Dúkì 8

Poòpa mɛ̀m̀pà de tṵ̀n-pá Sèsíì

¹ Ye kú dàhàka, kà Sèsíì é n'centì yɔtí nà yɔbící mɛhɛká è cakú Weèdi wóòti wɛnaamá, k'òo tɔntɔndipá píì-pàdɛ́ɛ́ ò nɔɔ̀-nà, ² nà poòpa pàcɔ̰́ ò de bɔ̀haà-pa kú mɛhɛká wɛɛ̀kupá, n'ɔ̀ɔ̀ de kpekànà-pa kú dɔncí. Ǹtɛ ye poòpa yèka: Màdíì Màkìdàdáà yɔtí kóoó, Sèsíì de bɔɔ̀haà-ko kú mɛhɛká wɛɛ̀kupá pàyehì, ³ nà Sàánì, Sùsáà poòo. Ye Sùsáà de yòǹ mɛ̀ǹǹ cɔ́ti-kó-dà Hèdótì káma wɛǹni. É yídá, nà sùsánì nà poòpa tɔɔ̀pa dɔ́ɔ́di, mɛ̀m̀pà de tóńkú-pa pa káma è tempú-nà Sèsíì n'ɔ̀ɔ dapàm̀ma.

Dibɔɔ̀ti yahípu wɛbemú yohènamá

Dentá Màtíyéè 13.1-9; Mádíkì 4.1-9

⁴ Nìpa-dà de yíhú-ní yɔtí bá mɛ̀ǹtì dɛ̀ɛ̀-ti è kɔ́dì-ní Sèsíì pesá. Nìku dɔ́ɔ́di há̰ de tíkánì-ma, k'ó caka wɛbemú yohènamà mɛmà è yɔ̀: ⁵ Dɔɔ̀ɔ òcɔ̰́ǹ-dà de taá o yɛ̀di dibɔɔ̀ti^a yahípu. K'ó tɛ̀i é tì n'yahù, kà bíimá màcɔ̰́ é dɔdi cɔ̀ku bɛ́ɛ́kú, kà pá mà nɔ̀ù-nà, kà nɛ̀hi é mà dii fɛ́. ⁶ Kà tɔɔ̀ma é dɔdi teǹka mɛ̀ǹkà káá-ka tá̰à̰ka è pú cṵmpu bá cɛ̰́ma. Kà má yɛɛ̀ni é tṵ́má kpɛ-kpɛí, mìì tee-sá bóhikú de pú péé. ⁷ Kà bíimá tɔɔ̀ma é dɔdi poòma cɔhɔ̀ka, kà má pɛ́ɛ́ é mà yɛ̀ni-nà-ní. K'yèe poòma é mà fḭń, é mà kɔ̀ù. ⁸ Kà màcɔ̰́ há̰ dɔdi tenyṵhùka hḭ́ǹka é yɛ̀ɛ̀, é kpɛ̰́ń dɛ́dɛ́í, kà bá mɛ̀mà dɛ̀ɛ̀-ma é pɛdá bíimá kɔ̀ta. Sèsíì wɛdà-ma mɛma é yɔ̀ɔ, k'ó yohòna boòku kpeéma è yɔ̀: Kà mɛ̀ǹǹ káá-ko toòka è kó besí k'ó besí.

Mìì tee-sá kà Sèsíì wɛì nà wɛbemú yohènamá

Dentá Màtíyéè 13.10-17; Mc 4.10-12

⁹ Kà Sèsíì dapàm̀ma óò béka ye wɛbemù yohènamà kpɛ̀i é n'yɔ̀pu. ¹⁰ K'ò yɔ̀: Weèdi-dà nɛ pɛ̰ḭ nɛ́na, è yɔ̀ nɛ́ yá̰dá ni wóòti kpɛ́ɛsá mìì sɔ̀ɔ-sá. Àmá nìpa tɔɔ̀pa mɛmpa, pà you niìya̰ wɛǹni nà wɛbemú yohènamá cɔ̰́ɔ̰̀di-dà, k'yé teha

kà pá n'wáń p'àá bá dɛ́há,

é n'you p'àá bá yekà yècɛ̰́ɛ̰̀.

Sèsíì wekànà dibɔɔ̀ti yahípu wɛbemú yohènamá.

