Dúkì 23

Pà tanà Sèsíì Pìdátì pesá

Dentá Màtíyéè 27.1-2, 11-14; Mádíkì 15.1-5; Ìsá̰à̰ 18.28-38

¹ Kà pá yídá pa wɛǹni nùdi nìcɔ̰́ é tanà Sèsíì Pìdátì pesá. ² Kà pá tɛ̀i ye pesá òò pṵ́ṵ́nì è toò: Ti dɛ́hà nìì mɛnǹ-dà k'ò yehènì ti nìpa. Ò pà cakú è yɔ̀ pà dá bodá dàm̀póò-dà Hɔ̀dɔ́m̀ wóosào, è tṵ́mà cakú è yɔ̀ mɔnń-dà yòǹ Kídísì, ti wódo.

³ Kà Pìdátì óò béka è yɔ̀: A yòǹ Sùwífùpa wódo-dà? K'óò tɛ̰́ná è yɔ̀: A mà yɔ̀ɔ wɛdápu. ⁴ Ye wɔ̀ni, kà Pìdátì é caka dɔ̀hàka yam̀ma kpɛ̰́m̀ma nà nìku mɛ̀ǹkù de yè péé-ku è yɔ̀: N pú dɛ́hà yetádi nìcɔ̰́nì ye dɔɔɔ̀ mɛnǹ hḭ́ǹka.

⁵ Àmá, kà pá yeda é dɔ̀hà è yɔ̀: Ò fukù nìku-dà o biɔhànamá mɛhɛká è yɔ̀ kú yeda todí. Ò yè cetà-ní Kàdìdéè tempáàku mɛhɛká-dà, éè cèn nà Sùdéè wɛnnì, hádí éè ta̰hìna-ní miì.

Pà tanà Sèsíì Hèdótì pesá

⁶ Pìdátì yèkaà-ma kà pá yíí Kàdìdéè yèdi, k'ó béka è yɔ̀: Ye dɔɔɔ̀ yòǹ Kàdìdéè kóoó-dá-à?

⁷ Ò yèkaà-ma è yɔ̀ Sèsíì yɛ̀ni Hèdótì wóoteǹka mɛhɛká-dà, k'ó kɔ̰́ɔ̰́ nùdi ye wɔ̀ni è yɔ̀ p'óò tanà o pesá. Yè de hɔ̰́tà ye kú daàka mɛhɛká, ò péé-ma Sèdìsàdɛ́m̀. ⁸ Kà p'óò tɛɛ̀-ní Hèdótì pesá, k'óò dɛ́há, k'yóò naaka sàma dɛ́dɛ́í. Ò de kpɛ̀i óò n'dɛ́hà-á-ma k'yè dɛu mìì tee-sá, ò de yeèkaà-á-ma kà pà wɛì o wɛmá, k'ò ní n'dɔ́sí òò dɛ́hà k'ó paá̰ pɔ́ńtápa̰á̰ma. ⁹ K'óò béka békàma dɔ́ɔ́di, àmá Sèsíì p'óò tɛ̰́nà màcɔ̰́mà. ¹⁰ Kà dɔ̀hàka yam̀ma kpɛ̰́m̀ma nà Weèdi kpɛ̰́ńtìnùka biɔhànapá nɛɛ̀hi ye pesá òò pṵ́nì dɛ́dɛ́í. ¹¹ Hèdótì n'ɔ̀ɔ sósìpa, kà p'óò dɛhí óò pa̰á̰ yɔ̰́sàma kpɛ́ɛsá. Ye kú dàhàka, k'ó héé kà p'óò báná díikpecí tókédi óò tɛ̰́ná Pìdátì pesá. ¹² Yè de hɔ̰́tà-ho Hèdótì nà Pìdátì pà kɔ̰̀ǹti-nà-á-ma pa tɔɔ̀pa, àmá ye kú daadí, kà pá hḭn dóòpa.

Pà dènà nùdi dèǹdèni è yɔ̀ pá kɔ̀ù Sèsíì.

