Dúkì 11

Sèsíì biɔhànì o dapàm̀ma Weèdɔɔ̀mu.

Dentá Màtíyéè 6.9-13; 7.7-11

¹ Daadí yènì, kà Sèsíì taá é n'dɔń Weèdi kàcɔ̰́kà bɛ́kà. Ò yɔ̀ɔ tḭ́ń wɔ̀ni, k'òo dapàǹn òcɔ̰́ óò caka è yɔ̀: Ti dakpɛ̰́ǹn, ti biɔhɔ̀na ti té kó dɔkamá Weèdi é n'yònà Ìsá̰à̰ de biɔhɔ̀nà-ma kú bookú o dapàm̀ma. ² K'ó pà tɛ̰́ná è yɔ̀: Kà nɛ té kpɛ̀i é dɔa Weèdi, kà nɛ́ n'yɔ̀: Ti Báà, hédá kà nìpa é bantá a yèdi wɛhimú sá̰pu é n'àà cùnì. Hédá k'àa wóòti é tɛ̀ni nìpa hḭ́ǹka. ³ Á ti m'pɔ̰n dimá daadí bá mɛ̀nì dɛ̀ɛ̀-di. ⁴ Ti deèda ti sḭ̀ḭ̀ma mìì tee-sá ti mɔ́mpá búúkú-ma sḭ̀ḭ̀ma tɔɔ̀pa ti pa̰kú-ma. A dá hédá kà tí dúú bɛḿma mɛhɛká.

⁵ Ò pà biɔhɔ̀nà-ma mɛma é yɔ̀ɔ, é tṵ́má pà caka è yɔ̀: K'yè yònà n'ɔɔ̀cɔ̰́ǹ káá dópo è taá òò hèǹtà yèǹkàcɔ̀hɔ̀ka è hḭ́n: N dóopó, n peèna pɛ̰́ɛ̰̀pa pàta̰a̰. ⁶ N dópo òcɔ̰́ǹ-dà n bátà, n há̰ pú káá yècɛ̰́ɛ̰̀ è k'óò kɔ̰́ɔ̰́ k'ó dii. ⁷ K'yàá yònà o dópo ò tɛ̰́nà-ní nà nàmɔ̀ni mɛhɛká è hḭ́n: N hédá yɔkàma! Ti yɔ̀ɔ dúúpu-dà è dɔɔ́ nà n bííhí, kà nàmɔ̀ni dásí, n pú kó nɛɛ́ é yídá áa kɔ̰́ɔ̰́ pɛ̰́ɛ̰̀pa. ⁸ N nɛ cakú mɔ́ma-dà, bá k'ò pú yídà óò kɔ̰́ɔ̰́ nà pa dópàti kpɛ́mú, ò kó yíí-ma óò kɔ̰́ɔ̰́ ò kpɛ̀i-sá wɛǹni mìì tee-sá o dópo sɔ̰ncí òò kɔkapú. ⁹ Mmí nɛ cakú è yɔ̀: Kà nɛ cɔɔ̀haà, pà kó nɛ pa̰a̰-á̰-ma. Kà nɛ pɛháà, nɛ kó dɛ́tá-ma. Kà nɛ potà cɔ̀di, pà kó nɛ kpetá-ma, ¹⁰ è yá̰á̰, nìdo mɛ̀ǹǹ kú wɛnnì kó cɔhà-ko, pà k'óò pa̰a̰-á̰-ma. Kà mɛ̀ǹǹ pɛnti-kó, ò kó dɛ́tá-ma. Kà mɛ̀ǹǹ potà-ko cɔ̀di pà k'óò kpetá-ma. ¹¹ Nɛ mɛhɛkà, nɛ wodà mɔ́ńn-dà cédí é pa̰a̰ o bíitá wàfa kà t'òò cɔ̀haà num̀bíitá? ¹² Yoo, t'òò cɔ̀haà kóńceèni, k'ó tà kɔ̰́ɔ̰́ naǹfa? ¹³ Nɛ́na mɛ̀m̀pà yòǹ-pa niìsḭ̀m̀ma, nɛ nɔn-ń-ma è pɔ̰n nɛ bííhí mìì suu-sá, k'yàá bá sííka-nà nɛ Báàa mɛ̀ǹǹ péé-ko hḭ́ǹka, ò kó pa̰a̰-má o sèdi mɛ̀m̀pà nì n'ɔ̀ɔ̀ cɔ̀hu-pá!

