Dúkì 10

Sèsíì tɔn dapàm̀ma púyehì nà pàdɛ́ɛ́.

Dentá Màtíyéè 9.37-38; 10.7-16; Mádíkì 6.8-11

¹ Ye kú dàhàka, kà Teó é ta̰kadá dapàm̀ma tɔɔ̀pa púyehì nà pàdɛ́ɛ́, é pà nihìna pàdɛ́ɛ́ pàdɛ́ɛ́ yɔtí mɛhɛká, nà o mɔ́nń de yònà é taá-sa wɛǹni. ² K'ó pà caka è yɔ̀. Dití mɛ̀ǹtì bii-tí wɛhi-í-ma sàma, kà ti kɔ̰ṵpá há̰ pú wɛhi. Sɛ́úka-nà ye kú kpɛ́mú yoǹku yaǹn k'ó tɔhìna-ní mɛ̀m̀pà kó tì kɔ̰ṵ-pá. ³ Ka̰há-nà! N nɛ tɔnti k'yè yònà n túdì-ma-dà hɔ̰ɔ̰̀bíiká càkomɔɔ̀ka cɔhàka. ⁴ Kà nɛ kɛ̰hɛdi, nɛ dá n'toó yècɛ̰́ɛ̰̀, k'yé n'yònà: Dífa, pɛ̀kedí yoo nɛ̀ùti. Nɛ mɛ̀ɛ té dá nɛɛ̀hi cɔ̀ku mɛhɛká é dɔa òcɔ̰́ǹ. ⁵ Kà nɛ té dúú-ta hɔ̰́ɔ̰̀ta mɛhɛká, kà nɛ́ té cedí é caka ta yam̀ma è yɔ̀: Wɛ̀ɛ̀di é nɛ m'péé-nà. ⁶ K'yè hɔ̰́tà nìi péé ta mɛhɛká è yòǹ wɛ̀ɛ̀di yaǹn, nɛ wɛ̀ɛ̀di k'óò m'péé-nà-á-ma. K'yè mɛ̀ɛ hɔ̰́tà wɛ̀ɛ̀di yaǹn yè kɔ́ɔ́, kà nɛ wɛ̀ɛ̀di é nɛ tón. ⁷ Nɛ́ bátá ye kú hɔ̰́ɔ̰́tà mɛhɛkà, é n'yon è yɔ̰̀ǹ ta yam̀ma kó nɛ kɔ̰́ɔ̰́-sa, mìì tee-sá tɔntɔǹn sà-nà o tɔntɔndití-dà. Nɛ dá n'centì è báákú hɔ̰́ɔ̰́hí wɛǹni. ⁸ Kà nɛ té dúú-ti yɔtí, kà ti yam̀ma nɛ codà, è nɛ kɔ̰́ɔ̰̀-sa wɛǹni, kà nɛ́ dii. ⁹ Nɛ́ kpekàna ti mɔkàpa, é caka ti yam̀ma è yɔ̀: Wɔ̀ni-dà tɔ́sí kà Weèdi kó wódí pa hḭ́ǹka. ¹⁰ Àmá, kà nɛ té dúú-ti yɔtí, kà ti yam̀ma pú nɛ codà, kà nɛ́ taá ti tíkáma bɛ̀m̀bɛ̀ka é tɛ̀i é pà caka pa wɛǹni è yɔ̀: ¹¹ Bá nɛ yɔtí tá̰pùdùmu mɛ̀mù dàdipú ti tàka, ti mù kpá̰hú nɛ kpɛ́mú^a. Há̰kà, nɛ́ n'yá̰á̰ è yɔ̀ wɔ̀ni Weèdi kó wódí-di nìpa hḭ́ǹka tɛ̀ni-í-ma-ní. ¹² N nɛ cakú-ma: Weèdi kó síi-nà tḭ́ń daadí nìpa, Sòdɔ́m̀^b yam̀ma kú toyɔ̰́ńti pú kó n'kpenì é ta̰ntá ye yɔtì kú kpɛ́ɛpá kpɛ́ɛtí.

