Dúkì 3

Ìsá̰-Bàtísì Weèdi wɛmá cakàma

Dentá Màtíyéè 3.1-12; Mádíkì 1.1-8; Ìsá̰à̰ 1.19-28

¹ Hɔ̀dɔ́m̀ wóosào Tìbɛ́ɛ̀ de káá tḭ́ń benní beeká píì-kànùm̀ wóokàtàda hḭ́ǹka, kà Pɔ̰́ńsí Pìdátì-dà yòǹ Sùdéè tempáàku yìkàǹyìdo, kà *Hèdótì wódí Kàdìdéè tempáàku, k'òo kúcàa Fìdípù yòǹ Ìtìdéè nà Tìdàkònítì tempáàti wódo, é yídá kà Dìsàníásì wódí Àbìdɛ́nì tempáàku. ² Ànásì nà Kàyífù kà pà yòǹ dɔ̀hàka yam̀ma kpɛ̰́m̀ma. Ye kú benní-dà Weèdi cakáà-ma ni wɛmá Ìsá̰à̰ càwenkú mɛhɛká k'ò yòǹ Sàkàdíì bíitá. ³ Ye wɔ̀ni-dà, Ìsá̰à̰ cetà-ma è cèǹtì yɔtí mɛ̀ǹtì de hɛ́dí-nà-ti wɛǹni Sùùtɛ̰́ɛ̰̀ kóńkú è bekànì è toò: Peǹta-nà nɛ fòùmu, é héé kà pá nɛ cóńtá k'yé teha kà Weèdi é nɛ deèda nɛ sḭ̀ḭ̀ma. ⁴ Mɛmá kú bookú-dà Weèdi wɛtɛ̰́náko Èsàyíì de wa̰tà-sa o pɔ̀kàta mɛhɛká de pa̰à̰-ma. Ò de wa̰tà è yɔ̀: Nìdo òcɔ̰́ǹ-dà bekànì càwenkú mɛhɛká è toò: Dɔ̀hà-nà ti Teó cɔ̀ku! Ò pa̰á̰-nà cɔ̀ci kà cí n'cɔ́dí sukú! ⁵ Pɔ̰sàku wɛǹni kó hìu-ú-ma, kà ta̰à̰ka nà ta̰hí é pɔ́dá é dakàna nà teǹka. Cɔ̀ci mɛ̀ǹcì wɔ̰dí-ci kó nadí-ma é cɔ́dí, kà mɛ̀ǹcì cɔ̰háà-ci é dɔ̀hà é sá̰kàna, ⁶ kà nìi wɛǹni é dɛ́há fḭ́hìnamá Weèdi ti kɔ̰́ɔ̰̀-ma-ní! ⁷ Nìku dɔ́ɔ́di-dà de tɛɛ̀hu-ní Ìsá̰à̰ pesá è kpɛ̀i ó kù cóńtá. Ò de kù cakú è tonà: Waàbídɔhì nɛ́na! Wodà nɛ bɛkáà cɔ̀ku nɛ kó tṵṵ̀na-kú é fḭ́tá-nà Weèdi sídàma mɛ̀mà pení-ma-ní mɛhɛká? ⁸ Nɛ́ m'pa̰kú pa̰á̰ma mɛ̀mà bɛkú-ma è yɔ̀ nɛ fòùmu pentà! Nɛ dá m'maàhu nɛ yàma mɛhɛká è tonà: Àbààhám̀-dà yòǹ ti yàdo. N nɛ cakú-ma, Weèdi kó nɛɛ́ kpáhìna-á-ma yè tá̰à̰kà mɛnkà kà ká hḭn Àbààhám̀ yaàbíiká. ⁹ Pɛ̰tá yɔ̀ɔ yòupú-dà è kó cédá tená nɛ cɛ̰̀ǹci pesá. Tepú mɛ̀mù pú pɛhí-pu wɛǹni tebíisuuká, pà kó mù cédá-ma é mù ká̰ńtá ha̰mú mɛhɛká!

¹⁰ Ye wɔ̀ni, kà nìku dɔ́ɔ́di òò békú è toò: Ti há̰ yònà é pa̰á̰ m̀mɔ́ya̰-dà?

¹¹ K'ó pà tɛ̰́ná è yɔ̀: Kà nìdo káá tóhòka kàdɛ́ɛ́ nɛ mɛhɛkà, k'ó pa̰a̰ nìcɔ̰́ mɛ̀ǹǹ pú káá-ko. Kà mɛ̀ǹǹ mɛ̀ɛ káá-ko dimá, k'ó mà totá nà mɛ̀ǹǹ kɔ́ɔ́-ko.

