Dúkì 13

Kà nìpa pú pentà fòùmu, pà kó kpíí-ma.

¹ Ye kú wɔ̀ni, kà nìpa pàcɔ̰́pà é tɛ̀ni é caka Sèsíì Kàdìdéè yam̀ma wɛmá, Pìdátì de héè kà pá kɔ̀ù-pa kà pà pa̰kú Weèdi dɔ̀hàka, kà pa hḭ̀ma é wudí é múná-nà pa dɔ̀hàka nɔtí kpɛ́ɛmá. ² K'ó pà tɛ̰́ná è yɔ̀: Nɛ maàhu è tonà ye Kàdìdéè yammà pà kɔ̀ù-pà, pa kú sḭ̀ḭ̀ma-dà ha̰tà Kàdìdéè tɔɔ̀pa wɛǹni kpɛ́ɛmá ye kú kpɛ́mú-dà tee kà miì é pà tɛ̀ni nkɛ́ɛ̀? ³ Á̰à̰! N há̰ nɛ cakú-ma: Kà nɛ pú pentà fòùmu, nɛ mɛ̀ɛ té kó kpíí-ma nɛ wɛnnì é n'yònà mɛmpá. ⁴ Nɛ́ deǹta nìpa píì-pànìì Sìdòwéè^a hɔ̰́ɔ̰dìdìkàta sàta de dɔɔ é kɔ̀ù-pa kú kpɛ́mú. Nɛ maàhu è tonà pa kú sḭ̀ḭ̀ma-dà de ha̰tà Sèdìsàdɛ́m̀ nìpa tɔɔ̀pa mɛ̀m̀pà de sɔ̰́ńtà-pà wɛǹni kpɛ́ɛmá? ⁵ Á̰à̰! Há̰kà, n nɛ cakú-ma: Kà nɛ pú pentà fòùmu, nɛ mɛ̀ɛ té kó kpíí-ma nɛ wɛnnì é n'yònà mɛmpá.

Wɛbemú yohènamá nà ka̰nka̰mú mɛ̀mù pú pɛní-pu.

⁶ Kà Sèsíì é tṵ́má pà caka wɛbemú yohènamà mɛmà è yɔ̀: Nìdo òcɔ̰́ǹ-dà de káá ka̰nka̰mú o tená yoǹku mɛhɛká. K'ó tɛ̀ni daadí yènì è kpɛ̀i é tɔ̰̀hì mu bíiká, ò pú dɛ́tà yècḭ́ḭ̀. ⁷ K'ó caka o deho mɛ̀ǹǹ de dɔɔ̀hu-kó ye tená yoǹku è yɔ̀: Ǹtɛ benta̰a̰-dà mɛmà kà n kɔ́dì-ní tepù mɛmù kú bíiká tɔ̰̀hìpu, n pú dɛ́hù yècḭ́ḭ̀. Mù fìta-ho! Mù nɛ̀hi ye pesà baà kpɛ́mú-dà è pɛ́kánì teǹka? ⁸ K'yèe deho óò tɛ̰́ná è yɔ̀: Cetá mù héé-ho benì n dakpɛ̰́ǹn, ká n tɔ̰̀ṵ̀ é mù yéńtá é mù pa̰á̰ kùtìdi. ⁹ Mɛma, k'yè púdí fòùma mù kó pɛdá-ma. Kà mù pú pɛdà nà mɛma, k'á mù cédá ye wɔ̀ni.

Sèsíì kpekànà poòo òcɔ̰́ǹ Sùwífùpa damuhipàdi daadí.

¹⁰ Sùwífùpa damuhipàdi daadí nìcɔ̰́nì, kà Sèsíì é m'biɔhànì Weèdi wɛmá biɔhà-nàmɔ̀ni mɛhɛká. ¹¹ Kà poòo òcɔ̰́ǹ yè péé, kà seèkpákpààdi ò mɔkànà k'ò kú-kúdí è yɔ̀ɔ beeká píta nà kànìì, ò pú kó nɛɛ́ é yohòna o cɔ̰́ɔ̰̀di. ¹² Sèsíì ò dɛ́hà-ma, óò yíí óò caka è yɔ̀: N yṵṵ̀, a dɔnkú bókáà-á-ma.

