Dúkì 16

Tɔntɔǹn mɛ̀ǹǹ pú coó-ko wɛbemú yohènamá.

¹ Kà Sèsíì é caka o dapàm̀ma è yɔ̀: Díikáàdo òcɔ̰́ǹ-dà de káá o tɔntɔǹn óò cɛ̰̀a̰ o káma wɛǹni. Kà nìpa é tɛ̀n'ɔ́ɔ̀ caka è yɔ̀ ye tɔntɔǹn cɔ̰hú o káma. ² K'óò yíí óò caka è yɔ̀: N you kà nìpa wɛì-sa a hḭ́ǹka, yè pú coó. N caka-ní a tɔmú ceǹkaàma kú bookú è yá̰á̰ a koò pú kó nɛɛ́ é n'nihí n káma hḭ́ǹka. ³ K'yèe tɔntɔnto é caka o cɔ̰́ɔ̰̀di è yɔ̀: N dakpɛ̰́ńǹ kó n bɔhà-á-dà tɔmú, ntɛ́ n kó hḭmà? N pú kpenì è kó nɛɛ́ pa̰á̰ yɛ̀di tɔná, fɛ̀ci-dà mɛ̀ɛ kó nà n káá nà n kó n'dɛ̀i-má è cɔ̀hàta. ⁴ Ɛ̰̀hɛ́ɛ̀-ɛ̰̀! N yá̰á̰-ma n kó hḭmpú, k'yé teha kà n dakpɛ̰́ǹn n bɔɔ̀haà tɔmú, ká n dɛ́há mɛ̀m̀pà kó nà n coní-pa kà n taá pa hɔ̰́ɔ̰́hí. ⁵ Ye wɔ̀ni, k'ó yíí mɛ̀m̀pà de bàn-pá wɛǹni o dakpɛ̰́ǹn p'oòcɔ̰́ òcɔ̰́. Kà cecedó é tɛ̀ni k'óò béka è yɔ̀: Cìdɛɛ-dà a bàn-má n dakpɛ̰́ǹn? ⁶ K'óò tɛ̰́ná è yɔ̀: *Òdífù kɔ̀ma tɔ̰̀nɔ́ɔ̀pa kɔ̀ta. K'ò yɔ̀: Ǹtɛ a bàǹti pɔkàfà̰ku, kaàdi fem̀ma é wa̰à̰ta é n'yɔ̀ tɔ̰̀nɔ́ɔ̀pa púnùm̀. ⁷ K'ó yíí-ní tɔɔ̀ɔ óò béka è yɔ̀: Fɔ̰́ń tá, a bàn n dakpɛ̰́ǹn cìdɛɛ-dà? K'óò tɛ̰́ná è yɔ̀: Pɛ̰́ɛ̰̀ yɔ̀ka píìka kɔ̀ta. K'ò yɔ̀: Ǹtɛ a bàǹti pɔkàfà̰ku, wa̰à̰ta píìka púniì. ⁸ Ye wɔ̀ni, k'yèe tɔntɔnto mɛ̀ǹǹ pú coó-ko dakpɛ̰́ǹn óò cóńta nà soúma ò de pa̰à̰-ma. Kà Sèsíì é tuɛ̀ha è yɔ̀: Fòùkù mɛnkù kú nìpa káá-ma soúma pa pa̰á̰ma mɛhɛká pa tɔɔ̀pa hḭ́ǹka, é ha̰tá-nà wenikú kpɛ́ɛpá.

Nɛ pú kó nɛɛ́ é n'tṵ̀n Weèdi è tṵ́mà bɔ̀hɔ̀ta dící.

