Dúkì 14

Sèsíì kpekànà mɔko òcɔ̰́ǹ Sùwífùpa damuhipàdi daadí.

¹ Sùwífùpa damuhipàdi nìcɔ̰́nì, kà pá yíí Sèsíì dikàdikú Fàdísìpa kpɛ̰́ǹn òcɔ̰́ǹ kú hɔ̰́ɔ̰̀ta, k'ó taá dúú è kó dii. Mɛ̀m̀pà de péé-pa ta mɛhɛká kà pa nɔ̀ǹfa cɔ̰mú o hḭ́ǹka. ² È hɔ̰́tà dɔɔ̀o òcɔ̰́ǹ péé o yìhìka è mɔn múukú. ³ Kà Sèsíì é tódá wɛmá é béka Weèdi kpɛ̰́ńtìnùka biɔhànapá nà Fàdísìpa è yɔ̀: Ti kpɛ̰́ńtìnùka ti pɛ̰ḭ-ḭ́-dà nùdi nkɛ́ɛ̀ kà pú ti pɛ̰ḭ è yɔ̀ tí kpekàna mɔko damuhipàdi? ⁴ Kà pá hḭn kúdúmú pà p'óò tɛ̰́ná màcɔ̰́mà. Ye wɔ̀ni, kà Sèsíì é pḭ́ń ye mɔko óò kpekàna, óò caka è yɔ̀ ó kòǹ. ⁵ Ye kú dàhàka, k'ó pà béka è yɔ̀: Kà n'ɔɔ̀cɔ̰́ǹ kú bíidatá yoo o nàfa dɔdi bíńdadá mɛhɛká, ò pú k'éè dèna fen-fem̀ma bá damuhipàdi daadí? ⁶ Kà pá hɛ̰ka pà k'óò tɛ̰́ná-ma ye wɛmá hḭ́ǹka.

Pà hɔ̰́ ta̰kadá-ma kààdi nà pà hɔ̰́ yíkamá dikàdikú.

⁷ Kà Sèsíì é cɔ́dí é n'hɔ̰́tà pà de yíí-pa ye dikàdikú, de ta̰kù kaàceceèka-dà. Ye wɔ̀ni, k'ó pà caka wɛbemú yohènamà mɛmà è yɔ̀: ⁸ Kà p'àà yíí potóóma dikàdikú, a dá taá é kaàdi kaàcecedí. K'yè púdí pà mɛ̀ɛ té yíí-ma tɔɔ̀ɔ òcɔ̰́ǹ ye dikàdikù k'òà wɛhi-nà. ⁹ Ye wɔ̀ni, mɛ̀ǹǹ nɛ yíí-ko nɛ dɛ́ɛ́kà k'ò dá tɛ̀ni è yɔ̀: Yídá ye kààdì kà mɛnǹ é kaàdi. Ye wɔ̀ni, fɛ̀ci-dà kó n'àà n'káá n'àa kó taá é kaàdi-má kaàdèǹdèni. ¹⁰ Àmá, kà p'àà yíí dikàdikú, k'á taá é kaàdi kaàdèǹdèni. Mɛma, mɛ̀ǹǹ àà yíí-ko kó tɛ̀ni tḭ́ń wɔ̀ni áa caka è yɔ̀: N dóopó, hɛ́tá-ní kaàcecehì pesà é kaàdi, yè kó n'yòǹ yṵkànamá-dà a kpɛ́mú nà mɛ̀m̀pà nɛ pɛ́ɛ̀ kàdi-pá wɛǹni yìhìka. ¹¹ Mɛ̀ǹǹ wɛnnì kó wɛkàna-kó o cɔ̰́ɔ̰̀di, pà k'óò yàkàda-á-ma, kà mɛ̀ǹǹ mɛ̀ɛ yakàda-kó o cɔ̰́ɔ̰̀di, pà k'óò wɛkàna-á-ma.

