Dúkì 21

Kpíipoòku kùcɔ̰́kù pa̰dí

Dentá Mádíkì 12.41-44

¹ Kà Sèsíì é wáńtá é dɛ́há káápa de tanì-ma kú bookú dící Weèdi hɔ̰́ɔ̰̀ta díitaàdí mɛhɛká. ² K'ò mɛ̀ɛ té dɛ́há kpíipoòku, kà kù pú káá yècɛ̰́ɛ̰̀, kà kú tɛ̀ni é taàa díimáací cìdɛ́ɛ́. ³ Ye wɔ̀ni, k'ò yɔ̀: N nɛ cakú bemú-dà. Ye kpíipokù mɛ̀ǹkù kɔ́ɔ́-kù yècɛ̰́ɛ̰̀ tàà-fà dífà, ha̰tà-á-ma tɔɔ̀pa wɛǹni kpɛ́cí, ⁴ mìì tee-sá mɛmpa pa wɛnnì, pà tàà pa díicɔ̰náci-dà. Àmá mɛnku, nà kù baà sɔ̰̀ǹ-sà, kù tàà kù de káá-fa wɛǹni-dà è kó n'fòù-nà.

Sèdìsàdɛ́m̀ pɔ́dáma wɛmá

Dentá Màtíyéè 24.1-2; Mádíkì 13.1-2

⁵ Kà nìpa pàcɔ̰́ é n'wɛì Weèdi hɔ̰́ɔ̰̀ta wɛmá è toò tà suu-ú-ma dɛ́dɛ́í, nà ta tá̰a̰suuká pà tà maá-nà-ka, nà nɛǹti nìpa pɛ̰ḭ-tí Weèdi, kà pá tà dɔ̀hà-nà. Ye wɔ̀ni, kà Sèsíì é pà caka è yɔ̀: ⁶ Daàka-dà pení, báà tá̰à̰di nìcɔ̰́nì pú kó sɔ̰́ńtá é n'cɔ̰mú ni tɔɔ̀di hḭ́ǹka nɛ dìi-sà wɛnnì. Ye wɛnnì kó wáńtá wuùdi-í-ma-ní teǹka.

⁷ Kà p'óò béka è yɔ̀: Ti dakpɛ̰́ǹn, wɔ̀ni m̀mɔ́ni-dà ye kú niyà̰ kó pa̰á̰-ma? Yḭdó wodà kó ti bɛka ye kú niyà̰ kó pa̰á̰ tḭ́ń wɔ̀ni?

⁸ Kà Sèsíì é pà tɛ̰́ná è yɔ̀: Pa̰á̰-nà yɔkàma, nɛ dá teha kà pá nɛ yehèna. Nìpa dɔ́ɔ́di pení-ma-ní nà n yèdi, è kó tɛ̀ni é m'báńtí è tonà, mɛmpá-dà héé Weèdi Ta̰kadáko, wɔ̀ni-dà tɛ̀i. Nɛ dá pà besí. ⁹ Nɛ kó n'you tḭ́ń wɔ̀ni kà pà wɛì ta̰à̰na wɛmá, kà nìpa kɔ̰̀ǹti-nà pa teǹka yìkàǹyìkàpa, nɛ dá héé kà wantafɔ̰̀di é nɛ cɛ̰ɛ̰́. Yè békú ye kú niyà̰ é tɛ̀ni-í-ma-ní, y'àá mum pú kó n'yòǹ fòùku yɔ̀ɔmá.

