Anyaarubha a yimbërë e Bhawuro kwo
Bhakorinto
Obhukangati
Anyaarubha ino ꞉yaandëkuru na Bhawuro, omotomu o Kirisito Yesu (1:1). ꞉Naandëkiri anyaarubha ino kwo riikanisa rino reere mo‑moghya o Korinto (1:2). Bhawuro niwe ꞉asëëmiri eriikanisa riyo (Amaköri gha Bhatomu 18:1–8; 1 Abhakorinto 3:10–11). Nekorighibhu kubha anyaarubha ino ꞉yaandëkuru mo‑mooka o 54 korwera hano Yesu Kirisito ibhoriiru. Anyaarubha ino ꞉naayaandëkiri anyi mo‑moghya o Ebheeso.
Omoghya o Korinto numënyuru chwee mo‑se e Bhoyunaani na mo‑bhukangati bhoose bho Keruumi. Abhaato bha iyo mbaare na chaasughara che manga haghare haghare, kinya ghusabha na ghusëngëra chasanaamu che misambu. Chaasughara chiyo ꞉nchiiköriri Abhakirisito bhaange kumënya ino bhaaghuye nayo mo‑bhokumi bhoobho na komobhoori Bhawuro ighoro e amangʼana haghare haghare ghano bhatëmëriine nagho (7:1).
Amënda gha nyaarubha ino, Bhawuro nëëndiri koruusi amëërëkërëri ighoro e mangʼana ghano are oghwire koru mo‑Bhakorinto. Gho ghayo ꞉naabhaandëkiire Abhakirisito kebhuno bhakwëndëru kumanya omooto na mukaache. Wiiki ꞉naaruusiri amëërëkërëri ighoro e masabhi, ne ebhihaano bhe Körö Ahörëëru na koryoka kwo bhaku.
꞉Naandëkiri ghayo koretoori eriikanisa re Korinto, kubha retasancha.