Dúkì 19

Sèsíì cèhènà Sàséè fòùmu

¹ Kà Sèsíì é butá Sèdìkóò yɔtí mɛhɛká è kɛ̰hɛ̰di. ² Kà dɔɔ̀o òcɔ̰́ǹ péé ti mɛhɛká kà p'òò toò Sàséè, k'ò yòǹ kaàcáhàpa kpɛ̰́ǹn, è káá dící dɛ́dɛ́í. ³ K'ó n'kpɛnti è kó dɛ́há Sèsíì. Ò há̰ de bɛ́dì-ma tá, ò pú nɛdà é mà hḭn nà nìku kpɛ́mú. ⁴ Mɛmá-dà, k'ó cocí é nihí yìhìka, é tɛ̀i é dìsi tepú mùcɔ̰́mù kú hḭ́ǹka, Sèsíì de kó yɛ̀ɛ̀-sa, è kpɛ̀i k'ò tɛ̀ni è kɛ̰hɛ̰di, k'óò dɛ́há. ⁵ Sèsíì tɛ̀ni tḭ́ń wɔ̀ni ye tepú fɔ̰̀di, é wáńtá mu hḭ́ǹka óò caka è yɔ̀: Cútá-ní fem̀ma Sàséè! A hɔ̰́ɔ̰̀ta-dà n kó taá é bátá-ma yenì kpɛ́ɛ́dì.

⁶ K'ó cútá-ní fen-fem̀ma, óò tanà o hɔ̰́ɔ̰̀ta, óò codá nà yaǹnaakú. ⁷ Mɛ̀m̀pà kú wɛnnì de dɛ́hà-pa miya̰, kà pà wṵkapú è tonà: Ò taá é bátá niìsḭ̀ǹn hɔ̰́ɔ̰̀ta-dà.

⁸ Àmá kà Sàséè é nɛɛ̀hi Teó yìhìka, óò caka è yɔ̀: N Teù, n kó tóó-ma n káma yɛ̰̀ṵ̀ku é mà totá pɛ́hí. Kà n mɛ̀ɛ de pa̰à̰ nìi fɔ́ɔ̀ti é dii o dífa, n kó fà n'ɔ̀ɔ̀ bodá-ma fa cɔ̀ku mànàhì. ⁹ Kà Sèsíì óò tɛ̰́ná è yɔ̀: Weèdi fḭ́hìnà-á-ma hɔ̰́ɔ̰́tà mɛntà kú nìpa yenì, mìì tee-sá a mɛ̀ɛ té yòǹ Àbààhám̀ yaàbíidí-dà. ¹⁰ Mmí Niìfòùo bíitá, n tɛ̀ni è kó pɛha nìpa mɛ̀m̀pà fée-pá-dà é pà fḭ́hìna.

Díiyuùka wɛbemú yohènamá.

Dentá M`atíyéè 25.14-30

¹¹ Kà Sèsíì é tṵ́má caka wɛbemú yohènamá mɛ̀m̀pà de tɛ̀ni-pá-ní è besí o wɛmá. Ò de hɛ́dí-nà Sèdìsàdɛ́m̀-dà kà nìpa maàhu è tonà Weèdi wóòti kó fodá-ní sá̰ńsá̰kù-dà. ¹² K'ó pà caka è yɔ̀: Wóobíitá tàcɔ̰́tà-dà de kɔ́dí cà̰ǹku heedí dɛudí, è kpɛ̀i é taá dii-ní wóòti é nɛɛ́ koní. ¹³ Kà tá n'kɛ̰hɛdi, é yíí ta dehèpa píta, é kɔ̰́ɔ̰́ bá pa mɛ̀ǹǹ dɛ̀ɛ̀-ko díiyudí è yɔ̀ ó n'tantí-nà hádí é n'sànà ta koḿma-ní. ¹⁴ Ta yɔtí yam̀ma há̰ de tà sɛ̰ɛ̰́-ma tá, kà pá tɔn nìpa è yɔ̀ pá tṵṵ̀na ta dàhàka é tɛ̀i é caka wóosào tà kɔ́dí-ko kú yɔtí è yɔ̀, pà pú kpɛ̀i kà tá n'yòǹ pa wódo.

