Dúkì 15

Wɛbemú yohènamá nà hɔ̰̀fa mɛ̀ǹfà fée-fá kà pá tṵ́má fà dɛ́tá.

Dentá Màtíyéè 18.12-14

¹ Kaàcáhàpa nà niìsḭ̀m̀ma tɔɔ̀pa wɛǹni, kà pá tɛ̀ni Sèsíì pesá è kò besí o wɛmá. ² K'yé cemá dɔnka Fàdísìpa nà Weèdi kpɛ̰́ńtìnùka biɔhànapá, kà pà kɔ̰̀ǹti è toò: Ye dɔɔò mɛnǹ coní niìsḭ̀ma-dà sukú è pɛ́ɛ̀ pà yon-nà.

³ Ye wɔ̀ni, kà Sèsíì é pà caka wɛbemú yohènamà mɛmà è yɔ̀: ⁴ Nɛ woò mɔ́ńn-dà kó n'káá nɛ mɛhɛkà o hɔ̰̀ci kɔ̀ta, kà fàcɔ̰́ há̰ fédí, k'ò pú n'hédà hɔ̰ɔ̰̀cɛ̰nkú mɛhɛká mɛ̀ǹcì kaá-ci è yòǹ púwɔ́ì nà cìwɔ́ì, é taá ye mɛ̀ǹfà fée-fá pɛhàpu, é n'yòǹ mɛma háá ò kó fà dɛ́tá tḭ́ń wɔ̀ni? ⁵ Ò fà dɛ́tà tḭ́ń wɔ̀ni, nà yaǹnaakú-dà ò kó fà bukadá-ma-ní, ⁶ é koní hɔ̰́ɔ̰̀ta, é tɛ̀ni yíí o dóòpa n'ɔ̀ɔ dentɔɔ̀pa é pà caka è yɔ̀: Ya̰ní n dii-nà wɛ̀ɛ̀di, mìì tee-sá n dɛ́tà-ní n hɔ̰̀fa mɛ̀ǹfà de fée-fá. ⁷ Ma cɔ̰́ɔ̰̀di-dà ká n nɛ caka, kà niìsḭ̀ǹn òcɔ̰́ bútà o sḭ̀ḭ̀ma dàhàka, yaǹnaakú mɛ̀ǹkù hɔ̰́ m'péé-ku hḭ́ǹka sàka mɛhɛká hɔ̰́ ha̰tá-ma mɛ̀ǹkù hɔ̰́ m'péé-ku, kà nìpa púwɔ́ì nà pàwɔ́ì coó k'yè koò pú békú pá bútá pa sḭ̀ḭ̀ma dàhàka.

Wɛbemú yohènamá nà díimáàdi mɛ̀nì fée-dí kà pá nì dɛ́tá.

⁸ Kà Sèsíì tṵ́mà yɔ̀: Poòo wodà kó n'káá díimáàka píta, è há̰ féná nìcɔ̰́, è pú n'tidà ha̰wèta é nì pɛha sukú, é pɛ́dá hɔ̰́ɔ̰̀ta háá ò kó nì dɛ́tá tḭ́ń wɔ̀ni? ⁹ Ò nì dɛ́tà tḭ́ń wɔ̀ni, é yíí o dɔ́ɔ̀pa n'ɔ̀ɔ dentɔɔ̀pa é pà caka è yɔ̀: Ya̰ní é n dii-nà wɛ̀ɛ̀di, mìì tee-sá n dɛ́tà n díimáàdi mɛ̀nì de fée-dí. ¹⁰ Ma cɔ̰́ɔ̰̀di-dà ká n nɛ caka, yaǹnaakú-dà hɔ̰́ n'dɛɛ̀ Weèdi tɔntɔndipá pesá, kà niìsḭ̀ǹn òcɔ̰́ bútà o sḭ̀ḭ̀ma dàhàka.

Wɛbemú yohènamá nà bíitá mɛ̀ǹtà fée-tá kà pá tà dɛ́tá.