Dentá Màtíyéè 13.18-23; Mádíkì 4.13-20

¹¹ K'ó tuɛ̀ha è yɔ̀: Ǹtɛ ye wɛbemú yohènamá kpɛ̀i é n'yɔ̀pu: Ye dibɔɔ̀ti pà yahù-ti héé Weèdi wɛmá-dà. ¹² Cɔ̀ku bɛ́ɛ́kú dibɔɔ̀ti dɔɔ-kú kú hḭ́ǹka yònà nìpa pàcɔ̰́ mɛ̀m̀pà hɔ̰́ yekà-pà-dà Weèdi wɛmá. Pà mà yèkaà-ma, kà Wɛɛ̀kupá wódo há̰ tɛ̀ni é mà dèda pa yàma mɛhɛká é kpaná pà kó mà teha-má é dɛ́tá fḭ́táma. ¹³ Tá̰à̰ka teǹka dibɔɔ̀ti dɔɔ-ká kú mɛhɛká, yònà tɔɔ̀pa mɛ̀m̀pà hɔ̰́ yekà-pa-dà Weèdi wɛmá, é mà tà̰ǹta nà yaǹnaakú, pà há̰ bá héé kà má kaàdi mámáḿ pa yàma mɛhɛká. Pà hɔ̰́ mà tà̰ǹta wɔ̀ni cɛ̰́masí mɛhɛká-dà, kà bɛḿma tɛ̀ni kà pá mà yahí-ho. ¹⁴ Poòti teǹka dibɔɔ̀ti dɔɔ-ká kú mɛhɛká, yònà nìpa mɛ̀m̀pà hɔ̰́ yekà-pa-dà Weèdi wɛmá, é n'tɔdì tɔ̀dì kà yam̀màhàka, nà káma, nà fòùku kpɛ́ɛsá dɔ́kàma há̰ té pà fḭntá, pà koò bá nɛɛ́ kpɛ̰́ń Weèdi cɔ̀ku mɛhɛká é pɛdá tebíiká kà kà bii. ¹⁵ Tenyṵhùka dibɔɔ̀ti dɔɔ-ká kú mɛhɛká, yònà nìpa tɔɔ̀pa mɛ̀m̀pà hɔ̰́ yekà-pa-dà Weèdi wɛmá, é mà tàa pa mɛkasuuká mɛhɛká nà yàma màcɔ̰́. Pà hɔ̰́ mà m'púsí-ma dɛ́dɛ́í, é kpɛ̰́ń Weèdi cɔ̀ku mɛhɛká, é pɛdá tebíiká.

Wɛbemú yohènamá ha̰wèta hḭ́ǹka

Dentá Mádíkì 4.21-25

¹⁶ Pà pú hɔ̰́ cɔ́hìna ha̰wèta é tà tàa yúúdi mɛhɛká yoo dɔɔdí teǹka, àmá pà hɔ̰́ tà cɔ̰ná kɔ̀ɔkú hḭ́ǹka-dà k'yé teha kà mɛ̀m̀pà dúti-pá-ní é dɛ́há wenkú. ¹⁷ Nìpa pú kó nɛɛ́ dɛ́há-sa wɛǹni sá̰mà-ní, pà kó wáńtá éè dɛ́há-ma. Mìì mɛ̀ɛ sɔ̀ɔ-sá wɛǹni sá̰mà-ní, yè kó wáńtá é dátá-ma wèǹku cɔdí kà p'éè yá̰dá.

¹⁸ Pa̰á̰-nà yɔkàma nɛ besíma hḭ́ǹka, mìì tee-sá mɛ̀ǹǹ káá-ko yècḭ́ḭ̀, pà kó dɔ̀hà óò tùɛ̀ha-á-ma. Mɛ̀ǹǹ mɛ̀ɛ kɔ́ɔ́-ko yècḭ́ḭ̀, pà kó feèda-á-ma bá ye cɛ̰́masí ò màhu è toò ò káá-sa.

Mɛ̀m̀pà yòǹ-pa Sèsíì màa n'ɔ̀ɔ ya̰nhí

Dentá Màtíyéè 12.46-50; Mádíkì 3.31-35

¹⁹ Kà Sèsíì màa n'ɔ̀ɔ ya̰nhí é tɛ̀ni è kpɛ̀i óò dɛ́há, àmá pà pú nɛɛ̀ é ta̰ntá o pesá, nà nìku dɔ́ɔ́di kpɛ́mú. ²⁰ Ye wɔ̀ni, kà p'óò caka è yɔ̀: A màa n'àa ya̰nhí péé tapaàdi è kpɛ̀i áa dɛ́há. ²¹ K'ó pà tɛ̰́ná è yɔ̀: Mɛ̀m̀pà bekù-pa Weèdi wɛmá è pa̰kú mà hḭ́mpú, mɛmpá-dà yòǹ n màa nà n ya̰nhí.