Nìpa pṵ́nì Sèsíì è yɔ̀ ò bɔ̀hu seèkpákpààka nà wɛɛ̀ko nɔɔ̀ti

Dentá Màtíyéè12.22-30; Mád,ikì 3.22-27

¹⁴ Daadí yènì, kà Sèsíì é bɔhà seèkpákpààdi nìdo òcɔ̰́ǹ kú mɛhɛká. Nì de hédà k'ó hḭn mùko-dà. Nì yɛ̀ɛ̀ tḭ́ń wɔ̀ni o mɛhɛká, k'yèe nìdo é cetá è wɛì sukú, k'yé dii nìku dɔ́ɔ́di. ¹⁵ Àmá, kà pàcɔ̰́ yɔ̀: Wɛsipá wódo pà tṵ́mà toò-ko Bèdìsèbúdì, mɛnń-d'òò kɔ̰́nì nɔɔ̀ti k'ò bɔ̀hu ye seèkpákpààkà-ní.

¹⁶ Kà tɔɔ̀pa é pɛha pà kó hḭmpú óò díhìna wɛmá. Kà pà yɔ̀ ó pa̰á̰ pɔ́ńtápa̰á̰ma é bɛka è yɔ̀ o nɔɔtì yɛ̀ni nà Weèdi pesá-dà-ní. ¹⁷ Sèsíì há̰ yá̰á̰-ma pà màhu-sá tá, k'ó pà caka è yɔ̀: Kà wóoteǹka kàcɔ̰́kà kú nìpa kɔ̰ǹti-nà pa tɔɔ̀pa, ye kú wóoteǹka hɔ̰́ pɔ́dá-ma, kà hɔ̰́ɔ̰́hí mɛ̀ǹhì kà péé-hi é dɔ-dɔdi hi tɔɔhí hḭ́ǹka. ¹⁸ Nɛ toò Bɛ̀dìsèbúdì-dà n kɔ̰́nì nɔɔ̀ti kà n bɔɔ̀hu seèkpákpààka, kà Wɛɛ̀kupá wódo kɔ̰ǹti-nà o cɔ̰́ɔ̰̀di, ntɛ́ o wóoteǹka kó hḭmà é n'kadí? ¹⁹ Kà mmí bɔɔ̀hu wɛɛ̀kupá nà Bɛ̀dìsèbúdì nɔɔ̀ti-dà, nɛ kpɛ́ɛ́pà mɛmpa há̰ pà bɔ̀hu nà woò kpɛ́ɛtí-dà? Nɛ nìpa mɔ́mpá-dà kó nɛ sída. ²⁰ Àmá, kà n bɔ̀hu wɛɛ̀kupá nà Weèdi nɔɔ̀ti-dà, miya̰ bɛkú è yɔ̀ Weèdi wóòti-dà tɛ̀ni nɛ cɔhɔ̀ka.

²¹ Kà nìdo kpenì, è sà̰di ta̰à̰pu nɛǹti è ceí o hɔ̰́ɔ̰̀ta, yècɛ̰́ɛ̰̀ pú kó pḭ́ń o káma. ²² Kà nìdo tɔɔ̀o mɛ̀ǹǹ ò kpenì-nà-ko há̰ tɛ̀ni òò nɛdà, ò kó feèda-á-ma o ta̰à̰pu nɛǹti ò de dań-ti kú hḭ́ǹka, ye wɔ̀ni é tódá ò de káá-sa wɛǹni éè totá o kú nìpa.

²³ Mɛ̀ǹǹ pú n péé-nà-ko, ò n kɔ̰̀ǹti-nà-á-ma. Mɛ̀ǹǹ mɛ̀ɛ pú n tempáà-nà-ko kà tí tíká nìpa, ò pà wìhìni-í-dà.

Kà wɛɛ̀ko yɛdì nìdo mɛhɛká, ò kó nɛɛ́ é tóní-ma-ní.

