ma? Kà pá nɛɛ̀hi, kà pa yàma cɔ̰háà dɛ́dɛ́í. ¹⁸ Kà p'oòcɔ̰́, kà p'òò toò Kèdòpásì óò tɛ̰́ná è yɔ̀: Kà fɔ̰́ń kú cɔ̰́ɔ̰̀di há̰ pú dɛɛ, wodà tṵ́mà péé Sèdìsàdɛ́m̀ mɛhɛkà è pú yá̰á̰ mìì pa̰à̰-sa daakà mɛnkà kú mɛhɛká? ¹⁹ K'ó pà béka è yɔ̀: M̀mɔ́ńya̰-dà pa̰nà? Kà p'óò tɛ̰́ná è yɔ̀: Mìì hɔ̰́tà-sa Sèsíì Nàsàdɛ́tì kóoó k'ò de yòǹ Weèdi wɛtɛ̰́náko kpedo mɔ́nń. Ò de bɛkáà-á-ma o kpeèti o pa̰á̰ma n'ɔ̀ɔ wɛmá mɛhɛká, Weèdi yìhìka nà nìku wɛǹni yìhìka. ²⁰ Ti dɔ̀hàka yam̀ma kpɛ̰́m̀ma nà ti yɔtí kpɛ̰́m̀ma-d'òò tàà Hɔ̀dɔ́m̀ wóópa nɔ̀hi mɛhɛká è yɔ̀ p'óò kɔ̀ù, kà p'óò kpɛ̰́ḭ́ kpíidɔkú hḭ́ǹka. ²¹ Tḭ́ńti de dań è yɔ̀ Weèdi ò tɔn-ní, k'ò kó fḭ́hìna Ìsìdàyɛ́dì nìku-dà. Ǹtɛ há̰ka data̰á̰di-dà mɛmà n'ɛ̀ɛ kú pa̰á̰mà pa̰à̰-ma. ²² Poòpa pàcɔ̰́pà-dà ti mɛhɛká há̰ ti cakáà wɛmá màcɔ̰́mà kà má ti dii sàma mɔ́ma. Pà pìi é taá ye híúdi pesá-dà, ²³ é tɛ̀i pà pú dɛ́hà o wɔ̰̀ǹku. Kà pá koní é ti caka è yɔ̀ Weèdi tɔntɔndipá-dà pà foò-ní, é pà caka è yɔ̀ ò fòù-ú-ma. ²⁴ Kà ti tɔɔ̀pa pàcɔ̰́ é yíí é taá ye híúdi pesá, é tɛ̀i é dɛ́há ye wɛǹni é n'yònà ye poòpa de cakáà-sa. Àmá, mɛnn, pà p'óò dɛ́hà.

²⁵ Ye wɔ̀ni, kà Sèsíì é pà caka è yɔ̀: Yaǹkɔ́ɔ̀pà nɛ́na. Nɛ pú tanì dandaní fem̀ma Weèdi Wɛtɛ̰́nápa nɛ cakáà-sa wɛǹni hḭ́ǹka. ²⁶ Ma kú bookú dɔ Kídísì de yònà é dii-má náńkú é nɛɛ́ é dúú o wɛhimú mɛhɛká-a? ²⁷ K'ó pà wekàna pà de wɛdà-sa wɛǹni o hḭ́ǹka Weèdi pɔ̀kàta mɛhɛká. K'ó cetá-nà Mɔ̀yísì pɔ̀kàhi háá é dúú-nà Weèdi Wɛtɛ̰́nápa wɛǹni kpɛ́hí mɛhɛká.

²⁸ Pà tɔ́sí-nà tḭ́ń wɔ̀ni ye yɔbíisá pà de kɔ́dí-sa, k'ó pa̰ná é n'yònà ò kɛ̰hɛ̰di-má yìhìka. ²⁹ Àmá, kà p'óò kpɛ̰̀hìkà è yɔ̀ ó cá̰ńtá pa pesá, weèdi-dà dɔdi kà yèǹka kó bóka. Ye wɔ̀ni, kà pá dúú hɔ̰́ɔ̰̀ta mɛhɛká nà Sèsíì é bátá. ³⁰ Pà kàdi tḭ́ń wɔ̀ni è yon, k'ó tódá pɛ̰́ɛ̰̀, é sɛda Weèdi, óò wɛ́ha é pà kɔ̰́ɔ̰́. ³¹ Ye wɔ̀ni, kà pa nɔ̀ǹci yɔ̀ póí, kà p'óò bantá. Ye pesá nà ye pesá, k'ó féé-ho pa yìhìka. ³² Kà pá caka pa tɔɔ̀pa è yɔ̀: Yaǹnaakú cetà pú ti hɔdà, ò ti wɛì-nà tḭ́ń wɔ̀ni cɔ̀ku mɛhɛká è ti wekànì Weèdi pɔ̀kàta wɛmá?

³³ Kà pá cemá é yídá ye wɔ̀ni ni cɔ̰́ɔ̰̀di mɛhɛká é tón Sèdìsàdɛ́m̀, é tɛ̀i é hɔ̰́tá y'oo tɔntɔndipá píì-òcɔ̰́ nà pa tɔɔ̀pa kà pà tísí, ³⁴ k'yèe mɛ̀m̀pà tísí-pa é pà caka è yɔ̀: Mɔ́ma-dà, ti Teó yá̰ńtà-ma kpíípa cɔhàka. Ò bɛkáà-á-ma o cɔ̰́ɔ̰̀di Sìmɔ́ɔ̀. ³⁵ Kà mɛmpà mɛ̀ɛ té pà caka mìì de pa̰à̰-sa Èmàyísì cɔ̀ku mɛhɛká, nà p'òò bankáàma ò wɛ́háà tḭ́ń wɔ̀ni pɛ̰́ɛ̰̀ óò pà kɔ̰́ɔ̰́.