Yɔtí mɛ̀ǹtì kú nìpa yedáà-pa è pú dań Sèsíì.

Dentá Màtíyéè 11.20-24

¹³ Kà Sèsíì tṵ́mà yɔ̀: Náńkú nɛ m'péé-nà nɛ́na Kòdàsínì^c yam̀ma nà Bɛ̀tìsàìdáà kpɛ́ɛpá, mìì tee-sá pɔ́ńtápa̰á̰ma mɛ̀mà pa̰à̰-ma nɛ yɔtí mɛhɛká, kà mà de pa̰à̰ Tíì nà Sìdónì mɛhɛká-dà, è yenì ti yam̀ma yèi píìka, é pukada tápémú é bɛka è yɔ̀ pà kpɛ̀i é peǹta fòùmu. ¹⁴ Mií-dà tee, Weèdi kó síi-nà tḭ́ń daadí nìpa, Tíì nà Sìdónì yam̀ma kú toyɔ̰́ḿma pú kó n'kpenì é ta̰ntá nɛ kpɛ́ɛmá. ¹⁵ Nɛ́na tá Kàpɛ̀nàúm̀ yam̀ma-nà! Nɛ maàhu è toò Weèdi kó nɛ yohòna-á-dà háá hḭ́ǹka? Fɔ́ú! Nì kó nɛ cúhìna-á-ma háá kpííku mɛhɛká. ¹⁶ K'ó tṵ́má é caka o dapàm̀ma è yɔ̀: Kà mɛ̀ǹǹ nɛ besí-ko, mmí-dà ò besí-ma, kà mɛ̀ǹǹ mɛ̀ɛ nɛ yeéè-ko, mmí-d'òò yeéè-ma. Kà mɛ̀ǹǹ mɛ̀ɛ n yeéè-ko, ò yeéè mɛ̀ǹǹ n tɔn-kó-dà-ní.

Ye Sèsíì dapàm̀ma púyehì nà pàdɛ́ɛ́ tón é koní

¹⁷ K'yé m'péé, k'yèe tɔntɔndipá púyehì nà pàdɛ́ɛ́ é tón é koní kà pa yàma nadi, é tɛ̀ni è yɔ̀: Ti Teù, kà ti yíí a yèdi bá wɛɛ̀kupá hɔ̰́ ti yekà-nà-á-ma toòka.

¹⁸ Kà Sèsíì é pà tɛ̰́ná è yɔ̀: N de wáń-ma Wɛɛ̀kupá wódo k'ò dɔɔ̀-ní nà hḭ́ǹka è yònà tayḭkàdakú. ¹⁹ Ǹtɛ, n nɛ kɔ̰́ɔ̰̀-ɔ̰́-ma nɔɔ̀ti è yɔ̀ nɛ́ nàa wàci nà nancí hḭ́ǹka, é pɔ́dá Kɔ̰ndìkàǹtɔ̀o nɔɔ̀ti wɛǹni, yècḭ́ḭ̀ mɛ̀ɛ pú kó nɛɛ́ nɛ pa̰á̰ sḭ̀ǹya̰ yècḭ́ḭ̀. ²⁰ Kà nɛ yàma nadi, mà dá n'nadi nà wɛɛ̀kupá nɛ yeèkaà-ma toòka cɔ̰́ɔ̰̀di, àmá má n'nadi nà Weèdi wa̰tà-ma kpɛ́mú nɛ yèka hḭ́ǹka mɛhɛká.

Sèsíì yaǹnaakú.

Dentá Màtíyéè 11.25-27; 13.16-17

²¹ Ye wɔ̀ni ni cɔ̰́ɔ̰̀di mɛhɛká, kà Weèdi Sèdi óò sṵ́ná yaǹnaakú k'ò yɔ̀: N Báà, fɔ̰́ń mɛ̀ǹǹ wóó-ko teǹka nà hḭ́ǹka, m'a sɛdáà n'àa bɛkáà-ma niìya̰ mìì sɔ̀ɔ-sá nìpa pà pú kɛɛ̀hi-pá, è há̰ yè sɔ̀na yaǹfòùma yam̀ma, nà yá̰á̰pa. Yè yòǹ mɛma n Báà, mìì tee-sá a dɔ́káà mɛmá-dà a yàma mɛhɛká.