⁹ Mmí, n nɛ cakú-ma è yɔ̀ nɛ́ pɛha dóòpa nà fòùkù kámà mɛ̀mà pú suumà, k'yé teha kà mà wáńtà ka̰hà, kà pá nɛ codá Weèdi hɔ̰́ɔ̰̀ta mɛhɛká, nɛ kó m'péé-sa k'yé n'kɔ́ɔ́ yɔ̀ɔmá. ¹⁰ Mɛ̀ǹǹ cɔ́dí-ko niìya̰ sàm̀mɔ́ǹya̰ hḭ́ǹka, ò mɛ̀ɛ té kó n'cɔ́dí-ma sàsa hḭ́ǹka. Kà mɛ̀ǹǹ mɛ̀ɛ pú cɔ́dí-ko niìya̰ sàm̀mɔ́ǹya̰ hḭ́ǹka, ò pú kó n'cɔ́dí sàsa hḭ́ǹka. ¹¹ Kà nɛ pú cɔ́dí fòùkù mɛnkù kú káma hḭ́ǹka, wodà kó nɛ cɛ̰ɛ̰̀a̰ káma mɔ́mmá? ¹² Kà nɛ pú coó tɔɔ̀o káma hḭ́ǹka, wodà kó nɛ kɔ̰́ɔ̰́ mɛ̀mà yòǹ-ma nɛ mɔ́mpá kpɛ́ɛmá? ¹³ Deho òcɔ̰́ǹ pú kó nɛɛ́ é n'dehú dakpɛ̰́m̀ma pàdɛ́ɛ́ kpɛ́mú. K'ò dɔ́sí òcɔ̰́, ò kó n'sɛ̰ɛ̰́-ma tɔɔ̀o, k'ò mɛ̀ɛ daàdi-nà òcɔ̰́, ò kó n'yɔ̰́sí-ma tɔɔ̀o. Nɛ pú kó nɛɛ́ é n'tṵ̀n Weèdi è tṵ́mà bɔ̀hɔ̀ta dící.

Sèsíì cakú Weèdi wɛmá niìya̰ dɔ́ɔ́di hḭ́ǹka.

Dentá Màtíyéè 11.12-13; 5.31-32; Mádíkì 10.11-12

¹⁴ Fàdísìpa mɛ̀m̀pà de naanà-pa dící de you-má kà Sèsíì wɛì mɛma, kà p'òò dɛhikú. ¹⁵ K'ó pà caka è yɔ̀: Nɛ́na, nɛ hɔ̰́ m'pa̰kú è kpɛ̀i é bɛka nìpa-dà è yɔ̀ nɛ yòǹ niìcoópa, Weèdi há̰ yá̰á̰-ma nɛ yàma yòm̀pu. Nìpa kɛɛ̀hu-sá sàsa, Weèdi pesá sɔ̀kací-dà. ¹⁶ Pà de biɔhanì Mɔ̀yísì kpɛ̰́ńtìnùka^a-dà, nà Weèdi Wɛtɛ̰́nápa pɔ̀kàhi, háá kà Ìsá̰-Bàtísì é yó tɛ̀ni. É cɛ̰ɛ̰́-nà ye kú wɔ̀ni-dà pà cakú-ma Weèdi wóòti wɛnaamá, bá mɛ̀ǹǹ dɛ̀ɛ̀ k'ò wɛ̰́dì è kó dúú ti mɛhɛká. ¹⁷ Mɛ̀ɛkà, Weèdi kpɛ̰́ńtìnùka fuehèfa deèdamá kó n'dɔǹ-ń-ma é ha̰tá-nà teǹka nà hḭ́ǹka yɔ̀ɔmá.

¹⁸ Kà nìi bɔɔ̀haà o poòo é tódá tɔɔ̀o, ò cɔ̰hú dɔɔdí-dà. Kà nìi mɛ̀ǹǹ mun pú kádà-ko poòo mɛ̀ɛ tódà poòo k'òo dɔɔ̀o ò bɔ̀haà-ní, ò mɛ̀ɛ té cɔ̰hú dɔɔdí-dà^b.