Dentá Màtíyéè 12.43-45

²⁴ Kà wɛɛ̀ko yɛɛ̀ nìdo mɛhɛká, ò hɔ̰́ ka̰há é taá n'centì cèǹtì càwenkú mɛhɛká-dà è pɛnti bɛ̀m̀bɛ̀ni ò kó muhipa-dí. K'ò pú dɛ́hà, k'ó caka o cɔ̰́ɔ̰̀di è yɔ̀: N kó tón-ń-ma n hɔ̰́ɔ̰̀ta n yɛɛ̀ni-tá-ní kú mɛhɛká. ²⁵ K'ò té tóní é tɛ̀ni è hɔ̰́tà pà tà pɛ́dà, é tà dɔ̀hà dɛ́dɛ́í. ²⁶ Ye wɔ̀ni, k'ò té tón é taá pɛha-ní wɛɛ̀kupá tɔɔ̀pa pàyehì mɛ̀m̀pà sḭ̀ǹ-pa òò ha̰tà, kà pá tóní é tɛ̀ni é dúú ye nìdo mɛhɛká é kaàdi. Ye kú dàhàka, k'òo pemá té dɔ̀hà é dɔnka é ha̰tá-nà ye wɛɛ̀ko de mum p'óò yídà k'yè yòm̀pu.

Mɛ̀m̀pà yòǹ-pa yaǹnaakú yam̀ma.

²⁷ Sèsíì káà wɛì mɛmá-dà, kà poòo òcɔ̰́ǹ é wɛɛ́-ní kpeéma n'ɛ̀ɛ nìku mɛhɛká, óò caka è yɔ̀: Yaǹnaakú é m'péé-nà poòo mɛ̀ǹǹ àà póń-ko áa yɔ̰dà. ²⁸ Kà Sèsíì óò tɛ̰́ná è yɔ̀: Yè yònà é n'nadi mɛ̀m̀pà bekù-pa-dà Weèdi wɛmá è pa̰kú mà hḭ́mpú.

Nìpa békáà Sèsíì yḭdó.

Dentá Màtíyéè 12.38-42

²⁹ Nìku dɔ́ɔ́di de tíkánì-ma Sèsíì pesá, ye wɔ̀ni k'ó kù caka è yɔ̀: Wɔ̀ǹkù mɛnkù kú nìpa yòǹ niìkpákpààpa-dà. Pà békú *yḭdó-dà, àmá pà koò pú kó dɛ́há yḭdó òcɔ̰́ǹ k'yè pú yòǹ Weèdi wɛtɛ̰́náko Sònásì kóoó. ³⁰ K'yé n'yònà Sònásì de yòǹ-ma yḭdó Nìnífù yam̀ma kpɛ́mú, ma kú bookú-dà Niìfòùo bíitá kó n'yòǹ-ma yḭdó wɔ̀ǹkù mɛnkù kú nìpa kpɛ́mú. ³¹ Sídàma daadí, poòo mɛ̀ǹǹ de wóó-ko Sàbá teǹka, kó yídá-ma wɔ̀ǹkù mɛnkù kú nìpa yìhìka é pà kɔ̰́ɔ̰́ yetádi, mìì tee-sá ò de yíì-ní nà dɛùma-dà é tɛ̀ni è kó besí wódo Sàdòmɔ́ɔ̀ yaǹfòùma. Òcɔ̰́ǹ há̰ péé-ma miì è wɛhi-nà Sàdòmɔ́ɔ̀. ³² Sídàma daadí, Nìnífù yam̀ma kó yídá-ma é nɛɛ̀hi wɔ̀ǹkù mɛnkù kú nìpa yìhìka é pà kɔ̰́ɔ̰́ yetádi mìì tee-sá, Sònásì de pà cakáà Weèdi wɛmá kà pá peǹta-á-ma pa pa̰á̰ma. Òcɔ̰́ǹ há̰ péé-ma miì è ha̰tà-nà Sònásì.

Nɔ̀ǹci yòǹ wɔ̰̀ǹku ha̰wèta-dà.