Sèsíì fodà o dapàm̀ma

Màtíyéè 28.16-20; Mádíkì 16.14-18; Ìsá̰à̰ 20.19-23; Tɔná 1.6-8

³⁶ Pà de káà wɛì mɛmá-dà, pà hɔ̰́tà Sèsíì o mɔ́nń nɛɛ̀hi pa cɔhɔ̀ka, é pà caka è yɔ̀: Wɛ̀ɛ̀di é nɛ m'péé-nà.

³⁷ Kà wandafɔ̰̀sàdi é pà cɛ̰ɛ̰́, è yá̰á̰ pà de tonà kpíkàǹyá̰ǹn-dà pà dɛ́hà-ma. ³⁸ Àmá, k'ó pà béka è yɔ̀: Badà tee kà nɛ wani mɛma? Badà tee kà nɛ káá yam̀màhàka kàdɛ́ɛ́ kàdɛ́ɛ́? ³⁹ Cɔ́ɔ́-nà n tàka nà n nɔ̀hi, mmí-dà n mɔ́-mɔ́nń. N pḭ́ń-nà é dɛ́há, kpíkàǹyá̰ǹn pú káá wɔ̰̀ǹku, ò mɛ̀ɛ pú káá kɔ̰́ɔ̰́di k'yé n'yònà nɛ n dìi kà n yè kákáàmà.

⁴⁰ Ò wɛɛ̀-ma mɛma, é pà bɛka o nɔ̀hi n'ɔ̀ɔ tàka. ⁴¹ Yè de pà naakáà-ma dɛ́dɛ́í, àmá kà pà mum pú n'dań ò wɛì-sa hḭ́ǹka, k'yè tṵ́mà pà yon sàma, k'ó pà béka ye wɔ̀ni è yɔ̀: Nɛ pú káá disá yècɛ̰́ɛ̰̀ miì?

⁴² Kà p'óò kɔ̰́ɔ̰́ num̀bíipṵ́náta màǹku. ⁴³ K'ó kù tà̰ǹta é kù cécí pa yìhìka. ⁴⁴ Ye kú dàhàka, k'ó pà caka è yɔ̀: N de yè nɛ cakáà-á-dà-ma n de káà nɛ péé-nà tḭ́ń wɔ̀ni è yɔ̀: Pà wà̰tà-sa wɛǹni n hḭ́ǹka Mɔ̀yísì kpɛ̰́ńtìnùka mɛhɛká, nà Weèdi Wɛtɛ̰́nápa pɔ̀kàhi mɛhɛká, nà nɛ́ńyɛ̰̀ǹdèmu kpɛ́ɛtá mɛhɛká, ye wɛǹni yònà é pa̰á̰-ma.

⁴⁵ Ye wɔ̀ni, k'ó wekàna pa yàma, pà kó hḭmpú é yekà mìì péé-sa Weèdi pɔ̀kàta mɛhɛká. ⁴⁶ K'ó pà caka è yɔ̀: Pà wà̰tà Weèdi pɔ̀kàta mɛhɛká è yɔ̀: Kídísì yònà é dii náńkú-dà, é kpíí, o data̰á̰di é yá̰ńtá kpíípa mɛhɛká. ⁴⁷ Yè békú n'ɔ̀ɔ yèdi pá caka Weèdi wɛmá-dà boocí wɛǹni, è yɔ̀ nìpa peǹta fòùmu, kà Weèdi é pà deèda pa sḭ̀ḭ̀ma. Pà yònà é cetá-nà Sèdìsàdɛ́m̀-dà. ⁴⁸ Nɛ́na mɛ̀m̀pà èè dɛ́hà-pa nà nɛ nɔ̀ǹci, nɛ́na-dà yònà éè caka nìpa. ⁴⁹ N kó nɛ kɔ̰́ɔ̰́-ma-ní n Báàa de hḭ́nà nùdi è yɔ̀ ò kó nɛ kɔ̰́ɔ̰́-sa. Àmá nɛ́na, nɛ́ m'péé Sèdìsàdɛ́m̀ mɛhɛká háá kà Weèdi nɔɔ̀ti é cútá-ní nɛ hḭ́ǹka.

Sèsíì hḭ́ǹka dìsimá

Mádíkì 16.19-20; Tɔná 1.9-11

⁵⁰ Ye kú dàhàka, k'ó tódá o dapàm̀ma kà pá ka̰há Bètàníì yɔtí bɛ́ka, é tɛ̀i ye pesá, k'ó yoòda o nɔ̀hi pa hḭ́ǹka é pà kóná. ⁵¹ Ò pà kónì tḭ́ń wɔ̀ni-dà, ò yídà-ma é pà nátá-nà, é dìsi hḭ́ǹka. ⁵² Ye kú wɔ̀ni, k'òo dapàm̀ma é wɛ̰̀ḭ dúùka óò dɔa, é yídá é n'tóńti-ní Sèdìsàdɛ́m̀, k'yè pà naa dɛ́dɛ́í. ⁵³ Kà pá tɛ̀ni, è baà é m'péé Weèdi hɔ̰́ɔ̰̀ta mɛhɛká è nì dùǹti.