¹³ K'ó cɔ̰ná o nɔ̀hi o hḭ́ǹka, ye pesá n'ɛ̀ɛ pesá, k'yèe poòo é yídá é nɛɛ̀hi cɔ́cɔ́ é duntà Weèdi. ¹⁴ Àmá, kà fɔ̰́ɔ̰́di é cɛ̰ɛ̰́ Weèdi wɛmá biɔhà-nàmɔ̀ni kpɛ̰́ǹn nà Sèsíì de kpekanà-ma ye poòo damuhipàdi daadí. K'ó tódá wɛmá é caka ye nìku mɛ̀ǹkù de péé-ku ye pesá è yɔ̀: Kàyeèho mɛhɛká, daàka yòǹ kàkɔ̀dì-dà nìdo yònà ó deha-ká. Nɛ té ya̰ní ka kú mɛhɛká kà pá nɛ kpekàna é hédá damuhipàdi.

¹⁵ Kà Teó óò tɛ̰́ná è yɔ̀: Yam̀pèǹtapà nɛ́na! Damuhipàdi daadí, nɛ mɛ̀ǹǹ dɛ̀ɛ̀-ko pú hɔ̰́ pḭ́tá o nàfa yoo o sa̰mmùǹta é taá éè nìa-a? ¹⁶ Ye pooò mɛnǹ yòǹ Àbààhám̀ yaàbíidí-dà. Nà Wɛɛ̀kupá wódo ò bowà-ma, bempíìniìdí-dà mɛmà. Yè de pú sànà n ò kpekàna damuhipàdi daadí-i? ¹⁷ Ò de wɛɛ̀-ma mɛma, kà fɛ̀ci é cɛ̰ɛ̰́ o kà̰à̰tɔ̀pa. Àmá, kà yaǹnaakú é sṵ́ná nìku mɛ̀ǹkù de péé-ku wɛǹni ye pesá nà pa̰á̰sàma ò de pa̰kú-ma kpɛ́mú.

Wɛbemú yohènamá nà kṵ̀ǹsɔ̰̀pu bíifá.

Dentá Màtíyéè 13.31-33; Mádíkì 4.30-32

¹⁸ Ye kú dàhàka, kà Sèsíì tṵ́mà yɔ̀: Weèdi wóòti yònà m̀mɔ́ńya̰-dà? N kó tì yòhèna nà badà? ¹⁹ Tì yònà kṵ̀ǹsɔ̰̀pu bíifá-dà, nìi tóò-fa é fà bɔdí o yoǹku mɛhɛká, kà fá yɛ̀ɛ̀, é kpɛ̰́ń é hḭn tesàpu, kà nɛ̀hi é tɛ̀ni é yɛ̰ná mu dɛ̀ɛcí hḭ́ǹka.

Wɛbemú yohènamá nà pɛ̰́ɛ̰̀ yòmu yíkànasá.

Dentá Màtíyéè 13.33

²⁰ Kà Sèsíì tṵ́mà yɔ̀: N kó yohèna nà badà Weèdi wóòti? ²¹ Tì yònà pɛ̰́ɛ̰̀ yòmu yíkànasá-dà, poòo òcɔ̰́ǹ tóò-sa é kɔkadá-nà yòmu sàma é pukàdà háá k'yèe yòmu wɛǹni é yó nɔdí.

Há̰ńnùfɛ̰́hidí

Dentá Màtíyéè 7.13-14, 21-23

²² Sèsíì de dèèku yɔtí-dà nà yɔbící è biɔhànì Weèdi wɛnaamá, è yòǹ Sèdìsàdɛ́m̀ bɛ́ka. ²³ K'òòcɔ̰́ǹ óò béka è yɔ̀: N dakpɛ̰́ǹn, nìpa cɛ̰́masí-dà Weèdi kó wáńtá fḭ́hìna-ma?

Kà Sèsíì é pà tɛ̰́ná è yɔ̀: ²⁴ Wɛ̰́ɛ̰́-nà é dúú nà há̰ńnùdi mɛ̀nì fɛ̰́hi-dí. N nɛ cakú-ma, nìpa dɔ́ɔ́di kó wáńtá pɛha-á-ma pà kó hḭmpú é nì dúú, p'àá bá nɛdá.

