Dúkì 20

Pà békú Sèsíì o nɔɔ̀ti péé-nà-sa-ní.

Dentá Màtíyéè 21.23-27; Mádíkì 11.27-33

¹ Daadí yènì, kà Sèsíì é m'biɔhànì nìku Weèdi hɔ̰́ɔ̰̀ta mɛhɛká, è kù cakú Weèdi wɛnaamá. Kà dɔ̀hàdi kpɛ̰́m̀ma nà Weèdi kpɛ̰́ńtìnùka biɔhànapá, nà Sùwífùpa kpɛ̰́m̀ma é bintá-ní é tɛ̀ni, ² óò béka è yɔ̀: Ti caka-ní, nà nɔɔ̀ti m̀mɔ́ńti-dà a pa̰kú-nà-ma ye kú niì-ní? Wod'àà pɛ̰ḭ nùdi k'à yè pa̰kú?

^3-4 Kà Sèsíì é pà tɛ̰́ná è yɔ̀: N mɛ̀ɛ té káá békàma màcɔ̰́mà-dà è kó nɛ béka. Woò tɔn-ní Ìsá̰à̰ k'ò cómù? Weèdi-dà nkɛ́ɛ̀ nìpa? N caka-nà-ní.

⁵ Ye wɔ̀ni, kà pá nɔhìnà pa cɔ̰́ɔ̰̀di mɛhɛká é caka pa tɔɔ̀pa è yɔ̀: Kà ti hḭ́n Weèdi-d'òò tɔn-ní, ò kó ti béka-á-ma è yɔ̀: Badà tee kà ti pú teháà o wɛmá? ⁶ Kà ti mɛ̀ɛ tɛ̰́nà è hḭ́n nìpa-d'òò tɔn-ní, nìku wɛǹni kó ti ká̰mu tá̰à̰ka-dà é ti kɔ̀ù, mìì tee-sá mɛnku d'oò tóńkú è yɔ̀ ò yòǹ Weèdi wɛtɛ̰́náko-dà dɛ́dɛ́í.

⁷ Ye wɔ̀ni, kà pá tɛ̰́ná è yɔ̀: Ti pú yá̰á̰ mɛ̀ǹǹ ò tɔn-kó-ní è yɔ̀ ó cóńtá nìpa. ⁸ Kà Sèsíì é pà tɛ̰́ná è yɔ̀: Kà mɛmá-dà, n mɛ̀ɛ té pú kó nɛ caka nà nɔɔ̀ti n pa̰kú-nà-ti ye kú niì-ní.

Wɛbemú yohènamá nà tɔntɔnsḭ̀ma.