Dentá Màtíyéè 27.15-26; Mádíkì 15.6-15; Ìsá̰à̰ 18.39 háá19-16

¹³ Kà Pìdátì é tíká Weèdi dɔ̀hàka yam̀ma kpɛ̰́m̀ma, nà yɔtí kpɛ̰́m̀ma, é pɛ́ɛ́-nà nìku, ¹⁴ é pà caka è yɔ̀: Nɛ n tɛɛ̀-ní dɔɔɔ̀ mɛnǹ é n caka è yɔ̀ ò yehènì nìku-dà. Ǹtɛ há̰kà, n ò békáà nɛ yìhìka-dà n pú dɛ́hà o yetádi n'ɔɔ̀ pṵ́ṵ́nì-sa kú hḭ́ǹka. ¹⁵ Hèdótì mɛ̀ɛ té pú dɛ́hà o yetádi, mɛmá-dà tee òò ti tɛ̰́nà-ma-ní. Ye dɔɔɔ̀ pú pa̰à̰ sḭ̀ḭ̀ma màcɔ̰́mà kà mà sànà t'óò kɔ̀ù. ¹⁶ Ye kpɛ́mú, n kó héé kà p'óò dèda míǹti-dà nà dáàfa é yɔ̀ɔ ká n ò wɛ́í. [ ¹⁷ Núǹtiyɛ̀ɛ̀ma kúúdi wɛǹni, Pìdátì de yònà è té pà wɛ́í kpenáku kùcɔ̰́-dà^a]

¹⁸ Kà pa wɛǹni é cemá kpákada è yɔ̀: Kɔ̀ù ye dɔɔɔ̀ mɛnǹ, é ti wɛ́í-ní Bàdàbásì! ¹⁹ Pà de kpenà Bàdàbásì kódedí mɛhɛká, è yɔ̀pu kpɛ́mú-dà pà de kɛ̰̀ḭ-nà pa yɔtí kpɛ̰́m̀ma, k'ó kɔ̀ù nìdo.

²⁰ Pìdátì há̰ de kpɛ̀i-má é wɛ́í Sèsíì tá, k'ó tṵ́má wɛɛ́-nà ye nìku. ²¹ Kà pá tódá hodí o hḭ́ǹka è yɔ̀: Ò kpɛ̰́ḭ́ kpíidɔkú hḭ́ǹka! Ò kpɛ̰́ḭ́ kpíidɔkú hḭ́ǹka! ²² Kà Pìdátì é tódá wɛmá cɔ̀kumá ta̰á̰ma é pà béka è yɔ̀: Kpákpààma m̀mɔ́ma-dà ò pa̰à̰-ma? N pú dɛ́hà yetádi nìcɔ̰́nì mɛ̀nì sà-nà-di t'óò kɔ̀ù. N kó héé kà p'óò dèe míǹti-dà nà dáàfa, ká n ò wɛ́í. ²³ Àmá, kà pá dɔ̀hà é tódá hodí dɛ́dɛ́í è yɔ̀ p'óò kpɛ̰́ḭ́ kpíidɔkú hḭ́ǹka! Kà pa hodí é sɛɛ̀da Pìdátì. ²⁴ Ye wɔ̀ni, k'ó tóó ta̰kadáma è yɔ̀ ò kó pa̰á̰ p'òò cɔ̀hu-sá. ²⁵ K'ó wɛ́í pà d'oò cɔ̀hu è yɔ̀ ó wɛ́í-ko, pà de kpeé-ko è yɔ̀pu kpɛ́mú pà de kɛ̰̀ḭ-nà pa yɔtí kpɛ̰́m̀ma k'ó kɔ̀ù nìdo. Àmá Sèsíì mɛnn, k'óò tàa pa nɔ̀hi mɛhɛká è yɔ̀ p'óò pa̰á̰-nà pà kpɛ̀i-sá.

Pà kpɛ̰́ḭ́ Sèsíì kpíidɔkú hḭ́ǹka.

Dentá Màtíyéè 27.32-44; Mádíkì 15.21-32; Ìsá̰à̰ 19.17-27

²⁶ Kà pá n'toó Sèsíì òò kɔ́ɔ́-nà kɔ̀ùpu, é peèta-nà Sìmɔ́ɔ̀ k'ò yòǹ Sìdɛ́nì yɔtí kóoó, k'ò kṵnti-ní yɛ̀di. Kà p'óò cɛ̰ɛ̰́ óò bukaná ye kpíidɔkú è yɔ̀ ó n'tṵ̀n Sèsíì dàhàka.