²² N báàa n kɔ̰́ɔ̰̀-ɔ̰́-ma niìi wɛǹni. Òcɔ̰́ǹ pú yá̰á̰ Weèdi bíitá, k'yè pú yòǹ ta Báàa. Òcɔ̰́ǹ mɛ̀ɛ pú yá̰á̰ Báàa, k'yè pú yòǹ Weèdi bíitá nà tà kpɛ̀i óò bɛka-pá kà p'óò yá̰dá.

²³ K'ó fitá o dapàm̀ma bɛ́ka é pà caka pa cɔ̰́ɔ̰̀di è yɔ̀: Wɛ̀ɛ̀di-dà nɛ péé-nà nɛ́na mɛ̀m̀pà kú nɔ̀ǹci dɛ́hù-pa nɛ dɛ́hù-sà miì! ²⁴ N nɛ cakú-ma: Weèdi Wɛtɛ̰́nápa nà wóópa dɔ́ɔ́di de dɔ́káà-á-ma é n'dɛ́hà pa̰á̰sàmà nɛ dɛ́hù-mà wɔ̀nì mɛnì, àmá pà pú mà dɛ́hà, é dɔ́ka é yekà nɛ yeèku-sà wɔ̀nì mɛnì, pà p'éè yèkaà.

Wɛbemú yohènamá nà Sàmàdíì niìmɔ́nń hḭ́ǹka.

Dentá Màtíyéè 22.34-40; Mádíkì 12.28-34

²⁵ Kà Weèdi kpɛ̰́ńtìnùka biɔhànakó òcɔ̰́ǹ é n'kpɛ̀i é díhìna Sèsíì wɛmá, é yídá óò béka è yɔ̀: N dakpɛ̰́ǹn, ntɛ́ n kó hḭmà é dɛ́tá fòùmu mɛ̀mù pú kó yɔ̀ɔ-pú?

²⁶ K'óò tɛ̰́ná è yɔ̀: Pà wà̰haà Weèdi kpɛ̰́ńtìnùka è yɔ̀ ba? A hɔ̰́ kà kàn é yekà m̀mɔ́ma kú bodú-dà?

²⁷ K'ò yɔ̀: Pà wà̰haà è yɔ̀, á n'dɔ́sí Bateó a Weèdi n'àa yàma wɛǹni, n'àa sèdi wɛǹni, n'àa kpeèti wɛǹni, n'àa yam̀màhàdi wɛǹni, é yídá é n'dɔ́sí a tɔɔ̀o k'yé n'yònà a mɔ́nń.

²⁸ Kà sèsíì óò caka è yɔ̀: A nɛɛ̀-ɛ́-ma é tɛ̰́ná k'yè sà, taá é m'pa̰kú mɛma, a kó n'fòù-ú-ma.

²⁹ K'òá n'kpɛ̀i é kɔ̰́ɔ̰́ o cɔ̰́ɔ̰̀di naadí é béka Sèsíì è yɔ̀: Wodà héé n tɔɔ̀o?

