Dúkì 2

Sèsíì pɛdáma

Dentá Mádíkì 1.18-25

¹ Ye kú wɔ̀ni^a mɛhɛká-dà, Hɔ̀dɔ́m̀ wóosào Òkúsì de denà-ma-ní nùdi è yɔ̀ p'óò kàn o teǹka nìku wɛǹni. ² Ye kú kàǹkàmù cecemù de pa̰kú, kà Kìdìnìísì-dà yòǹ Sìdíì teǹka yìkàǹyìdo. ³ Ye wɔ̀ni, kà nìpa wɛǹni é yídá è tóǹ è kṵǹ bá mɛ̀ǹǹ dɛ̀ɛ̀-ko o yɔtí mɛhɛká kà pà k'óò kàn. ⁴ Kà Sòsɛ́fù mɛ̀ɛ té yídá yɔtí pà toò-ti Nàsàdɛ́tì, kà tì péé Kàdìdéè tempáàku mɛhɛká, é póńtá Bɛ̀tìdɛ̀ɛ́m̀ yɔtí pà pɛdà-ti wódo Dàfítì, kà tì péé Sùdéè tempáàku mɛhɛká. Mɛnn de yòǹ Dàfítì yaàbíidí-dà. ⁵ Ò de kɛ̰hɛdi è nɔɔ̀-nà o pocɛ̰ǹni Màdíì-dà, kà nì póń, kà pà kó taá pà kàn. ⁶ Pà de tɛ̀i è péé Bɛ̀tìdɛ̀ɛ́m̀-dà, kà Màdíì pɛdá daadí é tɛ̀i. ⁷ K'ó pɛdá o pɔ̀ɔ, óò pɔ̰á̰ kùdáàpu^b, óò dɔá nɔtí cadidí mɛhɛká, mìì tee-sá, pà de tɛ̀i pà pú dɛ́tà bòdi cà̰m̀ma báákú-sa.

Weèdi tɔntɔndikó fodà hɔ̰ɔ̰̀cɛ̰má

⁸ Ye bɛ̀m̀bɛ̀ni ni cɔ̰́ɔ̰̀di hḭ́ǹka, è hɔ̰́tà hɔ̰ɔ̰̀cɛ̰má-dà péé è wenti yèǹka yɛ̀ka mɛhɛká, è cɛ̰nti pa hɔ̰ɔ̰̀kàapá. ⁹ Kà Weèdi tɔntɔndikó é pà fodá, kà Bateó wenkú é pà cḭ̀na, kà wandafɔ̰̀sàdi é pà cɛ̰ɛ̰́. ¹⁰ Àmá k'yèe Weèdi tɔntɔndikó é pà caka è yɔ̀: Nɛ dá n'wani. N nɛ toó-ní wɛnaamá-dà, mɛ̀mà kó nakàna-má sàma Ìsìdàyɛ́dì nìku wɛǹni yàma. ¹¹ Yenì kpɛ́ɛ́dì, Dàfítì yɔtí mɛhɛká pà nɛ pɛdà Fḭ́hìnɔ, mɛnń-dà Teó *Kídísì^c. ¹² Ǹtɛ yḭdó mɛ̀ǹǹ kó n'tee-kó kà n'ɔ́ɔ̀ bantá: Nɛ kó taá é dɛ́há bíipàǹdàda-dà kà tà pɔ̰ṵ́ kùdáàpu è dɔɔ́ nɔtí cadidí mɛhɛká.

¹³ Ye pesá n'ɛ̀ɛ pesá, kà Weèdi tɔntɔndipá tɔɔ̀pa naací dɔ́ɔ́di é cútá-nà-ní hḭ́ǹka é hɔ̰́tá-ní ye cecedó, é tɛ̀ni kà pà dùǹti Weèdi è tonà: ¹⁴ Wɛkànamá é m'péé-nà Weèdi hḭ́ǹka sàka mɛhɛká, kà ni wɛ̀ɛ̀di é m'péé-nà nìpa nì dɔ́sí-pa teǹka hḭ́ǹka. ¹⁵ Weèdi tɔntɔndipá tón tḭ́ń wɔ̀ni hḭ́ńkà bɛ́ka, kà hɔ̰ɔ̰̀cɛ̰má é caka pa tɔɔ̀pa è yɔ̀: Héé-nà kà tí taá háá Bɛ̀tìdɛ̀ɛ́m̀ é tɛ̀i dɛ́há mìì pa̰à̰-sa kà Bateó éè ti caka nà ni tɔntɔndikó nùdi.