Díikáàdo nà Dàsáà

¹⁹ Kà Sèsíì tṵ́mà yɔ̀: Díikáàdo òcɔ̰́ǹ-dà de péé è bádì nɛnsuutí, díikpecí kpɛ́ɛtí. Ò de fòù dikádɛ́nkú mɛhɛká-dà, è bédì diisuumá daàka wɛǹni. ²⁰ Kà pɛ́íta tàcɔ̰́tà mɛ̀ɛ té de péé, kà pà tà toò Dàsáà, kà tà yòǹ mɔká ta wɛǹni, è té n'dɔɔ́ ye díikáàdo hɔ̰́ɔ̰́tà há̰ńnùdi. ²¹ Kà tà té n'kpɛ̀i é dii ye díikáàdo de hɔ̰́ n'yon kà mìì dɔɔ̀-sa-ní o tábídì fɔ̰̀di, òcɔ̰́ǹ há̰ pú k'éè tà kɔ̰́ɔ̰́. Kà mɔhí de tṵ́mà kɔ́dì-ní è dɛ́hú ta mɔká.

²² Kà daadí é pɛdá, k'yèe pɛ́íta é kpíí, kà Weèdi tɔntɔndipá é tɛ̀ni é tà tódá é tà dìkàna hḭ́ǹka é taá tà kàna Àbààhám̀ nɔ̀ǹkàǹhiòma. K'yèe díikáàdo mɛ̀ɛ té kpíí, kà p'óò dáná. ²³ K'ó tɛ̀i é n'yon náńkú dɛ́dɛ́í kpííku mɛhɛká. K'ó yoòda o nɔ̀ǹci, é wáńtá é dɛ́há nà dɛùma Dàsáà k'ò kàdi Àbààhám̀ pesá. ²⁴ K'ó kpákada è yɔ̀: N báà Àbààhám̀, n kɔń séèma! N yon náńkú-dà ha̰mù mɛmù kú mɛhɛká! Tɔn Dàsáà k'ó fɛ̰ǹta-ní o há̰ḿbíifá nɛ́ɛmá é tɛ̀ni é bókàna n níkú! ²⁵ Kà Àbààhám̀ óò tɛ̰́ná è yɔ̀: N bidà, deǹta è yɔ̀ a de péé dikádɛ́nkú mɛhɛká-dà a fòùmu wɔ̀ni, kà Dàsáà yon náńkú. Sá̰mà-ní, ò péé wɛ̀ɛ̀di mɛhɛká-dà, kà fɔ̰́ń nɔ̀ǹci hṵɛ̰ní. ²⁶ Tṵ́màkaà, fɔ̰ɔ̰̀pɛkàdi cṵmpudí mɔ́nní-dà péé nɛ́na nà tḭ́ńti ti cɔhàka. Nìi pú kó nɛɛ́ nì dèta é nɛ ta̰ntá-ho yoo é nì dèta é ti ta̰ntá-ní. ²⁷ K'yèe díikáàdo yɔ̀: N báà, kà mɛmá-dà m'a sɛ́úkú-ma, tɔn Dàsáà n báà hɔ̰́ɔ̰̀ta. ²⁸ N káá-ní kúcàpa pànùm̀-dà. Ò tɔn k'ó taá pà caka è yɔ̀ pà dá n'fòù n de fòùkaàma, k'yé teha kà pà wáńtà kpíi, kà pà mɛ̀ɛ té dá tɛ̀ni náńkù bɛ̀m̀bɛ̀nì mɛnì. ²⁹ Kà Àbààhám̀ yɔ̀: A kúcàpa káá-ma-ní Mɔ̀yísì kpɛ̰́ńtìnùka nà Weèdi Wɛtɛ̰́nápa pɔ̀kàhi, pá besí-ho yè pà biɔhɔ̀nì-sa. ³⁰ K'yèe díikáàdo yɔ̀: Ṵ́! N báà Àbààhám̀, pà pú kpɛ̀i éè besí. Kà nìi há̰ yɛɛ̀ kpííkù mɛhɛkà è taá è pà cakáà, pà kó peǹta-á-ma fòùmu. ³¹ Kà Àbààhám̀ óò caka è yɔ̀: Kà pà pú kpɛ̀i besí Mɔ̀yísì kpɛ̰́ńtìnùka nà Weèdi Wɛtɛ̰́nápa pɔ̀kàhi tonàpu, bá kà nìi yá̰ńtà è tɛ̀i-ho è pà cakáà pà pú kó teha è yɔ̀ bemú-dà.