Dúkì 9

Sèsíì tɔn o dapàm̀ma píì-pàdɛ́ɛ́

Dentá Màtíyéè 10.5-15; Mádíkì 6.7-13

¹ Daadí yènì, kà Sèsíì é tíká o tɔntɔndipá píì-pàdɛ́ɛ́ é pà kɔ̰́ɔ̰́ nɔɔ̀ti nà kpɛ̰́ǹti è yɔ̀ pá bɔhà wɛɛ̀kupá wɛǹni, é kpekàna mɔkàpa. ² Ye kú dàhàka, k'ó pà tɔn è yɔ̀ pá taá caka nìpa Weèdi wóòti wɛnaamá, é yíí é kpekàna-nà mɔkàpa. ³ K'ó pà caka è yɔ̀: Kà nɛ kɛ̰hɛdi, nɛ dá n'toó yècɛ̰́ɛ̰̀, k'yé n'yònà: Ya̰kú, pɛ̀kedí, dipú yoo dífa. N'ɔɔ̀cɔ̰́ǹ mɛ̀ɛ dá n'toó tókédi tɔɔ̀di. ⁴ Kà nɛ tɛ̀i-sá wɛǹni, kà nìi nɛ codà o hɔ̰́ɔ̰̀ta mɛhɛká, kà nɛ́ m'péé mɛnta háá é n'sà-nà nɛ kó yídá tḭ́ń daadí ye yɔtí é ka̰há páàku tɔkú. ⁵ Kà nɛ tɛ̀i-tí yɔtí wɛǹni, kà ti yam̀ma nɛ yedáà codápu, kà nɛ tì yɛ̀tì, kà nɛ́ kpá̰-kpá̰dá nɛ tàka tá̰pùdùmu^a, mìì bɛkú-sa ti yam̀ma è yɔ̀ pà pa̰à̰-sa pú coó.

⁶ K'yèe tɔntɔndipá é ka̰há páàti wɛǹni, è cèǹtì yɔtí nà yɔtí è cakú nìpa Weèdi wɛnaamá, è kpekànì mɔkàpa.

Hèdótì yam̀buupàma

Dentá Màtíyéè 14.1-12; Mádíkì 6.14-29

⁷ Kà wódo *Hèdótì é yekà kà pà wɛì Sèsíì n'ɔ̀ɔ dapàm̀ma de pa̰kú-sa wɛǹni. K'òo yàma é buupa, mìì tee-sá pàcɔ̰́ de toò: Ìsá̰-Bàtísì-dà yá̰ńtà-ní, ⁸ kà tɔɔ̀pa toò: Weèdi wɛtɛ̰́náko Èdíì-dà tṵ́mà tóní. Kà tɔɔ̀pa tṵ́mà toò: Dekáà wɔ̀ni Weèdi Wɛtɛ̰́nápa, p'oòcɔ̰́-dà yá̰ńtà-ní. ⁹ Kà Hèdótì yɔ̀: N mɔ́nń-dà hédà kà pá fiìta Ìsá̰à̰ yudí. Wodà há̰ dɛ́ɛ̀, n you kà pà wɛì-kò kú hḭ́ńkà è yɔ̀ ò pa̰kú niì miì kú wɛnnì? K'ó m'pɛnti è k'óò dɛ́há.

Sèsíì dià nìpa tòhìka kànùm̀.

Dentá Màtíyéè 14.13-21; Mádíkì 6.30-44 ; Ìsá̰à̰ 6.1-14

¹⁰ Kà Sèsíì tɔntɔndipá é tóní o pesá, é tɛ̀n'ɔ́ɔ̀ caka pà pa̰à̰-sa-ní wɛǹni. K'ó pà tóó kà pá ka̰há yɔtí pà toò-ti Bɛ̀tìsàìdáà bɛ́ka pa cɔ̰́ɔ̰̀di pesá. ¹¹ Àmá, kà nìku é bantá pà coà-ka bɛ́ka, é pà tṵ̀na. Kà kú tɛ̀i, k'ó kù codá é kù caka Weèdi wóòti wɛnaamá, é kpekàna mɛ̀m̀pà de kɔnti-nà-pa dɔncí.