¹² Ye kú dàhàka, kà Sèsíì é caka mɛ̀ǹǹ ò yíí-ko dikàdikú è yɔ̀: K'à té pa̰à̰ dikàdikú wèǹku yoo yohokú è kó yíí nìpa, a dá yetá é yíí a dóòpa, a kúcàpa, a hɔ̰́ɔ̰́tà kpɛ́ɛpá, yoo a dentɔɔ̀pa mɛ̀m̀pà káá-pa è yá̰á̰ pà mɛ̀ɛ té kó wáńtá é nɛɛ́ áa yíí-ma áa bodá a wontà pà dià-sa. ¹³ Àmá, k'à té kó yíí nìpa dikàdikú, k'á yíí pɛ́íhí, nà hɔ̀ùhi, nà mɛ̀m̀pà cèǹtì-pa tàdi, nà yɔ̀m̀ma. ¹⁴ K'à pa̰à̰ miya̰, a kó n'yòǹ yaǹnaakú yaǹn-dà, è yá̰á̰ pà pú kó nɛɛ́ éè n'àà bodá daadí yènì. Weèdi-dà kó wáńtá éè n'àà bodá, mɛ̀m̀pà pa̰à̰-pa suumá kó yá̰ńtá tḭ́ń daadí.

Wɛbemú yohènamá dikàdikú hḭ́ǹka.

Dentá Màtíyéè 22.1-10

¹⁵ Mɛ̀m̀pà de pɛ́ɛ̀ yon-nà-pa Sèsíì, p'oòcɔ̰́ yeèkaà-ma mɛma, k'óò caka è yɔ̀: Wɛ̀ɛ̀di-dà kó péé-nà mɛ̀ǹǹ kó wáńtá dii-kó Weèdi wóòti mɛhɛká.

¹⁶ Kà Sèsíì óò tɛ̰́ná nà wɛbemú yohènamà mɛmà è yɔ̀: Nìd'oòcɔ̰́ǹ-dà de pa̰à̰ dikàdisàku, é yíí nìku dɔ́ɔ́di. ¹⁷ Dipú wɔ̀ni tɛ̀i-má, k'ó tɔn o dapàǹn è yɔ̀ ó taá é caka ò yíí-pa kú wɛǹni ye dikàdikú kà pá ya̰ní, dipú bii-í-ma. ¹⁸ Àmá, pa wɛǹni kà pá caka nùdi nìcɔ̰́ mìì pà kpaá-sa kà pà pú kó nɛɛ́ é taá. Kà cecedó é caka ye dapàǹn è yɔ̀: N dontà yɛ̀di-dà k'yè békú ń taá nì dentá. N pa̰á̰ káfádà, a dá n'tonà n yedáà. ¹⁹ Kà tɔɔ̀ɔ óò caka è yɔ̀: N dontà nɛ̀ci-dà dɔɔ̀má mànùm̀ è kɔ́dí ci bɛḿpu. N pa̰á̰ káfádà, a dá n'tonà n yedáà. ²⁰ Kà tɔɔ̀o mɛ̀ɛ té yɔ̀: N káà tóńkú-ho poòo-dà, mií tee kà n pú kó nɛɛ́ é taá. ²¹ K'yèe dapàǹn é tón o dakpɛ̰́ǹn pesá é tɛ̀i óò caka pà hḭ́mpú-ní wɛǹni. Ye wɔ̀ni, kà fɔ̰́di é cɛ̰ɛ̰́ ye hɔ̰́ɔ̰́tà dakpɛ̰́ǹn k'ó caka o dapàǹn è yɔ̀: Tɔɔ̀ta fen-fem̀ma yɔtí tíká-bɛ̀m̀bɛ̀ka pesá, nà ti cɔ̀ci mɛhɛká, é taá yíí-ní pɛ́íhí, nà hɔ̀ùhi, nà yɔ̀m̀ma nà mɛ̀m̀pà cèǹtì-pa tàdi. ²² K'yé tɔɔ̀hɛ-ní cɛ̰́ma, k'yèe dapàǹn é tóní é tɛ̀ni è yɔ̀: N dakpɛ̰́ǹn, n pa̰à̰-á̰-ma a hḭ́mpú, àmá kà kààka káà kadí. ²³ Ye wɔ̀ni, k'yèe dakpɛ̰́ǹn é caka o dapàǹn è yɔ̀: Tṵṵ̀na yɔbící cɔ̀ci, nà yoǹna nùka é kpahà-ní nìpa a kó peèta-nà-pa é pà dúù-ní n hɔ̰́ɔ̰́tà, k'yé teha kà tá sṵ́ná. ²⁴ N nɛ cakú-ma: Ye nìpà pà cedí é yíí-pà, p'oòcɔ̰́ǹ pú kó dɛmpa n dimá.