Dentá Màtíyéè 5.15; 6.22-23

³³ K'ó tṵ́má tuɛ̀ha è yɔ̀: Òcɔ̰́ǹ pú hɔ̰́ cɔ́hìna ha̰wèta é tà sɔ̀na yoo é tà tàa yuudí mɛhɛká. Pà hɔ̰́ tà cɔ̰ná cɔ̰̀ǹcɔ̰̀ni hḭ́ǹka-dà k'yé teha kà mɛ̀m̀pà dúti-pá-ní é dɛ́há wenikú. ³⁴ A nɔ̀ǹci yòǹ a wɔ̰̀ǹku ha̰wèta-dà. Kà cì pú mɔn, a wɔ̰̀ǹku wɛǹni-dà hɔ̰́ m'péé wenikú mɛhɛká. Kà cì há̰ mɔn, k'àa wɔ̰̀ǹku wɛǹni té m'péé binìku mɛhɛká. ³⁵ Ye kpɛ́mú, á n'yá̰á̰ kà wenikú mɛ̀ǹkù péé-ku a mɛhɛká dá kpáńtá é hḭn binìku. ³⁶ K'àa wɔ̰̀ǹku wɛǹni péé wenikú mɛhɛká, kà bɛ̀m̀bɛ̀ni nìcɔ̰́nì pú péé binìku mɛhɛká, ku wɛǹni kó m'péé wenikú mɛhɛká-dà k'yé n'yònà ha̰wèt'aa tìi-má ta wenikú.

Sèsíì kɔ̰̀ǹti-nà Fàdísìpa nà kpɛ̰́ńtìnùka biɔhànapá.

Dentá Màtíyéè 23.1-36; Mádíkì 12.38-40

³⁷ Sèsíì wɛdà-ma é yɔ̀a, kà Fàdísì òcɔ̰́ǹ óò yíí o hɔ̰́ɔ̰̀ta mɛhɛká dipú. K'ó dúú ye Fàdísì hɔ̰́ɔ̰̀ta è kó dii. ³⁸ K'yèe Fàdísì é dɛ́há é n'hɔ̰́tà ò pú nɛtà o nɔ̀hi é nɛɛ́ dii k'yé n'yònà pa kpɛ̰́ńtìnùka hḭ́mpú, k'yóò dii. ³⁹ Ye wɔ̀ni, kà Teó óò caka è yɔ̀: Ǹtɛ nɛ́na Fàdísìpa nɛ yòm̀pu: Nɛ hɔ̰́ nɛɛ̀ta bondidí nà caadí ye dàhàka-dà, àmá nɛ yàma mɛhɛká kà túùpu nà mɛkatohiká sṵ́nà. ⁴⁰ Yíńdácì nɛ́na! Weèdi mɛ̀nì pa̰à̰-di nìi wɔ̰̀ǹku mɛni pú pa̰à̰ o yàma nkɛ́ɛ̀? ⁴¹ Nɛ́ pa̰a̰ sɔ̰̀m̀ma dimá mɛ̀mà péé-ma nɛ caàka nà nɛ bondiká mɛhɛká. Ma kú bookú-dà, niìya̰ wɛǹni kó weka-má nɛ kpɛ́mú.

⁴² Náńkú nɛ m'péé-nà nɛ́na Fàdísìpa! Nɛ kɔ̰́nì Weèdi nɛ yɛ̀ka tɔná kpɛ́ɛsá wɛǹni niìya̰ píta mɛhɛká yècɔ̰́-dà, bá nà nɛ kṵ́nyɛ̀ka kṵ́nfa̰à̰ti, è há̰ té yeda nɛ kó n'coó-ma nà nìpa, é n'dɔ́sí Weèdi. N'aá de yònà é m'pa̰kú-sa-dà è baà é n'dèn ye tɔɔsà kpɛ́mú. ⁴³ Náńkú nɛ m'péé-nà nɛ́na Fàdísìpa! Nɛ hɔ̰́ n'dɔ́sí kààka ceceká-dà Weèdi wɛmá biɔhà-nàmɔ̀ka mɛhɛká, è té tṵ́má n'kpɛ̀i kà nìpa é hìu é nɛɛ́ nɛ dɔa tíkáma bɛ̀m̀bɛ̀ka pesá. ⁴⁴ Náńkú nɛ m'péé-nà! Nɛ yònà híùka^a pà koò pú bahiní-ka-dà è há̰ centì ka hḭ́ǹka è pú yá̰á̰.