dentá Màtíyéè 21.33-46; Mádíkì 12.1-12

⁹ Ye kú dàhàka, kà Sèsíì é caka nìku wɛbemú yohènamà mɛmà, è yɔ̀: Nìdo òcɔ̰́ǹ-dà de káá o yɛ̀di, é nì híúwá pɛ́ɛ̀sɔ̰ná, é pɛha tɔntɔm̀ma é nì pà ceá è yɔ̀ kà tebíiká biù nà mɛmpá kà pá n'tookú, é yíí ka̰há cà̰ǹku è kó yóka-ho. ¹⁰ Ye tebíiká bii tḭ́ń wɔ̀ni, k'ó tɔn o dapàǹn òcɔ̰́ ye yɛ̀di tɔntɔm̀ma pesá, è yɔ̀ p'óò kɔ̰́ɔ̰́-ní o kú tebíiká. K'ó tɛ̀i, k'yèe tɔntɔm̀ma óò cɛ̰ɛ̰́, óò podí, óò bɔ̀hà-ní o nɔɔ̀kpehí. ¹¹ K'yèe yɛ̀di yaǹn é tṵ́má tɔn o dapàǹn tɔɔ̀o pa pesá. K'ó tɛ̀i, kà pà mɛ̀ɛ t'óò podí, óò tèùnà é yɔ̀ɔ óò bɔ̀hà-ní o nɔɔ̀kpehí. ¹² K'ó tṵ́má é tɔn ta̰á̰ko. Mɛnn, kà p'óò podí, óò pa̰á̰ bòka, óò dèna ye yɛ̀di mɛhɛká. ¹³ Ye wɔ̀ni, k'yèe yɛ̀di yaǹn yɔ̀: Ntɛ́ n hɔ̰mù-dà? N kó tɔn n bíidatá-dà n dɔ́sí-tà sukú, k'yè púdí pà kó tà wampa-á-ma. ¹⁴ Ye bíitá ta̰ntà tḭ́ń wɔ̀ni, k'yèe tɔntɔm̀ma é tà dɛ́há, kà pá caka pa tɔɔ̀pa è yɔ̀: Ǹtɛ mɛ̀ǹǹ kó ya̰dá é n'tee-kó ye yɛ̀dì. T'óò kɔ̀ù-nà k'yé teha kà ní hḭn ti kpɛ́ɛdí. ¹⁵ K'ó tɛ̀ni, kà p'óò yɔ̰́ɔ̰́pa, óò dèna ye yɛ̀di bɛ́ɛ́kú óò kɔ̀ù. Kà Sèsíì há̰ pà béka ye wɔ̀ni è yɔ̀: Ntɛ́ ye yɛ̀dì yanǹ kó pà hḭmà? ¹⁶ Ò kó taá-ma è tɛ̀i é kɔ̀ù ye yɛ̀dì tɔntɔm̀ma, é nì cɛ̰̀a̰ tɔɔ̀pa. Ye nìku yeèkaà-ma mɛma, kà kù yɔ̀: Kɛ́ì! Weèdi dá yè tɛɛ̀ní!

¹⁷ Kà Sèsíì é pà n'sɛ̰̀ɛ̰ è yɔ̀: Weèdi wɛmá pà wà̰tà-mà mɛmà ti cakú è yɔ̀ ba? Pà wà̰tà è yɔ̀:

Tá̰à̰di maápa de wɛ́i-dí,

mɛní-dà hḭn tá̰à̰di

mɛ̀nì púsí-di sukú nàmɔ̀ni kpɛ̰kpɛ̰kamá^a.

¹⁸ Nìdo mɛ̀ǹǹ kú wɛnnì kó dɔdi-kó ni hḭ́ǹka, ò kó bɔ́-bɔ́kádá-ma. Kà nì mɛ̀ɛ dɔdi nìdo hḭ́ǹka, nì k'óò nun-nuncí-ma.

Dàm̀póò boóma Hɔ̀dɔ́m̀ wóosào.

Dentá Màtíyéè 22.15-22; Mádíkì 12.13-17

¹⁹ K'yèe Weèdi kpɛ̰́ńtìnùka biɔhànapá, nà dɔ̀hàka yam̀ma kpɛ̰́m̀ma é bantá è yɔ̀ Sèsíì de wɛì mɛmpá-dà n'ɛ̀ɛ wɛbemù yohènamà. Kà pá cemá m'pɛnti pà kó hḭmpú óò cɛ̰ɛ̰́, è há̰ wani nìku. ²⁰ Ye wɔ̀ni, kà pá tɔn nìpa o pesá, kà pà kó tɛ̀i m'pa̰kú é n'yònà niìcoópa. Kà pá tɛ̀i óò n'cɔ́ti. Pà de kpɛ̀i óò díhìna wɛmá-dà k'ó yetá, kà p'óò cɛ̰dí óò tàa pa yɔtí yìkàǹyìdo nɔ̀hi mɛhɛká, mɛnń mɛ̀ǹǹ káá-ko nɔɔ̀ti. ²¹ Kà p'óò béka è yɔ̀: Dakpɛ̰́ǹn, ti yá̰á̰-ma è yɔ̀ a wɛì-sa n'àa biɔhànì-sa coó-ma. A pú kɛɛ̀hu nìpa wɛhimú, àmá, a biɔhànì wɛbemú-dà, Weèdi hḭ́n tí n'fòùkaàma kú bookú. ²² Ti caka-ní, ti kpɛ̰́ńtìnùka hḭ́n tí m'bopù-ú-dà dàm̀póò Hɔ̀dɔ́m̀ wóosào nkɛ́ɛ̀ k'èè yedáà?