²⁷ Kà nìku dɔ́ɔ́di tṵ̀n Sèsíì. Ku mɛhɛká, kà poòpa dɔ́ɔ́di péé è kɔǹ è híkápú o kpɛ́mú. ²⁸ K'ó fitá pa bɛ́ka é pà caka è yɔ̀: Sèdìsàdɛ́m̀ poòpa-nà, nɛ dá é n'kɔǹ n kpɛ́mú! Kɔń-nà pɛ́ɛ̀kaà nɛ cɔ̰́ɔ̰̀di kpɛ́mú nà nɛ bííhí kpɛ́mú! ²⁹ Wɔ̀ni-dà pení kà pà kó n'yɔ̀: Yé n'nadi poòpa mɛ̀m̀pà yòǹ-pa poyɛ̰hí, nà mɛ̀m̀pà pú pɛdà-pa è mɛ̀ɛ pú yɔ̰ɔ̰̀daà! ³⁰ Ye wɔ̀ni, nìpa kó caka-á-ma ta̰à̰ka è yɔ̀: Dɔɔ-nà-ní ti hḭ́ǹka! É yíí caka ta̰hí è yɔ̀: Ti dáń-dáná-nà-ní. ³¹ Kà pà hḭn mɛma kú bookú dabóhikú, dakpɛíku há̰kà tá? ³² Kà sósìpa é pɛ́ɛ́ é tóó-nà niìsḭ̀m̀ma pàdɛ́ɛ́ è kó taá pà múná-nà Sèsíì é kɔ̀ù.

³³ Kà pá tɛ̀i bɛ̀m̀bɛ̀ni nìcɔ̰́nì kà pà nì tonà yukókóku, é tɛ̀i ye pesá é kpɛ̰́ḭ́ Sèsíì kpíidɔkú hḭ́ǹka, é pɛ́ɛ́ é kpɛ̰́ḭ́-nà ye niìsḭ̀m̀ma pa dɛ́ɛ̀ka, òcɔ̰́ o heùma, tɔɔ̀o o cà̰ǹkamá. ³⁴ Kà Sèsíì é cɔhà Weèdi è yɔ̀: N Báà, pà dèda pa sḭ̀ḭ̀ma, pà pú yá̰á̰ pà pa̰kú-sa. Kà pá ta̰á̰ o báatí tɛ́tɛ́ é tì totá. ³⁵ Kà nìku nɛɛ̀hi ye pesá è wáń. Àmá, kà Sùwífùpa kpɛ̰́m̀ma mɛmpa ò dɛhikú é tonà: Ò fḭ́hìnà nìpa tɔɔ̀pa, ó fḭ́hìna o cɔ̰́ɔ̰̀di-ì k'ò yòǹ Weèdi ta̰kadáko-dà nì tɔn-kó-ní! ³⁶ Kà sósìpa mɛ̀ɛ t'óò dɛhikú. Kà p'óò hɛ́tá-ho óò kɔ̰́ɔ̰́ dìfɛ̰́ɛ̰̀ naàkpáńkpáǹni, ³⁷ è yɔ̀: K'à yòǹ Sùwífùpa wódo-dà, k'á fḭ́hìna-hɔ̰ a cɔ̰́ɔ̰̀di! ³⁸ Kà pá wa̰à̰ta wà̰a̰cí dawɛɛtá hḭ́ǹka é cì dàna o kpíidɔkú yudí hḭ́ǹka kà cì tonà: Mɛnǹ yòǹ Sùwífùpa wódo-dà.

³⁹ K'yèe niìsḭ̀m̀ma pà pɛ́ɛ̀ óò kpɛ̰́ḭ́-nà-pa, p'oòcɔ̰́ ò tɛ̰́nì pà̰pà̰hì è tonà: Fɔ̰́ń-dà baà hḭ́n a yòǹ Kídísì'à? Fḭ́hìna a cɔ̰́ɔ̰̀di é pɛ́ɛ́ ti fḭ́hìn'ɛɛ̀! ⁴⁰ Kà tɔɔ̀o óò kɛ̰̀ḭ-nà-ní è yɔ̀: A pú wani Weèdi-ì? Fɔ̰́ń nà mɛnń, nɛ toyɔ̰́ńti tìcɔ̰́-dà. ⁴¹ Tḭ́ńti kú toòkà yɔ̰́ḿmà coó-dà è yá̰á̰ ti pa̰á̰ma-dà mà sànà. Àmá mɛnn pú pa̰à̰ kpákpààma màcɔ̰́mà. ⁴² Ye kú dàhàka, k'ó caka Sèsíì è yɔ̀: Á deǹta n kpɛ́mú, a kó wódí tḭ́ń daadí nìpa hḭ́ǹka nà nɔɔ̀ti. ⁴³ Kà Sèsíì óò tɛ̰́ná è yɔ̀: M'a cakú bemú-dà, yeǹ-yenì, a kó nà n m'péé-nà-á-ma Wɛ̀ɛ̀di hɔ̰́ɔ̰̀ta mɛhɛká.