Sèsíì nɛ̀hìnà yakùkùdi.

Dentá Màtíyéè 8.23-27; Mádíkì 4.35-41

²² Daadí yènì, Sèsíì n'ɔ̀ɔ dapàm̀ma kà pá dúú hà̰à̰pu mɛhɛká, k'ó pà caka è yɔ̀: Héé-nà kà tí deèta ye baàsàdì kóḿbòni tɔɔ̀di. Kà pá ka̰há n'ɛ̀ɛ hà̰à̰pu. ²³ Pà tɔ̀dì-ma ye nɛ́ɛmá mɛhɛká, k'ó dɔɔ́ nuǹdɔmú. Ye pesá n'ɛ̀ɛ pesá, kà yakpeekú é yíí-ní è heu ye baàdi hḭ́ǹka, kà nɛ́ɛmá dúù ye hà̰à̰pu mɛhɛká è mù sṵ́nì, kà mù pà tɔ́sí-nà níḿpu. ²⁴ K'òo dapàm̀ma óò hɛ́tá-ho óò hèǹta è yɔ̀: Ti dakpɛ̰́ǹn, ti dakpɛ̰́ǹn, nɛ́ɛmá-dà kó ti dii. K'ó heǹta-ní é wɛɛ́-nà kpeéma ye yakú n'ɛ̀ɛ nɛ́ɛ-sa̰à̰ka k'yé nɛɛ̀hi, k'yèe wɛǹni yɔ̀ cèù. ²⁵ K'ó béka o dapàm̀ma è yɔ̀: Nɛ dandaní péé ya-dà? Kà wantafɔ̰̀di é pà cɛ̰ɛ̰́, k'yè pà yon, kà pà békú pa tɔɔ̀pa è toò: Nìi wodà mɛnǹ, k'ò té kɔ̰́ɔ̰́ yakú nà nɛ́ɛmá nùdi k'yóò yèkà-nà toodí?

Sèsíì kpekànà dɔɔ̀o seèkpákpààka fá̰kápú-ko

Dentá Màtíyéè 8.28-34; Mádíkì 5.1-20

²⁶ Kà pá deèta ye baàdi é ta̰ntá Sèdàsáà yam̀ma teǹka mɛhɛká, kà kà coó-nà Kàdìdéè. ²⁷ Kà Sèsíì é n'cúti-ní ye hà̰à̰pu, k'yèe yɔtí dɔɔ̀o òcɔ̰́ǹ é tɛ̀n'ɔ́ɔ̀ pèta-nà, kà wɛɛ̀kupá dɔ́ɔ́di péé o mɛhɛká. Yè de yókáà-á-ma n'ɔ̀ɔ̀ koò de pú báti-má báatí, ò mɛ̀ɛ koò de pú wenti hɔ̰́ɔ̰̀ta mɛhɛká, àmá, híùka mɛhɛká-dà ò de wenti-má. ²⁸ Ò dɛ́hà-ma Sèsíì, é tódá hodí, é dɔɔ-ho o tàka fɔ̰̀di, é wɛɛ́ kpeéma è yɔ̀: A n kpɛ̀i-nà badà, Sèsíì Sàwèǹku Weèdi bidà? M'a sɛ́úkú-ma, dá n diá náńkú! ²⁹ Mìì há̰ de tee-sá k'ò wɛì mɛma, Sèsíì-dà de kɔ̰́nì nùdi ye wɛɛ̀kupá è yɔ̀ pá yɛ̀dì o mɛhɛká. Cɛ̰má dɔ́ɔ́di, ye wɛɛ̀kupá de hɔ̰́ cɛ̰ɛ̰́-ma ye dɔɔ̀o, kà pà t'óò bowá o nɔ̀hi n'ɔ̀ɔ tàka dákáti è yɔ̀ ò dá yɛ̀dì. Àmá, k'ò té tì tɔ̰̀-tɔ̰̀ta, kà pà t'óò túdí foǹni mɛhɛká. ³⁰ Kà Sèsíì óò béka è yɔ̀: A yèdi héé badà? K'yèe dɔɔ̀o óò tɛ̰́ná è yɔ̀: Dɔ́ɔ́di. Ò de hḭ́n mɛma, mìì tee-sá wɛɛ̀kupá dɔ́ɔ́di-d'òò dúú.