¹⁰ K'ó tṵ́má é tɔhɛ̀na è yɔ̀: Bookú kó dɔɔ-ɔ́-ma ku tɔkú ta̰à̰pu, kà wóoteǹka é dɔɔ ka tɔɔ̀ka ta̰à̰pu. ¹¹ Teǹka sa̰mpàma-dà kó pa̰á̰ dɛ́dɛ́í, é yídá páàti tìcɔ̰́ kú mɛhɛká, kà kòka nà dɔnhaàdicí é dúní é haàdi nìpa. Bɔɔ́pùukú-dà kó n'káá nìpa, kà yḭḭ́sàpa é pa̰á̰ hḭ́ǹka. ¹² Àmá, k'yèe kú niyà̰ é nɛɛ́ é tɛ̀ni, nìpa kó cedí nɛ cɛ̰ha-á-ma é nɛ fá̰kapa, é nɛ taàa Weèdi biɔhà-nàmɔ̀ka kpɛ̰́m̀ma nɔ̀hi mɛhɛká kà pá nɛ síi-nà, é yɔ̀ɔ é nɛ kpemu. Pà kó nɛ tanà-á-ma tempáàti yìkàǹyìkàpa yìhìka, nà wóópa yìhìka, nà mmí kú kpɛ́mú. ¹³ Ye kú pa̰á̰mà kó nɛ pa̰a̰ bòdi-dà kà nɛ́ caka n wɛmá. ¹⁴ Nɛ́ taàa sukú nɛ yàma mɛhɛká. Yè kó nɛ n'yòǹ tḭ́ń wɔ̀ni mɛma, nɛ yàma dá n'cɛ̰ḭ́ kà nɛ́ m'pɛnti nɛ kó taá wɛɛ́-sa é feèda nɛ cɔ̰́ɔ̰̀di. ¹⁵ N mɔ́-mɔ́nń-dà kó nɛ kɔ̰́ɔ̰́ wɛmá nɛ kó wɛɛ́-ma, kà nɛ kà̰à̰tɔɔ̀pa p'oòcɔ̰́ǹ pú kó nɛɛ́ é mà nɔ̀hì, é yíí nɛ kɔ̰́ɔ̰́ yaǹfòùma kà pà bá nɛɛ́ é nɛ nɔ̀hì-nà. ¹⁶ Bá nɛ báàpa, nà nɛ màpa, nà nɛ kúcàpa, nà nɛ hɔ̰́ɔ̰́tà kpɛ́ɛpá, nà nɛ dóòpa kó nɛ taàa-á-ma kpɛ̰́m̀ma nɔ̀hi mɛhɛká kà pá kɔ̀ù nɛ nìpa dɔ́ɔ́di. ¹⁷ Nìpa wɛǹni kó nɛ sɛ̰dá-ma nà n kpɛ́mú. ¹⁸ Há̰kà, n'ɔɔ̀cɔ̰́ǹ kú yùku pú kó nɔ́dá teǹka bá kùcɔ̰́. ¹⁹ Ní n'wɛ̰́ɛ̰̀-nà. Ma kú bookú-dà nɛ kó dontá-ma nɛ wɔ̰ɔ̰̀ka.

²⁰ Kà Sèsíì tṵ́mà yɔ̀: Kà nɛ dɛ́hà tḭ́ń daadí kà ta̰nìpa nɛhù è yém̀ Sèdìsàdɛ́m̀, kà nɛ́ n'yá̰á̰ è yɔ̀ o pɔ́dáma wɔ̀ni-dà hɛ́tà-ní. ²¹ Ye wɔ̀ni, mɛ̀m̀pà kó m'péé-pa Sùdéè tempáàku mɛhɛká yònà é cocí-ma é dìsi ta̰à̰ka hḭ́ǹka. K'yè hɔ̰́tà mɛ̀m̀pà péé-pa Sèdìsàdɛ́m̀ mɛhɛká, kà pá cocí é yɛ̀ɛ̀ óò nátá-nà. Yè kó n'hɔ̰́tà mɛ̀m̀pà mɛ̀ɛ péé-pa yɛ̀ka mɛhɛká, pà koò dá kòǹ yɔtí. ²² Yè kó n'yòǹ daàka-dà Weèdi kó yɔ̰́ń-ka kú mɛhɛká ni nìku toòka, k'yé teha mìì wà̰tà-sa wɛǹni ni wɛmá mɛhɛká k'yé pa̰ná. ²³ Ye kó n'yòǹ náńkú sàku-dà poòpa mɛ̀m̀pà kó m'póń-pa ye kú daàka mɛhɛká, nà mɛ̀m̀pà kó n'yɔ̰ɔ̰̀di-pá. Wèéwèdo sào-dà kó m'péé ye teǹka mɛhɛká, kà Weèdi fɔ̰́di é dɔdi ye nìku hḭ́ǹka. ²⁴ Pà kó kɔ̀ù-ú-ma pa pàcɔ̰́ nà sepɛ̰ɛ̰̀ká, é cɛ̰ha tɔɔ̀pa é pà tanà teǹka tɔɔ̀ka wɛǹni mɛhɛká é pà kpemu. Boocí tɔcí kó nɔɔ̀nà-á-ma Sèdìsàdɛ́m̀, háá é n'sànà ci wɔ̀ni kó cɛ̰ɛ̰̀na-má.