Nìi yònà é tṵṵ̀na-má kú bookú Sèsíì.

Dentá Màtíyéè 10.37-38

²⁵ Ye kú dàhàka, kà nìku dɔ́ɔ́di é n'nɔɔ̀-nà Sèsíì cà̰ǹku, k'ó fitá é pà caka è yɔ̀: ²⁶ Kà nìi kpɛ̀i é tɛ̀ni n pesá, ò pú kó nɛɛ́ é n'yòǹ n dapàǹn k'ò pú n dɔ́sí é ha̰tá o báàa, n'ɔ̀ɔ màa, n'ɔ̀ɔ poòo, n'ɔ̀ɔ bííhí n'ɔ̀ɔ kúcàpa, n'ɔ̀ɔ potɔ̰ɔ̰̀pa, é múńtá é pɛ́ɛ́-n'ɔ̀ɔ mɔ́-mɔ́nń kú fòùmu. ²⁷ Kà mɛ̀ǹǹ pú toó-ko o kpíidɔkú^a é n tṵṵ̀na, ò pú kó nɛɛ́ é n'yòǹ n dapàǹn. ²⁸ Kà n'ɔɔ̀cɔ̰́ǹ kpɛ̀i é madí hɔ̰́ɔ̰sàta, ò hɔ̰́ cetá é kaàdi-í-ma é cɔ́ɔ́ dífa yè k'óò dii-fá é dɛ́há k'ò káá dící sàma è kó nɛɛ́ é tà madí é tà yɔ̀ɔ. ²⁹ K'ò pú pa̰à̰ miya̰, ò kó nɛɛ́-ma é pṵ́dá ye hɔ̰́ɔ̰́tà w'àá bá tà kɔ̀ù. Ye wɔ̀ni, mɛ̀m̀pà kú wɛnnì kó dɛ́há-pa miya̰ k'óò n'dɛhikú-ma ³⁰ è tonà: Nìdò mɛnǹ cetà maápu-dà àá hɛ̰ka ò kó yɔ̀ɔ-má. ³¹ Nkɛ́ɛ̀ wódo woò kó n'káá ta̰nìpa tòhìka píta é n'kpɛ̀i é ta̰á̰-nà wóo tɔɔ̀ɔ mɛ̀ǹǹ káá-ko ta̰nìpa tòhìka púdɛ́ɛ́ è pú n'cedí é kaàdi é mahà é dɛ́há k'ò kó nɛɛ́ óò ta̰á̰-nà? ³² K'ò hɔ̰́tà ò pú kó nɛdá, ò hɔ̰́ tɔn tɔntɔndipá-dà ye wóo tɔɔ̀ɔ pesá k'ò káà péé-ní dɛùma, kà p'óò béka ò kpɛ̀i pá pa̰á̰-sa kà wɛ̀ɛ̀di é m'péé pa cɔhɔ̀ka. ³³ Yè yòm̀pu-dà, nɛ mɛhɛkà n'ɔɔ̀cɔ̰́ǹ pú kó nɛɛ́ é n'yòǹ n dapàǹn, k'ò pú héè ò káá-sa wɛǹni.

³⁴ Kà Sèsíì é tuɛ̀ha è yɔ̀: Kɔ́kɔ́mú yòǹ niìi suusá-dà. Kà m'àá fénà mu naakú, ti kó tṵ́má é mù nakàna nà ba? ³⁵ Mù koò pú hɔ̰́ n'sudi teǹka, mù mɛ̀ɛ koò pú hɔ̰́ teha kùtìdi. Pà hɔ̰́ mù hútá tapaàdi-dà. Kà mɛ̀ǹǹ káá-ko toùka è kó yekà, k'ó yekà.