³¹ K'yèe wɛɛ̀kupá sɛ́úkú Sèsíì, è yɔ̀ ò dá pà bɔ̀hà ye dɔɔɔ̀ mɛhɛkà, é pà hutá *bìḿbìni fɔ̰̀dìdi mɛhɛká. ³² Yè de hɔ̰́tà fa̰nkà-dɔ́ɔ́di nìcɔ̰́nì-dà càu ta̰à̰di hḭ́ǹka è pɛnti dimá. K'yèe wɛɛ̀kupá é sɛ́úka Sèsíì è yɔ̀ ó héé kà pá taá é dúú ye fà̰ǹkàti mɛhɛká. K'ó pà caka è yɔ̀: Tɔɔ̀ta-nà. ³³ Ye wɔ̀ni, k'yèe wɛɛ̀kupá é yɛ̀dì ye dɔɔ̀o mɛhɛká, é taá dúú ye fà̰ǹkàti. K'yèe fa̰nkà-dɔ́ɔ́di wɛǹni é dɔtìna-ní n'ɛ̀ɛ ta̰à̰di hḭ́ǹka, é n'káá-ho n'ɛ̀ɛ baàdi mɛhɛká, é kpíí fɛ́.

³⁴ Nìpa mɛ̀m̀pà de cɛ̰nti-pá ye fà̰ǹkàti dɛ́hà-ma miya̰, kà pá cocí é taá caka ye yɔtí nìpa nà yɔbící kpɛ́ɛpá. ³⁵ Kà nìpa é yɛɛ̀ni é taá è kó dɛ́há mìì pa̰à̰-sa. Kà pá ta̰ntá-ní o pesá, é tɛ̀ni dɛ́há ye dɔɔ̀o wɛɛ̀kupá dɔ́ɔ́di de yɛdì-ko kú mɛhɛká, k'ò kàdi Sèsíì fɔ̰̀di, è bádí báatí k'yècɛ̰́ɛ̰̀ koò p'óò káá. Kà wantafɔ̰̀di é pà cɛ̰ɛ̰́. ³⁶ Mɛ̀m̀pà de péé-pa ye pesá é dɛ́há mìì de pa̰à̰-sa nà pa nɔ̀ǹci, kà pá pà caka ye hḭmá k'yèe dɔɔ̀o é kpeka. ³⁷ Ye wɔ̀ni, kà Sèdàsáà tempáàku nìku wɛǹni é sɛ́úká Sèsíì è yɔ̀ ó yíí yɛ̀dì ku teǹka. Kù de hḭ́n mɛma, mìì tee-sá wantafɔ̰̀di-dà de kù cɛ̰ɛ̰́ sàma. Kà Sèsíì é dìsi hà̰à̰pu è kpɛ̀i é ka̰há, ³⁸ àmá, k'yèe nìdo wɛɛ̀kupá de yɛdì-ko kú mɛhɛká óò cɔhà è yɔ̀, ó héé k'óò tṵ̀na. K'ó yeda, óò caka è yɔ̀: ³⁹ Tón é kòǹ a hɔ̰́ɔ̰̀ta é tɛ̀i é caka Weèd'aa pa̰à̰-sa wɛǹni. K'yèe dɔɔ̀o é ka̰há é tɛ̀i é caka yɔtí nìpa wɛǹni, Sèsíì ò pa̰à̰-sa.

Poòo òcɔ̰́ǹ kpekànamá, nà Sàìdísì sepàǹn fokànamá

Dentá Màtíyéè 9.18-26; Mádíkì 5.21-43

⁴⁰ Sèsíì tóní tḭ́ń wɔ̀ni ye baàdi sóìdi tɔɔ̀di, kà nìku óò codá è yá̰á̰ pa wɛǹni d'oò ceí-ma. ⁴¹ Ye wɔ̀ni, kà dɔɔ̀o òcɔ̰́ǹ é tɛ̀ni kà p'òò toò Sàìdísì, k'ò yòǹ Weèdi wɛmá biɔhà-nàmɔ̀ni kpɛ̰́ǹn. K'ó hìu o yìhìka óò sɛ́úka è yɔ̀ ó taá o hɔ̰́ɔ̰̀ta, ⁴² mìì tee-sá, o sepàǹn-dà de mɔdì-nà kṵ́mú. Ò d'oò pɛɛ̀ o cɔ̰́ɔ̰̀di-dà k'ò káá beeká píì-kàdɛ́ɛ́ kpɛ́ɛmá.

