Amaköri gha Bhatomu 16

Bhawuro ˆakamwimoki Timotewo bhabhe bharaghëndani

Bhawuro aghaye mo‑meghya ghe Teeribhe na Risitura. Iyo Risitura naare‑ho omoonamwegha umu o Yesu, eriina reeche Timotewo. Nyina Muyahuuti are, woose naare amokumiri Yesu, amare ishe m‑Moyunaani are. 2 Timotewo naare na ghongo inkoro ghate e bhakumi bhaghëndi bhaache iyo Risitura na Ikoniyo. 3 Bhawuro ꞉nëëndiri kubha bhaghëndani haghirohamu na Timotewo uyo mo‑rughëndö rooche, na gho kubha Abhayahuuti bhoose bha iyo ꞉mbaamënyiri kubha ishe m‑Moyunaani are, eghaghëri akamusaara. 4 Akamara Bhawuro na abhaghëndi bhaache bhaaghaye kohetera mo‑meghya ghe iyo, bhaakabha bharamënyi Abhakirisito amaraghereri ghano ghatooruru na bha Yesu na abhagharuka bha riikanisa re , kubha Abhakirisito bha iyo bhoose bhaghaghöötë. 5 Hangʼu niho abhaato bha makanisa ꞉bhëëndëriire ghuköngʼëri mo‑bhokumi. Ekirëngërë ke Bhakirisito nkeere keriyëngëra chaasiko choose.

Bhawuro ˆakarighi amarighi ighoro e mooto o Maketoniya

6 Bhawuro na abhaghëndi bhaache bhayo, neere ebharëkiri kubha bhataacha kuraghani angʼana e Ryobha mo‑mukööwa o Asiya. Gho ghayo, bhakaheta mo‑mikööwa ghe Bhirighiya na Gharatiya. 7 Hano bhahikiri mo‑robhebhe ro ghusöha mo‑mukööwa o Miisiya, bhaghasaki ghusöha mo‑mukööwa o Bhitiniya amare Akörö Ahörëëru e Yesu tebhiishereriiri. 8 Gho ghayo, bhakaheta Miisiya, bhaaghaye mo‑moghya o Torowa.

9 Obhotiko Bhawuro akarighi amarighi. Mo‑marighi ghaache ghayo, akarighi omooto umu imeeriire mo‑mukööwa o Maketoniya aramusasaama chwee arabhugha, “Tëënya uche ino, otusakeri.” 10 Hano Bhawuro amariri korighi amarighi ghayo, niho toghasëëma ghuye Maketoniya, gho kubha ntorooche kubha Eryobha ndetobherekiire kubha tumënyi abhaato bha iyo Angʼana Anchömu.

Riitiya ˆakamokumi Yesu

11 Mbe, tookaru hayo Torowa no obhwato, tooghaye kimu kimu mbagha mo‑gheghinga ghe Samotiraake. Atabhoori yaache hano bhookiire, toghaköra orughëndö no obhwato tokahika mo‑moghya o Neyabhoori. 12 Koru hayo, tooghaye mbagha mo‑moghya o Bhiribhi, niwe omoghya o mumbërë mo‑bhokoro mo‑mukööwa o Maketoniya, na niwe omoghya uno Abharuumi ꞉bhaare bhariikara. Toghiikara hayo chaasiko nyarebhe.

13 Orosiko ro tooghaye anche e kehita ke moghya uyo, haghuhe no orooche, ahaghiro hano toore toriitëngʼëra kubha ntokubhöna ahaghiro ha ghusabha Eryobha. Hano tohikiri hayo, tokabhöna abhakari bhikomiine‑ho, toghiikara haghirohamu nabho, tokabhabhoorera ighoro e Yesu. 14 Umu o bhakari bhayo ꞉bhaare bharatutëghëërëra, naare aruure mo‑moghya o Tiyatira, eriina reeche Riitiya. Riitiya uyo naare omosorocha o maghööti amachömu gha sambaraawe, wiiki naare araresooka Eryobha. Hano Bhawuro abhamënyiri Angʼana Anchömu iyo, Omutëmi aghiighora omotema o Riitiya mbagha aghakumi. 15 Niho akabhatiisu haghirohamu na abhaato bha mo‑ka yaache, aghatusasaama akabhugha, “Aribha mokarighi kubha eni woose hëënë nemokumiri Omutëmi, ˆnekabhaghënëhi awaane, mwikare.” Aghatuhënërëra chwee tooghaye.

Bhawuro na Siira ˆbhaghaghöötu

16 Orosiko rumu, hano toore toraghe ahaghiro hano abhaato ꞉bhaare bharasëngërëra Eryobha, toghatëmëërana no omubhaghati umu uno are no omusambu o bhotoro bho kuraghura. Omuukë uyo naare no omusambu uno ore oramusakeri kubhöna chambiiri kwo bhuraghori bhooche. Gho kohetera iwe abhaame bhaache mbaare bharabhöna chambiiri chaaru chwee. 17 Ibheere omuukë uyo, akabha aramutambana Bhawuro na niitu, ino araköra eriireghe arabhugha, “Abhaato bhano n‑abhatamishi bha Ryobha Omokoro o Bhyose. Mbakobharaghaneri inyu anchëra e ghotooribhu.” 18 Akabha araköra hangʼu gho chaasiko chaaru. Antenero, Bhawuro aghakarara chwee, aghiishoorori akamumööhërëri omuukë uyo, akawobhoorera omusambu uyo ore moose yaache akabhugha, “ˆNeghakuhatëka kwo riina re Yesu , omoru omuukë uno!” Hayo hayo omusambu uyo okamoru.

