1 Abhakorinto 1

Anyaarubha a yimbërë e Bhawuro kwo

Bhakorinto

Amakëërani

Anyaarubha ino neyandëkiri eni Bhawuro, uno nebherekiiru kubha o Yesu , kwo mënda gha Ryobha. Eni no omohiiri wiito mo‑bhokumi Sositene, 2 ntokobhakëëri inyu abhaato bha riikanisa re Ryobha bhano moonyi mo‑moghya o Korinto. Eryobha ndebhahwire gho nchëra e Kirisito Yesu na kobhabherekera mubhe abhaato bhaache. Ntokobhakëëri inyu haghirohamu na abhaato bhoose bha chambaara choose bhano bhakomusabha Yesu Kirisito, uno niwe Omutëmi waabho no Omutëmi wiito itu bhoose.

3 Ntököbhëëndëra aghareeya no omurëmbë koru kwo Waryobha Taata wiito, na kwo Mutëmi wiito Yesu Kirisito, ghibhe haghirohamu na niinyu.

Amiitabheri gha Bhawuro kwo Waryobha

4 Nekoriitabheri Eryobha eriibhagha ryose gho ghiri yaanyu, gho kubha ndebhaheere aghareeya ino gho nchëra e Kirisito Yesu. 5 Gho ghughöötana koonyu na Kirisito mubheere no obhwame bho kira gheghiro, ahanene mo‑maghamba ghaanyu na kwo bhumënyi bhoonyu. 6 Ghano ngakwërëki kubha amangʼana ghano tobharaghaniiri ighoro e Kirisito n‑gha hëënë. 7 Ibheere motaaghotora ghosuuheru koru hasuuhu ekihaano ghe Körö Ahörëëru, hano mookubha moraghanya kwo miigha ghugharuka kwo Mutëmi wiito Yesu Kirisito. 8 Iryo ndekobhaköngʼi mbagha mo‑ntenero kubha motaacha kubha ni isörö, orosiko ruure Omutëmi wiito Yesu Kirisito akuucha ghotenera ekiina abhaato. 9 Eryobha ndeghuköra ghayo gho kubha n‑ihëënë. Iryo niryo rebhabherekiire inyu, mubhe no obhumu no Omoona waache Yesu Kirisito, Omutëmi wiito.

Obhumu ghate e bhakumi

10 Ibheere, bhahiiri bhaane, nekobhasasaama kwo riina re Mutëmi wiito Yesu Kirisito kubha, motabha moraheteerana mo‑maghamba. Motaanga kubha no obhoghwani ghate yaanyu, amare mubhe bhamu mo‑ghano mokwënda na mo‑ghano mokwihëëbha. 11 Bhahiiri bhaane, abhaato nyarebhe bha mo‑nyumba e Kiroowe mbambooriire kubha bhotaanyi‑ho obhoghwani ghate yaanyu. 12 Ibheere, ghano nekwënda ghosiikëra nigho ghano, kubha, omooto woose ghate yaanyu naghosiikëra ghaghaache, umu nakobhugha kubha, “Eni n‑o Bhawuro.” Owonde nakobhugha kubha, “Eni n‑o Abhooro.” Owonde nakobhugha kubha, “Eni n‑o Keebha.” Owonde nakobhugha kubha, “Eni n‑o Kirisito.” 13 Kana, Kirisito nanungukiine? Kana, Bhawuro niwe amamburu mo‑musarabha gho ghiri yaanyu? Kana, mubhatiisuru kwo riina re Bhawuro?

14 Nekoriitabheri Eryobha, gho kubha ntemubhatisiri omooto wowoose ghokoonyu, nanyinga Kirisibho na Ghaayo. 15 Gho ghayo, taanyi‑ho uno aghotora kobhugha kubha nabhatiisuru kwo riina reene. 16 ˆNekahiita ibheere kubha ꞉niibhatiisiri wiiki Siteebhana na abhaato bha mo‑ka yaache. Amare ghokera ghayo, ntyeche aribha ꞉niibhatiisiri omooto owonde wiiki. 17 Kirisito tantomiri eni kubhatiisa abhaato, amare nantomiri kuraghani Angʼana Anchömu. Tantomiri kuraghani gho ghwitëngʼëra amangʼiini ghaane gha ghosiikëra bhoheene, kubha oroko ro Kirisito mo‑musarabha rotabhori changuru cheeche.

