Dúkì 18

Kpíipoòku nà sídàko wɛbemú yohènamá

¹ Ye kú dàhàka, kà Sèsíì é caka o dapàm̀ma wɛbemú yohènamá è kpɛ̀i é pà bɛka è yɔ̀ pà yònà é n'dɔń-ma Weèdi kà pa wɔ̰̀ǹti dá yá̰á̰ka. ² K'ò yɔ̀: Sídàko òcɔ̰́ǹ-dà de péé yɔtí tìcɔ̰́tì, ò pú cunì Weèdi ò mɛ̀ɛ pú kaǹ nìi òcɔ̰́ǹ. ³ Kà kpíipoòku kùcɔ̰́kù mɛ̀ɛ té de péé ye yɔtí ti cɔ̰́ɔ̰̀di mɛhɛká, é té n'kɔ́dì-ní ye dɔɔ̀o pesá òò cɔ̀hu è tonà: N pṵ́tá n kà̰à̰tɔɔ̀o yìhìka. ⁴ K'yé yóka k'ò baà é n'yení, àá yɔ̀ɔ é mahà è yɔ̀: Bá nà n pú cunì-mà Weedì, è pú kaǹ nìi òcɔ̰́ǹ, ⁵ nà ye kpíipoòkù mɛnkù há̰ n wékànì-mà kpɛ́mú, n kó kù tempa-nà-á-ma é kù pṵ́tá ku kà̰à̰tɔɔ̀o yìhìka, k'yé teha kà kù dá é n'kɔ́dì-ní è n kɔkapú. ⁶ Kà Teó é tɔhìna è yɔ̀: Yekà-nà sukú sídàkpákpàdo hḭ́mpú. ⁷ Aá kó béka Weèdi-dà? Nì pú kó pṵ́tá ni kpɛ́ɛpá mɛ̀m̀pà kɔǹ-pa yèǹka nà wèǹku è nì yún? Nì kó yóka-á-dà è pú n'tɛ̀ni é pà tempa-nà? ⁸ N nɛ cakú-ma, nì kó pà pṵ́tá-ma feǹ-fem̀ma. Niìfòùo bíitá kó tɛ̀ni tḭ́ń daadí, tà kó dɛ́há-dà dandaní yam̀ma teǹka hḭ́ǹka?

Fàdísì nà kaàcáho wɛbemú yohènamá

⁹ Kà Sèsíì é tṵ́má caka wɛbemú yohènamà mɛmà nìpa pàcɔ̰́ kpɛ́mú, mɛ̀m̀pà hɔ̰́ n'dìi-pá pa cɔ̰́ɔ̰̀di è yɔ̀ pà coó, è yɔ̰́sí tɔɔ̀pa, k'ò yɔ̀: ¹⁰ Nìi pàdɛ́ɛ́-dà de dúú Weèdi hɔ̰́ɔ̰̀ta mɛhɛká è kó nì dɔa, k'òòcɔ̰́ yòǹ Fàdísì, kà tɔɔ̀o yòǹ kaàcáho. ¹¹ K'yèe Fàdísì é tɛ̀i è nɛ̀hi è dɔń Weèdi o yàma mɛhɛká è toò: Weèdi, m'a sɛdí nà n pú yònà-ma tɔɔ̀pa mɛ̀m̀pà yòǹ-pa túùpa, nà mɛ̀m̀pà pa̰kú-pa kpákpààma, nà mɛ̀m̀pà pa̰kú-pa yáyámú. M'a sɛdí nà n pú yònà-ma kaàcáhò mɛnǹ. ¹² N hɔ̰́ bowá nùdi cɛ̰má màdɛ́ɛ́-dà kàyeèho òcɔ̰́ mɛhɛká. N káá-sa wɛǹni, n hɔ̰́ a kɔ̰́ɔ̰́ niìya̰ píta mɛhɛká yècɔ̰́-dà. ¹³ Kà kaàcáho mɛnn nɛɛ̀hi dɛùma è sḭ́ń, bá ò pú nɛdà é yoòda o yudí hḭ́ǹka, è kɔǹ-nà Weèdi è toò: Weèdi, n kɔń séèma n yòǹ niìsḭ̀ǹn-dà. ¹⁴ Kà Sèsíì é tɔhìna è yɔ̀: N nɛ cakú-ma, Weèdi de teháà-á-ma ye kaàcáho è yɔ̀ ò yòǹ niìcoóko k'ó nɛɛ́ é n'kṵnti o hɔ̰́ɔ̰̀ta. Há̰kà, nì de pú teháà Fàdísì mɛnn, è yá̰á̰ mɛ̀ǹǹ wɛnnì kó wɛkàna-kó o cɔ̰́ɔ̰̀di, pà k'óò yàkàda-á-ma, k'ò mɛ̀ɛ yakàdà o cɔ̰́ɔ̰̀di, pà k'óò wɛkàna-á-ma.

