Dúkì 5

Sèsíì dapàm̀ma cecepá yííma

Dentá Màtíyéè 4.18-22; Mádíkì 1.16-20

¹ Daadí yènì, kà Sèsíì é n'nɛɛ̀hi Sènɛ̀sàdɛ́tì baàdi bɛ̀ni, kà nìku é tɛ̀ni óò yéńtá è bòhùta ku tɔkú è kpɛ̀i é besí Weèdi wɛmá. ² K'ó dɛ́há hà̰à̰na nàdɛ́ɛ́ ye baàdi bɛ̀ni, kà num̀bíimɛ́nápa mɛ̀m̀pà nà tee-pá nà hédà é cútá è pɔ̀kù pa ká̰ńcḭ̀na. ³ K'ó dúú hà̰à̰pu mùcɔ̰́ kú mɛhɛká, kà mù yòǹ Sìmɔ́ Píyɛ́ɛ̀ kpɛ́mú, ye wɔ̀ni óò cɔ̀hà è yɔ̀ ó mù nátá-nà ye bɛ̀nì cɛ̰́masí. Ye kú dàhàka, k'ó kaàdi mu mɛhɛká é sɔ̰kadá è biɔhànì ye nìku.

⁴ Ò wɛdà tḭ́ń wɔ̀ni é yɔ̀a, k'ó caka Sìmɔ́ɔ̀ è yɔ̀: Tuhìna-hɔ̰ ye hà̰à̰pù nɛ́ɛmá cṵmpu-dí bɛ̀m̀bɛ̀ni, n'àa mɛ́nátɔɔ̀pa kà nɛ́ ká̰ńtá nɛ ká̰ńcḭ̀na é cɛ̰ha num̀bííhí. ⁵ Kà Sìmɔ́ɔ̀ óò tɛ̰́ná è yɔ̀: N dakpɛ̰́ǹn, ti fḭ́ńtà-á-ma wondàko yèǹka wɛǹni è mɛ́nì ti pú cɛ̰ɛ̰́ yècɛ̰́ɛ̰̀. Aá wɛdà-mà-ní n kó ká̰ńtá-ma ká̰ńcḭ̀mu.

⁶ Kà pá mà hḭn, é cɛ̰ɛ̰́ num̀bííhí sàma mɔ́ma hádí kà pa ká̰ńcḭ̀mu kɔ́ɔ́ cɛ́tápu. ⁷ Kà pá pɛìda pa kpɛ́ɛpá tɔɔ̀pa mɛ̀m̀pà de péé-pa hà̰à̰pu tɔmú mɛhɛká è yɔ̀ pá ya̰ní é pà tempanà. Kà pá tɛ̀ni é pà tempanà kà pá pa̰ná ye hà̰à̰na na dɛ́ɛ̀ka num̀bííhí kà ná sṵ́ná é yɔ̀a è nímù-hɔ̰. ⁸ Sìmɔ́ Píyɛ́ɛ̀ dɛ́hà-ma miya̰, k'ó kòdi dúùka Sèsíì yìhìka è yɔ̀: N Teù, nátá n pesà, n yòǹ niìsḭ̀ǹn-dà!

⁹ Ò de hḭ́n mɛma mìì tee-sá, pà de cɛ̰ɛ̰́ num̀bííhí sàma mɔ́ma-dà, kà wantanfɔ̰̀di óò cɛ̰ɛ̰́ é pɛ́ɛ́ é cɛ̰ɛ̰́-nà mɛ̀m̀pà d'oò péé-nà-pa wɛǹni. ¹⁰ Wantafɔ̰̀di mɛ̀ɛ té de cɛ̰ɛ̰́-ma Sìmɔ́ɔ̀ mɛ́nátɔɔ̀pa, ye hà̰à̰pu tɔmú yam̀ma, Sàákì nà Ìsá̰à̰, Sèbèdéè bííhí. Àmá, kà Sèsíì é caka Sìmɔ́ɔ̀ è yɔ̀: Dá n'wani, é cɛ̰ɛ̰́-nà yenì, a kó nà n pɛhàǹta-ní nìpa-dà. ¹¹ Kà pá tɛ̰́ná-ní pa hà̰à̰na ye baàdi bɛ́ɛ́kú, é tɛ̀ni é hédá ye wɛǹni é tṵṵ̀na Sèsíì.