¹⁵ Kà tá tɛ̀i kà pá tà kàna wóòti, kà tá tón é koní ta yɔtí. Kà tá tɛ̀ni é yíí ta dehèpa tà de kɔ̰́ɔ̰̀-pa dící, è kó dɛ́há bá mɛ̀ǹǹ dɛ̀ɛ̀-ko de cì pèǹtà-nà é cɔ́ńtì-fa. ¹⁶ Kà cecedó é tɛ̀ni è yɔ̀: N dakpɛ̰́ǹn, a díiyudí pɛdà díiyuùka tɔɔ̀ka píta. ¹⁷ K'yèe wódo óò caka è yɔ̀: Yè sudi, a yòǹ deho sudó-dà. A cɔ́dí-mà niìya̰ sàm̀mɔ́ǹya̰ hḭ́ǹka, m'a kɔ̰́nì wóòti yɔtí píta hḭ́ǹka. ¹⁸ Kà dɛ́ɛ̀do é tɛ̀ni è yɔ̀: N dakpɛ̰́ǹn, a díiyudí pɛdà díiyuùka tɔɔ̀ka kànùm̀. ¹⁹ K'yèe wódo é caka mɛnn è yɔ̀: Fɔ̰́ń, m'a kɔ̰́nì wóòti yɔtí tìnùm̀ hḭ́ǹka-dà. ²⁰ Kà ta̰á̰ko é tɛ̀ni è yɔ̀: N dakpɛ̰́ǹn, ǹtɛ a díiyudí, n de nì wḭnà kùdáakpíìku-dà é nì sɔ̀na. ²¹ M'a wani-í-ma é mà hḭn, mìì tee-sá a wɛmá-dà dɔǹ. A hɔ̰́ tódá a pú hḭ́nà-sa-dà, è té kɔ̰ṵ a pú bɔɔ́-sa. ²² K'óò tɛ̰́ná è yɔ̀: A yòǹ deho kpákpàdo-dà. N k'áa síi-nà a wɛmá hḭ́ǹka-dà. A de yá̰á̰-ma è yɔ̀ n wɛmá dɔǹ, kà n té tódá n pú hḭ́nà-sa, é kɔ̰ṵ n pú bɔɔ́-sa, ²³ badà tee k'àá de pú taá é taàa n dífa díikɔ́ɔ̀ta mɛhɛká? N koní-mà-ní, n de kó nɛɛ́ taá fà tóó-ma-ní nà cɔ́ńtídi. ²⁴ Ye wɔ̀ni, k'ó caka mɛ̀m̀pà de yè péé-pa è yɔ̀: Ta̰ǹta-nà ye díiyudì, é nì kɔ̰́ɔ̰́ mɛ̀ǹǹ káá-ko díiyuùka píta. ²⁵ Kà pà yɔ̀: Ti dakpɛ̰́ǹn, ò yɔ̀ɔ káápu-dà díiyuùka píta. ²⁶ K'ó pà tɛ̰́ná è yɔ̀: N nɛ cakú-ma, mɛ̀ǹǹ káá-ko pà kó dɔ̀hà óò tɔ̀hɛ̀na-á-ma ò káá-sa hḭ́ǹka, mɛ̀ǹǹ mɛ̀ɛ kɔ́ɔ́-ko yècɛ̰́ɛ̰̀, pà kó ta̰ǹta-á-ma bá niìya̰ cɛ̰́masí ò káá-sa. ²⁷ Há̰kà, n kà̰à̰tɔɔ̀pa mɛ̀m̀pà pú kpɛ̀i-pá n ní n'yòǹ pa wódo, nɛ́ pà ya̰à̰ní miì é pà hɛ̰ṵ n yìhìka.

Sèsíì dúúma Sèdìsàdɛ́m̀

Dentá Màtíyéè 21.1-11; Mádíkì 11.1-11; Ìsá̰à̰12.12-19

²⁸ Sèsíì wɛdà-ma mɛma é yɔ̀ɔ, é yíí é nihí ye nìku yìhìka è póńti Sèdìsàdɛ́m̀. ²⁹ Ò pàtì tḭ́ń wɔ̀ni yɔtí pà toò-ti Bɛ̀tìfàséè nà Bètàníì, kà tì pɛ̀ɛ-nà òdífùna ta̰à̰di, k'ó tɔn o dapàm̀ma pàdɛ́ɛ́, ³⁰ è yɔ̀: Tɔɔ̀ta-nà yɔsìmɔ́ńtì mɛ̀ǹtì péé-tì ti yìhìkà. Kà nɛ tɛ̀i è tì dúú, nɛ kó dɛ́há-ma sa̰mmùǹbíidí kà nì pḭ́dí, k'òòcɔ̰́ǹ mum pú nì dáá daadí yènì. Nɛ́ nì pḭ́tá-ní é nì tɛɛ̀-ní miì. ³¹ K'òòcɔ̰́ǹ nɛ békáà è hḭ́n: Baà tee kà nɛ nì pḭ́ḭ́kú? Kà n'ɔ́ɔ̀ tɛ̰́ná è yɔ̀, nɛ Teó-dà nì kpɛ̀i.

³² K'yèe tɔntɔndipá é ka̰há é tɛ̀i é dɛ́há Sèsíì pà cakáà-sa-ní wɛǹni. ³³ Pà pḭ́ḭ́kú tḭ́ń wɔ̀ni ye sa̰mmùǹbíidí, kà ni yam̀ma é pà béka è yɔ̀: Baà tee kà nɛ nì pḭ́ḭ́kú?