Niìfòùo bíitá tóḿma-ní wɛmá

Dentá Màtíyéè 24.29-31; Mádíkì 13.24-27

²⁵ K'ó sɔ̰kadá è yɔ̀: Ye kú wɔ̀ni-dà yḭḭ́pa kó pa̰á̰-ma wèǹku mɛhɛká, nà cḭ̀ma mɛhɛká, nà hà̰hi mɛhɛká. Teǹka hḭ́ǹka, nìpa yàma kó cɔ̰ha-á-ma sàma, kà pa bɔ̀ti é m'pudì-nà dàmɛ́dì nɛ́ɛmá nà ma nɛ́ɛsa̰nhí wuùdimá. ²⁶ Nìpa kó m'maàhu-ú-ma mìì kó tɛ̀ni-sá-ní wɛǹni teǹka hḭ́ǹka, kà wantafɔ̰̀di pà kɔ̀ùdì, è yá̰á̰ hḭ́ǹka nɔɔ̀ti^a kó sa̰mpà-á-ma. ²⁷ Ye wɔ̀ni, pà kó dɛ́há-ma Niìfòùo bíitá kà tà cúti-ní wɔ́ɔ̀di mɛhɛká nà ta nɔɔ̀ti sàti é yíí nà ta wɛhimú sàmu. ²⁸ K'yèe kú niyà̰ cetà tḭ́ń daadí pa̰á̰ma, nɛ koò dá m'mɔɔ́ mɔí, kà nɛ́ pḭǹta nɛ yàma é n'yá̰á̰ è yɔ̀ nɛ fḭ́hìnamá-dà hɛ́ɛ́kú-ní.

Biɔhɔ̀namá ka̰nka̰mú tepú ti kɔ̰́nì-ma.

Dentá Màtíyéè 24.32-35; Mádíkì 13.28-31

²⁹ Kà Sèsíì é pà caka wɛbemú yohènamá è yɔ̀: Cɔ́ɔ́-nà ka̰nka̰mú tepú nà tená tɔɔ̀na wɛǹni. ³⁰ Kà nɛ dɛ́há kà nɛ fa̰à̰ti pɔ̰ǹni, nɛ yá̰á̰-ma è yɔ̀ bíhidí-dà tɔ́sí. ³¹ Ma cɔ̰́ɔ̰̀di-dà, kà nɛ dɛ́hà tḭ́ń daadí k'yèe kú niyà̰ pa̰kú, kà nɛ́ n'yá̰á̰ è yɔ̀ Weèdi wóòti-dà hɛ́tà-ní. ³² N nɛ cakú bemú-dà, wɔ̀ǹkù mɛnkù kú nìpa pú kó kpíí pa wɛǹni k'yèe kú niì wɛnnì mum pú tɛ̀ni. ³³ Hḭ́ǹka nà teǹka kó yɔ̀ɔ-ɔ́-ma, àmá n wɛmá pú kó yɔ̀ɔ daadí yènì.

Sèsíì teǹ nìpa è yɔ̀ pá n'you é n'ceí-n'ɔ̀ɔ tóḿma-ní

³⁴ Nɛ́ pa̰á̰ yɔkàma! Nɛ dá hédá kà dikàdikú sàku, nà nayà̰sàpu, é pɛ́ɛ́ nà fòùkù mɛnkù kú kpɛ́ɛsá dɔ́kàma sàma é tɛ̀ni é fḭntá nɛ yàma. Kà nɛ héè nɛ cɔ̰́ɔ̰̀di mɛma, ye daadì kó nɛ sɛ́ńtá-ma. ³⁵ Nì kó tɛ̀ni é sɛ́ńtá teǹka nìku wɛǹni, é n'yònà ká̰ńcḭ̀mu hɔ̰́ hḭmpú-dà num̀bííhí. ³⁶ Ye kú kpɛ́mú, nɛ dá é n'dɔɔ́. Nɛ́ n'dɔń Weèdi wɔ̀ka wɛǹni, k'yé teha kà nɛ́ dɛ́tá kpeèti é nɛdá mìì kó tɛ̀ni-sá-ní wɛǹni, é tṵ́má wáńtá nɛɛ́ é nɛɛ̀hi Niìfòùo bíitá yìhìka.

³⁷ Weǹtṵ́ṵká wɛǹni, Sèsíì de hɔ̰́ m'biɔhànì Weèdi wɛmá-dà Weèdi hɔ̰́ɔ̰̀ta mɛhɛká. Kà yohokú yodà, k'ò té taá é weń-ní ta̰à̰di pà toò-di òdífùna ta̰à̰di hḭ́ǹka. ³⁸ Ká̰ńyɛ̰̀ǹci wɛǹni, kà nìku wɛǹni té pìi é taá Weèdi hɔ̰́ɔ̰̀ta mɛhɛká, é tɛ̀i é besí o biɔhànamá.