¹¹ Kà Sèsíì tṵ́mà yɔ̀: Dɔɔ̀ɔ òcɔ̰́ǹ-dà de péé è káá bíidahí hìdɛ́ɛ́. ¹² Daadí yènì, kà sḭ̀m̀mɔ́ǹta é caka ta báàa è yɔ̀: N báà, n kɔ̰́ɔ̰́-ní a káma mɛhɛká a kó wáńtá kpíí ká n kpàa-sá. Mɛmá-dà, k'yèe báàa é pà totá o káma. ¹³ Kà daàka kàcɔ̰́kà é ka̰há, k'yèe sḭ̀m̀mɔ́ǹta é yɛ-yɛda ta kú kpààti ti wɛǹni, é tódá ti dící é ka̰há cà̰ǹku heedí dɛudí. Kà tá tɛ̀i ka bɛ́ka, é n'fòù fòùkpákpààmu, é ya-yakapa ta dící wɛǹni. ¹⁴ Tà dii tḭ́ń daàdi ye dící é yɔ̀ɔ, kà koǹsàdi há̰ dúú-ní ye heedí, kà tá mɔ́ńka tà kó dii-sá. ¹⁵ Kà tá taá é pɛha tɔmú ye heedí dɔɔ̀o òcɔ̰́ǹ kú pesá, k'ó tà tanà o yɛ̀ka, kà tà kó n'diinì o fà̰ǹkàti. ¹⁶ Kà tà té n'kpɛ̀i é dii ye fa̰nkàdití, òcɔ̰́ǹ há̰ pú kó tì tà pa̰a̰. ¹⁷ Kà daadí é pɛdá, kà tá kaàdi é mahà ta yàma mɛhɛká ta pemá hḭ́ǹka, é caka ta cɔ̰́ɔ̰̀di è yɔ̀: N báàa dehèpa wɛǹni hɔ̰́ dii-í-ma dipú é yó hɛ̰ka, kà mmí há̰ péé mìì kà kòni n kɔdì. ¹⁸ N kó tón-ń-ma n báàa pesá é tɛ̀i óò caka è yɔ̀: N báà, m'a yetà-nà-á-ma, é tṵ́má yetá-nà Weèdi. ¹⁹ N koò pú sànà á n yíí a bíitá. N tódá é n kpáhìna a deho òcɔ̰́. ²⁰ Kà tá yídá é tón è kòǹ ta báàa pesá. Kà tá m'pàti-ho hɔ̰́ɔ̰̀ta, kà ta báàa é tà dɛ́há-ní nà deùma, kà séèma óò cɛ̰ɛ̰́ sàma. K'ó cocí é taá tà codá-ní sukú nà nɔ̀hi hìdɛ́ɛ́. ²¹ K'yèe bíitá óò caka è yɔ̀: N báà, m'a yetà-nà-á-ma é tṵ́má yetá-nà Weèdi. N koò pú sànà á n yíí a bíitá. ²² Ye wɔ̀ni, kà ta báàa é yíí o dehèpa é pà caka è yɔ̀: Taá tóó-nà-ní fen-fem̀ma tókesàdi mɛ̀nì suu-nà-di tɔɔ̀ka wɛǹni é tɛ̀ni é báná n bíitá! Tà kɔ̰́ɔ̰́-nà mámú nà nɛ̀ùti kà tá fḭ́ḭ́! ²³ Taá é tóó-nà-ní ye naàdapàni fɔ̰̀ǹfɔ̰̀ni ti de hḭ́ḭ́-di é tɛ̀ni nì kɔ̀ù, kà tí dii é ya̰nkà kúúdi, ²⁴ è yá̰á̰ n bíítà mɛntà, yè yònà tà de kpíi-má-dà é tṵ́má foùda, tà de fée-má, ká n tṵ́má tà dɛ́tá. Ye wɔ̀ni, kà pá cetá kúúdi ya̰nkàpu.

²⁵ Pà hɔ̰n mɛma, è hɔ̰́tà pɔ̀ɔ mɛnn péé-ho yɛ̀di è púsí tɔmú. Ò kṵnti-má-ní, é m'patì-ní hɔ̰́ɔ̰̀ta, ò you kà kà̰ǹkà̰ǹti dawòni toó, kà nìpa hɔu. ²⁶ K'ó yíí deho òcɔ̰́ óò béka mìì pa̰kú-sa. ²⁷ K'yèe deho óò tɛ̰́ná è yɔ̀: A ya̰ǹta-dà koní, k'àa báàa é kɔ̀ù ye naàdapàni fɔ̰̀ǹfɔ̰̀ni ti de hḭ́ḭ́-di, mìì tee-sá òò dɛ́hà nà wɔ̰̀ǹkpeèti. ²⁸ Ye wɔ̀ni, kà fɔ̰́ɔ̰́di é cɛ̰ɛ̰́ ye pɔ̀ɔ, k'ó yeda hɔ̰́ɔ̰̀ta dúú-pu. K'òo báàa é yɛɛ̀ni é tɛ̀n'ɔ́ɔ̀ sɛ́uka è yɔ̀ ó dúú. ²⁹ K'ó caka o báàa è yɔ̀: Á cɔ́ɔ́-ho beeká dɔ́ɔ́di dɔ́ɔ́di m'a deháà-ka, n mɛ̀ɛ mum pú yedáà daadí yènì a wɛnùdi nìcɔ̰́nì. Nà mɛma, bá bɔbíisá a mum pú n pɛ̰ḭ è yɔ̀ ń dii kúúdi nà n dóòpa. ³⁰ Àmá, a bíimɔ́ntá há̰ koní-ma-ní è sèhènà-ní a káma poyáyáhí pesá, a pú tà kɔù ye naàdapàni fɔ̰̀ǹfɔ̰̀ni ti de hḭ́ḭ́-di? ³¹ Ye wɔ̀ni, k'òo báàa óò tɛ̰́ná è yɔ̀: N bidà, fɔ̰́ń n péé-nà-á-ma daàka wɛǹni, n káá-sà wɛnnì yòǹ a kpɛ́ɛsá-dà. ³² Yè békú-ma tí pa̰á̰ kúúdi é nì yà̰ǹkà nà yaǹnaakú mìì tee-sá, a ya̰ntà mɛntà de kpíi-í-ma é tṵ́má foùda-ní, tà de fée-é-ma ká n tṵ́má tà dɛ́tá.