¹² Wèǹku yɔɔ̀hu-má, k'yòo tɔntɔndipá píì-pàdɛ́ɛ́ óò hɛ́tá-ho óò caka è yɔ̀: Wihìna ye nìpà kà pá taá yɔtí mɛhɛká nà yɔbící mɛ̀ǹcì tì yéńtà-ci, é pɛha pà kó weń-sa nà pà kó dii-sá, è yá̰á̰ ti péé-sà miì nìì yè kɔ́ɔ́. ¹³ Kà Sèsíì é pà caka è yɔ̀: Nɛ mɔ́mpá é pà kɔ̰́ɔ̰́ kà pá dii! Kà p'óò tɛ̰́ná è yɔ̀: Ti káá pɛ̰́ɛ̰̀pa pànùm̀-dà nà num̀bííhí hìdɛ́ɛ́ sá̰à̰di. Ti kó taá é dontá-dà-ní é tɛ̀ni é diá ye nìkù kù sá̰pù?

¹⁴ Ye nìku mɛhɛká há̰kà, niìdaapá de yɔ̀ɔ-ɔ́-ma tòhìka kànùm̀. Kà Sèsíì é caka o dapàm̀ma è yɔ̀: Nɛ́ pà kàna hùhùhùka, nìpa púnùm̀-nùm̀ kpɛ́ɛ́mà. ¹⁵ Kà pá mà hḭn, é pà kàna pa wɛǹni. ¹⁶ K'ó tódá ye pɛ̰́ɛ̰̀pa pa nùm̀ka n'ɛ̀ɛ num̀bííhí hidɛ́ɛ̀ka, é wáńtá hḭ́ǹka é sɛda Weèdi n'ɛ̀ɛ dimá kpɛ́mú. Ye kú dàhàka, k'ó pà wɛ́ha, é pà kɔ̰́ɔ̰́ o dapàm̀ma è yɔ̀ pá totá ye nìku. ¹⁷ Pa wɛǹni, kà pá dii é dɛn é sɔ̰́ńtá. Kà pá tíká mìì de sɔ̰́ńtà-sa k'yé sṵ́ná náḿbòhi píta nà hìdɛ́ɛ́.

Píyɛ́ɛ̀ cakáà è yɔ̀ Sèsíì yòǹ Weèdi ta̰kadáko-dà

Dentá Màtíyéè 16.13-19; Mádíkì 8.27-29

¹⁸ Daadí yènì, kà Sèsíì é n'dɔń Weèdi o cɔ̰́ɔ̰̀di, k'òo dapàm̀ma péé bɛ́ɛ́kú, kà p'óò pàa-ho k'ó pà béka è yɔ̀: Nìpa wɛɛ̀ n hḭ́ǹka è toò n yòǹ wodà? ¹⁹ Kà p'óò tɛ̰́ná è yɔ̀: Pàcɔ̰́ toò a yòǹ Ìsá̰-Bàtísì-dà, tɔɔ̀pa Èdíì, kà tɔɔ̀pa tṵ́mà toò dekáà wɔ̀ni Weèdi Wɛtɛ̰́nápa p'oòcɔ̰́ǹ-dà yá̰ńtà-ní.

²⁰ K'ó tṵ́má pà béka è yɔ̀: Nɛ́na há̰kà tá, nɛ maàhu è toò n yòǹ wodà?

Kà Píyɛ́ɛ̀ é tɛ̰́ná è yɔ̀: A yòǹ Kídísì-dà, Weèdi ta̰kadà-ko óò tɔn-ní. ²¹ Kà Sèsíì é pà fedí há̰ḿbíifá, é pà caka è yɔ̀ pà dá yetá mà caka òcɔ̰́ǹ!

Sèsíì cakú o kṵ́mú nà nìdo yònà óò tṵ̀ǹkàma

Dentá Màtíyéè 16.24-28; Mádíkì 8.30–9.1

²² K'ó tuɛ̀ha è yɔ̀: Yè békú Niìfòùo bíitá-dà é dii náńkú sàma. Ti yɔtí kpɛ̰́m̀ma, nà dɔ̀hàka yam̀ma kú kpɛ̰́m̀ma, nà Weèdi kpɛ̰́ńtìnùka biɔhànapá kó tà yee-é-ma, é tà kɔ̀ù kpíidɔkú hḭ́ǹka, data̰á̰di kà tá yá̰ńtá-ní.