²⁵ Wɔ̀ni pení-ma-ní kà hɔ̰́ɔ̰̀ta yaǹn kó yídá é kpená o hɔ̰́ɔ̰̀ta cɔ̀di é dákáná. Ye wɔ̀ni, k'yé n'hɔ̰́tà nɛ káà péé-ní tapaàdi, kà nɛ́ tɛ̀ni é m'podì cɔ̀di è toò: Ti dakpɛ̰́ǹn, ti kpetá-ho. K'ó nɛ tɛ̰́ná è yɔ̀: N pú yá̰á̰ nɛ yɛɛ̀ni yà-ní. ²⁶ Ye wɔ̀ni-dà nɛ k'óò caka-ma è yɔ̀: Ti pɛ́ɛ̀ áa dii-nà-á-ma é pɛ́ɛ́ áa yà̰à̰-nà, k'á biɔhàna ti yɔtí cɔ̀ci mɛhɛká Weèdi wɛnaamá. ²⁷ K'ó tṵ́má nɛ tɛ̰́ná è yɔ̀: N pú yá̰á̰ nɛ yɛɛ̀ni-kà-ní. Ń nɛ mɔ́ńka n yìhìkà, nɛ́na mɛ̀m̀pà kú wɛnnì pa̰kú-pa kpákpààma. ²⁸ Ye pesá-dà nɛ kó toó-ma nɛ yuùka é hódí, é cécí nɛ há̰ḿbící nɛ kó dɛ́há tḭ́ń daadí Àbààhám̀, nà Ìsáákì, nà Sàkɔ́pù, nà Weèdi Wɛtɛ̰́nápa wɛǹni kà pà péé Weèdi wóòti mɛhɛká, kà p'àá héé nɛ́na tapaàdi. ²⁹ Nìpa kó wáńtá é yɛɛ̀ni-ma-ní hḭ́ǹka bɛ́ka, nà fɔ̰̀-bɛ́ka, nà pɛ̰̀pɛ̰̀-cúɛ́cúɛ̀di, nà pɛ̰̀pɛ̰̀-yúńyúùni é tɛ̀ni é kaàdi Weèdi wóòti mɛhɛká é dii kúúdi. ³⁰ Pàcɔ̰́ péé-dà è yòǹ dèǹdèm̀ma wɔ̀nì mɛnì è kó wáńtá hḭn cecepá, kà tɔɔ̀pa péé è yòǹ cecepá wɔ̀nì mɛnì è kó wáńtá hḭn dèǹdèm̀ma.

Sèdìsàdɛ́m̀ yam̀ma pú bekù Weèdi pà tɔǹ-pa-ní.

Dentá Màtíyéè 23.37-39

³¹ Ye wɔ̀ni, kà Fàdísìpa pàcɔ̰́ é hɛ́tá-ho Sèsíì óò caka è yɔ̀: Yíí miì é dɛ́há a kó yɛ̀ɛ̀-ka bɛ́ka. Hèdótì pɛnti ò kó hḭmpú-dà áa kɔ̀ù.

³² Kà Sèsíì é pà tɛ̰́ná è yɔ̀: Tɔɔ̀ta-nà é tɛ̀i caka Hèdótì, mɛnń mɛ̀ǹǹ kú yàma yònà-ko hòǹn kpɛ́ɛmá è yɔ̀ n yɔ̀: N bɔɔ̀hu yenì wɛɛ̀kupá-dà, è kpekànì mɔkàpa, kṵ́ńweǹni è kó mà hḭn, data̰á̰di daadí é dehà n tɔmú. ³³ Há̰kà, yè békú ń sɔ̰kadá-ma n cɔ̀ku yenì, nà ká̰ńweǹni, nà tɔɔ̀di è yá̰á̰, yè pú sà pá kɔ̀ù Weèdi wɛtɛ̰́náko yɔtí tɔɔ̀ti mɛhɛká k'yè pú yòǹ Sèdìsàdɛ́m̀.

³⁴ K'ò tṵ́mà yɔ̀: Sèdìsàdɛ́m̀ kpɛ́ɛpá-nà, Sèdìsàdɛ́m̀ kpɛ́ɛpá-nà! Nɛ́na mɛ̀m̀pà kɔ̀dì-pa Weèdi Wɛtɛ̰́nápa, kà nì nɛ tɔn-pá-ní kà nɛ té pà kɔ̀ù nà tá̰à̰ka! Cɛ̰má mà dɛɛ-dà n de kpɛ̀i-má é nɛ tíká k'yé yònà kóonitá hɔ̰́ tíkáma ta bíící ta fɛ̀ɛ̀ti mɛhɛká nɛ pú teháà? ³⁵ Ye kú kpɛ́mú, Weèdi nɛ héè-é-ma nɛ yɔtí nì koò pú kó tì n'cɛ̰̀ɛ̰. N nɛ cakú-ma: Nɛ koò pú kó n dɛ́há háá é n'sànà daadí nɛ kó n'yɔ̀-di: Weèdi kóná mɛ̀ǹǹ pení-ko-ní nà Bateó yèdi.