²³ Àmá, kà Sèsíì é bantá pa seúma é pà caka è yɔ̀: ²⁴ N bɛka-nà-ní díimáàdi nìcɔ̰́. Wodà tee dìkù nà yèdì mɛ̀nì dàdi-dì ni hḭ́ńkà? Kà p'óò tɛ̰́ná è yɔ̀: Hɔ̀dɔ́m̀ wóosào-dà. ²⁵ Ye wɔ̀ni, k'ó pà caka è yɔ̀: Nɛ́ kɔ̰́ɔ̰́ Hɔ̀dɔ́m̀ wóosào mìì yòǹ-sa o kpɛ́ɛsá, é kɔ̰́ɔ̰́ Weèdi mìì mɛ̀ɛ té yòǹ-sa ni kpɛ́ɛsá. ²⁶ Pà pú dɛ́hà yetádi nìcɔ̰́nì o wɛmá mɛhɛká nìku yìhìka. K'yé múná pà dii, kà pà yɔ̀ wá̰m pà koò pú cḭ́háà.

Békàma kpíípa yá̰ńtáma hḭ́ǹka

Dentá Màtíyéè 22.23-33; Mádíkì 12.18-27

²⁷ Kà Sàdúkìpa, nìpa mɛ̀m̀pà pú dań-pa è yɔ̀ kpíípa kó wáńtá yá̰ńtá, kà pa pàcɔ̰́ é tɛ̀ni Sèsíì pesá óò béka ²⁸ è yɔ̀: Dakpɛ̰́ǹn, ǹtɛ kpɛ̰́ńtìnùdi Mɔ̀yísì kɔ̰́ɔ̰̀-di: Kà nìi káá poòo è kpíi è p'óò pɛɛ̀-nà bíída, o yaǹn yònà é hɔɔ̀ta-á-ma ye pooò óò pɛɛ́-nà bííhí k'yé teha k'òo fùdi dá fédí. ²⁹ Ǹtɛ há̰kà kà nìi pàyehì de péé, è yòǹ kúcàpa cɔ̰́ɔ̰̀di. Kà Pɔ̀ɔ é kádá poòo é kpíí ò pú pɛdà bída. ³⁰ Kà Sàbi é hɔɔ̀ta o poòo é kpíí, ò mɛ̀ɛ té p'óò pɛɛ̀-nà bída. ³¹ Kà Bíɔ́ mɛ̀ɛ t'óò hɔ̀ta é kpíí ò p'óò pɛɛ̀-nà bíída. Pa yehìka, kà pá hɔɔ̀ta ye poòo é kpíí, p'oòcɔ̰́ǹ p'óò pɛɛ̀-nà bída. ³² Pà kpíi-má pa wɛǹni mɛma, k'yèe poòo mɛ̀ɛ té tṵṵ̀na é kpíí. ³³ Kpíípa yá̰ńtá daadí, pa yehìkà mɛhɛkà, ò kó n'yòǹ pa woò kú pooò-dà, è yá̰á̰ pa wɛnnì de ò kádà-á-dà-ma?