³⁴ Kà pá tɛ̰́ná è yɔ̀: Ti Teó-dà nì kpɛ̀i.

³⁵ Kà pá nì dɛ̀di é nì tɛɛ̀-ní Sèsíì pesá, é tɛ̀ni é tóó pa nɛǹti é pohà ni hḭ́ǹka, é héé k'ó dìsi é kaàdi. ³⁶ K'ó nì dádí è tɔ̀di, kà nìpa piikú pa nɛǹti o yìhìka cɔ̀ku hḭ́ǹka. ³⁷ K'ó n'tɔ́sí-nà Sèdìsàdɛ́m̀, è tṵ̀n-ní cɔ̀ku mɛ̀ǹkù sḭ́ńti-nà-ku-ní òdífùna ta̰à̰di, kà yaǹnaakú sṵ́ná o dapàm̀ma mɛ̀m̀pà de ò pùdi-pá wɛǹni, kà pà dùǹti Weèdi kpeéma nà pɔ́ńtápa̰á̰ma ò de pa̰à̰-ma kpɛ́mú pa nɔ̀ǹci mɛhɛká. ³⁸ Kà pà tonà:

Kónáma é m'péé-nà wódo

mɛ̀ǹǹ pení-ko-ní nà Bateó Weèdi yèdi!

Wɛ̀ɛ̀di é m'péé hḭ́ǹka,

kà Weèdi yèdi é wɛhika hḭ́ǹka sàka mɛhɛká^a.

³⁹ Kà Fàdísìpa pàcɔ̰́ mɛ̀m̀pà de péé-pa nìku mɛhɛká, é caka Sèsíì è yɔ̀: Dakpɛ̰́ǹn, caka a dapàm̀ma kà pá hḭn wá̰m.

⁴⁰ Kà Sèsíì é pà tɛ̰́ná è yɔ̀: N nɛ cakú-ma, kà pà hḭn wá̰m, tá̰à̰ka kó n duntà-á-ma kpeéma.

Sèsíì kɔń Sèdìsàdɛ́m̀ kpɛ́mú

⁴¹ Sèsíì hɛ́ɛ́kú-nà tḭ́ń wɔ̀ni Sèdìsàdɛ́m̀ yɔtí, k'ó tì dɛ́há é kɔń ti kpɛ́mú, ⁴² è yɔ̀: Nɛ́na Sèdìsàdɛ́m̀ yam̀ma-nà, kà nɛ de kó nɛɛ́ bantá mìì kó nɛ tɛ̀ni-nà-sa-ní wɛ̀ɛ̀di yenì! Y'àá káà nɛ sɔ̀di-í-ma sá̰mà, nɛ mum pú kó nɛɛ́ yè dɛ́há. ⁴³ Daàka-dà pení nɛ kpɛ́mú kà nɛ wɛ̀ɛ̀tɔ̀pa kó tɛ̀ni é maá bonkú, é yéńtá nɛ yɔtí, é nɛ pìi, é nɛ pɛ̰́káná páàti wɛǹni. ⁴⁴ Pà kó nɛ kɔ̀ù-ú-ma pápáí, é pɔ́dá nɛ yɔtí ti wɛn-wɛnnì. Tá̰à̰di pú kó sɔ̰́ńtá é n'cɔ̰mú ni tɔɔ̀di hḭ́ǹka, mìì tee-sá, nɛ pú bantà wɔ̀ni Weèdi tɛ̀ni-di-ní è kó nɛ fḭ́hìna.

Sèsíì bɔ̀haà tantam̀ma Weèdi hɔ̰́ɔ̰̀ta mɛhɛká.

Dentá Màtíyéè 21.12-17; Mádíkì 11.15-19; Ìsá̰à̰ 2.13-22

⁴⁵ Kà Sèsíì é dúú Weèdi hɔ̰́ɔ̰̀ta mɛhɛká, é cetá bɔhàpu mɛ̀m̀pà de taǹ-pa ta mɛhɛká. ⁴⁶ K'ó pà caka è yɔ̀: Pà wà̰tà Weèdi pɔ̀kàta mɛhɛká è yɔ̀: N hɔ̰́ɔ̰̀ta kó n'yòǹ weèdidɔɔ̀pu kpɛ́ɛtá-dà. Àmá, kà nɛ́na há̰ tà kpáhìna túùpa peètadí^b.

⁴⁷ Kà Sèsíì é m'biɔhànì daàka wɛǹni Weèdi hɔ̰́ɔ̰̀ta mɛhɛká, kà dɔ̀hɔ̀ka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá, é pɛ́ɛ́-nà Sùwífùpa kpɛ̰́m̀ma, kà pà pɛnti pà kó hḭmp'óò kɔ̀ù. ⁴⁸ Àmá, pà de pú yá̰á̰ pà kó hḭmà mìì tee-sá, nìku dɔ́ɔ́di d'oò besí-ma dɛ́dɛ́í nà pa yàma wɛǹni.