¹² Kà kaàcáhàpa mɛ̀ɛ té tɛ̀ni Ìsá̰à̰ pesá è kpɛ̀i ó pà cóńtá, kà pá tɛ̀ni óò béka è yɔ̀: Dakpɛ̰́ǹn, ntɛ́ ti yònà é hḭmà-dà?

¹³ K'ó pà tɛ̰́ná è yɔ̀: Nɛ té dá ta̰ǹta tìkéè dífa k'yé ha̰tá pà hḭ́n nɛ́ ta̰ǹta-fá.

¹⁴ Kà sósìpa mɛ̀ɛ t'óò béka è yɔ̀: Tḭ́ńti tá, ntɛ́ ti yònà é hḭmà? K'ó pà tɛ̰́ná è yɔ̀: Nɛ dá ta̰ǹta òcɔ̰́ǹ kú dífa nà nɔɔ̀ti, nɛ mɛ̀ɛ dá pṵ́á̰ òcɔ̰́ǹ wɛmá, àmá nɛ́ n'sà-nà nɛ tɔmú dífa cɔ̰́ɔ̰̀di.

¹⁵ Nìpa mɛ̀m̀pà de yè péé-pa de ceí-ma è dań è kó dɛ́há mìyà̰ kó pa̰á̰-sa. Kà pà màhu pa yàma mɛhɛká è tonà: Ìsá̰à̰ pú kó n'yòǹ Kídísì? ¹⁶ Ò bantà-ma mɛma, k'ó pà caka pa wɛǹni è yɔ̀: Mmí, n nɛ cómù nà nɛ́ɛmá-dà. Àmá òcɔ̰́ǹ pení è n kpenì-nà dɛ́dɛ́í, bá n pú sàà-nà n kó dákádá-ma o nɛ̀ùti nawɔ̰̀ǹci. Mɛnn, ò kó tɛ̀ni é nɛ cóńtá nà Weèdi Sèdi-dà nà ha̰mú. ¹⁷ Ò kó n'yònà nìdo mɛ̀ǹǹ púsí-ko-dà náḿbíisá yɛkú mɛhɛká è kó cudí é baàta yɔ̀ka nà yoòbɔtí. Ye kú dàhàka, k'ó taàa yoòbíimá o bɔdí mɛhɛká, ye wɔ̀ni é tíká yoǹti é tì tɔ̀n ha̰mú mɛ̀mù pú kó kpíí-pu daadí yènì. ¹⁸ Mɛmá-dà Ìsá̰à̰ de pà cakú-ma Weèdi wɛnaamá, è pà teǹ sàma è yɔ̀ pá mà teha. ¹⁹ Há̰kà, ò de kɛ̰̀ḭ-nà-á-ma wódo Hèdótì, n'ɔ̀ɔ̀ de ta̰ntà-ma o kúcàa Fìdípù poòo Hèdòdíyátì é kádá, nà kpákpààma tɔɔ̀ma ò de pa̰à̰-ma. ²⁰ Mɛmá-dà, k'ó dɔ̀hà éè níí-ní é héé kà pá cɛ̰ɛ̰́ Ìsá̰à̰ óò yɛ̰̀ḭ kódedí.

Sèsíì cóńtáma

Dentá Màtíyéè 3.13-17; Mádíkì 1.9-11

²¹ Kà pá nɛɛ́ yɛ̰̀ḭ Ìsá̰à̰ kódedí, nìpa mɛ̀m̀pà d'eè péé-pa wɛǹni de héè-é-ma k'ó pà cóńtá, è mɛ̀ɛ té cóńtá-nà Sèsíì. Òò cóńtà-ma é yɔ̀a, k'ó n'cɔɔ̀hu Weèdi, kà hḭ́ǹka é kpetá. ²² Kà Weèdi Sèdi é cútá-ní o hḭ́ǹka è yònà pàǹdɔ̀di, kà Weèdi é wɛɛ́-ní nà hḭ́ǹka è yɔ̀: A yòǹ n bíidɔ́kàta-dà n ta̰kadà-ta kà n yàma wɛǹni péé ta hḭ́ǹka.

Sèsíì yààpa yèka.