Sèsíì kpekànà kɔ̰̀ǹn

Dentá Màtíyéè 8.1-4; Mádíkì 1.40-45

¹² Daadí yènì, kà Sèsíì é m'péé yɔtí tìcɔ̰́tì kú mɛhɛká, kà dɔɔ̀o òcɔ̰́ǹ é tɛ̀n'ɔ́ɔ̀ dɛ́há è mɔn-ní kɔ̰̀ǹku o wɛǹni. K'ó tɛ̀ni é dɔɔ́ bìbìùdi o yìhìka òò sɛ́úkú è toò: N Teù, k'à kpɛ̀i, a kó nɛɛ́ n wekàna-á-ma. ¹³ Kà Sèsíì é dɛɛ̀da o nɔ̀ku óò pḭ́ń è yɔ̀: N kpɛ̀i-í-ma, weka! Ye pesá n'ɛ̀ɛ pesá, k'yèe dɔɔ̀o kɔ̰̀ǹku é yɔ̀a. ¹⁴ Ye kú dàhàka, kà Sèsíì óò caka è yɔ̀: A dá yetá mà ca-caka òcɔ̰́ǹ. Taá é bɛka a cɔ̰́ɔ̰̀di dɔ̀hàdi yaǹn, é yíí pa̰ná wekànamá dɔ̀hàdi Mɔ̀yísì kpɛ̰́ǹti nùdi hḭ́n á pa̰á̰-di é bɛka nìpa wɛǹni è yɔ̀ a kpekáà!

¹⁵ Nà mɛma, k'òo yèdi é dɔ̀hà é cèn kà nìpa dɔ́ɔ́di kɔ́dì-ní o pesá è kó besí o wɛmá, kà tɔɔ̀pa kpɛ̀i kpekànamá pa dɔncí hḭ́ǹka. ¹⁶ Àmá, Sèsíì de hɔ̰́ yɔ̀ɔ é héé-ma nìpa è té ka̰há nátáma bɛ̀m̀bɛ̀ni nìpa kɔ́ɔ́-di é tɛ̀i é n'dɔń Weèdi.

Sèsíì kpekàna hɔ̀ùta

Dentá Màtíyéè 9.1-8; Mádíkì 2.1-12

¹⁷ Daadí yènì, kà Sèsíì m'biɔhànì Weèdi wɛmá, kà Fàdísìpa nà Weèdi kpɛ̰́ńtìnùka biɔhànapá kàdi ye pesá. Pà de yɛɛ̀ni-nà-ní Kàdìdéè nà Sùdéè tempáàti yɔtí wɛǹni-dà, nà Sèdìsàdɛ́m̀ yɔtí mɛhɛká. Kà Bateó nɔɔ̀ti péé-nà Sèsíì k'ò kpekànì mɔkàpa. ¹⁸ Kà nìpa é tɛ̀ni è toó-ní hɔ̀ùta kà tà dɔɔ́ dɔɔdí hḭ́ǹka. Kà pá m'pɛnti é tà dúwà nàmɔ̀ni Sèsíì de péé-di kú mɛhɛká, é tɛ̀i é tà hḭ́ná o yìhìka. ¹⁹ P'àá pú dɛ́hà pà kó yɛ̀ɛ̀-sa é yó tà dúùwa nà nìku kpɛ́mú. Kà pá dìsi nàmɔ̀ni hḭ́ǹka é tɛ̀i beé-nà ò de péé-sa é cúdá bòdi, é tà cúhìna-hɔ̰ ye nìpa cɔhɔ̀ka Sèsíì yìhìka kà tà dɔɔ́ ta dɔɔdí hḭ́ǹka. ²⁰ Sèsíì dɛ́hà-ma ye nìpa dandaní, k'ó cemá caka ye hɔ̀ùta è yɔ̀: N dóopó, m'a dedà-á-ma a sḭ̀ḭ̀ma.

²¹ Kà Weèdi kpɛ̰́ńtìnùka biɔhànapá nà Fàdísìpa é cemá mahà pa yàma mɛhɛká è yɔ̀: Nìdo wodà mɛmà, k'ò tèù Weèdi? Weèdi cɔ̰́ɔ̰̀di bààsí, wodà k'ó nɛɛ́ é deèda nìdo sḭ̀ḭ̀ma? ²² Kà Sèsíì é bantá pà màhu-sá pa yàma mɛhɛká é pà béka è yɔ̀: Badà tee kà nɛ káá ye kú yam̀màhàkà kú bookù-ní? ²³ M̀mɔ́ńya̰-dà pú dɔǹ-nà ye tɔɔ̀sa m'a n'yɔ̀-ma: M'a dedà a sḭ̀ḭ̀ma nà m'a n'hḭ́n-má: Yídá é cèn? ²⁴ N kpɛ̀i nɛ́ n'yá̰á̰-ma è yɔ̀ mmí Niìfòùo bíitá, n káá-ma nɔɔ̀ti è kó nɛɛ́ é deèda nìdo sḭ̀ḭ̀ma teǹka hḭ́ǹka. Ye wɔ̀ni, k'ó caka ye hɔ̀ùta è yɔ̀: Yídá é tódá a dɔɔdí é kòǹ, mmí-dà mà n'àà hḭ́n.