19 Niho abhaame bha muukë uyo, hano bharooche kubha eriitëngʼërö reebho re kubhöna chambiiri reghasira, bhakabhaghööta Bhawuro na Siira, bhakabhangʼuura mbagha mwibharacha ambërë e bhakoro bha moghya, bhakabhasëma mo‑bhateni bha kiina. 20 Bhakabhabhoorera abhakangati bhayo bharabhugha, “Abhaato bhano n‑Abhayahuuti, mbaghuköra anyööri mo‑moghya wiito! 21 Wiiki mbakobhoorera abhaato kubha, bhatambane chaasughara cheebho. Ne emeghiro ghiito itu Abharuumi ghetaaghotwisherereri kubha tochekumi, koru ghochitambana.”

22 Mbe, erikinda re bhaato bhayo ꞉bhaare bhiikomiine hayo bhaaghaye kwo bhororo o‑Bhawuro na Siira. Abhakangati bhayo bhakabharuusi Bhawuro na Siira amaghööti ghaabho gho changuru, bhakahatëka kubha bhatëmu chasaanyi. 23 Hano bhamariri kobhatëma chwee, bhakabhatoora mwighërëcha bhakamobhoorera omochongi o riighërëcha riyo abhachonge bhoheene. 24 Kurëngʼaana na amaraghereri ghayo omochongi uyo akabhasöhi mo‑kenyumba ghe ghateghate, akabhabhöha amaghoro ghaabho ne eminyörörö mekoro.

25 Hano ehikiri obhotiko bho ghate, Bhawuro na Siira bhaakabha bhararisabha Eryobha na koryembera emyembo ghe koreghongi. Abhabhöhu bhaghëndi bhaabho, mbaare bharatëghëërëra. 26 Hayo hayo hakarwera omorighito mokoro o se, oghasingisi obhoroso bho nyumba iyo e bhabhöhu, niho charwighe choose cheekabha cheriighoka echeene ne eminyörörö ghyose ghino ꞉bhaare bhabhabhöhiri abhabhöhu bhayo gheghasaasuka! 27 Omochongi uyo o riighërëcha riyo, akabhooka. Hano arooche kubha charwighe nchiighokiri, aghasöhöra ekinyamiino keeche arëënda kwiyita, gho kubha naare ariihëëbha kubha abhabhöhu bhayo mbangʼosiri bhoose. 28 Amare Bhawuro aghatiiri eriiraka reeche akamobhoorera akabhugha, “Otiyita! Itu bhoose niho toonyi!”

29 Hayo hayo omochongi uyo aghatomani ebhemore bhirëëtu. Ebhemore hano bhirëëturu, aghasöha mo‑nyumba iyo, akabhuna ebheru ambërë e maghoro gha Bhawuro na Siira ino arasingisa kwo bhotiini. 30 Akamara akabhahoroki anche, akabhabhoori, “Oo abhasooku bhaane, nekwëndëru nikörë bhu nibhönë ghotooribhu?”

31 Bhakamugharokeri bhakabhugha, “Omokumi Omutëmi Yesu, niho oghotooribhu haghirohamu na abhaato bha mo‑ka yaacho.” 32 Niho Bhawuro na Siira bhakamweghi omochongi uyo Angʼana e Mutëmi, haghirohamu na abhaato bhoose bhano ꞉bhaare mo‑ka yaache. 33 Obhotiko bhuyo bhuyo, omochongi uyo akabhiishaabhi Bhawuro na Siira amaghaati ghaabho. Akamara akabhatiisu iwe na abhaato bhaache bhoose. 34 Achekumara akabhahira Bhawuro na Siira awaache, akabhaha ebhiinyakurë. Aghachömëru chwee haghirohamu na abhaato bhaache bhoose, gho kubha ibheere ˆbhakarekumi Eryobha.

35 Hano bhookiire, abhakangati bha moghya bhaghatoma abhatoorereri bhaabho kwo mochongi uyo o riighërëcha, bhamobhoorere kubha, “Obhatighooroke abhaato bhaare.” 36 Omochongi uyo hano abhooriiru ghayo, akamobhoorera Bhawuro akabhugha, “Abhakangati mbantomiire abhaato kubha nebhatighooroke. Gho ghayo, mohoroke mughëndë kwo murëmbë.”

37 Bhawuro akabhabhoorera abhatoorereri bhayo akabhugha, “Kana mobhughabhu? Mbatutëmiri kwo bhororo ambërë e bhaato ino bhatatoteniire kiina, na niitu n‑abhiikari bha Ruumi toonyi! Bhaghatotoora mwighërëcha. Kana ibheere mbakwënda ghototighooroka gho kobhisa? Tiyaanyi! Motighe bhatohoroki ibho abheene!” 38 Abhatoorereri bhayo bhakabhabhoorera abhakangati ghayo ghoose. Abhakoro bhayo, hano bhooghwire kubha Bhawuro na Siira n‑Abharuumi, bhaghaghöötu no obhotiini chwee. 39 Gho ghayo, bhaaghaye kobhasasaama, bhakabharuusi mwighërëcha, bhakabhasabha kubha bharu hayo mo‑moghya waabho.

40 Bhawuro na Siira, hano ꞉bhaare bhahörökiri mwighërëcha, bhaaghaye o‑Riitiya. Bhaghiikomana muyo na Abhakirisito bhaghëndi bhaabho, bhakabhatoora omukörö. Niho bhakamara bhaaghaye.