²³ K'ó caka mɛ̀m̀p'òò besí-pa wɛǹni è yɔ̀: Kà mɛ̀ǹǹ kpɛ̀i-kó é n tṵṵ̀na é hḭn n dapàǹn, k'ó héé o mɔ́nń dɔ́kàma, é tóó daàka wɛǹni o kpíidɔkú^b é toó é n tṵṵ̀naa! ²⁴ Mɛ̀ǹǹ kó n'kpɛ̀i-kó é fḭ́hìna o fòùmu, ò kó mù féná-ma. Kà mɛ̀ǹǹ mɛ̀ɛ mù fénà-ko nà n kpɛ́mú, ò kó mù dɛ́tá-ma. ²⁵ Cɔ́ńtídi m̀mɔ́ni-dà nìi kó n'káá-ma k'ò dɛ́tà fòùku kpɛ́ɛsá wɛǹni, àá sehènà o cɔ̰́ɔ̰̀di yoo ò fénà o fòùmu? ²⁶ Kà fɛ̀ci káá nìdo nà n kó n'yòǹ-ma o dakpɛ̰́ǹn, n'ɔ̀ɔ̀ kó n'cunì-ma n wɛmá, fɛ̀ci-dà mɛ̀ɛ té kó wáńtá nà n káá mmí Niìfòùo bíitá n'ɔ̀ɔ kpɛ́mú, n kó tóní tḭ́ń daadí, mmí nà n Báàa n'ɔ̀ɔ tɔntɔnwenipá wenikú mɛhɛká. ²⁷ N nɛ cakú bemú-dà, pàcɔ̰́ péé-ma è nɛ̀hi miì è kó dɛ́há Weèdi wóòti é nɛɛ́ kpíí.

Sèsíì wɔ̰̀ǹti pentà

Dentá Màtíyéè 17.1-8; Mádíkì 9.2-8

²⁸ Ò wɛɛ̀-ma mɛma é yɔ̀ɔ, kà daàa kànìì kpɛ́ɛmá é ka̰há, k'ó tóó Píyɛ́ɛ̀, nà Ìsá̰à̰, nà Ìsákì kà pá dìsi ta̰à̰di hḭ́ǹka k'ò kó dɔa Weèdi. ²⁹ Ò dɔń tḭ́ń wɔ̀ni Weèdi, k'òo yìhìka é peǹta, k'òo báatí pɛ́ídá wɛ́dɛ́dɛ́. ³⁰ Kà pá cemá dɛ́há nìpa pàdɛ́ɛ́, kà pá tɛ̀ni òò wɛì-nà. Ye nìi pàdɛ́ɛ́ de yòǹ Mɔ̀yísì-dà nà Èdíì. ³¹ Pà de fodà-ní Weèdi wenikú mɛhɛká-dà òò wɛì-nà ò yònà kpíkamá Sèdìsàdɛ́m̀ mɛhɛká é yɔ̀ɔ o tɔmú. ³² Píyɛ́ɛ̀ n'ɔ̀ɔ dópàpa, kà pà dɔɔ́ è kpíi. Kà pá heǹta-ní é dɛ́há o wenikú n'ɛ̀ɛ nìi pàdɛ́ɛ́ mɛ̀m̀pà d'oò nɛ̀hi-nà-pa. ³³ Ye nìpa kpɛ̀i óò héé tḭ́ń wɔ̀ni é ka̰há, kà Píyɛ́ɛ̀ óò caka è yɔ̀: Ti dakpɛ̰́ǹn, yè sudi tí m'péé miì-dà. Ti kó pa̰á̰ fḭ́ḭná nàta̰a̰-dà, fɔ̰́ń kùcɔ̰́, Mɔ̀yísì kùcɔ̰́, Èdíì tɔkú. (Ò de wɛì mɛma è pú yá̰á̰ ò toòpu). ³⁴ Ò káà wɛì-ma mɛma, kà wɔ́ɔ̀di nìcɔ̰́nì é tɛ̀ni é pà cḭ̀na, kà wantafɔ̰̀di é cɛ̰ɛ̰́ Sèsíì dapàm̀ma. ³⁵ Kà Weèdi é wɛɛ́-ní nà ye wɔ́ɔ̀di mɛhɛká è yɔ̀: Mɛnǹ yòǹ n bíita̰kadáta-dà, nɛ́ tà besí! ³⁶ Ye boòku wɛdà-ma é yɔ̀ɔ, kà pá n'hɔ̰́tà ò nɛ̀hi o cɔ̰́ɔ̰̀di. K'yèe dapàm̀ma é cɛ̰ɛ̰́ pa nùka ye kú daàka mɛhɛká, pà pú cakáà òcɔ̰́ǹ pà de dɛ́hà-sa.

Sèsíì bɔ̀haà wɛɛ̀ko bíitá tàcɔ̰́tà kú mɛhɛká.

