Dúkì 17

Sḭ̀ḭ̀ma pa̰á̰ma nà tɔɔ̀pa sḭ̀ḭ̀ma bútáma.

Dentá Màtíyéè 18.7-6, 21-22; Mádíkì 9.42

¹ Kà Sèsíì é caka o dapàm̀ma è yɔ̀: Pa̰á̰ma pú kó mɔ́ńka, mɛ̀mà kó n'tee-má kà nìdo é dɔdi sḭ̀ḭ̀ma mɛhɛká. Àmá, náńkú é m'péé-nà mɛ̀ǹǹ kó n'tee-kó k'yèe kú pa̰á̰mà é pa̰ná. ² Kà pà de cemà ò yínà tá̰a̰sàku o fɔ̰̀ɔ̰kú, òò ká̰ńtà dàmɛ́dì mɛhɛká, ye kpɛ́ɛmá tɔ̰ṵ, nà w'aa dúùu-má yaǹyɔ̀kàm̀pa p'oòcɔ̰́ sḭ̀ḭ̀ma mɛhɛká. ³ Pa̰á̰-nà yɔkàma nɛ cɔ̰́ɔ̰̀di hḭ́ǹka!

K'àa kúcàa a yetà-nà, ò caka sukú è yɔ̀ ò pa̰à̰-sà pú coó. K'ò bantà o sḭ̀ḭ̀ma, k'á bútá w'àà pa̰à̰-sa. ⁴ K'òà yetà-nà cɔ̀ku màyehì weǹtṵ́nní nìcɔ̰́ mɛhɛká, è tóǹ-ní ye ma yehìkà a pesá è bahiní o yetádi, k'á bútá-ho o sḭ̀ḭ̀ma.

Dandaní kó nɛɛ́ pa̰á̰-ma pɔ́ńtápa̰á̰ma.

⁵ Kà Teó tɔntɔndipá óò caka è yɔ̀: Ti tɔhɛ̀na dandaní.

⁶ K'ó pà tɛ̰́ná è yɔ̀: Kà nɛ dandaní cɛ̰́hímú sá̰à̰-nà kṵ̀ǹsɔ̰̀pu bíifá, nɛ kó nɛɛ́-ma é caka tesàpù mɛmù è yɔ̀: Fikàda é taá dɔdi dàmɛ́dì mɛhɛká, mù kó pa̰á̰-ma nɛ hḭ́mpú.

Núndeho mɛ̀ǹǹ pú ceí-ko cóńtàma

⁷ K'yè yònà n'ɔɔ̀cɔ̰́ǹ káá núndeho k'òò dɔ̀dì o yɛ̀di yoo è cɛ̰nti o nɔtí, k'yèe núndeho koní yɛ̀di, ò k'óò caka-á-dà è yɔ̀: Ya̰ní fem̀ma é dii? ⁸ Ṵ́ṵ̀! Ò múńtà k'óò caka-á-ma è yɔ̀: N béná dipú, k'à yɔ̀a k'á cehèna nɛǹti é n pa̰á̰ dipú ká n dii, é yà̰à̰. Ye kú dàhàka-dà a mɛ̀ɛ té kó nɛɛ́-ma é dii é yà̰à̰. ⁹ Ò kó sɛda-á-dà ye núndeho n'ɔ̀ɔ̀ pa̰à̰-ma tɔmú pà de hḭ́n ó pa̰á̰-pu? ¹⁰ Ma cɔ̰́ɔ̰̀di-dà nà nɛ́na. Kà nɛ té pa̰à̰ pà hḭ́n nɛ́ pa̰á̰-sa wɛǹni è yɔ̀ɔ, kà nɛ́ n'yɔ̀: Ti yòǹ núndehèpa mɛ̀m̀pà pú sànà-pa cóńtàma, ti pa̰à̰ ti yònà é pa̰á̰-sa-dà sá̰à̰di.

Sèsíì kpekànà kɔ̰̀m̀ma píta

¹¹ Kà Sèsíì é n'kɔ́dí Sèdìsàdɛ́m̀ bɛ́ka, é yɛ̀ɛ̀ Sàmàdíì nà Kàdìdéè ye teǹka peèku-sá. ¹² K'ó m'patì yɔbíisá yècḭ́ḭ̀, kà kɔ̰̀m̀ma píta é yíí-ní o peètanàpu. Kà pá tɛ̀ni é nɛɛ̀hi nà dɛùma, ¹³ é wɛɛ́ kpeéma è yɔ̀: Ti dakpɛ̰́ǹn Sèsíì! T'a sɛ́úkú-ma, ti kɔń séèma!

¹⁴ Kà Sèsíì é pà n'wáń é pà caka è yɔ̀: Taá é bɛka-nà nɛ cɔ̰́ɔ̰̀di dɔ̀hàdi yam̀ma^a! Kà pá n'kɛ̰hɛdi é kpeka. ¹⁵ P'oòcɔ̰́ dɛ́hà-ma è hɔ̰́tà ò kpekáà, k'ó fitá é n'tóńti-ní, è dùǹti-ní Weèdi kpeéma. ¹⁶ K'ó tɛ̀ni é dɔdi-ho bìbìùdi Sèsíì tàka fɔ̰̀di, óò tɔná. Ye dɔɔ̀o há̰ de yòǹ Sàmàdíì kóoó-dà. ¹⁷ Ye wɔ̀ni, k'óò tɛ̰́ná è yɔ̀: Ye kɔ̰̀m̀ma píta pú kpekáà pa wɛǹni dò? Ye tɔɔ̀pa pàwɔ́ì tá? ¹⁸ Badà tee kà tɔɔ̀pa pú maàhaà é tóní é sɛda Weèdi é n'yònà ye cà̰ǹǹ mɛnǹ hḭmpú?