Dentá Màtíyéè 1.1-17

²³ Sèsíì de kó n'kó cetá-ma o tɔmú è káá beeká púta̰a̰ kpɛ́ɛmá-dà. Nìpa de maàhu è tonà o báàa-dà héé Sòsɛ́fù, kà Sòsɛ́fù kú báàa héé Hèdíì. ²⁴ Hèdíì báàa-dà de héé Màtátì, kà Màtátì báàa héé Dèfí, kà Dèfí báàa héé Mɛ̀dìkíì, kà Mɛ̀dìkíì báàa héé Yànàyíì, kà Yànàyíì kú báàa héé Sòsɛ́fù, ²⁵ kà Sòsɛ́fù báàa héé Màtàtíyásì, kà Màtàtíyásì báàa héé Àmɔ́sì, kà Àmɔ́sì báàa héé Nàúm̀, kà Nàúm̀ báàa héé Hɛ̀sìdíì, kà Hɛ̀sìdíì kú báàa héé Nàkàyíì, ²⁶ kà Nàkàyíì báàa héé Màátì, kà Màátì báàa héé Màtàtíyásì, kà Màtàtíyásì báàa héé Sèmɛ̀yíǹ, kà Sèmɛ̀yíǹ báàa héé Yòsɛ́sì, kà Yòsɛ́sì kú báàa héé Yòdáà, ²⁷ kà Yòdáà báàa héé Yòànáǹ, kà Yòànáǹ báàa héé Hèdèsáà, kà Hèdèsáà báàa héé Sòdòbàbɛ́dì, kà Sòdòbàbɛ́dì báàa héé Sàdàtìɛ́dì, kà Sàdàtìɛ́dì kú báàa héé Nɛ̀díì, ²⁸ kà Nɛ̀díì báàa héé Mɛ̀dìkíì, kà Mɛ̀dìkíì báàa héé Àdíì, kà Àdíì báàa héé Kòsám̀, kà Kòsám̀ báàa héé Ɛ̀dìmàdám̀, kà Ɛ̀dìmàdám̀ kú báàa héé Ɛ́dì, ²⁹ kà Ɛ́dì báàa héé Sèsíì, kà Sèsíì báàa héé Èdìyèsɛ́ɛ̀, kà Èdìyèsɛ́ɛ̀ báàa héé Yòdím̀, kà Yòdím̀ báàa héé Màtátì, kà Màtátì kú báàa héé Dèfí, ³⁰ kà Dèfí báàa héé Sìmɛ̀ɔ́ɔ̀, kà Sìmɛ̀ɔ́ɔ̀ báàa héé Sùdáà, kà Sùdáà báàa héé Sòsɛ́fù, kà Sòsɛ́fù báàa héé Yònám̀, kà Yònám̀ kú báàa héé Èdìyàkím̀, ³¹ kà Èdìyàkím̀ báàa héé Mɛ̀dèyáà, kà Mɛ̀dèyáà báàa héé Mɛ̀náà, kà Mɛ̀náà báàa héé Màtàtáà, kà Màtàtáà báàa héé Nàtá̰à̰, kà Nàtá̰à̰ kú báàa héé Dàfítì, ³² kà Dàfítì báàa héé Ìsàyíì, kà Ìsàyíì báàa héé Òbɛ́dì, kà Òbɛ́dì báàa héé Bòásì, kà Bòásì báàa héé Sàdáà, kà Sàdáà kú báàa héé Nààsóǹ, ³³ kà Nààsóǹ báàa héé Àmìnàdábù, kà Àmìnàdábù báàa héé Àdìmíǹ, kà Àdìmíǹ báàa héé Àdìníì, kà Àdìníì báàa héé Hɛ̀sìdóm̀, kà Hɛ̀sìdóm̀ báàa héé Fàdɛ́sì, kà Fàdɛ́sì kú báàa héé Sùdáà, ³⁴ kà Sùdáà báàa héé Sàkɔ́pù, kà Sàkɔ́pù báàa héé Ìsáákì, kà Ìsáákì báàa héé Àbààhám̀, kà Àbààhám̀ báàa héé Tèdáà, kà Tèdáà kú báàa héé Nàhɔ́ɔ̀, ³⁵ kà Nàhɔ́ɔ̀ báàa héé Sèdúkì, kà Sèdúkì báàa héé Hèdèúù, kà Hèdèúù báàa héé Pèdɛ́kì, kà Pèdɛ́kì báàa héé Hèbɛ́ɛ̀, kà Hèbɛ́ɛ̀ kú báàa héé Sèdáà, ³⁶ kà Sèdáà báàa héé Kàyìnám̀, kà Kàyìnám̀ báàa héé Àfàkìsádì, kà Àfàkìsádì báàa héé Sɛ́m̀, kà Sɛ́m̀ báàa héé Nɔ̀wéè, kà Nɔ̀wéè kú báàa héé Dèmɛ́kì, ³⁷ kà Dèmɛ́kì báàa héé Màtùsàdɛ́m̀, kà Màtùsàdɛ́m̀ báàa héé Hènɔ́kì, kà Hènɔ́kì báàa héé Yèdɛ́tì, kà Yèdɛ́tì báàa héé Màdèdèyɛ́dì, kà Màdèdèyɛ́dì kú báàa héé Kènám̀, ³⁸ kà Kènám̀ báàa héé Hènɔ́sì, kà Hènɔ́sì báàa héé Sɛ́tì, kà Sɛ́tì báàa héé Àdám̀, kà Àdám̀ kú báàa héé Weèdi.