Dentá Màtíyéè 17.14-18; Mádíkì 9.14-27

³⁷ K'yé weka, Sèsíì n'ɔ̀ɔ dapàm̀ma pa ta̰à̰ka kà pá cútá-ní ye ta̰à̰di hḭ́ǹka, kà nìku é tɛ̀ni sàma o peètanà-pu. ³⁸ Kà dɔɔ̀o òcɔ̰́ǹ é cemá kpákada-ní n'ɛ̀ɛ nìku cɔhàka è yɔ̀: N dakpɛ̰́ǹn, m'a sɛ́úkú-ma, ya̰ní é wisí n bíidatá, n bínàcɔ̰́-dà. ³⁹ Wɛɛ̀ko-dà hɔ̰́ tà cɛ̰dí, ye wɔ̀ni nà ye wɔ̀ni, é tà sà̰m̀pà, kà tà té n'toó hodí, kà nuǹtáḿpùkàti yɛɛ̀hu-ní ta nùdi. Ò hɔ̰́ tà diá náńkú-dà dɛ́dɛ́í è té nɛɛ́ tà yídá. ⁴⁰ Ká n cɔhà a dapàm̀ma è yɔ̀ p'óò bɔ̀hà, p'àá pú nɛdà.

⁴¹ Kà Sèsíì é tɛ̰́ná è yɔ̀: Wɔ̀ǹkù mɛnkù kú nìpà nɛ́na, nɛ kɔ́ɔ́ dandaní è tṵ́mà pa̰kú sḭ̀ḭ̀ma. Háá wɔ̀ni m̀mɔ́ni-dà n baà kó nɛ m'péé-nà-ma? Háá daadí m̀mɔ́ni-dà n kó m'pa̰kú-ma mùyɔ̰ nɛ hḭ́ǹka? K'ó caka ye dɔɔ̀o è yɔ̀: Fɔ̰́ń, ya̰à-ní miì a bíitá.

⁴² Ye bíitá ò tɔ́kàǹta-ma-ní, k'yèe wɛɛ̀ko é tà sà̰m̀pà dɛ́dɛ́í, é tà hɛ́í teǹka. Àmá k'ó wɛɛ́-nà kpeéma ye wɛɛ̀ko óò bɔ̀hà ye bíitá mɛhɛká, é tà kpekàna, é tà tɛ̰́ná ta báàa. ⁴³ K'yé pà dii pa wɛǹni nà Weèdi nɔɔ̀ti wɛhimú pà de dɛ́hà-mu.

Sèsíì tṵ́mà cakú o kṵ́mú wɛmá.

Dentá Màtíyéè 17.22-23; Mádíkì 9.30-32

K'yé n'káà pà yon n'ɔ̀ɔ̀ cetà pa̰à̰-sa hḭ́ǹka, k'ó caka o dapàm̀ma è yɔ̀: ⁴⁴ Nɛ́ kpetá nɛ toòka é yekà sukú n nɛ cakú-sà sá̰mà-ní. Pà kó taàa-á-ma Niìfòùo bíitá nìpa nɔ̀hi mɛhɛká.

⁴⁵ Àmá, o dapàm̀ma de pú yeèkaà ye wɛmà kpɛ̀i é n'yɔ̀pu. Mà de pà bìnì-í-ma, pà mɛ̀ɛ pú nɛɛ̀ é cḭḭ̀na kṵnnɔ̀ǹfa óò béka.

Wodà yòǹ sào ti cɔhɔ̀kà?

Dentá Màtíyéè 18.1-5; Mádíkì 9.33-37

⁴⁶ Kà Sèsíì dapàm̀ma é púsí nɔ̀nɔ̀hicí è kó yá̰dá pa mɛ̀ǹǹ yòǹ-ko sào. ⁴⁷ K'ó yá̰dá pà màhu-sá pa yàma mɛhɛká, ye wɔ̀ni, é tódá bíitá é tà nɛ̀hìna o pesá, ⁴⁸ é pà caka è yɔ̀: Mɛ̀ǹǹ codà-ko ye bíítà mɛntà nà n yèdi, mmí mɔ́nń-dà ò codà-ma. Mɛ̀ǹǹ mɛ̀ɛ n codà-ko, ò codà mɛ̀ǹǹ n tɔn-kó-dà-ní, è yá̰á̰ mɛ̀ǹǹ yòǹ-ko sìmɔ́ǹn mɔ́-mɔ́nń nɛ wɛnnì mɛhɛkà, mɛnń-dà yòǹ sào.

Mɛ̀ǹǹ pú nɛ sɛ̰ɛ̰́-ko ò yòǹ nɛ kóoó-dà.

