Anyaarubha a yimbërë e Bhawuro gho
Timotewo
Obhukangati
Anyaarubha ino ꞉yaandëkuru na Bhawuro omotomu o Yesu Kirisito (1:1). ꞉Naamwandëkiire omooto umu o mo‑moghya o Risitura eriina reeche Timotewo. Ishe Timotewo m‑Moyunaani are, na nyina m‑Muyahuuti are (mööhi Amaköri gha Bhatomu 16:1). Timotewo ꞉naatooriibhu gho kohetera emeremo ghe Bhawuro, nikyo Bhawuro akomobherekera kubha, “Omoona waane o muhëënë mo‑bhokumi” (1:2). Timotewo ꞉naaghöötiine na Bhawuro mo‑meremo ghe kuraghani Angʼana Anchömu ighoro e Yesu Kirisito (mööhi Amaköri gha Bhatomu 17:14–15, 18:5). Nekorighibhu kubha, Bhawuro ꞉naandëkiri anyaarubha ino mo‑mooka o 65 korwera hano Yesu Kirisito ibhoriiru. Hano Bhawuro are akeere koyandëka anyaarubha ino, ꞉naamoheere Timotewo emeremo ghe kwimeererera abhakumi mo‑moghya o Ebheeso (1:3).
Kino ꞉ghiighëriri Bhawuro akayandëka anyaarubha ino, ꞉nëëndiri komobhoorera Timotewo kinya bhuno ekwëndëru kwahura na kweghi abhagharuka bha riikanisa na amashemaasi. Bhawuro ꞉nëëndiri kubha, Timotewo na abhagharuka bhayo bhabhe bhaghöröröku, na abheeghi obhuhëënë na atëëmö anchömu kwo bhakumi. Wiiki, ꞉nëëndiri komobhoorera Timotewo kubha, abhe eghetuubhaani ghichömu mo‑bhaato bhoose (4:12). Angʼana ayende, ꞉nëëndiri komwërëkërëri Timotewo kebhuno akobhatoori abhakumi mo‑maköngʼu ghano ꞉ghaare‑ho. Na abhe na changuru kwanga ameeghi ghoose gha bhuröngö (1:3–7, 4:1–5, 6:3–5).