Sèsíì kṵ́mú.

Dentá Màtíyéè 27.45-56; Mádíkì 15.33-41; ìsá̰à̰ 19.28-30

⁴⁴ Wèǹku beé-nà tḭ́ń wɔ̀ni yuùka hḭ́ǹka kà teǹka é biikà ka wɛǹni, é n'yòǹ mɛma háá kà máàku màta̰a̰ é yɔ̀ɔ potá. ⁴⁵ Wèǹku hḭn tḭ́ń wɔ̀nì cḭ̀m̀, kà kùdáasàpu mɛ̀mù de ca̰ncí-pu Weèdi nàmɔ̀ǹwentí, é cɛ́tá mu cɔhɔ̀ka é hḭn màdɛ́ɛ́. ⁴⁶ Ye wɔ̀ni, kà Sèsíì é hoda kpeéma è yɔ̀: N báà, n tanì n sèdi a nɔ̀hi mɛhɛká-dà. Ò wɛdà-ma mɛma é yɔ̀ɔ, é tɔ̰ɔ̰̀ta. ⁴⁷ Hɔ̀dɔ́m̀ sósìpa dapàǹkpɛ̰́ǹn mɛ̀ǹǹ de péé-ko ye pesá dɛ́hà-ma mìì de pa̰à̰-sa, k'ó duntà Weèdi è yɔ̀: Nà wɛbemú-dà, ye dɔɔɔ̀ pú pa̰à̰ sḭ̀ḭ̀ma màcɔ̰́mà.

⁴⁸ Nìku mɛ̀ǹkù de tɛ̀ni-kú-ní dentápu, kù dɛ́hà-ma mìì de pa̰à̰-sa wɛǹni, kà kú n'tóńti è kṵnti-ho kà ku yàma cɔ̰háà dɛ́dɛ́í. ⁴⁹ Kà Sèsíì dóòpa wɛǹni nà poòpa mɛ̀m̀pà d'oò bɛ́hìnà-pa-ní nà Kàdìdéè, kà pà nɛ̀hi nà dɛùma è wáń mìì pa̰kú-sa wɛǹni.

Sèsíì dánáma

Dentá Màtíyéè 27.57-61; Mádíkì 15.42-47; Ìsá̰à̰ 19.38-42

⁵⁰ Nìi òcɔ̰́ǹ-dà de péé pa sídàma tíkásàma yudí mɛhɛká kà p'òò toò Sòsɛ́fù. Ò de yòǹ niìmɔ́nń-dà è tṵ́mà coó. ⁵¹ Mɛnn de pú teháà o tɔɔ̀pa de ta̰kadà-di nùdi, nà pà de pa̰à̰-sa. Ò de yòǹ Sùwífùpa yɔtí pà toò-ti Àdìmàtéè kóoó-dà. Ò mɛ̀ɛ té de ceí-ma Weèdi wóòti tɛ̀mmá-ní. ⁵² K'ó yíí é taá Pìdátì hɔ̰́ɔ̰̀ta, é tɛ̀i óò cɔ̀hà nùdi è yɔ̀ óò kɔ̰́ɔ̰́ Sèsíì wɔ̰̀ǹku k'ó kù dáná. ⁵³ Ye kú dàhàka, k'ó taá é cúhìna-ní o wɔ̰̀ǹku kpíidɔkú hḭ́ǹka, é kù pɔ̰á̰ kúdáapɛ́ta, é taá é kù tàa kpíifɔ̰̀ɔ̰kú kà pà kù tṵṵ tá̰a̰beèdi mɛhɛká. Ye kpíifɔ̰̀ɔ̰kú, pà de mum pú kù tàà nìdo. ⁵⁴ Yè de yòǹ Yúédi daadí-dà, kà Sùwífùpa damuhipàdi kó cetá yohokú.

⁵⁵ Kà poòpa mɛ̀m̀pà de bɛ́hìnà-pa-ní Sèsíì nà Kàdìdéè, é bɛ́hìna Sòsɛ́fù é tɛ̀i é dɛ́há ye híúdi nà pà de dɔkáàma o wɔ̰̀ǹku. ⁵⁶ Kà pá fitá é kòǹ yɔtí mɛhɛká, é tɛ̀i é pɛha kɔ̀ma nà tùdàdépa nɔ́ɔkpekú kpɛ́ɛpá. Damuhipàdi daadí, kà pá muhipa é n'yònà Weèdi kpɛ̰́ńtìnùka mà hḭ́mpú.