Sèsíì kónà bííhí

Dentá Màtíyéè 19.13-15; M,adíkì 10.13-16

¹⁵ Kà nìpa é n'kɔ́dì-nà-ní pa bíipàǹhi Sèsíì pesá è kpɛ̀i ó cɔ̰ná o nɔ̀hi hi yuùka hḭ́ǹka é hì kóná. K'òo dapàm̀ma é dɛ́há pà pa̰kú-sa, é pà kɛ̰̀ḭ-nà. ¹⁶ Kà Sèsíì é hì yíí-ní o pesá è yɔ̀: Héé-nà bísḭ̀m̀mɔ́nhí kà hí tɛ̀ni n pesá, nɛ dá hì n'kpanì è yá̰á̰ Weèdi wóòti péé mɛ̀m̀pà hì yònà-pa kpɛ́mú-dà. ¹⁷ Bemú-dà n nɛ cakú-ma. Kà mɛ̀ǹǹ pú teháà-ko Weèdi wóòti o hḭ́ǹka é n'yònà bísḭ̀m̀mɔ́ǹta, ò pú kó nɛɛ́ é wáńtá dúú ti mɛhɛká.

Káma yaǹn òcɔ̰́ǹ nà Sèsíì

Dentá Màtíyéè 19.16-30; Mádíkì 10.17-31

¹⁸ Kà Sùwífùpa dapàǹkpɛ̰́ǹn òcɔ̰́ǹ é béka Sèsíì è yɔ̀: Dakpɛ̰́nsudó, n kó pa̰á̰ badà é dɛ́tá fòùmu mɛ̀mù bá yɔ̀ɔ-pú?

¹⁹ K'à Sèsíì óò tɛ̰́ná è yɔ̀: Baà tee k'á n yíí sudó? Nìd'oòcɔ̰́ǹ kɔ́ɔ́ è sudi, Weèdi cɔ̰́ɔ̰̀di bààsí. ²⁰ A yá̰á̰-dà-ma Weèdi hɔ̰́ɔ̰wencí nùka mɛ̀ǹkà hḭ́n-ká: A dá yetá cɔ̰ha dɔɔdí, a dá kɔ̀ù nìdo, a dá yódá, a dá yetá báńta é cɔ̰ha tɔɔ̀o yèdi, á n'cuunì a báàa n'àa màa!

²¹ K'yèe káma yaǹn óò tɛ̰́ná è yɔ̀: N pa̰à̰-ma miì kú wɛnnì nà n dapàǹku wɔ̀ni.

²² Sèsíì yèkaà-ma mɛma, óò caka è yɔ̀: Niìi yècɔ̰́-d'àà dóńtà. Taá yɛda a káá-sa wɛǹni, é tódá ye dící é cì totá pɛ́íhí. K'à hḭn mɛma a kó ya̰dá dɛ́tá-ma káma Weèdi pesá. K'à pa̰à̰ miya̰ è yɔ̀a k'àá ya̰ní é n tṵṵ̀na.

²³ Ye dɔɔ̀o yeèkaà-ma mɛma, k'òo yàma yɔ̀ bìi-ì, mìì tee-sá, ò de káá káma-dà sàma. ²⁴ Sèsíì hɔ̰́tà-ma o yàma cɔ̰háà, k'ò yɔ̀: Yè dɔǹ-nà-á-ma káma yam̀ma nà p'aa dúú-ma Weèdi wóòti mɛhɛká. ²⁵ Káma yaǹn dúúma Weèdi wóòti mɛhɛká kó n'dɔǹ-ń-ma é ha̰tá-nà bɔnamáku kó yɛ̀ɛ̀-ma yáafá bòdi mɛhɛká.

²⁶ Kà mɛ̀m̀p'òò besí-pa yɔ̀: Kà mɛmá-dà, wod'àá kó dɛ́tá fḭ́táma? ²⁷ K'ó pà tɛ̰́ná è yɔ̀: Nìpa kó hɛ̰ka-sá pa̰á̰pu, Weèdi k'éè nɛdá-ma.