⁴⁵ Kà Weèdi kpɛ̰́ńtìnùka biɔhànakó òcɔ̰́ óò caka è yɔ̀: Dakpɛ̰́ǹn, k'à wɛì mɛma, a mɛ̀ɛ té ti teù-ú-ma.

⁴⁶ Kà Sèsíì óò tɛ̰́ná è yɔ̀: Náńkú mɛ̀ɛ té nɛ m'péé-nà Weèdi kpɛ̰́ńtìnùka biɔhànapà nɛ́na! Nɛ tóńkú totoyṵhùka-dà è toonì nìpa kà pà pú kó nɛɛ́ kà toó. Nɛ mɔ́mpá há̰ pú hɔ̰́ n'kpɛ̀i nɛ kó pà dɔ́dá-ma bá nà pa há̰ḿbíifá fàcɔ̰́ kà pá kà toó. ⁴⁷ Náńkú nɛ m'péé-nà, mìì tee-sá nɛ madì Weèdi Wɛtɛ̰́nápa híùka-dà, nɛ yààpa de kɔù-pa. ⁴⁸ Nɛ bɛkú mɛma è yɔ̀ nɛ sɛdáà-á-ma nɛ yààpa de pa̰à̰-sa, mìì tee-sá mɛmpa kɔù Weèdi Wɛtɛ̰́nápa, kà nɛ́na mɛ̀ɛ madì pa híùka. ⁴⁹ Mɛmá-dà tee Weèdi ni yaǹfòùma mɛhɛká nì wɛdà-ma è yɔ̀: N kó pà kɔ̰́ɔ̰́-ní Weèdi Wɛtɛ̰́nápa-dà nà tɔntɔndipá. Pà kó kɔ̀ù-ú-ma pa pàcɔ̰́ é diá tɔɔ̀pa náńkú. ⁵⁰ Ye kú kpɛ́mú-dà tee, Weèdi kó wáńtá yɔ̰́ń-ma wɔ̀ǹkù mɛnkù kú nìpa toòka, nà Weèdi Wɛtɛ̰́nápa hḭ̀ma pà hútà-ma wɛǹni nà fòùku cetáma, ⁵¹ é tódá Àbɛ́dì kpɛ́ɛmá pà cedí hútá-ma, háá é deǹta-nà Sàkàdíì kpɛ́ɛmá pà kɔ̀ù-ko dɔ̀hàdi cɔ̰̀ǹcɔ̰̀ni nà Weèdi nàmɔ̀ni ye cɔhàka. N nɛ cakú mɔ́masí-dà, Weèdi kó wáńtá yɔ̰́ń-ma wɔ̀ǹkù mɛnkù kú nìpa toòka n'ɛ̀ɛ kú niìkɔ̀ùpù wɛnnì kpɛ́mú.

⁵² Náńkú nɛ m'péé-nà nɛ́na Weèdi kpɛ̰́ńtìnùka biɔhànapá, mìì tee-sá nɛ kpenà Weèdi cɔ̀ku yá̰dáma há̰ńnùdi-dà é deèda ni peǹfa. Nɛ pú dúù nɛ mɔ́mpá è há̰ tṵ́mà kpanì mɛ̀m̀pà kpɛ̀i é dúú-pa è yɔ̀ pà dá dúú.

⁵³ Ò yɛ̀ni tḭ́ń wɔ̀ni ye Fàdísì hɔ̰́ɔ̰̀ta mɛhɛká, kà Fàdísìpa nà Weèdi kpɛ̰́ńtìnùka biɔhànapá òò mɔn-nà fɔ̰́di dɛ́dɛ́í, kà pá cetá òò tíúnì békàma niìya̰ dɔ́ɔ́di hḭ́ǹka. ⁵⁴ Pà de ò díhìnì wɛmá-dà, è kpɛ̀i ó yetá tɛ̰́náma hḭ́ǹka kà p'óò cɛ̰ɛ̰́.