Kirisito niwe changuru na amangʼiini gha Ryobha

18 Angʼana e roko ro Kirisito mo‑musarabha n‑e ghighëëghë kwo bhaato bhano bhakobhora, amare ghokwito itu bhano toghotooribhu, angʼana iyo n‑changuru che Ryobha. 19 N‑kinya bhuno yandëkuru mo‑Mandëkö Amatööbhiyu kubha,

“Abhaato bhano bhaanyi na amangʼiini,

neghusari amangʼiini ghaabho.

Abhamënyi nekobhute kurë haare obhumënyi bhoobho.”

20 Ibheere hayi bhaanyi bhano tookobhugha kubha mbaanyi na amangʼiini? Hayi bhaanyi bhano tookobhugha kubha n‑, koru abhaato bhano bheeche kuhakaana bhoheene chaasiko chino? Eryobha ndyërëkiri haheero kubha amangʼiini gha bhaato bhano bhataryeche, n‑gha ghighëëghë. 21 Neghosiikëra hangʼu, gho kubha, Eryobha kwo mangʼiini ghaache, ꞉ndiihatëkiri kubha abhaato bhataaghotora korimënya gho nchëra e mangʼiini ghaabho abheene. Amare Eryobha ndesiighiri kobhatoori bhano bhakorekumi gho nchëra e ngʼana ino tokuraghani. Angʼana iyo, abhaato bhano bhataryeche Eryobha, mbakoyerighi kubha n‑e ghighëëghë. 22 Abhayahuuti mbakwënda ebhyërëkërëri koru Mwishaaro kubha bhakumi, na Abhayunaani mbaghutabhara amangʼiini gha bhaato. 23 Amare itu, ntokuraghani angʼana ighoro e Kirisito uno amamburu mo‑musarabha. Angʼana iyo nekobhakarari Abhayahuuti, na kwo bhaato bha matöngö no obhughëëghë. 24 Amare ghokoobho bhano Eryobha rebhabherekiire kubha abhaato bhaache, bhabhe Abhayahuuti hamu Abhayunaani, Kirisito niwe changuru na amangʼiini gha Ryobha. 25 Nekobhugha hangʼu, gho kubha amangʼana ghano abhaato bhakorighi kubha n‑obhughëëghë bho Ryobha, ngaanyi na amangʼiini ghokera amangʼiini gha bhaato. Na amangʼana gha Ryobha ghano bhakorighi ghataanyi ni inguru, ngaanyi na changuru ghokera che bhaato.

26 Ibheere, bhahiiri bhaane, mohiite kebhuno moore eriibhagha rino mobherekiiru ne Eryobha. Kwo miihëëbhö gha bhaato, abhaaru ghate yaanyu mobherekiiru motaanyi na amangʼiini. Wiiki abhaaru ghate yaanyu motaare mumënyëkiine, koru motibhwiru mo‑chaaka chino cheenyi na asooko. 27 Amare Eryobha ndeghahwire amangʼana ghano ghakorighibhu n‑gha ghighëëghë kwo bhaato bhano bhataryeche, kubha rebhasooki bhano bhaanyi na amangʼiini. Wiiki Eryobha rekaahura amangʼana ghano abhaato bhano bhakorighi kubha ghataanyi ni inguru, kubha rebhasooki bha changuru. 28 Wiiki Eryobha ndyahwire amangʼana ghano abhaato bhano bhakorighi kubha ghataanyi na asooko, na gha ghutaraahu, na ghano ghatanchakiine, kubha asari amangʼana ghano abhaato bhano bhakorighi kubha nganchakiine. 29 Ndiköriri hangʼu kubha omooto wowoose atiihacha ambërë e Ryobha. 30 Eryobha niryo rekobhaghöötani inyu na Kirisito Yesu. Iryo ndiköriri Kirisito abhe amangʼiini ghiito. Niko kobhugha kubha gho nchëra e Yesu ntobheere bha hëënë ambërë e Ryobha, na ntobheere abhatööbhiyu, wiiki ntoghotingoribhu. 31 Mbe, kinya bhuno yandëkuru mo‑Mandëkö Amatööbhiyu kubha, “Omooto wowoose uno akwihacha, ihache gho ghiri e Mutëmi.”