³⁴ Kà Sèsíì é pà tɛ̰́ná è yɔ̀: Wɔ̀nì mɛnì kú daapá nà ni poòpa tóńkú-ma pa tɔɔ̀pa. ³⁵ Àmá, mɛ̀m̀pà coó-pa è sànà pá yá̰ńtá kpíípa yá̰ńtáma daadí, é n'fòù fòùmu mɛ̀mù penì-pu-ní mɛhɛká, daapá koò pú kó kádá poòpa, poòpa mɛ̀ɛ koò pú kó yan. ³⁶ Pà koò pú kó nɛɛ́ é kpíí, mìì tee-sá, pà kó n'yònà Weèdi tɔntɔndipá-dà. Pà kó n'yòǹ Weèdi bííhí-dà, mìì tee-sá, mɛní-dà pà yá̰hìnà-ní kpííku mɛhɛká. ³⁷ Mìì héé-sa kpíípa yá̰ńtáma wɛmá, Mɔ̀yísì de mà wekànà-á-ma dɛ́dɛ́í è yɔ̀ pà kó yá̰ńtá-ní. Ò de mà wɛdà Weèdi d'oò fodà-sa-dà túku mɛhɛká kà kù cɔ́hú ha̰mú àá pú yon, k'ó yíí Bateó è yɔ̀: Àbààhám̀ Weèdi, Ìsáákì Weèdi nà Sàkɔ́pù Weèdi^b. ³⁸ Weèdi pú yòǹ kpíípa Weèdi, nì yòǹ fòùpa Weèdi-dà, mìì tee-sá ni kú pesá, pa wɛǹni yòǹ fòùpa-dà.

³⁹ Kà Weèdi kpɛ̰́ńtìnùka biɔhànapá pàcɔ̰́pà é tódá wɛmá è yɔ̀: Dakpɛ̰́ǹn, a tɛ̰́nà-á-ma k'yè sà dɛ́dɛ́í. ⁴⁰ Pà de koò pú teháà é pádá kṵnnɔ̀ǹfa óò béka békàma tɔɔ̀ma.

Sèsíì *Kídísì nà wódo Dàfítì, pà yòm̀pu.

Dentá Màtíyéè 22.41-46; Mádíkì 12.35-37

⁴¹ Kà Sèsíì é pà béka è yɔ̀: Ntɛ́ nìpa kó nɛɛ́ é hḭmà è yɔ̀ *Kídísì yòǹ Dàfítì yaàbíidí-dà? ⁴² Dàfítì mɔ́nń-dà wɛdà duntàma nɛ́yɛ̰̀ǹci pɔ̀kàta mɛhɛká è yɔ̀:

Bateó Weèdi cakáà n Teó è yɔ̀:

Kaàdi-ho n nɔ̀kàǹheùmà,

⁴³ háá é n'sànà n kó héé-ma

k'á cèn a kà̰à̰tɔɔ̀pa hḭ́ǹka.

⁴⁴ Dàfítì mɔ́nń ò yún o Teó-dà. Ntɛ́ yè kó hḭmà k'ó tṵ́má n'yòǹ-nà Dàfítì yaàbíidí?

Nɛ́ pa̰á̰ yɔkàma nà Weèdi kpɛ̰́ńtìnùka biɔhànapá.

Dentá Màtíyéè 23.1-36; Mádíkì 12.37-40

⁴⁵ Kà nìku wɛǹni é n'káà ò besí, k'ó caka o dapàm̀ma è yɔ̀: ⁴⁶ Pa̰á̰-na yɔkàma, nà kpɛ̰́ńtìnùka biɔhànapá. Pà naanà é báá tókodɛutí-dà é n'centì peètamá bɛ̀m̀bɛ̀ka mɛhɛká, kà pà pà cùnì è pà dɔnti. Pà naanà kaàceceká-dà Weèdi wɛmá biɔhà-nàmɔ̀ka mɛhɛká nà dikàdikú péé-sa. ⁴⁷ Mɛmpá-dà fèùdì kpíipoòti káá-sa wɛǹni, àá té tódá wɔ̀ni sàdi é n'dɔń Weèdi è kpɛ̀i pá pà yíí niìcoópa. Pa kú toòka yɔ̰́ḿma kó wáńtá é ha̰tá-ma tɔɔ̀pa kpɛ́ɛmá.