¹⁶ Kà pá cemá é yídá é ka̰há fen-fem̀ma é tɛ̀i é dɛ́há Màdíì nà Sòsɛ́fù n'ɛ̀ɛ bíipàǹdàda kà tà dɔɔ́ nɔtí cadidí mɛhɛká. ¹⁷ Pà tà dɛ́hà tḭ́ń wɔ̀ni, kà pá tɛ̰́ń-tɛ̰́ná Weèdi tɔntɔndikó de pà hḭ́mpú wɛǹni ye bíipàǹtà hḭ́ǹka. ¹⁸ K'yé dii mɛ̀m̀pà kú wɛnnì de yeèkaà-pa k'yèe hɔ̰ɔ̰̀cɛ̰má wɛì. ¹⁹ Kà Màdíì mɛnn mà tàànì o yàma mɛhɛká è té m'maàhu ma hḭ́ǹka. ²⁰ Ye kú dàhàka, k'yèe hɔ̰ɔ̰̀cɛ̰má é fitá é n'kṵnti è dùǹti-ho Weèdi, è nì fa̰ntí nà pà de yeèkaà-sa wɛǹni é tṵ́má éè dɛ́há, k'yé pa̰ná é n'yònà Weèdi tɔntɔndikó de yè pà cakáàma.

Sèsíì bɛkàma Weèdi hɔ̰́ɔ̰̀ta mɛhɛká

²¹ Bíitá daa-niì daadí, daadí pà yònà é tà ca̰ntá-di, kà pá tà ca̰ntá, é tà yíí è yɔ̀ Sèsíì, yèdi Weèdi tɔntɔndikó de hḭ́n pá tà pa̰a̰-dí kà pà mum pú tà póń.

²² É yídá, kà poyɔ̰ɔ̰̀do yɛ̀ɛ̀ma daadí é tɛ̀i, k'yé m'békú Sòsɛ́fù nà Màdí é pa̰ná kákamú Mɔ̀yísì kpɛ̰́ńtìnùka de békú-mu poyɔ̰ɔ̰̀do wɛǹni. Kà pá tɛɛ̀ní bíitá Sèdìsàdɛ́m̀, è kó tà bɛka Bateó. ²³ Kà pá mà hḭn, mìì tee-sá, Bateó kpɛ̰́ńtìnùka mɛhɛká, pà wà̰tà è yɔ̀: Pɔ̀ɔ wɛǹni k'ó n'yòǹ Bateó kóoó^d-dà. ²⁴ Kà pá tɛ̀ni é kɔ̰́ɔ̰́ dɔ̀hɔ̀di yaǹn, Weèdi kpɛ̰́ńtìnùka de békú-sa poyɔ̰ɔ̰̀do wekànamá. Kà de békú pá kɔ̰́ɔ̰́ nàńkpehí hìdɛ́ɛ́-dà yoo pàǹdɔ̀pàka kàdɛ́ɛ́.

²⁵ Nìdo òcɔ̰́ǹ-dà há̰ de péé Sèdìsàdɛ́m̀ mɛhɛká kà p'òò toò Sìmɛ̀ɔ́ɔ̀. Ò de yòǹ nìi mɔ́nń-dà, è coó Weèdi yìhìka, è nì tṵ̀n dɛ́dɛ́í. Ò de ceí mɛ̀ǹǹ kó tɛ̀ni é fḭ́hìna-kó-dà Ìsìdàyɛ́dì nìku. Weèdi Sèdi-dà d'oò péé-nà. ²⁶ Mɛní-dà mɛ̀ɛ d'oò cakáà è yɔ̀ ò pú kó kpíí è pú dɛ́hà Fḭ́hìnɔ Bateó kó tɔn-kó-ní. ²⁷ Kà n'ɔ́ɔ̀ túdí-ní k'ó tɛ̀ni Weèdi hɔ̰́ɔ̰̀ta mɛhɛká. Yè há̰ de hɔ̰́tà Sèsíì báàpa-dà òò tɛɛ̀-ní è kó pa̰á̰ Weèdi kpɛ̰́ńtìnùka de békú-sa o kpɛ́mú. ²⁸ Kà pá tɛɛ̀-ní bíitá, k'ó tà tà̰ǹta o nɔ̀hi mɛhɛká é sɛda Weèdi è yɔ̀:

²⁹ N Bateù, a pa̰à̰-á̰-ma a de n hḭ́nà nùdi è yɔ̀ a kó pa̰á̰-sa.

Sá̰mà, a kó nɛɛ́ n héé-ma mmí a deho

ká n kpíí wɛ̀ɛ̀di mɛhɛká.

³⁰ N nɔ̀ǹfa dɛ́hà-á-ma dɛ́dɛ́í Fḭ́hìnɔ,

³¹ a pa̰à̰-ko sɔ̀do

óò kɔ̰́ɔ̰́-ní nìku wɛǹni fḭ́hìnamá kpɛ́mú.

³² Ò yòǹ wenkú-dà

mɛ̀ǹkù kó n'tee-kú kà nìku boocí áa yá̰dá.

Ò mɛ̀ɛ kó tṵ́má kɔ̰́ɔ̰́-ma wɛhimú a nìku, Ìsìdàyɛ́dìpa.

³³ K'yé dii bíitá báàa nà ta màa nà Sìmɛ̀ɔ́ɔ̀ de wɛì-sa ta hḭ́ǹka. ³⁴ Kà Sìmɛ̀ɔ́ɔ̀ é pà kóná, é yɔ̀ɔ é caka Màdíì, Sèsíì màa è yɔ̀: Weèdi ta̰kadà ye bíítà mɛntà é tà tɔn-ní kà tà kó héé kà nìpa dɔ́ɔ́di-dà é dɔdi, kà tɔɔ̀pa é yídá Ìsìdàyɛ́dì nìku mɛhɛká. Tà kó n'yòǹ Weèdi *yḭdó-dà nìpa dɔ́ɔ́di kó yeda-kó. ³⁵ Tà kó fohìna-á-ma nìpa dɔ́ɔ́di yam̀màhàka mɛ̀ǹkà sɔ̀ɔ-ká pa yàma mɛhɛká. Àmá fɔ̰́ń Màdí, ye kú pa̰á̰mà dɔnkú kó yá̰dá pɔ́dá-ma a yàma é n'yònà p'àà kpɛ̰́ḭ́-ma sepɛ̰ɛ̰̀dí.

Weèdi wɛtɛ̰́náko, Ánì tɔnì Weèdi

³⁶ Poòo òcɔ̰́ǹ-dà mɛ̀ɛ té de péé Sèdìsàdɛ́m̀ mɛhɛká è yòǹ Weèdi wɛtɛ̰́náko, kà p'òò toò Ánì, k'ò yòǹ Fànùyɛ́dì bíitá. Ye Fànùyɛ́dì de yòǹ Àsɛ́ɛ̀ nahàku kóoó-dà. Ánì de kpɛ̰́ń-ma sàma. Ò de tódà o dɔɔ̀o o sepàǹku wɔ̀ni, kà pá n'káá beé kàyehì-dà, k'òo dɔɔ̀o é kpíí. ³⁷ K'ó hḭn kpíipoòku ò koò pú tódà dɔɔ̀o, hádí é kpɛ̰́ń é n'káá beeká púniì nà kànàhì. Ò de pú yɛɛ̀hu Weèdi hɔ̰́ɔ̰̀ta mɛhɛká. Ò de púsí Weèdi tɔmú-dà yèǹka nà wèǹku, è boonì nùdi, è dɔń Weèdi. ³⁸ K'ó hɛ́tá-ho ye wɔ̀ni ni cɔ̰́ɔ̰̀di mɛhɛká, Sèsíì báàpa pesá. K'ó tɛ̀i è dùǹti Weèdi è cakú ye bíitá wɛmá, nìpa mɛ̀m̀pà de ceí-pa è yɔ̀ Weèdi é tɛ̀ni é fḭ́hìna Sèdìsàdɛ́m̀ nìku.