²⁵ Ye pesá n'ɛ̀ɛ pesá, k'yèe dɔɔ̀o é yídá nìku wɛǹni yìhìka, é tódá o dɔɔdí ò cetà dɔɔ́-di kú hḭ́ǹka, é yɛ̀dì é n'kṵnti è dùǹti-ho Weèdi. ²⁶ K'yé dii mɛ̀m̀pà de péé-pa wɛǹni ye pesá, kà wantafɔ̰̀di é pà cɛ̰ɛ̰́ kà pà dùǹti Weèdi è toò: Ti dɛ́hà yenì-dà pa̰á̰ma ti mum pú dɛ́hà-ma daadí yènì.

Sèsíì yíí Dèfí è yɔ̀ óò tṵ̀na.

Dentá Màtíyéè 9.9-13; Mádíkì 2.13-17

²⁷ Ye kú dàhàka, kà Sèsíì é yɛɛ̀ni é dɛ́há kaàcáho òcɔ̰́ǹ kà p'òò toò Dèfí, k'ò kàdi o tɔmú pesá. K'óò caka è yɔ̀: N tṵṵ̀na-ní! ²⁸ Kà Dèfí é yídá, é hédá niìya̰ wɛǹni, óò tṵ̀na. ²⁹ Ye wɔ̀ni, kà Dèfí é yíí Sèsíì o hɔ̰́ɔ̰̀ta dikàdikú é béná dití sàma. Kà kaàcáhàpa dɔ́ɔ́di nà nìpa tɔɔ̀pa é tɛ̀ni é pɛ́ɛ́ è pà yon-nà. ³⁰ Kà Fàdísìpa nà pa Weèdi kpɛ̰́ńtìnùka biɔhànapá kɔ̰ǹti. Kà pá béka Sèsíì dapàm̀ma è yɔ̀: Badà tee kà nɛ yon è pɛ́ɛ̀ yɔ̰̀ǹ-nà kaàcáhàpa nà niìsḭ̀m̀ma tɔɔ̀pa? ³¹ Kà Sèsíì é pà tɛ̰́ná è yɔ̀: Nìpa mɛ̀m̀pà kpenì-pa pú hɔ̰́ m'pɛnti dòkòtódo, àmá mɛ̀m̀pà mɔn-pá-dà h'ɔ̰́ɔ̰̀ m'pɛnti è yɔ̀ ó pà kpekàna. ³² N pú tɛ̀ni è kó yíí mɛ̀m̀pà coó-pa, àmá n tɛ̀ni niìsḭ̀m̀ma kpɛ́mú-dà è yɔ̀ pá peǹta fòùmu.

Sèsíì wekànà num̀boóma wɛmá

Dentá Màtíyéè 9.14-17; Mádíkì 2.18-22

³³ Kà Fàdísìpa óò caka è yɔ̀: Ìsá̰-Bàtísì dapàm̀ma nà ti kpɛ́ɛpá boonì-í-ma nùdi, è pa̰kú-nà Weèdidɔɔ̀pu, àmá fɔ̰́ń kú kpɛ́ɛpá mɛmpa há̰ baà yon-ń-ma è yɔ̰̀ǹ-nà. ³⁴ K'ó pà tɛ̰́ná è yɔ̀: Kà nìi kpɛ̀i é tóó poòo è yíí o dóòpa, nɛ maàhu è yɔ̀ ò kó nɛɛ́ héé-dà kà pá bowá nùdi kà podɔɔ̀o káà pà péé-nà? ³⁵ Àmá, wɔ̀ni pení-ma-ní kà pà kó tódá podɔɔ̀o óò ka̰hàna, ye wɔ̀ni pà kó boó-ma nùdi.

³⁶ Kà Sèsíì é tṵ́má pà caka wɛbemú yohìnamà mɛmà è yɔ̀: Òcɔ̰́ǹ pú hɔ̰́ cɛ́tá báapàǹku pɛ̀tàda é taá pɔ̰ná báakpɛ̰́nkú. Kà nìi mà hḭn, ò pa̰à̰ bòdi-dà ye báapàǹkù-ní, ku pɛ̀tàdà mɛ̀ɛ tṵ́mà pú kó teha é pɛ́ɛ́-nà ye báakpɛ̰́ńkù-ní. ³⁷ Òcɔ̰́ǹ mɛ̀ɛ pú hɔ̰́ cɔ̰dí dìfɛ̰́ɛ̰̀ pàǹn dɔcí yúukpɛ̰́ɛ̰̀ka mɛhɛká. Kà nìi hḭn mɛma, ye dìfɛ̰́ɛ̰̀ kó kà pɔ́dá-ma é wu-wudí, kà ká sèǹ. ³⁸ Àmá, pà hɔ̰́ cɔ̰dí dìfɛ̰́ɛ̰̀ pàǹn yúupààka mɛhɛká-dà. ³⁹ Òcɔ̰́ǹ pú hɔ̰́ nìì dìfɛ̰́ɛ̰̀ kpɛ̰́ǹn é tṵ́má n'kpɛ̀i pàǹn. Ò hɔ̰́ n'yɔ̀: Kpɛ̰́ńǹ naa-nà-á-dà pàǹǹ.