Kuraghani amangʼana ighoro e Yesu Kirisito
2
Bhahiiri bhaane,
hano niichiri bhowaanyu kobharaghaneri ighoro e kebhisere ke Ryobha,
a ntesiikiire amangʼana kwo bhuchömu hamu kwo mangʼiini ghaane.
2 Eriibhagha neere bhowaanyu,
꞉neesiikiire amangʼana ighoro e Yesu Kirisito omwene chiri,
ahanene oroko rooche runo amamburu mo‑musarabha,
ntyëndiri ghosiikërëra egheghiro ekende.
3 Eriibhagha riyo neere nenyuutiri,
neere na ahaho,
wiiki neere ndasingisa chwee.
4 Eriibhagha neere ndeeghi na kuraghani,
ntesiikiire kwo mangʼiini ghaane,
kubha nebhatebhitebhi abhaato gho kubha na amangʼiini,
amare changuru che Körö Ahörëëru ꞉nchëërëkiri obhuhëënë.
5 ꞉Niiköriri hangʼu,
kubha obhokumi bhoonyu bhotiitëngʼëra amangʼiini gha bhaato,
amare bhwitëngʼërë changuru che Ryobha.
Amangʼiini koru mo‑Körö Ahörëëru
6 Amare itu,
ntoghosiikëra amangʼana gha mangʼiini mo‑bhaato bhano bhaköngʼiri mo‑bhokumi,
amare amangʼiini ghayo ghataanyi gha se ino,
wiiki ghataanyi gha bhakangati bha se ino bhano bhaakoru‑ho.
7 Amangʼiini ghano tokuraghani n‑gha kebhisere ke Ryobha.
Amangʼiini ghayo n‑obhorwachi bho Ryobha bhuno bhoore bhobhisuru mo‑bhaato.
Eriibhagha Eryobha reere rekeere ghutëëma ase,
꞉ndyëëndiri kuhökëri amangʼiini ghayo,
kubha retughöötani mo‑bhokumi bhooche obhokoro.
8 Taanyi‑ho koru umu mo‑bhakangati bha se ino uno amënyiri amangʼiini ghayo,
gho kubha mbangabheere bhaghamënyiri,
bhatangamumambiri mo‑musarabha Omutëmi o bhokumi obhokoro.
9 Amare n‑kinya bhuno yandëkuru mo‑Mandëkö Amatööbhiyu kubha,
“Ghano Eryobha ꞉reebhasëëmiire bhano bharesiighiri,
taanyi‑ho omooto uno are ashamiri ghogharighi
koru ghoghooghu,
taanyi‑ho omooto uno are ashamiri ghoghatoora
mo‑motema waache.”b
10 Amare itu,
Eryobha ndetwërëkiri ghayo gho kohetera Akörö Ahörëëru,
gho kubha Akörö Ahörëëru nehiisuncha ghoose,
koru obhorwachi bho Ryobha bhuno bhobhisuru.
11 Taanyi‑ho omooto uno aghotora kumënya ghano omooto owonde akwihëëbha,
nanyinga akörö yaache ayeene chiri niyo eghotora kumënya.
Hangʼu hangʼu na ghano Eryobha rekwihëëbha,
taanyi‑ho uno aghotora ghoghamënya,
nanyinga Akörö e Ryobha ayeene niyo egheeche.
12 Eryobha ndetoheere itu Akörö yaache,
kubha toghamënyë ghano tuhaabhuru gho ghareeya yaache.
Mbe,
totaakwihëëbha kinya bhuno abhaato bha mo‑se bhakwihëëbha.
13 Wiiki totaaghosiikëra amangʼana ghano tweghuru na amangʼiini gha bhaato,
amare ntoghosiikëra ghano tweghuru na Akörö e Ryobha.
Ntokobhabhoorera amangʼana gha Körö e Ryobha abhaato bhano bhaanyi na Akörö iyo.c
14 Amare omooto uno ataanyi na Akörö e Ryobha,
taaghosongʼaana ghano ghaakoru mo‑Körö e Ryobha.
Ghokooche ghayo n‑gha ghitaraaho,
wiiki taaghotora ghoghamënya,
gho kubha ngakumënyu kwo bhotoorereri bho Körö e Ryobha.
15 Omooto uno aghukangatu na Akörö e Ryobha naghoghiisuncha ghoose,
amare iwe,
omooto wowoose taaghotora komwisuncha.
16 N‑kinya bhuno Amandëkö Amatööbhiyu ghakobhugha kubha,
“N‑niwe uno eche ghano Omutëmi Waryobha akwihëëbha?
Wiiki n‑niwe uno aghotora komorwacha?”
d
Amare, itu abhakumi ntokwihëëbha ghano ghaakoru gho Kirisito.