²⁸ Kà Píyɛ́ɛ̀ yɔ̀: Ǹtɛ, tḭ́ńti héè-é-ma ti kpɛ́ɛsá wɛǹni áa tṵṵ̀na. ²⁹ K'ó pà tɛ̰́ná è yɔ̀: N nɛ cakú mɔ́ma-dà, kà nìi yídà è hédà o hɔ̰́ɔ̰̀ta, yoo o poòo, yoo o kúcàpa, yoo o hɔ̰́ɔ̰́tà kpɛ́ɛpá, yoo o bííhí, nà Weèdi wóòti kpɛ́mú, ³⁰ ò kó dɛ́tá-ma pemà mɛmà kú mɛhɛká ò héè-sa-ní k'yé n'wɛhi sàma, é tṵ́má wáńtá dɛ́tá fòùmu mɛ̀mù bá yɔ̀ɔ-pú pemá mɛ̀mà pení-ma-ní mɛhɛká.

Sèsíì cakú ta̰á̰ma o kṵ́mú n'ɔ̀ɔ yá̰ńdáma.

Dentá Màtíyéè 20.17-19; Mádíkì 10.32-34

³¹ Kà Sèsíì é tódá o tɔntɔndipá píì-pàdɛ́ɛ́ é taá pà caka è yɔ̀: Ǹtɛ kà ti póńti Sèdìsàdɛ́m̀. Weèdi Wɛtɛ̰́nápa de wa̰à̰haà-sa wɛǹni Niìfòùo bíitá hḭ́ǹka, kó pa̰ná-ma. ³² Ta kpɛ́ɛpá kó tà tàa-á-ma mɛ̀m̀pà pú yá̰á̰-pa Weèdi nɔ̀hi mɛhɛká, kà pá tà dɛhí, é tà tèùnà, é tà tṵ́ha nuǹtɔ̰tí, ³³ é tà poó dáàfa, é yɔ̀ɔ tà kɔ̀ù, data̰á̰di, kà tá yá̰ńtá-ní. ³⁴ Àmá, o tɔntɔndipá de pú yeèkaà yècɛ̰́ɛ̰̀ ò de kpɛ̀i é n'yɔ̀pu. O wɛmá de pà bìnì-í-ma, pà de pú nɛɛ̀ é bantá ò de wɛì-sa kú hḭ́ǹka.

Sèsíì dìhìnà yɔ̀ǹn

Dentá Màtíyéè 20.29-34; Mádíkì 10.46-52

³⁵ K'ó m'patì Sèdìkóò yɔtí, kà yɔ̀ǹn òcɔ̰́ǹ kàdi cɔ̀ku nùdi è cɔ̀hu. ³⁶ K'ó yekà nìku nampàta kà kù kɛ̰hɛdi, k'ó béka mìì pa̰kú-sa. ³⁷ Kà p'óò caka è yɔ̀: Sèsíì Nàsàdɛ́tì kóoó-dà kɛ̰hɛdi. ³⁸ K'ó dedí kpeéma è yɔ̀: Sèsíì, Dàfítì bidà, n kɔń séèma.

³⁹ Mɛ̀m̀pà de nihí-pa yìhìka, kà p'òò kɔ̰̀ǹti-nà è yɔ̀ ó hḭn wá̰mu. K'ò mɛ̀ɛ dɔ̀hà é dedí sàma è yɔ̀: Dàfítì bidà, n kɔń séèma.

⁴⁰ Kà Sèsíì é nɛɛ̀hi, é kɔ̰́ɔ̰́ nùdi è yɔ̀ p'óò ya̰à̰ní. Ò tɛ̀ni tḭ́ń wɔ̀ni o pesá, k'óò béka è yɔ̀: ⁴¹ A kpɛ̀i m'áa pa̰á̰ badà?

K'ó tɛ̰́ná è yɔ̀: N Teù, n kpɛ̀i á n dìhìna-á-ma.

⁴² Kà Sèsíì óò caka è yɔ̀: Diìda, a dandaní-d'àà kpekànà.

⁴³ Ye pesá nà ye pesá, k'òo nɔ̀ǹci é diìda, k'ó tṵṵ̀na Sèsíì dàhàka è dùǹti Weèdi. Ye nìku wɛǹni dɛ́hà-ma ye kú pa̰á̰mà, kà kú cetá è mɛ̀ɛ té duǹti Weèdi.