Ò tɔ̀dì-ma ye dɔɔ̀o hɔ̰́ɔ̰̀ta, kà nìku dɔ́ɔ́di-d'òò pɔ̰dí, òò bòpù páàti wɛǹni. ⁴³ Ye nìku mɛhɛká, kà poòo òcɔ̰́ǹ de yè péé é mɔn poòma è yòǹ beeká píì-kàdɛ́ɛ́, mà pú yɔ̀ɔ. [K'ó cɔ̰ha ò káá-sa wɛǹni dòkòtóòpa pesá, p'oòcɔ̰́ǹ pú nɛɛ̀ óò kpekàna.] ⁴⁴ K'ó fɛ̰kapa-ní nà Sèsíì dàkàbɛ́ka é tɛ̀ni dɛɛ̀da é pḭ́ń o tókédi yàǹyàǹti. Ye pesá n'ɛ̀ɛ pesá, k'òo poòma é nɛɛ̀hi. ⁴⁵ Kà Sèsíì é béka nìpa è yɔ̀: Wodà n pḭ́ń? Kà pá nɔ̀hì pa wɛǹni è yɔ̀ pà p'óò pḭ́ń. Ye wɔ̀ni, kà Píyɛ́ɛ̀ yɔ̀: N dakpɛ̰́ǹn, nìpa-d'àà pɔ̰dí-ma àà bòhòta páàti wɛǹni. ⁴⁶ Kà Sèsíì óò tɛ̰́ná è yɔ̀: Òcɔ̰́ǹ-dà n pḭ́ń. N bantà-á-ma è yɔ̀ n nɔɔ̀ti tìcɔ̰́ yɛdì-í-ma n mɛhɛká.

⁴⁷ Ye poòo hɔ̰́tà-ma pà bantà ò pa̰à̰-sa, k'ó tɛ̀ni é hìu-ho Sèsíì yìhìka, è cèùdi. Ye wɔ̀ni nìku wɛǹni yìhìka, k'ó caka mìì tee-sá k'óò pḭ́ń, n'ɔ̀ɔ̀ kpekáàma kú bookú ye pesá n'ɛ̀ɛ pesá. ⁴⁸ Kà Sèsíì óò caka è yɔ̀: N sepàǹ, a dandaní a fḭ́hínà-á-ma. Ka̰há nà wɛ̀ɛ̀di.

⁴⁹ Ò de káà wɛì mɛmá-dà, kà tɔntɔndikó é yɛɛ̀ni-nà-ní ye Weèdi wɛmá biɔhà-nàmɔ̀ni kpɛ̰́ǹn hɔ̰́ɔ̰̀ta é tɛ̀n'ɔ́ɔ̀ caka è yɔ̀: A sepàǹn koò pú kadí, koò dá n'kɔkapú dakpɛ̰́ǹn. ⁵⁰ Sèsíì yèkaà-ma mɛma, k'ó caka Sàìdísì è yɔ̀: Dá wampa! Ní n'dań sá̰à̰di, a sepàǹn kó kpeka-á-ma. ⁵¹ Ò ta̰ntà tḭ́ń wɔ̀ni hɔ̰́ɔ̰̀ta, ò pú teháà kà nìpa é pɛ́ɛ́ óò dúú-nà ye sepàǹn dɔɔ́-sa, k'yè pú yòǹ Píyɛ́ɛ̀, nà Ìsá̰à̰, nà Ìsáákì, nà bíitá báàa nà ta màa sá̰à̰di. ⁵² Mɛ̀m̀pà de péé-pa wɛǹni ye hɔ̰́ɔ̰̀ta mɛhɛká, kà pà toó kpíi-dawòka ye bíitá kpɛ́mú. Ye wɔ̀ni, kà Sèsíì é pà caka è yɔ̀: Dá n'kɔǹ-nà! Ye bíítà pú kpíi, tà dɔɔ́-ma. ⁵³ Kà p'òò dɛhikú, mìì tee-sá pà de yá̰á̰-ma è yɔ̀ tà kpíi. ⁵⁴ Kà Sèsíì é cɛ̰ɛ̰́ ye sepàǹn nɔ̀ku é wɛɛ́ kpeéma è yɔ̀: Sepàǹtà, yídá! ⁵⁵ Kà tá foùda-ní é yídá ye pesá n'ɛ̀ɛ pesá. Kà Sèsíì é pà caka è yɔ̀ pá tà pa̰a̰ dipú kà tá dii. ⁵⁶ K'yé dii ye bíitá báàa nà ta màa, k'ó pà caka è yɔ̀ pà dá yetá caka òcɔ̰́ǹ mìì pa̰à̰-sa.