¹⁹ Ye kú dàhàka, k'óò caka è yɔ̀: Yídá é ka̰há, a dandaní-d'àà fḭ́hìnà.

Sèsíì cakú mìì kó pa̰á̰-sa kà Niìfòùo bíitá é nɛɛ́ tóní.

Dentá Màtíyéè 24.23-28; 37-41

²⁰ Kà Fàdísìpa é béka Sèsíì Weèdi wóòti kó tɛ̀ni tḭ́n daadí.

K'ó pà tɛ̰́ná è yɔ̀: Weèdi wóòti baà pú kó m'pení è foó kà pà tì wáń. ²¹ Pà pú kó n'yɔ̀: Weèdi wóòti péé miì-dà yoo tì péé mɛnkà-dà, è yá̰á̰ Weèdi wóòti yɔ̀ɔ péé-pu-dà nɛ cɔhɔ̀ka.

²² K'ó caka o dapàm̀ma è yɔ̀: Wɔ̀ni pení-ma-ní kà nɛ kó n'kpɛ̀i é dɛ́há Niìfòùo bíitá bá daadí nìcɔ̰́, n'aá bá nì dɛ́há. ²³ Pà kó nɛ caka-á-ma è yɔ̀: Tà péé miì yoo tà péé mɛnkà. Nɛ dá cokapa é taá ka bɛ́ka. ²⁴ É n'yònà tafá hɔ̰́ yikàda-má hḭ́ǹka páàku kùcɔ̰́ háá nà tɔkú k'yè yɔ̀ póí, Niìfòùo bíitá tóní daadí kó n'yòm̀pu-dà. ²⁵ Kà t'àá nɛɛ́ é tóní, yè békáà tá dii náńkú-dà sàma, kà wɔ̀nì mɛnì kú nìpa é tà yeda. ²⁶ Mìì de pa̰à̰-sa Nɔ̀wéè wɔ̀ni, mií-dà kó tṵ́má é pa̰á̰ Niìfòùo bíitá kó tóní tḭ́ń daadí. ²⁷ Nɔ̀wéè wɔ̀ǹku kpɛ́ɛpá de yon-ń-ma, è púsí nayà̰pu, kà daapá tóńkú poòpa, kà nìpa pɔ̰n pa bíipohí daapá, háá daadí Nɔ̀wéè dúú-di nɛ́ɛmá dawɛ́ɛ̀ku mɛhɛká. Ye kú dàhàka, kà nɛ́ɛsṵ́násàku é tɛ̀ni é pà dii pa wɛǹni. ²⁸ Yè mɛ̀ɛ té kó wáńtá é n'yònà Dɔ̀ɔ́tì wɔ̀ni yòm̀pu-dà. Nìpa de yon-ń-ma, è púsí nayà̰pu, è don, è yɛdí, é bɔdì diití, é yíí è madì hɔ̰́ɔ̰́hí. ²⁹ Àmá, Dɔ̀ɔ́tì yɛ̀dì tḭ́ń daadí Sòdɔ́mù mɛhɛká, kà ha̰yɔ̰́kamú tafá nà ha̰mú é dɔɔ-ní nà hḭ́ǹka é pà dii pa wɛǹni páí. ³⁰ Yè kó n'yòǹ mɛmá-dà, mmí Niìfòùo bíitá kó fodá tḭ́ń daadí nà n nɔɔ̀ti.

³¹ Ye kú daadí, kà nìi péé hɔ̰́ɔ̰mùm̀mùǹta hḭ́ǹka, k'òo nɛǹti péé ta mɛhɛká, ò dá cútá-ní è yɔ̀ ò kó dúú é tì tódá. K'yè mɛ̀ɛ hɔ̰́tà nìi péé yɛ̀di, ò dá koní hɔ̰́ɔ̰̀ta. ³² Nɛ́ deǹta Dɔ̀ɔ́tì poòo^b kpɛ́mú. ³³ Mɛ̀ǹǹ kó n'kpɛ̀i-kó é fḭ́hìna o fòùmu, ò kó mù féná-ma. Kà mɛ̀ǹǹ mɛ̀ɛ mù fénà-ko, ò kó wáńtá mù dɛ́tá-ma. ³⁴ N nɛ cakú-ma: Ye kú yèǹka, nìpa pàdɛ́ɛ́ kó n'dɔɔ́-ma dɔɔdí nìcɔ̰́ kú hḭ́ǹka, kà pá tódá òcɔ̰́ é hédá tɔɔ̀o. ³⁵ Kà poòpa pàdɛ́ɛ́ é pɛ́ɛ́ é n'naǹ, kà pá tódá òcɔ̰́ é hédá tɔɔ̀o. [ ³⁶ Daapá pàdɛ́ɛ́ kó n'dehú-ma yɛ̀di mɛhɛká, kà pá tódá òcɔ̰́ é hédá tɔɔ̀o.]^c

³⁷ K'òo dapàm̀ma óò béka è yɔ̀: Mii kó pa̰á̰ yaà bɛ́kà-dà, ti Teù?

K'ó pà tɛ̰́ná è yɔ̀: Nɔkpíìta dɔɔ́-sa, yòti peèku-sá-dà.