³⁹ Sèsíì báàa n'ɔ̀ɔ màa yɔ̀a tḭ́ń daadí Weèdi kpɛ̰́ńtìnùka de pà békú-sa wɛǹni, kà p'óò tódá kà pá tón é kòǹ Nàsàdɛ́tì pa yɔtí, Kàdìdéè tempáàku mɛhɛká. ⁴⁰ Kà bíitá é n'kpɛ̰́ǹ-ní, è pa̰kú kpeèti, kà yaǹfòùma tà sṵ́nà, kà Weèdi pa̰á̰suumá tà péé-nà.

Sèsíì bempíìdɛ́ɛ̀di, k'ó taá Weèdi hɔ̰́ɔ̰̀ta mɛhɛká

⁴¹ Beeká wɛǹni, Sèsíì báàpa de tahú-ma Sèdìsàdɛ́m̀ yɔtí, núǹtiyɛ̀ɛ̀ma kúúdi dipú. ⁴² Sèsíì káá tḭ́ń benní beeká píta nà kàdɛ́ɛ́, k'òo báàpa é n'kɔ́dí ye kúúdi dipú Sèdìsàdɛ́m̀, pà hɔ̰mpú beeká wɛǹni, òò nɔɔ̀-nà. ⁴³ Ye kúúdi wiìda daadí, k'òo báàpa é n'tóńti è kṵnti-ní, k'ó cá̰ńtá Sèdìsàdɛ́m̀ mɛhɛká, o báàpa pú yá̰á̰. ⁴⁴ Pà de maàhu è tonà ò nɔɔ̀-nà pa kpɛ́ɛpá tɔɔ̀pa-dà nà mɛ̀m̀pà pà de pɛ́ɛ̀ kṵnti-pá-ní. Kà pá cèn weǹtṵ́nní nìcɔ̰́, é nɛɛ́ cetá o pɛhàpu pa hɔ̰́ɔ̰́tà kpɛ́ɛpá pesá nà pa dóòpa pesá. ⁴⁵ Àmá, pà de p'óò dɛ́tà. Ye wɔ̀ni, kà pá fidí é tón Sèdìsàdɛ́m̀ òò pɛhɛ̀ǹta. ⁴⁶ Data̰á̰di daadí, kà pá taá ò dɛ́tá Weèdi hɔ̰́ɔ̰̀ta mɛhɛká, k'ò kàdi Weèdi kpɛ̰́ńtìnùka biɔhànapá cɔhɔ̀ka è pà besí, è pà békú wɛmá. ⁴⁷ Mɛ̀m̀pà kú wɛnnì de you-pá ò wɛì-sa, k'yé pà dii nà yam̀màhàsàdi ò de káá-di, nà tɛ̰́náma ò de tɛ̰́nì-ma. ⁴⁸ O báàpa ò dɛ́hà tḭ́ń wɔ̀ni, k'yé pà dii dɛ́dɛ́í, k'òo màa óò béka è yɔ̀: N bidà, badà tee k'á ti pa̰á̰ ye kú pa̰á̰mà-ní? Nà ndadí-dà kà t'aa pɛnti mmí n'àa báàa ti p'áa dɛ́hà, kà ti bɔ̀ti pudì.

⁴⁹ K'ó pà tɛ̰́ná è yɔ̀: Badà tee kà nɛ n pɛnti? Nɛ pú yá̰á̰ è yɔ̀ n yònà é wɛ̰ǹta n báà tɔmú-dà? ⁵⁰ Àmá, o báàpa de pú bantà ò de kpɛ̀i é n'yɔ̀pu.

⁵¹ K'ó yídá é pà tṵ̀na kà pá tón é kòǹ Nàsàdɛ́tì. Ò de pà you-nà toòka-dà. K'òo màa mɛnn taanì o piidí mɛhɛká, mìì kú wɛnnì de pa̰kú-sa. ⁵² Kà Sèsíì é n'kpɛ̰́ǹ-ní, k'òo yaǹfòùma hɔ́ù, k'ò tṵ́mà káá yuudí Weèdi pesá nà nìpa pesá.