³⁰ Kà Sèsíì óò tɛ̰́ná è yɔ̀: Dɔɔ̀o òcɔ̰́ǹ-dà de yíì-ní Sèdìsàdɛ́m̀ è sḭ́ńti Sèdìkóò, é tɛ̀i é dɔdi túùpa nɔ̀hi mɛhɛká. Kà p'óò cɛ̰ɛ̰́, é feèda ò toó-sa wɛǹni, óò podí tenten k'yé n'kɔ́ɔ́ cɛ̰́ma pà k'óò kɔ̀ù-ma, kà p'óò dɔɔ́-ho é ka̰há. ³¹ K'yé n'sà-nà kà dɔ̀hàdi yaǹn òcɔ̰́ǹ mɛ̀ɛ té tṵ̀n-ní ye cɔ̀ku. K'ó tɛ̀n'ɔ́ɔ̀ dɛ́há é nɛ́dí bɛ́ɛ́kú tɔkú é ka̰há. ³² Kà Dèfí yaàbíidí mɛ̀ɛ té n'tṵ̀n-ní é tɛ̀ni ye bɛ̀m̀bɛ̀ni, óò dɛ́há, é nɛ́dí bɛ́ɛ́kú tɔkú é ka̰há. ³³ Kà Sàmàdíì yaǹn^d òcɔ̰́ǹ há̰ n'kɛ̰hɛdi cà̰ǹku é yɛɛ̀ni ye cɔ̀ku, é tɛ̀ni ye pesá, óò dɛ́há kà séèma óò cɛ̰ɛ̰́ dɛ́dɛ́í. ³⁴ K'óò hɛ́tá-ho, é pɔ̀sì o mɔká, é kà pa̰á̰ kɔ̀ma nà dìfɛ̰́ɛ̰̀ é kà bowá. K'ó yíd'óò tódá óò cɔ̰ná o sa̰mmùǹta hḭ́ǹka, óò ka̰há-nà cà̰ma báákú-sa é tɛ̀i é dɔ̀h'óò wisí. ³⁵ K'yé weka, k'ó deèe-ní díimáàka kàdɛ́ɛ́ é kɔ̰́ɔ̰́ ye hɔ̰́ɔ̰̀ta kpɛ̰́ǹn óò caka è yɔ̀: Á púsí-ho ye dɔɔò nà nɔ̀hi hìdɛ́ɛ́! K'à dii dífa o hḭ́ǹka kà fà ka̰hànà mɛnfà, ká n tóní é fà n'àà bodá.

³⁶ Kà Sèsíì é béka ye Weèdi kpɛ̰́ńtìnùka biɔhànakó è yɔ̀: Ye nìpà pa ta̰a̰kà mɛhɛkà, a maàhu è tonà pa wodà héé ye túùpà poó-kò o tɔɔ̀o?

³⁷ K'óò tɛ̰́ná è yɔ̀: Mɛ̀ǹǹ ò kɔń-ko séèma óò teepa.

Ye wɔ̀ni, kà Sèsíì óò caka è yɔ̀: Ka̰há è mɛ̀ɛ té m'pa̰kú mɛma!

Màátì nà Màdíì codà Sèsíì pa hɔ̰́ɔ̰̀ta

³⁸ Kà Sèsíì n'ɔ̀ɔ dapàm̀ma é n'tɔdì pa cà̰ǹku, é ta̰ntá yɔbíisá yècɛ̰́ɛ̰̀, kà poòo òcɔ̰́ǹ óò codá o hɔ̰́ɔ̰̀ta mɛhɛká kà p'òò toò Màátì. ³⁹ Ye poòo de káá ya̰ǹn-dà kà p'òò toò Màdíì. K'yèe Màdíì é taá é kaàdi Sèsíì fɔ̰̀di è besí o wɛmá. ⁴⁰ Kà Màátì mɔ̀ù-nà cà̰ǹn dipú pɛhàpu. Kà tɔná óò sɛ̀da k'ó tɛ̀ni Sèsíì pesá è yɔ̀: N Teù, yè p'áa yòǹ màcɔ̰́mà nà n ya̰ǹn n hédà-ma kà n púsí tɔmú n cɔ̰́ɔ̰̀di nkɛ́ɛ̀? Ò caka k'ó tɛ̀ni é n tempanà.

⁴¹ Kà Teó óò tɛ̰́ná è yɔ̀: Màátì, a sɛ̰ɛ̰̀di niìi dɔ́ɔ́di hḭ́ǹka-dà è wékànì a cɔ̰́ɔ̰̀di. ⁴² Há̰kà, niìi yècɔ̰́-dà yòǹ suusá. Màdíì mɛnn ta̰kadà mìì suusá-dà dɛ́dɛ́í òcɔ̰́ǹ pú kó nɛɛ́ óò tà̰ǹta-sá daadí yènì.