Anyaarubha e Bhawuro kwo
Bharuumi
Obhukangati
Anyaarubha ino e Bharuumi ꞉yaandëkuru no omotomu Bhawuro (1:1). Hano Bhawuro akwandëka anyaarubha ino, naare akeere ghutaarera omoghya o Ruumi (1:13–15). Abhakirisito bhayo bha Ruumi mbaare Abhayahuuti haghirohamu na abhaato bha matöngö. Bhawuro ꞉naandëkiri anyaarubha ino kubha eghi Abhakirisito bha iyo kumanya kwo bhokumi, na kumënya amangʼana amaköngʼu ghano ghaghotora kobhabhöna kurëngʼaana no obhokumi bhuyo.
Mo‑nyaarubha ino, Bhawuro nakweghi kubha neenyi‑ho anchëra imu hangʼu e bhotoori, na anchëra iyo n‑gho kohetera Yesu Kirisito. Ekebhune eghekoro ke mwandëki, nkeenyi mo‑mangʼana ghano ghakobhugha,
Eni nteekorighi chaasoni kuraghani Angʼana Anchömu iyo, gho kubha nibho obhotoro bho Ryobha bhuno bhoghotoori abhaato bhoose bhano bhakomokumi Yesu, korwera mo‑Bhayahuuti mbagha mo‑bhaato bha matöngö. Angʼana Anchömu iyo nekwërëki haheero kinya bhuno Eryobha rekubharera abhaato kubha abhahëënë ambërë yaache. Abhaato mbakubhareru kubha abhahëënë ambërë e Ryobha gho nchëra e ghokumi okwene (1:16–17).
Haghirohamu na ghayo, Bhawuro nakwërëki haheero kubha obhotoori bhuno toghotora ghosongʼaana n‑gho kohetera anchëra e Yesu Kirisito omwene, mboghotusakeri kumanya eriimanya re ghotegheri Eryobha (Eghisëku ghi 12—15).