Dentá Mádíkì 9.38-40

⁴⁹ Ye kú hḭ́ǹka, kà Ìsá̰à̰ é tódá wɛmá è yɔ̀: N Dakpɛ̰́ǹn, ti dɛ́hà-á-ma nìdo òcɔ̰́ǹ k'ò bɔ̀hu wɛɛ̀kupá nìpa mɛhɛká n'àa yèdi, kà ti mɛ̀ɛ óò bɔ̀hà mìì tee-sá, ò p'áa tṵ̀n è yònà tḭ́ńti. ⁵⁰ Kà Sèsíì óò tɛ̰́ná è yɔ̀: Dá ò bɔ̀hà-nà, mìì tee-sá mɛ̀ǹǹ pú nɛ sɛ̰ɛ̰́-ko yòǹ nɛ kóoó-dà.

Sàmàdíì yɔbíisá yècɛ̰́ɛ̰̀ kú nìpa yedáà Sèsíì codápu.

⁵¹ Wɔ̀ni Weèdi kó tódá-di Sèsíì óò dìkàna hḭ́ǹka de hɛ́tà-ma-ní, k'ó ta̰kadá mámáḿ è yɔ̀ ò kɔ́dí-ma Sèdìsàdɛ́m̀. ⁵² K'ó tɔn nìpa pàcɔ̰́ yìhìka, kà pá ka̰há é tɛ̀i é dúú Sàmàdíì yɔbíisá yècɛ̰́ɛ̰̀ kú mɛhɛká, è kó dɔ̀hà ò kó tɛ̀ni é bátá-sa. ⁵³ Àmá, k'yèe yɔbíisá yam̀ma é yeda o codápu mìì tee-sá ò de coó Sèdìsàdɛ́m̀ bɛ́ka-dà. ⁵⁴ O dapàm̀ma pàdɛ́ɛ́, Sàákì nà Ìsá̰à̰ yèkaà-ma mɛma, kà p'óò béka è yɔ̀: Ti Teù, a kpɛ̀i-í-dà kà tí kɔ̰́ɔ̰́ nùdi kà ha̰mú é cútá-ní nà hḭ́ǹka é tɛ̀ni é pà fíɔ́wá? ⁵⁵ K'ó fitá pa bɛ́ka é pà kɛ̰̀ḭ-nà [è yɔ̀: Nɛ pú yá̰á̰ sèdi mɛ̀nì nɛ yɛ̰ṵ̀-di kà nɛ wɛì mɛma. Niìfòùo bíitá pú tɛ̀ni è kó kɔ̀ù nìpa, àmá tà tɛ̀ni pa fḭ́hìnapú-dà.] ⁵⁶ Kà pá yídá é ka̰há yɔtí tɔɔ̀ti mɛhɛká.

Mɛ̀m̀pà kpɛ̀i-pá é tṵṵ̀na Sèsíì yònà é hḭmpú.

Dentá Màtíyéè 8.19-22

⁵⁷ Kà pá n'sá̰á̰ cɔ̀ku k'òòcɔ̰́ǹ é caka Sèsíì è yɔ̀: N kó n'àà tṵ̀n-ṵ́-ma a kó yɛ̀ɛ̀-sa wɛǹni. ⁵⁸ K'óò tɛ̰́ná è yɔ̀: Dóócí káá-ma fɔ̰̀ɔ̰cí, kà yɛ̀di nɛ̀hi káá yɛ̰tidí. Àmá Niìfòùo bíitá pú káá tà kó dɔɔ́-sa é muhipa. ⁵⁹ K'ó caka tɔɔ̀ɔ è yɔ̀: Ya̰ní é n tṵṵ̀na! Àmá k'yèe yaǹn yɔ̀: Dakpɛ̰́ǹn! Hédá ká n cetá é taá dáná-ní n báàa. ⁶⁰ Kà Sèsíì óò tɛ̰́ná è yɔ̀: Héé kpíípa kà pá dáná pa kpíípa, àmá fɔ̰́ń, taá é caka Weèdi wóòti wɛnaamá. ⁶¹ Kà tɔɔ̀ɔ òcɔ̰́ǹ tṵ́mà yɔ̀: N k'áa tṵṵ̀na-á-ma Dakpɛ̰́ǹn! Àmá, héé ká n cedí taá cɔwa-ní n hɔ̰́ɔ̰́tà kpɛ́ɛpá. ⁶² Kà Sèsíì óò tɛ̰́ná è yɔ̀: Kà mɛ̀ǹǹ dɔ̀ɔ̀-nà-ko nɛ̀ci, è tṵ́mà wɛ̰̀kù dàhàka, ye yaǹn pú kó nɛɛ́ é púsí tɔmú Weèdi wóòti mɛhɛká.